2 Kings 10

Kamba (MBIVILIA ŨVOO MŨSEO)

← Chapter 9 Jump to: Chapter 11 →

1Aavu aĩ na ana mĩongo mũonza ndũanĩ ya Samalia. Kwoou Yeũ nĩwaandĩkie valũa itwaĩwe anene ma ndũa ya Samalia. Aandĩkĩie anene ma ndũa, atumĩa, na ala masũvĩaa syana sya Aavu. Amaandĩkĩie amea atĩĩ:

2“Ninyw'ĩ mũsũvĩaa ana ma mũsumbĩ, na mwĩ na makasya ma kaũ, mbalasi, mĩio ya kaũ, na ndũa mbiĩĩe. Kwoou ĩndĩ, mwamina kũkwata valũa ũũ oou,

3nyuvai ũla mũseo vyũ na waĩlĩte katĩ wa ana ma mũsumbĩ mũmũtw'ĩkĩthye mũsumbĩ. Ĩtina wa ũu ũkitai mũsũvĩe mũsyĩ wa mũnene wenyu.”

4Anene ma ndũa ya Samalia nĩmakĩie mũno. Nĩmakũlilye atĩĩ, “Tũtonya kũsiĩĩa Yeũ ata ethĩwa asumbĩ elĩ, Yolamu na Aasia nĩmanaemiwe nĩ kũmũsiĩĩa?”

5Kwoou mũnene ũla waũngamĩe nyũmba ya kĩ-ũsumbĩ, na mũnene ũla waũngamĩe ndũa ya Samalia, me vamwe na atumĩa, na ala masũvĩaa syana sya Aavu, nĩmatũmanie vala ve Yeũ mayasya atĩĩ, “Ithyĩ twĩ athũkũmi maku, na nĩtũkwĩka ũndũ w'onthe ũla ũkwenda. Ĩndĩ tũinyuva mũndũ o na wĩva tũmũtw'ĩkĩthye mũsumbĩ. Ĩka ũla ũkwona wĩ ũseo.”

6Yeũ nĩwamaandĩkĩie valũa wa kelĩ amea atĩĩ, “Ethĩwa mwĩ ngalĩkonĩ ĩla yakwa, na ethĩwa mũkeekaa ũndũ nĩmwĩaĩaa, ũnĩ ĩvinda ta yĩĩ mwĩndetee vaa Yesileeli mĩtwe ya ana onthe ma Aavu.” Ana onthe mĩongo mũonza ma Mũsumbĩ Aavu mekalaa na atongoi ma ndũa ya Samalia; atongoi asu nĩmo mamaeaa.

7Yĩla valũa ũsu wamavikĩie, atongoi asu nĩmooaie ana asu ma mũsumbĩ onthe. Nĩmeekĩie mĩtwe yoo ikavũnĩ na mamũtwaĩa Yeũ kũu Yesileeli.

8Yĩla Yeũ wataviw'e kana mĩtwe ya ana ma mũsumbĩ nĩyaetwe, nĩweeaie asya, “Iai mĩtwe ĩsu ivumbu ilĩ mũvĩanĩ wa ndũa na mũiekana nayo yĩkale vau nginya ũnĩ kĩoko.”

9Kwakya, Yeũ nĩwaendie mũvĩanĩ aũngama mbee wa andũ ala maĩ vau na amea atĩĩ, “Ninyie naseũvĩisye mũsumbĩ Yolamu mũvango mũthũku na namũaa; inyw'ĩ mũi na mavĩtyo. Ĩndĩ aa onthe moaiwe nũũ?

10Manyai ĩndĩ kana maũndũ onthe ala Mwĩai Ngai waneenie ũndũ wa mũsyĩ wa Aavu mailea kwĩanĩa. Mwĩai Ngai nĩwĩkĩte ũndũ wathanie, kwĩsĩla vala ve mũthũkũmi wake Eliya.”

11Nĩvo ĩndĩ Yeũ wooaie andũ ala angĩ onthe mekalaa Yesileeli, ala maileny'e ũndũ na Aavu. O ta ũu nĩwooaie anini ma Aavu, anyanyae make ma vakuvĩ, na athembi make; vai ũmwe waatiala.

12Yeũ nĩwaumie Yesileeli athi Samalia. E nzĩanĩ vandũ vetawa Maeema ma Aĩthi,

13nĩwakomanie na andũ amwe maĩ ma mũsyĩ ũmwe na Aasia mũsumbĩ wa Yuta na amakũlya atĩĩ, “Ninyw'ĩ aaũ?” Nĩmamũsũngĩie mamwĩa, “Twĩ andũ ma mũsyĩ ũmwe na Aasia. Tũendete Yesileeli tũkakethye Yeseveli inyia wa mũsumbĩ, vamwe na andũ ala angĩ ma mũsyĩ wa kĩ-ũsumbĩ.”

14Yeũ nĩweeaĩie andũ ala waĩ namo amea atĩĩ, “Makwatei me thayũ.” Nĩmamakwatie na mamoaĩa vakuvĩ na ĩima yaĩ vau. Andũ asu onthe mooaiwe maĩ mĩongo ĩna na elĩ; vai ũmwe woo waatiwa e thayũ.

15Yeũ auma vau, aendete nĩwakomanie na Yonatavu mwana wa Lekavi ũla waĩ nzĩanĩ amũthaũĩte. Yeũ nĩwamũkethisye na amũkũlya atĩĩ, “We wĩ na wĩw'ano nakwa o tondũ nyie nĩ na wĩw'ano naku?” Yonatavu nĩwamũsũngĩie amwĩa, “Ĩĩ, nĩ na wĩw'ano naku.” Yeũ nĩwamwĩie atĩĩ, “Ethĩwa ũu nĩ w'o, nengeleelye kw'oko kwaku.” Yonatavu nĩweekie ũu, nake Yeũ amũlĩsya ĩkasyanĩ yake ya kaũ.

16Yeũ nĩweeie Yonatavu atĩĩ, “Ũka tũendany'e nĩ kana wĩyonee ũndũ nĩyumĩtye vala ve Mwĩai Ngai.” Nĩmaendanisye me vamwe ĩkasyanĩ nginya Samalia.

17Yĩla mavikie vo, Yeũ nĩwooaie andũ onthe ala maĩ ma mũsyĩ ũmwe na Aavu; ndaatialya o na ũmwe. Eekie kwĩanana na ũndũ Mwĩai Ngai weeĩte Eliya kana akeeka.

18Yeũ nĩweetie andũ ma Samalia moombana vamwe na amea atĩĩ, “Aavu nĩwathũkũmie vanini ngai ya mũvw'anano ĩla yĩtawa Mbaali, ĩndĩ nyie nĩngũmĩthũkũma mũno.

19Ĩtai athani ma Mbaali onthe, athaithi make onthe, na athembi make onthe moke; vai mũndũ wĩ na mwanya wa kũlea kũka. Nĩngũthembea Mbaali nthembo nene, na mũndũ o na wĩva ũla ũteĩthĩwa vo akooawa.” (Ũũ waĩ mũvango wa Yeũ wa kĩmbithĩ, nũndũ endaa kũaa andũ ala mathaithaa Mbaali.)

20Yeũ nĩwaneenie asya atĩĩ, “Tavany'ai mwasye kana kwĩ wũmbano wa ũthaithi wa kũnenga Mbaali ndaĩa.” Kwoou nĩmatavanisye ũu.

21Yeũ nĩwatũmanie kĩla vandũ nthĩ ya Ĩsilaeli yonthe, na andũ onthe ala mathaithaa Mbaali mooka; vai ũmwe waalea kũka. Onthe nĩmalikile ĩkalũnĩ ya Mbaali mausũa, kuma ngalĩko ĩmwe kũvika ĩla ĩngĩ.

22Nĩvo ĩndĩ Yeũ weeaĩie mũthembi ũla wanengetwe wĩa wa kũũngamĩa ngũa ntheu sya kĩ-ũthaithi amwĩa atĩĩ, “Nenga athaithi ma Mbaali onthe ngũa.” Kwoou nĩwamanengie ngũa.

23Ĩtina wa ũu, Yeũ nĩwalikile ĩkalũnĩ e na Yonatavu mwana wa Lekavi na eea andũ ala maĩ vo atĩĩ, “Sisyai nesa wĩthĩe no athaithi ma Mbaali oka me vo, na vai mũthaithi o na wĩva wa Mwĩai Ngai ũnalika.”

24Nĩvo ĩndĩ Yeũ e na Yonatavu malikile mathembee Mbaali nthembo na nthembo ya kũvĩvw'a. Yeũ aĩ anaũngamya aũme mĩongo nyanya nza wa ĩkalũ na akameaĩa akamea atĩĩ, “No nginya mũae andũ aa onthe; mũndũ o na wĩva ũla ũkũeka ũmwe woo avonoke athi, eĩva na thayũ wake mwene.”

25Yeũ amina kũthemba nthembo ĩsu oou, nĩweeaĩie asikalĩ ala masungaa vamwe na anene ma asikalĩ amea atĩĩ, “Likai mũmoae onthe; mũikaeke mũndũ o na ũmwe akĩe athi.” Kwoou nĩmalikile mooaa onthe na ũvyũ, na makusya mĩĩ yoo mamyumaalya nza. Nĩvo ĩndĩ malikile kasũmbanĩ ka nthĩnĩ ka ĩkalũ yĩu,

26maumaalya kĩtuĩ kĩtheu kĩla kyaĩ vo, na makĩvĩvya.

27Kwoou nĩmaanangie kĩtuĩ kĩu kĩtheu vamwe na ĩkalũ, na matw'ĩkĩthya ĩkalũ yĩu kyoo. Kũvika o na ũmũnthĩ ĩkalũ yĩu nĩ kyoo.

28Ũu nĩw'o Yeũ waminie ũthaithi wa Mbaali nthĩ ya Ĩsilaeli.

29Ĩndĩ ndaaeka kwĩka naĩ ya Yelovoamu mwana wa Nevati, ũla watumie andũ ma Ĩsilaeli meka naĩ ya kũthaitha tũsalũ twa thaavu, tũla waũngamĩtye Mbethi-eli na Ndani.

30Mwĩai Ngai nĩwaneenie na Yeũ amwĩa atĩĩ, “Nũndũ nĩwĩkĩte nesa kwa kũaa andũ ma mũsyĩ wa Aavu kwĩanana na ũndũ navangĩte kwĩka, nzyawa syaku ikasumbĩka Ĩsilaeli nginya nzyawa yaku ya kana.”

31Ĩndĩ Yeũ ndaatĩĩa na ngoo yake yonthe mĩao ya Mwĩai Ngai, Ngai wa Ĩsilaeli. Aatĩĩie ngelekany'o nthũku ya Yelovoamu ũla watumie andũ ma Ĩsilaeli malika naĩnĩ.

32Ĩvindanĩ yĩu Mwĩai Ngai nĩwambĩlĩĩlye kũola kĩsio kya nthĩ ya Ĩsilaeli. Aasaeli mũsumbĩ wa Silia nĩwasindie andũ ma Ĩsilaeli, ala maĩ kĩsionĩ kyoo kya nthĩ kĩla kĩ

33ngalĩko ya wumĩlonĩ wa syũa ya Ũsĩ wa Yolotani. Nĩwasindie andũ ma Ĩsilaeli ala maĩ kĩsionĩ kĩu kũthi ngalĩko ya ĩtheo, nginya ndũanĩ ya Aloeli ĩla yĩ Ũsĩnĩ wa Alinoni. Kĩsionĩ kĩĩ nĩvo vaĩ kĩsio kĩla kĩtawa Ngileati na Mbasani, vala mbaĩ ya Ngandi, ya Lũveni, na ya Manase syekalaa.

34Maũndũ ala angĩ Yeũ weekie yĩla wasumbĩkĩte, vamwe na meko make ma ũkũmbaũ, maandĩkĩtwe Ĩvukunĩ ya Maũndũ ma Mavinda ma Asumbĩ ma Ĩsilaeli.

35Nĩwakwie na athikwa Samalia, na Yeoaasi mwana wake atw'ĩka mũsumbĩ ĩtina wake.

36Yeũ asumbĩkie Ĩsilaeli vandũ va myaka mĩongo ĩlĩ na nyanya e Samalia.

← Chapter 9 Jump to: Chapter 11 →