2 Chronicles 35

Mien Bible (Thai Script) © Thailand Bible Society, 2007

← Chapter 34 Jump to: Chapter 36 →

1โยสิยา เยียม เยลูซาเลม เจี๋ย เสีย แหม่ง ฒิบ เหว่ย ท่าย เฒี้ยว. ฒี่ หฮลา เหฒียบ เฝย วั้ว ฮนอย, นิ่น บัว ไต๋ เจี๋ย ฒิบ เญย ปะกี ยู่ง ตอน.

2นิ่น พ้าย ไซ เมี่ยน, เก๊าะ-เมี่ยน หฒิว เก๊าะ-เมี่ยน เญย กง โหฒว, หย่า ขวิน นิ่น บัว เยียม หฒั่ง เฒี้ยว เญย เปย๊า จอม เฮญี้ยว โหฒว กง ฟู-สู.

3นิ่น ก๊อง บั๋ว เลวี เมี่ยน, เซ ฝูง กั้น เป๋น เฒี้ยว เญย ธีง-เหฑ่ง เมี่ยน, ต้ง หฌาว อิสะลาเอน เญย เหยียด ฒู้ง เมี่ยน, “เฒาะ ธีง-เหฑ่ง เญย แล์ง แหง่ง หว่า ฟาง อัน เจี๊ยน อิสะลาเอน เญย ฮู่ง, ดาวิด เญย ตอน, ซาโลมอน, เหธย ต้าย วั้ว นอม หฒั่ง ทิน-ฮู่ง เญย เปย๊า. ไม้ หฒุ หล่ง บะเต้า แกง มี่ง แกง ต้าย อ๊ะ. อี้ หฒั่น อ๋อย หฒุ ฟู-สู เฒี้ยว, เม่ย บัว เญย ทิน-ฮู่ง, เหธา นิ่น เญย แปะ ฝีง, อิสะลาเอน เมี่ยน.

4เม่ย บัว อ๋อย หฒุ เอย เจี๊ยน อิสะลาเอน เญย ฮู่ง, ดาวิด, เหธา นิ่น เญย ตอน, ซาโลมอน, เฟี้ย เจี๊ยน พ้าย เญย หว่า หลิ่ว เล์ย เหฒียง หฒิว เม่ย บัว เญย ปู้ง ป่วน เป๋น เหยียด กวั้น เหยียด กวั้น เญย.

5“อ๋อย หฒุ โซ้ว เจี๊ยน ธีง-เหฑ่ง เญย ต๋อง, โม์ว กวั้น เลวี เมี่ยน เถง ไม้ เฒ์ย โหฒว ไซ เมี่ยน วั้ว เต๋ย, เซ เม่ย บัว เญย ก๋อ-โย์ว หฒิว นิ่น บัว เญย ปู้ง ป่วน.

6อ๋อย หฒุ ไต๋ เสีย แหม่ง ฒิบ เญย ปะกี ยู่ง ตอน, สา กั้น ธีง-เหฑ่ง ต้าย, เหว่ย เม่ย บัว จวั่ง ฝีง เญย ก๋อ-โย์ว, อิสะลาเอน เมี่ยน, หลิ่ว เล์ย ปะกี ยู่ง ตอน เอย เจี๊ยน เฒี้ยว หล่ง โมเซ พ้าย เญย หว่า.

7โยสิยา ธ้วด ฟิม ปุน เหว่ย เยียม วั้ว เญย โพว-ทง เมี่ยน เจี๋ย เสีย แหม่ง ฒิบ ฝ่ง ห่อ เญย กะน้าย. นิ่น ปุน ปัว หว่าน เต้า ปะกี ยู่ง เหธา ยู่ง ตอน เหธา ปัว ธิน เต้า ง่ง โก๊ว. น้าย เต๋ย เหยียด ฒู้ง เซ เยียม ฮู่ง เตี๋ย เญย ป่วน เฒาะ ธ้วด ต้าย.

8ฮู่ง เตี๋ย เญย เจียน หย่า ธ้วด ฟิม ปุน แปะ ฝีง เหธา ไซ เมี่ยน เหธา เลวี เมี่ยน. กุ๊น หฒั่ง ทิน-ฮู่ง เญย เปย๊า เญย เมี่ยน, ฮินคียา, เสคาลิยา เหธา เยฮีเอน เฒาะ อี ธิน หลัวะ แป๊ะ เต้า ปะกี ยู่ง ตอน เหธา ยู่ง ตอน เหธา ฟาม-แป๊ะ เต้า ง่ง โก๊ว จิว ปุน ไซ เมี่ยน เหว่ย โหฒว เจี๋ย ฒิบ ฝ่ง ห่อ เหฒี่ย เญย กะน้าย.

9แอ๋ง ม่าย เลวี เมี่ยน เญย เปย๊ย เฒ้ย, โคนานิยา, เหธา เซไมอา เหธา นิ่น เญย โย์ว, เหธา เนทันเอน, เหธา ฮาซาบียา เหธา เยอีเอน เหธา โยซาบาด, ปุน ปยา ธิน เต้า ปะกี ยู่ง ตอน เหธา ยู่ง ตอน เหธา ฮม์ แป๊ะ เต้า ง่ง โก๊ว เลวี เมี่ยน เหว่ย โหฒว เสีย แหม่ง ฒิบ ฝ่ง ห่อ เหฒี่ย เญย กะน้าย.

10เจี๋ย ฒิบ เญย เจ๊า-โหล่ว หลิ่ว เล์ย เหฒียง เหฑ่ง, ไซ เมี่ยน โซ้ว เจี๊ยน นิ่น บัว เญย ต๋อง เหธา เจี๊ยน เลวี เมี่ยน หฒิว นิ่น บัว เญย กวั้น ฮนั้ง ฮู่ง เตี๋ย พ้าย นอ.

11เลวี เมี่ยน ฯฒฯ ไต๋ เสีย แหม่ง ฒิบ เญย ปะกี ยู่ง ตอน. ไซ เมี่ยน ฒิบ วั้ว เต๋ย ฑย้าม ต้าย ฟุ เหฒี่ย-ต้อง. เลวี เมี่ยน แมะ ฆอย ปะกี ยู่ง เญย ด๊บ.

12นิ่น บัว เฒาะ ฝ่ง ห่อ ปั๊ว เหฒี่ย เญย แซง-คู้ เหว่ย จิว ปุน โพว-ทง เญย เมี่ยน หฒิว นิ่น บัว เญย ปู้ง ป่วน เญย กวั้น, ฮนั้ง เฟี้ย เจี๊ยน โมเซ เญย โซว ฝ่ง ห่อ ปุน เฒี้ยว. ง่ง แอ๊ะ, นิ่น บัว ฟี่ ฮนั้ง เญย โหฒว.

13นิ่น บัว เอย เจี๊ยน เล์ย หล่ง โต์ว ฒิ เสีย แหม่ง ฒิบ เญย ปะกี ยู่ง ตอน, แอ๋ง เฒาะ ฝ่ง ห่อ วั้ว เต๋ย ธีง-เหฑ่ง กะน้าย หล่ง ต้ม แธง, ต้ม แธง-ลอ เหธา ต้ม แธง-เบ้ย โฒ้ว หย่า เซี้ยบๆ เญย ฝูง มี่ง ปุน หฒวัง เมี่ยน.

14ฆะฮ้า นิ่น บัว เหว่ย กั้น หย่า เหว่ย ไซ เมี่ยน หลิ่ว เล์ย เหว่ย หฒุ ไซ เมี่ยน, ต้ง อาโลน เญย เฒ้ย-ฟุน, ปั๊ว วั้ว เต๋ย ฝ่ง ห่อ ปั๊ว เหฒี่ย เญย กะน้าย เหธา เฮมย เถา ลู่ง ม์วน หฒั่น. เลวี เมี่ยน ฯฒฯ เหว่ย กั้น เหธา อาโลน ไซ เมี่ยน เญย เฒ้ย-ฟุน หลิ่ว เล์ย.

15ป๋าว ฑูง เญย เมี่ยน, เซ อาสาบ เญย เฒ้ย-ฟุน, หฒิว ดาวิด, อาสาบ, เฮมาน เหธา เถง ฮู่ง เตี๋ย ก๊อง ฒิ่น โฮ์ หว่า วั้ว เต้า เยดูทูน, พ้าย เญย หว่า เยียม นิ่น บัว เญย ต๋อง. ฒั้ว แก้ง เมี่ยน หย่า ฒั้ว เต้าๆ แก้ง, ไม้ หฒุ กวั่ง นิ่น บัว เญย ต๋อง, เหว่ย หฒุ นิ่น บัว เญย ก๋อ-โย์ว เถง นิ่น บัว หลิ่ว เล์ย เหฒียง เจี๋ย ฒิบ.

16ต้ง วั้ว ฮนอย นิ่น บัว เบ่น เหฒียง เสีย แหม่ง ฒิบ ฟู-สู เฒี้ยว, หย่า เยียม เฒี้ยว เญย เหฒี่ย-ต้อง ฝ่ง ห่อ ปั๊ว เหฒี่ย เญย กะน้าย ฮนั้ง โยสิยา ฮู่ง พ้าย เหฒียง นอ.

17วั้ว หฒั่น เยียม วั้ว เญย อิสะลาเอน เมี่ยน เจี๋ย เสีย แหม่ง ฒิบ หย่า เจี๋ย ไม้ อัน ปี๊ง เญย ฌั้ว เญย ฒิบ เสี่ย ฮนอย.

18เยียม โต่ว หว่า เมี่ยน, ซามูเอน, เญย เฒี่ยง โห่ เถา วั้ว หฒั่น, เยียม อิสะลาเอน ไม้ ตุ๊ ฮนั้ง น้าย นอ เจี๋ย เสีย แหม่ง ฒิบ. เยียม อิสะลาเอน เต่ย-ปูง ไม้ ม่าย เจี๋ย เหยียด เต้า ฮู่ง ฮนั้ง โยสิยา ฮู่ง เหธา ไซ เมี่ยน, เลวี เมี่ยน เหธา เจี๊ยน นิ่น บัว เยียม วั้ว เญย ยูดา เมี่ยน เหธา อิสะลาเอน เมี่ยน, เลี่ยม เยียม เยลูซาเลม เญย เมี่ยน, เจี๋ย เสีย แหม่ง ฒิบ.

19นิ่น บัว เจี๋ย น้าย นอม ฒิบ เซ โยสิยา โหฒว ฮู่ง เหฒียบ เป๊ด หฮญัง วั้ว หฮญัง.

20โยสิยา หลิ่ว เล์ย เหฒียง หฒั่ง ทิน-ฮู่ง เญย เปย๊า ซูง เหฑ่ง, ฆะฮ้า อียิบ เญย ฮู่ง, เนโค, ต้าย เถา ยูเฟติด ด้าย, คานเคมิด วั้ว, เบ๊าะ จ๋า. โยสิยา ธ้วด มี่ง เหธา นิ่น เบ๊าะ จ๋า.

21มป่า เนโค พ้าย กง-โฒ่ มี่ง ก๊อง บั๋ว นิ่น, “โอ ยูดา เญย ฮู่ง อ้า! เยีย เหธา เม่ย ม่าย หาย หญู่ง? เยีย อี้ ฮนอย ต้าย ไม้ เฒ์ย อ๋อย เหธา เม่ย เบ๊าะ จ๋า. เยีย ต้าย เบ๊าะ ต้ง เหธา เยีย เบ๊าะ จ๋า วั้ว เจ๊า เมี่ยน. ทิน-ฮู่ง เห่ว เยีย ก๊าน อ๊ะ. ฮนั้ง หน่าย ตี้ง ม่าะ! ไม้ ตู๋ง ตั๊ง เจี๊ยน ทิน-ฮู่ง เหว่ย หฒุ นิ่น เหธา เยีย เยียม. ไม้ เฒย แอ๊ะ, นิ่น อ๋อย ปุน เม่ย หฒุ เหมียด.”

22มป่า โยสิยา ไม้ คั้ง เล่ย ฆอย นิ่น. นิ่น ฒอง จ๊า เป๋น กั้น เต้า อ๋อย เหธา เนโค เบ๊าะ จ๋า. นิ่น ไม้ หมวัง ทิน-ฮู่ง หล่ง เนโค เญย ฑุ่ย ก๊อง เญย หว่า. นิ่น ธ้วด มี่ง เมกิดโด เญย เดา-แป้ง เบ๊าะ จ๋า.

23ป๊วน จวัง-หฒิน เญย เมี่ยน ป๊วน หฒุ โยสิยา ฮู่ง. นิ่น ฯฒฯ บั๋ว นิ่น เญย โปว, “ต้อ เยีย ธ้วด ม่าะ! เยีย หฒุ เซียง อ๊ะ.”

24นิ่น บัว ฯฒฯ ต้อ นิ่น ธ้วด เบ๊าะ จ๋า เญย เธีย แอ๋ง เปียะ นิ่น เญย ตะเหญ่ย นอม เบ๊าะ จ๋า เญย เธีย ฝูง นิ่น เถา เยลูซาเลม. นิ่น ฯฒฯ เยียม วั้ว ไต่ หมี่ อ๊ะ, หฒัง เจี๊ยน นิ่น เญย อง-ถาย เญย โฒ้ว. ยูดา เหธา เยลูซาเลม เญย หฒวัง เมี่ยน เหว่ย นิ่น เฑ่า เญี้ยม.

25เยเลมี เหว่ย โยสิยา โหฒ่ เฑ่า เญี้ยม เญย หน่าน ฒี่ง ฑูง. เถา อี้ จ๋า ฮนอย ป๋าว ฑูง เญย มจั่ง มเซียะ ป๋าว น้าย เต๋ย หน่าน ฒี่ง ฑูง เหว่ย จั๋ง โยสิยา. ฮนั้ง น้าย โหฒว เยียม อิสะลาเอน เป๋น เล์ย-ฝีง อ๊ะ, หย่า เฟี้ย เจี๊ยน เฑ่า เญี้ยม ฑูง เญย โซว.

26โยสิยา กุ๊น เญย เฒี่ยง โห่ โหฒว เหฒ่ง เหฌี่ย เญย สี่ เหธา นิ่น เอย เจี๊ยน เฒี้ยว เญย เล์ย-หลัด โหฒว เญย คู้ สี่,

27นิ่น โหฒว เญย เหยียด ฒู้ง, เยียม กอน เถา เซ้ด เมว์ย, เฟี้ย เจี๊ยน อิสะลาเอน เหธา ยูดา เญย ฮู่ง โต้ว ตาน.

← Chapter 34 Jump to: Chapter 36 →