2 Kings 20

Kamba (MBIVILIA ŨVOO MŨSEO)

← Chapter 19 Jump to: Chapter 21 →

1Ĩvindanĩ yĩu Mũsumbĩ Esekia nĩwawaie mũno weethĩa akilĩlye kũkw'a. Mwathani Ĩsaia mwana wa Amosu nĩwaendie kũmwona na amwĩa atĩĩ, “Mwĩai Ngai easya, ‘Ĩyĩae ũndũ wa mũsyĩ waku, nũndũ nũũkw'a; ndwĩvoa.’ ”

2Nĩvo ĩndĩ Esekia weethyũũie asisya ũkũtanĩ, na amũvoya Mwĩai Ngai ayasya,

3“Ame Mwĩai Ngai, nĩngũkwĩsũva ũlilikane ũndũ nĩthĩĩtwe nĩ mũĩkĩĩku kwaku, na ũndũ nĩnenganĩte kwaku na thayũ wakwa w'onthe, na kwĩka maũndũ ala makwendeeasya.” Esekia nĩwaĩie kĩĩo kĩ woo.

4Ĩsaia nĩwaumie vala ve mũsumbĩ, ĩndĩ atanamba kũvĩtũkĩla katĩ wa kĩwanza kĩla kĩ kwa mũsumbĩ, Mwĩai Ngai nĩwaneenie nake amwĩa atĩĩ,

5“Syoka ũkaneene na Esekia mũtongoi wa andũ makwa ũmwĩe, ‘Nyie Mwĩai Ngai, Ngai wa Ndeviti ũmae waku, nĩneew'a mboya yaku na noona methoi maku. Nĩngũũvosya, na ĩtina wa mĩthenya ĩtatũ ũkathi Ĩkalũnĩ.

6Nĩngũkwongela myaka ĩkũmi na ĩtano, na nĩngũũtangĩĩa wĩ na ndũa ĩno ya Yelũsalemu kuma ũtonyinĩ wa mũsumbĩ wa Asuli. Kwondũ wa ndaĩa yakwa, na ũtianĩo ũla natianĩie na mũthũkũmi wakwa Ndeviti, nĩngũsũvĩa ndũa ĩno.’ ”

7Nĩvo ĩndĩ Ĩsaia weeie athũkũmi ma mũsumbĩ mekĩe matunda ma makũyũ mathie mũimũnĩ wake, na nũkũvoa.

8Esekia nĩwakũlilye Ĩsaia atĩĩ, “Wonany'o wa kana Mwĩai Ngai nũkũmbosya, na kana ĩtina wa mĩthenya ĩtatũ ngathi Ĩkalũnĩ nĩ mwaũ?”

9Ĩsaia nĩwamũsũngĩie amwĩa, “Ũũ nĩw'o wonany'o ũla Mwĩai Ngai ũkũũnenga, onany'e kana nũkwĩanĩsya watho wake: Wĩenda muunyĩ ũla wĩ ngasinĩ ũthi mbee matambya ĩkũmi, kana wĩenda ũsyoke ĩtina matambya ĩkũmi?”

10Esekia nĩwasũngĩie asya, “Nĩ ũndũ wĩ laisi muunyĩ kũthi mbee matambya ĩkũmi! Kavaa ũsyoke ĩtina matambya ĩkũmi.”

11Nĩvo ĩndĩ mwathani Ĩsaia wavoyie Mwĩai Ngai, na Mwĩai Ngai atuma muunyĩ ũsu ũsyoka ĩtina matambya ĩkũmi, ngasinĩ ĩla yaseũvĩtw'e nĩ Mũsumbĩ Aasu.

12Ĩvindanĩ yĩu, mũsumbĩ wa Mbavilonĩ, Melotaki-mbalatani mwana wa Mbalatani, nĩweewie kana Mũsumbĩ Esekia ethĩĩtwe e mũwau, na kwoou nĩwatũmanie atwaĩwe valũa na mũthĩnzĩo.

13Esekia nĩwathokisye atũmwa asu, na amony'a syĩndũ syonthe ila syaĩ nyũmbanĩ syake sya kwia syĩndũ: Silĩva, thaavu, syĩndũ ila inyungaa nesa, mauta me vata mũno, na mĩio yake yonthe ya kaũ, vamwe na syĩndũ syonthe ila syaĩ kũla waiaa mothwii. Vai kĩndũ o na kĩmwe katĩ wa syĩndũ ila waiĩte kũla waiaa syĩndũ, kana ila syaĩ ũsumbĩnĩ wake ũtaamony'a.

14Nĩvo ĩndĩ mwathani Ĩsaia waendie kũla kwĩ Mũsumbĩ Esekia na amũkũlya atĩĩ, “Andũ asu maumĩte va, na makwĩie ata?” Esekia nĩwamũsũngĩie amwĩa, “Maumĩte Mbavilonĩ, nthĩ yĩ kũasa mũno.”

15Ĩsaia amũkũlya atĩĩ, “Monie kyaũ nyũmbanĩ yaku ya kĩ-ũsumbĩ?” Esekia amũsũngĩa amwĩa atĩĩ, “Monie syĩndũ syonthe ila syĩ nyũmbanĩ yakwa ya kĩ-ũsumbĩ. Vai kĩndũ katĩ wa ũthwii wakwa ndanamony'a.”

16Nĩvo ĩndĩ Ĩsaia weeie mũsumbĩ, “Mwĩai Ngai easya atĩĩ,

17‘Ĩvinda nĩyũkĩte yĩla syĩndũ syonthe ila syĩ nyũmbanĩ yaku ya kĩ-ũsumbĩ, na syĩndũ syonthe ila aaũmae maku maiĩte kũvika ũmũnthĩ, ikakuwa itwawe Mbavilonĩ; vai kĩndũ o na kĩmwe kĩkatiwa.

18Imwe sya nzyawa syaku mwene ikatavwa itwawe, na iitw'ĩkĩthw'a andũ avakũe, nĩ kana ithũkũmae nyũmbanĩ ya kĩ-ũsumbĩ ya mũsumbĩ wa Mbavilonĩ.’ ”

19Nĩvo ĩndĩ Mũsumbĩ Esekia weeie Ĩsaia atĩĩ, “Ndeto sya Mwĩai Ngai ila wandavya nĩ nzeo.” Esekia asũngĩie ũu nũndũ asũanĩie asya, “Nĩ ũndũ ũseo ethĩwa ĩvindanĩ yonthe ya kũsumbĩka kwakwa kũkeethĩawa mũuo na ũsũvĩo”

20Maũndũ ala angĩ Esekia weekie yĩla wasumbĩkĩte, meko make ma ũkũmbaũ, na ũndũ waseũvisye silanga ya kĩw'ũ, na mũtaũ wa kũtwaa kĩw'ũ ndũanĩ, onthe maandĩkĩtwe Ĩvukunĩ ya Maũndũ ma Mavinda ma Asumbĩ ma Yuta.

21Esekia nĩwakwie na mwana wake Manase atw'ĩka mũsumbĩ ĩtina wake.

← Chapter 19 Jump to: Chapter 21 →