2 Kings 14

Kamba (MBIVILIA ŨVOO MŨSEO)

← Chapter 13 Jump to: Chapter 15 →

1Mwakanĩ wa kelĩ wa kũsumbĩka kwa Yeoasi mwana wa Yeoaasi mũsumbĩ wa Ĩsilaeli, Amasia mwana wa Yoasi nĩwatw'ĩkie mũsumbĩ wa Yuta.

2Atw'ĩkie mũsumbĩ e na ũkũũ wa myaka mĩongo ĩlĩ na ĩtano. Asumbĩkie vandũ va myaka mĩongo ĩlĩ na kenda e Yelũsalemu. Inyia wake eetawa Yeoatini kuma Yelũsalemu.

3Mũsumbĩ Amasia nĩweekaa maũndũ ala mamwendeeasya Mwĩai Ngai, ĩndĩ ndailyĩ ta Ndeviti ũmae wake; nĩwaatĩĩie mwĩkalĩle wa ĩthe wake Yoasi.

4Ndaa ananga kũndũ kũla andũ mathaithĩaa iĩmanĩ ĩũlũ; andũ nĩmaendeeie kũthembea nthembo kw'o na kũvĩvĩsya ũvani kw'o.

5Amasia amina kwĩthĩwa e na ũtonyi wa kĩ-ũsumbĩ oou, nĩwooaie anini make ala mooaie ĩthe wake.

6Ĩndĩ ndaaũaa syana sya andũ asu mooaie ĩthe wake, o tondũ kũandĩkĩtwe Ĩvukunĩ ya Mĩao ya Mwose, vala Mwĩai Ngai wĩaĩte akasya atĩĩ, “Asyai mayaĩlĩte kũawa nũndũ wa mavĩtyo mekĩtwe nĩ syana syoo, nasyo syana iyaĩlĩte kũawa nũndũ wa mavĩtyo mekĩtwe nĩ asyai masyo. Mũndũ aĩlĩte kũawa nũndũ wa naĩ ĩla we mwene wĩkĩte.”

7Amasia nĩwooaie asikalĩ ma Etomu ngili ĩkũmi; amoaĩie vandũ vetawa Mwanda wa Mũnyũ. Nĩwokitie namo amasinda na akwata ndũa ya Sela, na amĩta Yokitheeli. Ndũa ĩsu yĩtawa ũu kũvika ũmũnthĩ.

8Nĩvo ĩndĩ Amasia watũmie andũ kũla kwĩ Yeoasi mũsumbĩ wa Ĩsilaeli, ũla waĩ mwana wa Yeoaasi na mwĩsũkũũe wa Yeũ, amwĩĩte atĩĩ, “Ũka tũkomane tũkite.”

9Yeoasi nĩwatũmanie kũla kwĩ Amasia akewe atĩĩ, “Kĩkuthu kya mĩw'a kya Levanoni nĩkyatũmanie kũla kwĩ mũtĩ wa mũkũũ wa Levanoni kĩyasya, ‘Nenga mwana wakwa mwĩĩtu waku atwae.’ Ĩndĩ nyamũ ya kĩthekanĩ ya Levanoni yavĩtĩla vau ve kĩkũthu kĩu kya mĩw'a na yakĩkinyanga.

10We Amasia kwa w'o nũnasindie andũ ma Etomu na wĩ na ngathĩĩo. Ĩanĩwa nĩ ũkumyo ũsu, na ũyĩkala mũsyĩ kwaku. Nĩ kyaũ kĩũtuma ũmantha thĩna nĩ kana we wĩ na andũ ma Yuta mũsindwe?”

11Amasia nĩwaleile kwĩthukĩĩsya. Kwoou Yeoasi mũsumbĩ wa Ĩsilaeli nĩwambatie amũvithũkĩa, na mambĩĩa kaũ me ndũanĩ ya Mbethi-semesi ĩla yĩ Yuta.

12Andũ ma Yuta nĩmasindiwe nĩ andũ ma Ĩsilaeli, na kĩla ũmwe woo asemba akĩĩte enũka.

13Yeoasi mũsumbĩ wa Ĩsilaeli nĩwakwatĩie Amasia mũsumbĩ wa Yuta, mwana wa Yeoasi, mwĩsũkũũe wa Aasia Mbethi-semesi. Yeoasi nĩwaendie Yelũsalemu na aomboa ũkũta wayo kuma Mũvĩanĩ wa Evalaimu kũvika Mũvĩanĩ wa Konanĩ. Aomboie ũkũta ũsu ũasa wa ta mita maana elĩ.

14Nĩwoosie thaavu na silĩva w'onthe ũla weethĩie, na syĩndũ syonthe ila syaĩ Ĩkalũnĩ, o vamwe na syĩndũ syonthe sya vata ila syaĩ nyũmbanĩ ya kĩ-ũsumbĩ. Nĩwakuie syĩndũ isu syonthe aitwaa Samalia. O ta ũu nĩwaendie na andũ onthe ala wakwatĩte asyoka namo Samalia.

15Maũndũ ala angĩ onthe Yeoasi weekie yĩla wasumbĩkĩte, vamwe na ũkũmbaũ wake kaũnĩ ũla wokitie na Amasia mũsumbĩ wa Yuta, maandĩkĩtwe Ĩvukunĩ ya Maũndũ ma Mavinda ma Asumbĩ ma Ĩsilaeli.

16Yeoasi nĩwakwie na athikwa Samalia vala asumbĩ mathikawa. Mwana wake Yelovoamu nĩwatw'ĩkie mũsumbĩ ĩtina wake.

17Yeoasi mũsumbĩ wa Ĩsilaeli, mwana wa Yeoaasi amina kũkw'a, Amasia mũsumbĩ wa Yuta, mwana wa Yoasi ekalile thayũ vandũ va myaka ĩkũmi na ĩtano.

18Maũndũ ala angĩ onthe Amasia weekie yĩla wasumbĩkĩte, maandĩkĩtwe Ĩvukunĩ ya Maũndũ ma Mavinda ma Asumbĩ ma Yuta.

19Andũ nĩmaseũvĩisye mũvango mũthũku Yelũsalemu wa kũaa Amasia, na kwoou asemba akĩa athi ndũanĩ ya Lakisi. Ĩndĩ amaitha make nĩmamũatĩĩie kw'o na mamũaa.

20Mwĩĩ wake nĩwakuiwe na Mbalasi watũngwa Yelũsalemu. Nĩwathikiwe Ndũanĩ ya Ndeviti vala asumbĩ mathikawa.

21Nĩvo ĩndĩ andũ onthe ma Yuta manyuvie Asalia, ũla waĩ na ũkũũ wa myaka ĩkũmi na thanthatũ, mamũtw'ĩkĩthya mũsumbĩ ĩtina wa ĩthe wake Amasia.

22Ĩtina wa kĩkw'ũ kya Amasia, Asalia nĩwaakie ĩngĩ ndũa ya Elathi na amyosa yatw'ĩka ya Yuta.

23Mwakanĩ wa ĩkũmi na itano wa kũsumbĩka kwa Amasia mwana wa Yeoasi mũsumbĩ wa Yuta, Yelovoamu mwana wa Yeoasi nĩwatw'ĩkie mũsumbĩ wa Ĩsilaeli. Yelovoamu asumbĩkie myaka mĩongo ĩna na ũmwe e Samalia.

24Nĩwavĩtĩisye Mwĩai Ngai kwa kũatĩĩa mwĩkalĩle mũthũku wa Yelovoamu mwana wa Nevati, ũla watumie andũ ma Ĩsilaeli meka naĩ.

25Nĩwatũngĩĩie mĩvaka ya Ĩsilaeli kuma ũlikĩlonĩ wa Amathi nginya Ũkanga Mũkw'ũ. Ũu weekĩkie kwĩanana na ũndũ Mwĩai Ngai, Ngai wa Ĩsilaeli waneenete kwĩsĩla vala ve mũthũkũmi wake Yona mwana wa Amitai, mwathani waumĩte Ngathi-eeveli.

26Mwĩai Ngai nĩwoonie ũndũ andũ onthe ma Ĩsilaeli, ngombo na ala mate ngombo, maĩ na thĩna wĩana. Vayaĩ mũndũ wa kũmatetheesya.

27Ĩndĩ nũndũ Mwĩai Ngai ndaneenete akasya kana akamina andũ ma Ĩsilaeli vyũ, kuma ĩũlũ wa nthĩ, nĩwamavonokisye kwĩsĩla kwa Yelovoamu mwana wa Yeoasi.

28Maũndũ ala angĩ onthe Yelovoamu weekie yĩla wasumbĩkĩte, makaũ ala wokitie na ũkũmbaũ, na ũndũ woosie ĩngĩ ndũa ya Ndamasikũ na ya Amathi aitũngĩa Ĩsilaeli, maandĩkĩtwe Ĩvukunĩ ya Maũndũ ma Mavinda ma Asumbĩ ma Ĩsilaeli.

29Yelovoamu nĩwakwie na athikwa vala asumbĩ mathikawa. Nzekalia mwana wake nĩwatw'ĩkie mũsumbĩ ĩtina wake.

← Chapter 13 Jump to: Chapter 15 →