2 Kings 1

Kamba (MBIVILIA ŨVOO MŨSEO)

Jump to: Chapter 2 →

1Aavu mũsumbĩ wa Ĩsilaeli amina kũkw'a, andũ ma nthĩ ya Moavi nĩmang'endeie nthĩ ya Ĩsilaeli.

2Ĩvinda yĩmwe, Aasia mũsumbĩ wa Ĩsilaeli nĩwavalũkile nthĩ, kuma valandanĩ ũla waĩ kĩalanĩ kya nyũmba yake ya kĩ-ũsumbĩ, ĩla yaĩ ndũanĩ ya Samalia. Avalũka nĩwaũmĩie mũno. Kwoou nĩwatũmie andũ amea atĩĩ, “Endai mũkakũlye Mbaalinzevuvu, ngai ya andũ ma ndũa ya Ekeloni kana nĩngũvoa.”

3Ĩndĩ mũlaĩka wa Mwĩai Ngai nĩwaneenie na Eliya, mwathani kuma Tisive amwĩa atĩĩ, “Enda ũkomane na andũ ala matũmĩtwe nĩ Mũsumbĩ Aasia na ũimakũlya, ‘Mũendete kũkũlya ũtao vala ve Mbaalinzevuvu, ngai ya ndũa ya Ekeloni nĩkĩ? Mwĩĩka ũu nũndũ mwĩsũanĩa kana nthĩ ya Ĩsilaeli vai Ngai?’

4Tavyai mũsumbĩ mũmwĩe Mwĩai Ngai easya ũũ, ‘We ndwĩvoa kũla ũnaũmĩie; kwa w'o nũũkw'a!’ ” Eliya nĩweekie ũndũ Mwĩai Ngai wamwĩaĩie.

5Andũ asu matũmĩtwe nĩmasyokie kũla kwĩ mũsumbĩ. Mũsumbĩ nĩwamakũlilye, “Mwasyoka nĩkĩ?”

6Nĩmamũsũngĩie mamwĩa atĩĩ, “Nĩtwakomana na mũndũ na atwĩa, ‘Syokai kũla kwĩ mũsumbĩ ũla eĩmũtũmĩte mũkamwĩe: Mwĩai Ngai eũkũlya, ũtũmĩte andũ makakũlye ũtao vala ve Mbaalinzevuvu, ngai ya ndũa ya Ekeloni nĩkĩ? Wĩĩka ũu nũndũ wĩsũanĩa kana nthĩ ya Ĩsilaeli vai Ngai? We ndwĩvoa kũla ũnaũmĩie; kwa w'o nũũkw'a!’ ”

7Mũsumbĩ nĩwamakũlilye atĩĩ, “Mũndũ ũsu mũkomanie nake na amwĩa ũu ailyĩ ata?”

8Nĩmamũsũngĩie mamwĩa atĩĩ, “Mũndũ ũsu eĩkĩĩte ngũa ya kĩthuma kya nyamũ, na eĩyovete mũsivi wa kĩthuma kĩnyunyunĩ.” Mũsumbĩ nĩwaneenie asya, “Mũndũ ũsu nĩ Eliya ũla Mũtisive!”

9Nĩvo ĩndĩ mũsumbĩ watũmie mũtongoi ũmwe wa asikalĩ mĩongo ĩtano, e na asikalĩ mĩongo ĩtano mathi makaete Eliya. Mũtongoi ũsu nĩwambatie na eethĩa Eliya ailyĩ nthĩ kĩĩmanĩ mũthya na amwĩa atĩĩ, “We mũndũ wa Ngai, mũsumbĩ ekwĩaĩa ũthee.”

10Eliya nĩwamũsũngĩie amwĩa atĩĩ, “Ethĩwa nyie nĩ mũndũ wa Ngai, mwaki nũthee kuma ĩtunĩ ũkũae we vamwe na asikalĩ asu maku mĩongo ĩtano!” Vau kwa vau mwaki nĩwatheeie kuma ĩtunĩ wooaa mũtongoi ũsu vamwe na asikalĩ make mĩongo ĩtano.

11Mũsumbĩ nĩwatũmie mũtongoi ũngĩ wa asikalĩ, vamwe na asikalĩ make mĩongo ĩtano kũla kwĩ Eliya. Mũtongoi ũsu nĩweeie Eliya atĩĩ, “We mũndũ wa Ngai, mũsumbĩ ekwĩaĩa ũthee oyu!”

12Eliya nĩwamũsũngĩie amwĩa atĩĩ, “Ethĩwa nyie nĩ mũndũ wa Ngai, mwaki nũthee kuma ĩtunĩ ũkũae, we vamwe na asikalĩ asu maku mĩongo ĩtano!” Vau kwa vau mwaki wa Ngai nĩwatheeie kuma ĩtunĩ, wooaa mũtongoi ũsu vamwe na asikalĩ make mĩongo ĩtano.

13O ĩngĩ mũsumbĩ nĩwatũmie mũtongoi ũngĩ wa asikalĩ mĩongo ĩtano, vamwe na asikalĩ make mĩongo ĩtano. Mũtongoi ũsu wa katatũ nĩwambatie vala Eliya waĩ, na atulya ndu vau mbee wake. Nĩweesũvie Eliya aimwĩa atĩĩ, “Ame mũndũ wa Ngai, mbĩw'ĩe tei nyie vamwe na asikalĩ aa mĩongo ĩtano nĩ namo. Ndũkatume tũkw'a!

14Ala atongoi angĩ elĩ ma asikalĩ, vamwe na asikalĩ onthe ala meĩ namo, nĩmoaiwe nĩ mwaki kuma ĩtunĩ; ĩndĩ nĩngũkwĩsũva mbĩw'ĩe tei!”

15Mũlaĩka wa Mwĩai Ngai nĩwaneenie na Eliya amwĩa atĩĩ, “Theea wĩ nake ndũkakĩe.” Kwoou Eliya nĩwaendanisye na mũtongoi ũsu wa asikalĩ, nginya vala mũsumbĩ waĩ.

16Mavika vo, Eliya nĩweeie mũsumbĩ atĩĩ, “Mwĩai Ngai eũkũlya ũũ: ‘Ũnatũmie andũ maende makakũlye ũtao vala ve Mbaalinzevuvu, ngai ya Ekeloni, nũndũ Ĩsilaeli vai Ngai ũtonya kũmũkũlya ũtao? Nĩkwĩthĩwa nĩwĩkĩte ũu ndwĩvoa, kwa w'o nũũkw'a!’ ”

17Kwoou Aasia nĩwakwie o tondũ Mwĩai Ngai watavĩtye Eliya. Aasia ndaĩ na ana ma aũme, kwoou mwana-a-inyia ũla weetawa Yolamu nĩwatw'ĩkie mũsumbĩ ĩtina wake. Yolamu atw'ĩkie mũsumbĩ mwakanĩ wa kelĩ wa kũsumbĩka kwa Yeolamu, mwana wa Yeosavati mũsumbĩ wa Yuta.

18Maũndũ ala angĩ Aasia weekie yĩla wasumbĩkĩte, maandĩkĩtwe Ĩvukunĩ ya Maũndũ ma Mavinda ma Asumbĩ ma Ĩsilaeli.

Jump to: Chapter 2 →