2 Kings 12

Kamba (MBIVILIA ŨVOO MŨSEO)

← Chapter 11 Jump to: Chapter 13 →

1Mwakanĩ wa mũonza wa kũsumbĩka kwa Yeũ mũsumbĩ wa Ĩsilaeli, Yoasi nĩwatw'ĩkie mũsumbĩ wa Yuta. Asumbĩkie myaka mĩongo ĩna e Yelũsalemu. Inyia wake eetawa Nzivia kuma ndũanĩ ya Mbeeli-sieva.

2Yoasi nĩweekaa maũndũ ala mamwendeeasya Mwĩai Ngai ĩvindanĩ yonthe yĩla waĩ thayũ, nũndũ mũthembi Yeoiata nĩwamũmanyĩasya.

3Ĩndĩ ũu wĩ o vo, Yoasi ndaa ananga kũndũ kũla andũ mathaithĩaa iĩmanĩ ĩũlũ; andũ nĩmaendeeie kũthembea na kũvĩvĩsya ũvani kw'o.

4Yoasi nĩwaneenie na athembi amea atĩĩ, “Ũmbany'ai mbesa syonthe ila ietawe Ĩkalũnĩ ya Mwĩai Ngai syĩthĩwe nthembo ntheu, mbesa ila mũndũ ũtalilwe kumya, na mbesa ila ietawe nĩ andũ syĩthĩwe nthembo yumĩtw'e na ngoo ya kwenda.

5Kĩla mũthembi nĩosae mbesa kuma andũnĩ onthe, na mbesa isu nitũmĩwe kũseũvya kũndũ kũla kwĩoneka kwĩ kwanangĩku Ĩkalũnĩ.”

6Ĩndĩ o na kũvika mwaka wa mĩongo ĩlĩ na itatũ wa kũsumbĩka kwa Yoasi, athembi mayaĩ maaĩsa kũseũvya kũndũ kũla kwaĩ kwanangĩku Ĩkalũnĩ.

7Kwoou Yoasi nĩweetie mũthembi Yeoiata, vamwe na athembi ala angĩ na amakũlya atĩĩ, “Mũleete kũseũvya kũndũ kũla kwanangĩku Ĩkalũnĩ nĩkĩ? Kwambĩĩa yu, mũikambĩla kwia mbesa ila mũnengawe; no nginya mũkainenganae nĩ kana wĩa wa kũseũvya kũla kwanangĩku Ĩkalũnĩ ũtethw'e.”

8Athembi nĩmeetĩkĩlanile kana maisyoka kwosa mbesa ĩngĩ kuma andũnĩ, na kana maiseũvya kũla kwanangĩku Ĩkalũnĩ.

9Nĩvo ĩndĩ Yeoiata woosie ĩsandũkũ na atonya ĩima ngunĩkonĩ ya yo. Nĩwaiie ĩsandũkũ yĩu ũtee wa kĩthembeo, ngalĩko ya kw'oko kwa aũme kwa mũndũ ailika Ĩkalũnĩ. Athembi ala meethĩawa wĩanĩ maithũkũma mũomonĩ wa Ĩkalũ, nĩmoosaa mbesa syonthe ila syaetawe makasyĩkĩa ĩsandũkũnĩ yĩu.

10Yĩla moona kana ĩsandũkũnĩ ve mbesa mbingĩ, mũandĩki wa mũsumbĩ vamwe na Mũthembi Mũnene, nĩmookaa makatala mbesa ila syaetawe Ĩkalũnĩ ya Mwĩai Ngai na kũsyĩkĩa mĩvukonĩ.

11Ĩtina wa kũmanya ũndũ mbesa isu syĩana, nĩmainengae andũ ala manyuvĩtwe kũũngamĩa wĩa wa kũseũvya kũla kwaĩ kwanangĩku Ĩkalũnĩ, namo maiĩva andũ ala matethasya wĩa wa kũseũvya Ĩkalũ kũla yaĩ yanangĩku; nĩmaĩvaa aseũvya ma syĩndũ sya mbwaũ na ala maakaa,

12ala makaa nyũmba na mavia, na ala masaa mavia. Mbesa isu o ta ũu nĩsyatũmĩawa kũthooa mbwaũ na mavia mase, vamwe na kwĩanĩsya mavata angĩ onthe ma kũseũvya kũla kwaĩ kwanangĩku Ĩkalũnĩ ya Mwĩai Ngai.

13Mbesa ila syaetawe Ĩkalũnĩ iyaatũmĩwa kũseũvya mbakũli sya silĩva, syĩndũ sya kũvosya taa, mbakũli sya kũminzangĩsya, masoo kana syĩndũ ingĩ o na syĩva sya thaavu kana silĩva, ila syatũmĩawa Ĩkalũnĩ.

14Mbesa isu syonthe syatũmĩiwe kũĩva athũkũmi, na kwa kũthooa syĩndũ sya kũseũvya kũla kwaĩ kwanangĩku Ĩkalũnĩ.

15Mayaaĩthĩwa na vata wa kũmanya kuma kwa ala manengetwe wĩa wa kũĩva athũkũmi ũndũ mbesa syatũmĩkaa, nũndũ matethasya wĩa ũsu na ũĩkĩĩku.

16Mbesa ila syaumaw'a syĩthĩwe nthembo kwondũ wa mavĩtyo, na ila syaumaw'a syĩthĩwe nthembo kwondũ wa ũekeo wa naĩ, iyeekĩawa yĩla ĩsandũkũnĩ yaĩ Ĩkalũnĩ; syeethĩawa syĩ sya athembi.

17Ĩvindanĩ yĩu, Aasaeli mũsumbĩ wa Silia nĩwavithũkĩie ndũa ya Ngathi na amĩsinda. Nĩvo ĩndĩ wavangie kũvithũkĩa Yelũsalemu.

18Yoasi mũsumbĩ wa Yuta nĩwoosie syĩndũ syonthe ila syavathĩtwe syĩthĩwe syĩ ntheu nĩ asumbĩ ma Yuta ala maĩ mbee wake: Yeosavati, Yeolamu na Aasia, vamwe na ila we mwene wavathĩte, na thaavu ũla waĩ kũndũnĩ kwa kwia ũthwii wa Ĩkalũ, na ũla waĩ nyũmbanĩ ya kĩ-ũsumbĩ, atwaĩa Aasaeli mũsumbĩ wa Silia. Kwoou Aasaeli nĩwaekie kũvithũkĩa Yelũsalemu.

19Maũndũ ala angĩ Yoasi weekie yĩla wasumbĩkĩte maandĩkĩtwe Ĩvukunĩ ya Maũndũ ma Mavinda ma Asumbĩ ma Yuta.

20Anini ma Mũsumbĩ Yoasi nĩmamũseũvĩisye mũvango mũthũku na mamũaĩa vandũ vetawa Nyũmba ya Milo nzĩanĩ ĩla ĩtheete Silila.

21Anini make ala mamũaie maĩ Yosakali mwana wa Simeathi, na Yeosavatu mwana wa Someli. Yoasi nĩwakwie na athikwa vala aaũmae make mathikĩtwe Ndũanĩ ya Ndeviti. Amasia mwana wake nĩwatw'ĩkie mũsumbĩ ĩtina wake.

← Chapter 11 Jump to: Chapter 13 →