2 Kings 5

Kamba (MBIVILIA ŨVOO MŨSEO)

← Chapter 4 Jump to: Chapter 6 →

1Naamani aĩ mũnene wa asikalĩ ma kaũ ma mũsumbĩ wa Silia. Nĩwanengetwe ndaĩa mũno nĩ mũsumbĩ wa Silia nũndũ Mwĩai Ngai nĩwatumĩte asikalĩ ma Silia masinda kaũnĩ matongoew'e nĩwe. Aĩ mũsikalĩ ngũmbaũ, ĩndĩ aĩ na ũwau wa mangũ.

2Ĩvinda yĩmwe, yĩla asikalĩ ma Silia mavithũkĩie Ĩsilaeli, nĩmakwatie kelĩtu kamwe makatwaa nthĩ ya Silia ke katave. Kelĩtu kau nĩkatw'ĩkie mũthũkũmi wa mũka wa Naamani.

3Mũthenya ũmwe kelĩtu kau nĩkaneenie na mũka wa Naamani kamwĩa atĩĩ, “Nenda kethĩwa mũnene wakwa nũthi kũla kwĩ mwathani ũla wĩkalaa Samalia! Mwathani ũsu no amũvosye ũwau wake.”

4Yĩla Naamani weewie ũu, nĩwaendie vala ve mũsumbĩ na amũtavya ũndũ kelĩtu kau kasya.

5Mũsumbĩ nĩweeie Naamani atĩĩ, “Enda o yu, nĩngũkũandĩkĩa valũa ũtwaĩe mũsumbĩ wa Ĩsilaeli.” Kwoou Naamani nĩwambĩlĩĩlye kyalo. Aendie akuĩte silĩva wa kĩlo maana atatũ na mĩongo ĩna, thaavu wa kĩlo mĩongo mũonza, na ngũa ĩkũmi nzeo sya kũkũany'a.

6Valũa ũla Naamani watwaĩie mũsumbĩ wa Ĩsilaeli waandĩkĩtwe ũũ: “Nĩkũandĩkĩa valũa ũũ ngũmanyĩthye kana nĩnatũma mũthũkũmi wakwa Naamani, nĩ kana ũmũvosye ũwau wake wa mangũ.”

7Yĩla mũsumbĩ wa Ĩsilaeli wasomie valũa ũsu, nĩwatembũangie ngũa syake nĩ kũsaanĩw'a na akũlya atĩĩ, “Mũsumbĩ wa Silia atonya ata kũsũanĩa kana nĩndonya kũvosya mũndũ ũũ? Eona nyie ta nĩ Ngai, ũla ũtonya kũnengane thayũ kana akoaa? Ũu wĩonany'a nesa kana nũkwenda tũthokoane!”

8Yĩla mwathani Elisa weewie kana mũsumbĩ wa Ĩsilaeli nũtembũangie ngũa syake, nĩwatũmanie vala ve mũsumbĩ amũkũlĩtye atĩĩ, “Ũtembũangie ngũa syaku nĩkĩ? Tũma mũndũ ũsu oke vala nĩĩ, nake nũkũmanya kana Ĩsilaeli ve mwathani!”

9Kwoou Naamani e na mbalasi syake na makasya make ma kaũ, nĩwaendie aũngama mũomonĩ wa nyũmba ya Elisa.

10Elisa nĩwatũmie mũndũ athi vala ve Naamani amwĩe atĩĩ, “Enda Ũsĩnĩ wa Yolotani ũkathambe mavinda mũonza, na mwĩĩ waku nũũvow'a na ũyĩthĩwa wĩ mũtheu.”

11Ĩndĩ Naamani nĩwaumie vau athi athatĩte na asya atĩĩ, “Nĩĩsilasya kana kwa w'o nũkumaala oke vaa nĩĩ, avoye Mwĩai Ngai wake, avyũlye kw'oko kwake ĩũlũ wa vala ve ũwau, na aimbosya ũwau wakwa wa mangũ.

12Nĩkũlya, w'o Ũsĩ wa Avana na wa Vaalivali ila syĩ Ndamasikũ, ti nzeo mbee wa mbũsĩ syonthe ila syĩ Ĩsilaeli? Ndyĩĩ ndonya kũthambĩa mbũsĩnĩ isu ngavoa?” Kwondũ wa ũu Naamani nĩweethyũũie athi athatĩte.

13Athũkũmi ma Naamani nĩmaendie vala ũĩ mamwĩa atĩĩ, “Mũnene, kethĩwa mwathani ũsu akwĩa wĩke ũndũ mũnene, ndwĩthĩwa wawĩka? Yu wĩlea nĩkĩ kũthi ũkathamba o ũndũ we wakwĩa ũthi ũthambe nĩ kana ũvoe?”

14Kwoou Naamani nĩwatheeie Ũsĩnĩ wa Yolotani, na eeyĩinda kĩw'ũnĩ kya w'o mavinda mũonza, o ũndũ Elisa wamwĩĩte nĩeke. Nĩwavoiw'e mwĩĩ wake na kĩkonde kyake kyekala ta kya kana kanini.

15Nĩvo ĩndĩ Naamani, e vamwe na andũ ala maendanĩtye nake, wasyokie vala ve Elisa. Nĩwaũngamie mbee wake na asya atĩĩ, “Yu nĩnamanya kana vai Ngai ĩũlũ wa nthĩ, ate o nthĩnĩ wa Ĩsilaeli. Nĩngũkwĩsũva wĩtĩkĩle ngũnenge mũthĩnzĩo.”

16Elisa nĩwamũsũngĩie amwĩa atĩĩ, “Nĩngwĩvĩta ĩsyĩtwanĩ ya Mwĩai Ngai ũla wĩ thayũ, Ngai ũla nĩthũkũmaa, kana ndiĩtĩkĩla ũnenge kĩndũ.” Naamani nĩwathing'ĩĩisye Elisa etĩkĩle mũthĩnzĩo, ĩndĩ alea.

17Kwoou Naamani nĩwaisye atĩĩ, “Ethĩwa ndwĩĩtĩkĩla mũthĩnzĩo kuma kwakwa, eka nose mũthanga ũtonya kũkuwa nĩ nyũmbũ ilĩ nĩnũke naw'o nũndũ kuma yu na kũendeea, ndikambĩla kumĩsya ngai o na yĩva nthembo kana nthembo sya kũvĩvw'a, ate o kumĩsya Mwĩai Ngai.

18Ĩndĩ Mwĩai Ngai nĩandekeae ũndũnĩ ũũ ũmwe: Yĩla mũnene wakwa mũsumbĩ walika ĩkalũnĩ ya ngai ya mũvw'anano yĩtawa Limoni, athaithe eyaĩĩsye kw'okonĩ kwakwa, nakwa ngĩkumana; nakumana nĩ nthĩnĩ wa nyũmba ĩsu ya Limoni, Mwĩai Ngai nandekeae ũndũ ũsu.”

19Elisa nĩweeie Naamani atĩĩ, “Enda na mũuo.” Naamani aendanga vandũ va mũendo mũnini,

20Ngeasi, mũthũkũmi wa Elisa nĩwasũanĩie asya, “Mũnene wakwa aeka Naamani athi ataĩvĩte kĩndũ! Eaĩlĩte kwĩtĩkĩla kĩla Mũsilia ũsu eemũnengete. Nĩngwĩvĩta ĩsyĩtwanĩ ya Mwĩai Ngai ũla wĩ thayũ, kana nĩngũmũatĩĩa nose kĩndũ kuma kwake.”

21Kwoou Ngeasi nĩweekalaatile aatĩĩa Naamani. Yĩla Naamani woonie mũndũ amũatĩĩe asembete, nĩwaumie ĩkasyanĩ yake ya kaũ nĩ kana akomane nake. Yĩla makomanie, Naamani nĩwakũlilye Ngeasi atĩĩ, “Ve vandũ ve thĩna?”

22Ngeasi nĩwamũsũngĩie amwĩa atĩĩ, “Vai thĩna, ĩndĩ mũnene wakwa nĩwandũma nũke ngwĩe kana andũ elĩ kuma nguthunĩ ya athani, ala mekalaa nthĩ yĩ iĩma ya Evalaimu, nĩmooka oyu. Nũkwenda ũmanenge kĩlo mĩongo ĩtatũ na inya sya silĩva, na ngũa ilĩ nzeo sya kũkũany'a.”

23Naamani nĩwamũsũngĩie amwĩa atĩĩ, “Mwa osa kĩlo mĩongo thanthatũ na nyanya sya silĩva.” Nĩwathing'ĩĩisye Ngeasi nginya eetĩkĩla kwosa, na amwĩkĩĩa silĩva ũsu mĩvukonĩ ĩlĩ, na amĩnenga athũkũmi make elĩ na amatũma matongosye mamũkuĩe. O ta ũu nĩwoosie ngũa ilĩ nzeo sya kũkũany'a amanenga makue.

24Yĩla mavikie kĩĩmanĩ vala Elisa wekalaa, Ngeasi nĩwoosie ĩla mĩvuko ĩlĩ na ila ngũa kuma kwa ala athũkũmi na aitwaa nyũmba kwake. Nĩweeie athũkũmi asu masyoke namo mathi.

25Nĩwasyokie nyũmba nthĩnĩ na Elisa amũkũlya atĩĩ, “Ngeasi ũendie nakũ?” Ngeasi nĩwamũsũngĩie amwĩa, “Nyie mũthũkũmi waku ndinathi vandũ.”

26Ĩndĩ Elisa nĩwamũkũlilye atĩĩ, “Veva wakwa ũyĩĩ vo yĩla mũndũ ũsu wauma ĩkasyanĩ yake ya kaũ oke kũkomana naku? Yĩĩ nĩyo ĩvinda ya kwosa mbesa kana kwosa ngũa, mĩũnda ya mĩthata na ya mĩsavivũ, ndĩthya sya malondu na sya ng'ombe, kana athũkũmi aka na athũkũmi aũme?

27Ũwau wa mangũ ũla Naamani ũnawaĩte, nũũkũkwata we vamwe na nzyawa syaku ĩvindanĩ yonthe yĩla yũkĩte!” Nĩvo ĩndĩ Ngeasi waumie vala ve Elisa na athi. Ayuma vo aĩ na ũwau wa mangũ; kĩkonde kya mwĩĩ wake kyeeũvĩte ta ĩa.

← Chapter 4 Jump to: Chapter 6 →