2 Kings 25

Kamba (MBIVILIA ŨVOO MŨSEO)

← Chapter 24 Jump to:

1Nzetekia nĩwang'endeie Nevukatinesa mũsumbĩ wa Mbavilonĩ, na kwoou Nevukatinesa ooka na asikalĩ make, na mavithũkĩa Yelũsalemu mũthenyanĩ wa ĩkũmi wa mwei wa ĩkũmi, mwaka wa kenda wa kũsumbĩka kwa Nzetekia. Nĩmeelingĩlile ndũa ĩsu na maaka ivumbu kũmĩthyũlũlũka.

2Kwoou ndũa ya Yelũsalemu nĩyekalile yĩlingĩlĩtwe nĩ amaitha, nginya mwakanĩ wa ĩkũmi na ũmwe wa kũsumbĩka kwa Nzetekia.

3Mũthenyanĩ wa kenda wa mwei wa kana mwakanĩ o ũsu, yũa nĩyaingĩvie mũno weethĩa vai lĩu o na ũmwe ũtialĩte ndũanĩ ĩsu andũ matonya kũya.

4O na kau asikalĩ ma Mbavilonĩ nĩmeelingĩlĩte Yelũsalemu, ũkũta wa ndũa ĩsu nĩwavũthũiwe na asikalĩ onthe makĩa ũtukũ, mathi na nzĩa ĩla yesĩlĩte mũũndanĩ wa mũsumbĩ, na maumaalĩla mũvĩanĩ ũla waĩ katĩ wa ngũta ilĩ sya ndũa. Nĩmakĩie melekele mwandanĩ wa Yolotani.

5Ĩndĩ asikalĩ ma Mbavilonĩ nĩmaatĩĩie mũsumbĩ Nzetekia, na mamũkwatĩa ũiĩnĩ ũla waĩ vakuvĩ na ndũa ya Yeliko. Asikalĩ onthe ma Nzetekia nĩmasembie manyaĩĩka mamũtia.

6Nĩvo ĩndĩ asikalĩ ma Mbavilonĩ makwatie Nzetekia mamũtwaa ndũanĩ ya Livila, kũla kwĩ mũsumbĩ wa Mbavilonĩ nake amũsilĩla.

7Nĩmooaie syana syake asyaĩĩsye na ĩndĩ mamũvũthũanga metho. Nĩmamwĩkĩie mbĩngũ na mamũtwaa Mbavilonĩ.

8Mũthenya wa mũonza wa mwei wa katano, mwakanĩ wa ĩkũmi na kenda wa kũsumbĩka kwa Nevukatinesa mũsumbĩ wa Mbavilonĩ, Nevusalatani mũtongoi wa asikalĩ ala masungaa mũsumbĩ wa Mbavilonĩ nĩwookie Yelũsalemu.

9Nĩwavĩvisye Ĩkalũ, nyũmba ya mũsumbĩ, na nyũmba syonthe sya Yelũsalemu; avĩvisye nyũmba syonthe ila syaĩ vata.

10Asikalĩ onthe ma Mbavilonĩ ala maĩ vamwe nake nĩmaomboangie ngũta syonthe ila syeelingĩlĩte Yelũsalemu.

11Nevusalatani nĩwakuie andũ onthe ala matialĩte Yelũsalemu amatwaa Mbavilonĩ, vamwe na andũ ala maumĩte Yelũsalemu makathi kũla kwĩ mũsumbĩ wa Mbavilonĩ.

12Ĩndĩ Nevusalatani nĩwatialilye andũ amwe ala maĩ ngya mũno ma Yuta, nĩ kana mathũkũmae mĩũndanĩ ya mĩsavivũ na mĩũndanĩ ĩla ĩngĩ.

13Andũ ma Mbavilonĩ nĩmatilangile ituĩ sya mbulonzi, na makasya ala maĩ Ĩkalũnĩ, vamwe na ĩtangi ĩnene ya mbulonzi syatw'ĩka ilungu, na matwaa mbulonzi ĩsu yonthe Mbavilonĩ.

14O ta ũu nĩmakuie mĩko, na syĩndũ sya kwĩkĩa mũu ila syatũmĩawa kwondũ wa kũthesya kĩthembeo, syĩndũ ila syatũmĩawa kũvosya taa, mbakũli ila syatũmĩawa kwanyĩlĩĩlya nthakame ya nyamũ ila syathembawa, mbakũli ila syatũmĩawa kwĩkĩa ũvani, na syĩndũ ila ingĩ syonthe sya mbulonzi syatũmĩawa Ĩkalũnĩ.

15O ta ũu Nevusalatani nĩwakuie syĩndũ ila syatoeeasya ũvani na mbakũli ila syaseũvĩtw'e na thaavu kana silĩva.

16Mbulonzi ĩla Solomoni watũmĩie kũseũvya ituĩ ilĩ, ĩtangi, na makasya ala maĩ Ĩkalũnĩ yaĩ ngito ũkethĩa ndĩtonya kũthimĩka.

17Ituĩ syelĩ syailyĩ ũndũ ũmwe, kĩla kĩmwe kyaĩ na ũasa wa mita nyanya na kyaĩ na ngunĩko ya mbulonzi mũthya, ĩla yaĩ na ũasa wa mita ĩmwe na sendimita mĩongo ĩtatũ. Kĩla ngunĩko yaanakavĩtw'e kwa kũmbĩĩwa matunda ma makũngũmanga mamĩlingĩlĩte, onthe maseũvĩtw'e na mbulonzi.

18Nevusalatani mũtongoi wa asikalĩ ala masungaa mũsumbĩ nĩwakwatie Selaia Mũthembi Mũnene, Nzevania mũnini wa Mũthembi Mũnene, na athũkũmi ala angĩ atatũ masungaa ũlikĩlo wa Ĩkalũ na amatwaa me ove.

19Katĩ wa andũ ala maĩ ndũanĩ ya Yelũsalemu, Nevusalatani nĩwakuie mũndũ ũla waũngamĩe asikalĩ, na atai mũonza ma mũsumbĩ. Nĩwakuie mũandĩki wa mũnene wa asikalĩ, ũla waũngamĩe wĩa wa kũandĩka masyĩtwa ma andũ ma nthĩ ya Yuta, na akua andũ angĩ mĩongo thanthatũ ala meethĩiwe ndũanĩ.

20Nevusalatani akwatie andũ asu amatwaa me ove kũla kwĩ mũsumbĩ wa Mbavilonĩ, ũla waĩ ndũanĩ ya Livila

21kĩsionĩ kya nthĩ ya Amathi. Me vau mũsumbĩ nĩweeaie moawe. Kwoou andũ ma Yuta nĩmatwaiwe Mbavilonĩ me ove; maumw'a nthĩ yoo.

22Nevukatinesa mũsumbĩ wa Mbavilonĩ nĩwatw'ĩkĩthisye Ngetalia mwana wa Aikamu, mwĩsũkũũe wa Savani ngavana wa Yuta. Nĩwamũnengie wĩa wa kũũngamĩa andũ onthe ala mataakwatwa makatwawa Mbavilonĩ.

23Yĩla atongoi ma asikalĩ na asikalĩ ala maĩ namo, meewie kana mũsumbĩ wa Mbavilonĩ nũtw'ĩkĩthisye Ngetalia ngavana, nĩmookie Misiva kũla kwĩ Ngetalia. Atongoi asu ma asikalĩ maĩ Ĩsumaeli mwana wa Nethania, Yoanani mwana wa Kalea, Selaia mwana wa Tanumethi kuma ndũanĩ ya Netovathi, na Yesania mwana wa mũndũ waumĩte Maaka. Atongoi asu maĩ vamwe na asikalĩ moo.

24Ngetalia nĩweevĩtie aĩkĩĩthye asikalĩ asu aimea, “Mũikakĩe atongoi ma Mbavilonĩ; ĩkalai nthĩ ĩno na mũithũkũma mũsumbĩ wa Mbavilonĩ, na maũndũ menyu nĩmekũendeea nesa.”

25Ĩndĩ mweinĩ wa mũonza, Ĩsumaeli mwana wa Nethania, mwĩsũkũũe wa Elisama, ũmwe wa andũ ma mũsyĩ wa kĩ-ũsumbĩ, nĩwaendie Misiva e na asikalĩ ĩkũmi, na avithũkĩa Ngetalia amũaa. O ta ũu nĩwooaie andũ ma Ĩsilaeli na ma Mbavilonĩ ala maĩ vamwe na Ngetalia.

26Nĩvo ĩndĩ andũ onthe, anini na anene, vamwe na atongoi ma asikalĩ, maendie Misili nĩkwĩthĩwa nĩmakĩaa andũ ma Mbavilonĩ.

27Mwakanĩ ũla Evili-melotaki watw'ĩkie mũsumbĩ wa Mbavilonĩ, nĩweew'ĩie Yeoiakini mũsumbĩ wa Yuta tei na amũthasya kuma yela. Athaiw'e mũthenyanĩ wa mĩongo ĩlĩ na mũonza wa mwei wa ĩkũmi na ilĩ, mwaka wa mĩongo ĩtatũ na mũonza wa kwovwa kwake.

28Nĩweekie Yeoiakini nesa, na amũnenga kĩvĩla kya ndaĩa mbee wa asumbĩ ala angĩ maĩ vamwe nake Mbavilonĩ.

29Yeoiakini nĩwaumisye ngũa sya yela, na ĩvinda yonthe ya thayũ wake aĩsanĩaa na mũsumbĩ.

30Kĩla mũthenya, Mũsumbĩ Evili-melotaki nĩwanengae Yeoiakini kĩla waaĩlĩte kũtũmĩa kwondũ wa mavata make; amũnengae ũu ĩvindanĩ yonthe ya thayũ wake.

← Chapter 24 Jump to: