2 Kings 11

Kamba (MBIVILIA ŨVOO MŨSEO)

← Chapter 10 Jump to: Chapter 12 →

1Yĩla Athalia inyia wa Mũsumbĩ Aasia wamanyie kana mwanae nũminĩte kũawa, nĩweeaie andũ onthe ma mũsyĩ wa kĩ-ũsumbĩ moawe.

2Ĩndĩ Yeoseva, mwĩĩtu-a-inyia wa Aasia, ũla waĩ mwĩĩtu wa Mũsumbĩ Yeolamu, nĩwoosie Yoasi mwana wa Aasia amumya vala ve ana ma kĩ-ũsumbĩ ala makilĩlye kũawa na amũvitha. Nĩwamwosie amũvitha vamwe na mũei wake kasũmbanĩ ka kũkoma, nĩ kana ndakoawe nĩ Athalia; kwoou ndaaũawa.

3Yoasi ekalile avithĩtwe e na mũei wake Ĩkalũnĩ ya Mwĩai Ngai, myaka thanthatũ ĩvindanĩ yĩla Athalia wasumbĩkĩte nthĩ ĩsu.

4Mwakanĩ wa mũonza wa kũsumbĩka kwa Athalia, mũthembi Yeoiata nĩwatũmanie vala ve anene ala maũngamĩe asikalĩ ma kũsunga mũsumbĩ, na ma asikalĩ ma kũsunga nyũmba ya kĩ-ũsumbĩ moke vala ũĩ Ĩkalũnĩ. Nĩwaseũvisye wĩw'ano namo na atuma metĩkĩla kwa nzĩa ya kwĩvĩta kana makeetĩkĩlana na maũndũ ala wavangĩte kwĩka. Nĩwamonisye Yoasi mwana wa Aasia,

5na ameaĩa amea atĩĩ, “Yĩla mwĩũka wĩanĩ wa kũsunga mũthenyanĩ wa Savato, nguthu ĩmwe katĩ wa nguthu syenyu itatũ, ĩsungae nyũmba ya kĩ-ũsumbĩ;

6nguthu ĩngĩ katĩ wa nguthu syenyu itatũ, ĩsungae yĩ Mũvĩanĩ wa Suli, na nguthu ĩla ĩngĩ katĩ wa nguthu syenyu itatũ, ĩsungae yĩ mũvĩanĩ ũla wĩ ĩtina wa asikalĩ ala angĩ ma kũsunga.

7Nguthu ilĩ ila ikethĩawa ithũmũĩte mũthenyanĩ wa Savato, isungae Ĩkalũnĩ nĩ kana isũvĩe mũsumbĩ.

8No nginya mũthyũlũlũke Mũsumbĩ Yoasi mũmũsũvĩe, kĩla mũndũ akwete mũio wake wa kaũ. Mũndũ o na wĩva ũla wĩtheea vala mũĩ no nginya oawe. Ĩkalaai vakuvĩ na mũsumbĩ kĩla vandũ ũĩ ĩvinda yonthe.”

9Anene asu nĩmeekie ũndũ Yeoiata wameaĩie, na mooka vala ũĩ me na asikalĩ moo onthe: Asikalĩ ala maaĩlĩte kũthũmũĩa wĩa mũthenyanĩ wa Savato, na ala malikaa wĩanĩ mũthenyanĩ ũsu.

10Yeoiata nĩwanengie anene asu matumo na ngao ila syaĩ sya Mũsumbĩ Ndeviti, na syaiĩtwe Ĩkalũnĩ.

11Asikalĩ asu nĩmaũngamie melingĩlĩte mũsumbĩ, kĩla ũmwe akwete mĩio yake ya kaũ. Maũngamĩte mathyũlũlũkĩte kĩthembeo na Ĩkalũ, kuma ngalĩko ya ĩtheo nginya ngalĩko ya ĩũlũ ya Ĩkalũ.

12Nĩvo ĩndĩ Yeoiata watongoeisye Yoasi mwana wa mũsumbĩ maumaala, amwĩkĩa ngovia ya kĩ-ũsumbĩ, na amũnenga walany'o wa kũsumbĩka nthĩ wĩ mũandĩke. Yoasi nĩwetĩkĩiw'e mauta na atavanw'a kana nĩwe mũsumbĩ. Andũ nĩmakũnangie moko na maneena na wasya mũnene masya, “Mũsumbĩ nĩekale thayũ ĩvinda ĩasa!”

13Mũsumbĩ mũndũ mũka Athalia nĩweewie wasya ũsu mũnene, ũla waumiw'e nĩ asikalĩ ma kũsunga na andũ. Kwoou nĩwaendie Ĩkalũnĩ vala andũ moombanĩe.

14Nĩwoonie mũsumbĩ aũngamĩte ũtee wa kĩtuĩ kĩla kĩ ũlikĩlonĩ wa Ĩkalũ o tondũ kweekawa. Anene na andũ ala mavuvaa masoo maĩ vakuvĩ na mũsumbĩ, na andũ onthe nĩmatanaa na kũvuva masoo. Nĩvo ĩndĩ Athalia watembũangie ngũa syake, na aneena na wasya mũnene asya, “Nĩmwaleana na ũsumbĩ wakwa! Nĩmwaleana na ũsumbĩ wakwa!”

15Yeoiata ndendaa Athalia oaĩwe Ĩkalũnĩ. Kwoou nĩweeaĩie anene ma asikalĩ ma kaũ amea atĩĩ, “Mumaalyei e katĩ wa mĩthĩa ya asikalĩ ma kũsunga, na mũyũaa mũndũ o na wĩva ũla ũkũtata kũmũvonokya.”

16Nĩmakwatie Athalia mamũtwaa nyũmbanĩ ya kĩ-ũsumbĩ, na mamũaĩa mũvĩanĩ ũla wĩtawa Mũvĩa wa Mbalasi.

17Mũthembi Yeoiata nĩwatumie Mũsumbĩ Yoasi vamwe na andũ maseũvya ũtianĩo na Mwĩai Ngai, kana makeethĩawa me andũ ma Mwĩai Ngai. O ta ũu nĩwaseũvisye ũtianĩo katĩ wa mũsumbĩ na andũ.

18Nĩvo ĩndĩ andũ onthe maendie ĩkalũnĩ ya Mbaali na mayĩomboanga. Nĩmaanangie ithembeo na mĩvw'anano ya ngai ĩsu, na mooaĩa Matani mũthembi wayo vau mbee wa ithembeo isu. Yeoiata nĩwaiie asikalĩ ma kũsunga Ĩkalũ,

19na ĩndĩ we, e na anene ma asikalĩ, asikalĩ ma kũsunga mũsumbĩ, na asikalĩ ma kũsunga nyũmba ya kĩ-ũsumbĩ, nĩmaumaaisye mũsumbĩ kuma Ĩkalũnĩ nginya nyũmbanĩ ya kĩ-ũsumbĩ, maatĩĩwe nĩ andũ. Yoasi alikĩle mũvĩanĩ ũla wĩtawa Mũvĩa wa Asikalĩ ma kũsunga na athi ekalĩla kĩvĩla kya kĩ-ũsumbĩ.

20Andũ onthe ma nthĩ ĩsu nĩmatanie. Ndũa yonthe nĩyakilĩtye, nũndũ Athalia nĩwaĩ anooaĩwa na ũvyũ nyũmbanĩ ya kĩ-ũsumbĩ.

21Yoasi atw'ĩkie mũsumbĩ wa Yuta e na ũkũũ wa myaka mũonza.

← Chapter 10 Jump to: Chapter 12 →