2 Kings 16

Kamba (MBIVILIA ŨVOO MŨSEO)

← Chapter 15 Jump to: Chapter 17 →

1Mwakanĩ wa ĩkũmi na mũonza wa kũsumbĩka kwa Veka mwana wa Lemalia mũsumbĩ wa Ĩsilaeli, Aasu mwana wa Yothamu nĩwatw'ĩkie mũsumbĩ wa Yuta.

2Aasu atw'ĩkie mũsumbĩ e na ũkũũ wa myaka mĩongo ĩlĩ. Asumbĩkie vandũ va myaka ĩkũmi na thanthatũ e Yelũsalemu. Nĩwavĩtĩisye Mwĩai Ngai, Ngai wake na ndaatĩĩa ngelekany'o nzeo ya Ndeviti ũmae wake.

3Nĩwaatĩĩie ngelekany'o nthũku ya asumbĩ ma Ĩsilaeli. O na nĩwathembie mwana wake mwene ethĩwe nthembo ya kĩvĩvw'a, aatĩĩe ngelekany'o ya maũndũ mathũku ala meekawa nĩ andũ ma nthĩ ingĩ, ala Mwĩai Ngai walũngilye mauma nthĩ ya Kanaani, yĩla andũ ma Ĩsilaeli maendee kũmĩlika.

4Nĩwaumĩasya nthembo na kũvĩvĩsya ũvani kũndũnĩ kũla andũ mathaithĩaa iĩmanĩ ĩũlũ, tũlĩmanĩ, na ungu wa kĩla mũtĩ wĩ matũ maingĩ.

5Nĩvo ĩndĩ Lesini mũsumbĩ wa Silia, na Veka mwana wa Lemalia mũsumbĩ wa Ĩsilaeli, mambatie Yelũsalemu mamĩvithũkĩa na mamĩlingĩla, ĩndĩ mayaasinda Aasu.

6Ĩvindanĩ yĩu, mũsumbĩ wa Etomu nĩwakwatie ndũa ya Elathi ĩngĩ, na alũngya Ayuti ala matwĩe vo. Aetomu nĩmatũie ndũanĩ ĩsu kũvika o na ũmũnthĩ.

7Aasu nĩwatũmie andũ kũla kwĩ Tikilathi-vileseli, mũsumbĩ wa nthĩ ya Asuli mathi makamwĩe atĩĩ, “Nyie nĩ mũthũkũmi waku wĩyumĩtye. Ũka ũndangĩĩe kuma vala ve mũsumbĩ wa Silia na wa Ĩsilaeli ala maendee kũmbũkita.”

8Aasu nĩwoosie silĩva na thaavu kuma Ĩkalũnĩ, na kuma kũla kwaiawa ũthwii nyũmbanĩ ya kĩ-ũsumbĩ, na anengane ũtwaĩwe mũsumbĩ wa Asuli ta mũthĩnzĩo.

9Tikilathi-vileseli mũsumbĩ wa Asuli nĩweetĩkĩlile ũndũ Aasu wamwĩie, na kwoou avithũkĩa ndũa ya Ndamasikũ na amĩkwata. Nĩwooaie Lesini, na akwata andũ ma ndũa ĩsu amatwaa ndũanĩ ya Kili me ove.

10Yĩla Aasu waendie Ndamasikũ akakomane na Tikilathi-vileseli, nĩwoonie kĩthembeo kũu. Nĩwatũmĩie mũthembi Ulia visa wa kĩthembeo kĩu ũkululĩtwe ũndũ kyakĩtwe kĩilyĩ vyũ.

11Kwoou mũthembi Ulia nĩwaakie kĩthembeo kĩilyĩ ta kĩu vyũ akĩmina Aasu atanasyoka.

12Yĩla Aasu wasyokie kuma Ndamasikũ, na oona kĩthembeo kĩu; nĩwakĩthengeeie na athembea ĩũlũ wakyo.

13Nĩwathembie nthembo yake ya kũvĩvw'a, nthembo ya ngetha ya mbaa mbeke, eta nthembo yake ya kũnyuwa ya ndivai, na aminzangĩsya nthakame ya nthembo yake ya ngwatanĩo kĩthembeonĩ kĩu.

14Nĩwathamisye kĩthembeo kya kyũma kya mbulonzi kĩla kyavathĩtwe kwondũ wa Mwĩai Ngai, kĩla kyaĩ katĩ wa Ĩkalũ na kĩthembeo kĩu kyake, akĩtwaa ngalĩko ya ĩũlũ ya kĩthembeo kĩu waakĩte.

15Nĩvo ĩndĩ weeaĩie Ulia amwĩa atĩĩ, “Thembeaa kĩthembeonĩ kĩĩ kĩnene kyakwa nthembo sya kũvĩvw'a sya kwakya, na nthembo sya wĩoo sya ngetha ya mbaa mbeke. O ta ũu thembeaa vo nthembo sya kũvĩvw'a na sya ngetha ya mbaa mbeke sya mũsumbĩ na sya andũ onthe ma Ĩsilaeli, na nthembo syoo sya kũnyuwa. Minzangĩasya kĩthembeonĩ kĩĩ nthakame ya nthembo sya kũvĩvw'a, na ya nyamũ ila syumĩtw'e syĩthĩwe nthembo. Ĩndĩ ngatũmĩaa kĩthembeo kĩĩ kya mbulonzi, yĩla ngwenda kũmanya ũndũ kuma kwa Mwĩai Ngai.”

16Mũthembi Ulia nĩweekie maũndũ onthe ala mũsumbĩ Aasu wamwĩaĩie.

17Mũsumbĩ Aasu nĩwavetangie tũkasya twa mbulonzi tũla twatũmĩawa Ĩkalũnĩ, na avetanga tũlaĩ tũla twailĩĩlwe ĩũlũ wa tũkasya tũu. O ta ũu nĩwaumisye ĩtangi yĩla yailĩĩlwe nzaũnĩ iseũvĩtw'e na mbulonzi, na ayilĩĩla vandũ vaseũvĩtw'e na mavia.

18Nĩwavetangie ĩeema ya mwanya yĩla yatũmĩawa ũthaithinĩ wa Savato, na avinga mũvĩa ũla watũmĩawa nĩ asumbĩ ma Yuta mailika Ĩkalũnĩ. Eekie maũndũ asu onthe nĩ kana endeesye Tikilathi-vileseli mũsumbĩ wa Asuli.

19Maũndũ ala angĩ Aasu weekie yĩla wasumbĩkĩte, maandĩkĩtwe Ĩvukunĩ ya Maũndũ ma Mavinda ma Asumbĩ ma Yuta.

20Aasu nĩwakwie na athikwa mbũanĩ ila syathikawa asumbĩ Ndũanĩ ya Ndeviti. Esekia mwana wake nĩwatw'ĩkie mũsumbĩ ĩtina wake.

← Chapter 15 Jump to: Chapter 17 →