2 Kings 18

Kamba (MBIVILIA ŨVOO MŨSEO)

← Chapter 17 Jump to: Chapter 19 →

1Mwakanĩ wa katatũ wa kũsumbĩka kwa Osea mwana wa Ela mũsumbĩ wa Ĩsilaeli, Esekia mwana wa Aasu nĩwatw'ĩkie mũsumbĩ wa Yuta.

2Atw'ĩkie mũsumbĩ e na ũkũũ wa myaka mĩongo ĩlĩ na ĩtano. Asumbĩkie vandũ va myaka mĩongo ĩlĩ na kenda e Yelũsalemu. Inyia wake eetawa Aviya mwĩĩtu wa Nzekalia.

3Esekia eekie maũndũ ala mamwendeeasya Mwĩai Ngai, o tondũ ũmae wake Ndeviti weekaa.

4Nĩwaanangie kũndũ kwa kũthaithĩa ngai sya mĩvw'anano, aananga ituĩ sya ũthaithi na atilanga mĩvw'anano ya ngai nga ĩla yĩtawa Asela. O ta ũu nĩwatilangile ilungu nzoka ya mbulonzi ĩla Mwose waseũvĩtye, nĩkwĩthĩwa kũvika ĩvinda yĩu andũ ma Ĩsilaeli nĩmamĩtoeeasya ũvani na yeetawa Neusitani.

5Esekia nĩwaĩkĩĩaa Mwĩai Ngai, Ngai wa Ĩsilaeli. Katĩ wa asumbĩ ala masumbĩkie Yuta mbee wake, na ĩtina wake, kũyaaĩthĩwa mũsumbĩ ũngĩ ũilyĩ take.

6Aĩ mũĩkĩĩku kũla kwĩ Mwĩai Ngai na ndaalea kũmwĩw'a; nĩwaatĩĩaa na kĩthito mĩao yonthe ĩla Mwĩai Ngai weeaĩĩte Mwose.

7Mwĩai Ngai aĩ vamwe nake; nĩwaendeeaa nesa maũndũnĩ make onthe. Nĩwaleanile na mũsumbĩ wa Asuli na ndaamũthũkũma.

8Nĩwokitie Avilisiti amasinda na amalũngya kuma kũla matwĩe ndũanĩ nini na nene, vamwe na ndũa ya Ngasa na kĩsio kĩla kyamĩthyũlũlũkĩte.

9Mwakanĩ wa kana wa kũsumbĩka kwa Esekia, ũla nĩw'o waĩ mwaka wa mũonza wa kũsumbĩka kwa Osea mwana wa Ela mũsumbĩ wa Ĩsilaeli, Salimaneseli mũsumbĩ wa Asuli nĩwaendie kũkita Samalia na amĩlingĩla.

10Mũminũkĩlyonĩ wa myaka ĩsu ĩtatũ Asuli nĩmakwatie Samalia. Kwoou Samalia yakwatiwe mwakanĩ wa thanthatũ wa kũsumbĩka kwa Esekia, ũla nĩw'o waĩ mwaka wa kenda wa kũsumbĩka kwa Osea, mũsumbĩ wa Ĩsilaeli.

11Mũsumbĩ wa Asuli nĩwatwaie andũ ma Ĩsilaeli nthĩ ya Asuli me ove. Nĩwaiie amwe moo ndũanĩ ya Aalaa, na aia angĩ kĩsionĩ kĩtawa Ngosani vakuvĩ na Ũsĩ wa Avoli, na atwaa angĩ ndũanĩ sya Metia.

12Samalia yasindiwe nũndũ Andũ ma Ĩsilaeli mayaaĩw'a Mwĩai Ngai, Ngai woo, ĩndĩ nĩmaanangie ũtianĩo ũla waseũvĩtye namo. O ta ũu mayaatĩĩaa mĩao ĩla manengiwe nĩ Mwose, mũthũkũmi wa Mwĩai Ngai. Mayeethukĩĩasya mĩao, o na mayeekaa ũndũ ĩkwasya.

13Mwakanĩ wa ĩkũmi na inya wa kũsumbĩka kwa Esekia, Senakelivu mũsumbĩ wa Asuli nĩwavithũkĩie ndũa syonthe mbiĩĩe sya Yuta na aikwata.

14Kwoou Esekia mũsumbĩ wa Yuta nĩwatũmanie Lakisi kũla kwĩ mũsumbĩ wa Asuli ayasya atĩĩ, “Nĩnĩvĩtĩtye; ekana nakwa, na nĩngũũtuva kĩla ũkwenda.” Mũsumbĩ wa Asuli nĩweetisye Esekia kĩlo ngili ĩkũmi sya silĩva, na kĩlo ngili ĩmwe sya thaavu.

15Kwoou Esekia nĩwamũnengie silĩva w'onthe ũla waĩ Ĩkalũnĩ, na ũla waĩ kũla ũthwii wa nyũmba ya kĩ-ũsumbĩ waiawa.

16O ta ũu nĩwoombũie thaavu ũla waĩ mĩomonĩ ya Ĩkalũ, na ũla we mwene woombĩĩie ituĩnĩ sya mĩomo, na w'onthe aũnenge mũsumbĩ wa Asuli.

17Nĩvo ĩndĩ Senakelivu mũsumbĩ wa Asuli watũmie mũnene wa atongoi make ma asikalĩ, mũnene wa asikalĩ onthe ma kaũ, na mũtongoi wa asikalĩ, vamwe na asikalĩ aingĩ kuma Lakisi, mathi Yelũsalemu vala ve Esekia. Yĩla mavikie Yelũsalemu, nĩmaendie maũngama vakuvĩ na mũtaũ ũla wumĩtye kĩw'ũ ndianĩ ĩla yĩ ngalĩko ya ĩũlũ, nzĩanĩ nene ĩla ĩendete vandũ vetawa kwa Mũseũvya wa Ngũa.

18Nĩvo ĩndĩ matũmanie Mũsumbĩ Esekia, na mathaũwa nĩ Eliakimu mwana wa Ilikia, ũla waĩ mũsyaĩĩsya wa nyũmba ya mũsumbĩ, Sevina ũla waĩ mũandĩki, na Yoa mwana wa Asavu ũla waĩ mũandĩki wa maũndũ.

19Nĩvo ĩndĩ mũtongoi wa asikalĩ wameie atĩĩ, “Tavyai Mũsumbĩ Esekia mũmwĩe, ‘Mũsumbĩ wa Asuli ũla wĩ ndaĩa mũno eũkũlya: Nĩ kyaũ kĩkũnengete ũkũmbaũ ũsu wĩ naw'o?

20Wĩasya wĩ na mũvango mũseo na vinya wa kaũ, ĩndĩ ndeto syaku no sya mana. Nũũ ũla wĩkwatĩtye akũtetheesye nĩ kana ũng'endee?

21Yu weteelete andũ ma Misili makũtetheesye. Misili nĩ ta ndata ya mũangi mbatũkangu, ĩla ĩtonyaa mũndũ kw'oko, na ĩimwĩkĩa kĩtau eetw'ĩĩka nayo! Valao mũsumbĩ wa Misili ethĩawa ailyĩ ũu kwa onthe ala mamwĩkwatasya.’ ”

22Mũtongoi ũsu wa asikalĩ nĩwaendeeie kwasya atĩĩ, “Ethĩwa wĩmbĩa, ‘Twĩkwatĩtye Mwĩai Ngai, Ngai waitũ,’ ũsu tyo we Ngai ũla kũndũ kwake kwa kũthaithĩa na ithembeo syake, we Mũsumbĩ Esekia wavetie, na weea andũ ma Yuta na ma Yelũsalemu, mathaithĩae kĩthembeonĩ kĩla kĩ Yelũsalemu kĩ kyoka?

23Yu seũvyai wĩw'ano na mũnene wakwa mũsumbĩ wa Asuli, nakwa nĩngũũnenga mbalasi ngili ilĩ, ethĩwa ngalĩkonĩ ĩla yaku nũtonya kwona aũme meana ũu ma kũthi mailĩsĩte!

24Mũtonya ata kũsinda mũsikalĩ ũmwe, katĩ wa asikalĩ ma mũnene wakwa ala mate nguma, o na kau mũendee kwĩkwatya nthĩ ya Misili ĩmũnenge makasya ma kaũ, na asikalĩ ma kũkita malĩsĩte mbalasinĩ?

25Wĩsũanĩa nooka kũvithũkĩa nthĩ yaku na kũmyananga, ndatethetw'e nĩ Mwĩai Ngai? Mwĩai Ngai nĩwe ũmbĩie nĩvithũkĩe nthĩ yaku na ngĩmyananga.”

26Nĩvo ĩndĩ Eliakimu mwana wa Ilikia, Sevina na Yoa, meeie mũtongoi ũsu wa asikalĩ atĩĩ, “Nĩtũũkwĩsũva, neena naitũ na kĩthyomo kya Kĩalamaiki nũndũ nĩtũkĩsĩ. Eka kũneena naitũ ũitũmĩa Kĩevelania, nũndũ andũ ala me ũkũtanĩ nĩmethukĩĩsye.”

27Ĩndĩ mũtongoi ũsu wa asikalĩ nĩwamakũlilye atĩĩ, “Mwĩsũanĩa kana mũnene wakwa andũmĩte nũke kũmũtavya maũndũ aa, o inyw'ĩ vamwe na mũsumbĩ wenyu? Aiee, o na andũ ala me ũkũtanĩ nĩngũneena namo, ala no nginya maye mai moo ene, na mainyw'a maumao moo ene, o ũndũ inyw'ĩ mwĩĩka.”

28Nĩvo ĩndĩ mũtongoi ũsu wa asikalĩ waũngamie, na aneena na wasya mũnene na kĩthyomo kya Kĩevelania asya atĩĩ, “Ĩthukĩĩsyei ũndũ mũsumbĩ wa Asuli ũla wĩ nguma mũno ũkwasya!

29Mũsumbĩ easya atĩĩ, ‘Mũikaeke Esekia amũkenge. Ndatonya kũmũtangĩĩa kuma ũtonyinĩ wakwa.

30Mũikaeke amũsesenge mũĩkĩĩe Mwĩai Ngai aimwĩa: Vate nzika Mwĩai Ngai nũkũtũtangĩĩa; ndũa ĩno ndĩnenganwe ũtonyinĩ wa mũsumbĩ wa Asuli.’

31“Mũikethukĩĩsye Esekia. Mũsumbĩ wa Asuli easya atĩĩ, ‘Nĩtwĩw'ane na mũyĩnengane kũla nĩĩ. Mweeka ũu, kĩla ũmwe wenyu akaĩsaa nzavivũ sya mũsavivũ wake mwene, na makũyũ ma mũkũyũ wake mwene, na kũnyw'a kĩw'ũ kuma kĩthimanĩ kyake mwene,

32nginya yĩla nĩũka na ngĩmũtwaa nthĩ ĩilyĩ ta ĩno yenyu; nthĩ ĩvandawa lĩu wa ngetha ya mbaa mbeke na yĩ mĩsavivũ, nthĩ yĩ lĩu na ndivai ĩla nzeo. O ta ũu nthĩ ĩsu yĩ mĩtĩ ya mĩthata na ũkĩ wa nzũkĩ. Nyuvai thayũ na ti kĩkw'ũ! Mũiketĩkĩle Esekia amũkenge kwa kũmwĩa: Mwĩai Ngai nũkũtũtangĩĩa.’

33Ve ngai ya nthĩ o na yĩva, yaatangĩĩa andũ ma nthĩ ya yo kuma ũtonyinĩ wa mũsumbĩ wa Asuli?

34Ngai sya Amathi na Alivati iĩva? Ngai sya Sevalivaimu, Ena na Iva iĩva? Ve ĩmwe yaatangĩĩa Samalia kuma ũtonyinĩ wakwa?

35Ve ĩmwe ya ngai sya nthĩ isu, yaatangĩĩa nthĩ ya yo kuma ũtonyinĩ wakwa? Yu ĩndĩ Mwĩai Ngai atonya kũtangĩĩa Yelũsalemu kuma ũtonyinĩ wakwa ata?”

36Ĩndĩ andũ nĩmavindisye na mayaamũsũngĩa ũndũ, nũndũ Esekia nĩwameaĩĩte akamea atĩĩ, “Mũikamũsũngĩe ũndũ.”

37Nĩvo ĩndĩ Eliakimu, Sevina na Yoa, matembũangie ngũa syoo nĩ woo, na mathi kũtavya Mũsumbĩ Esekia ũndũ mũtongoi ũsu wa asikalĩ waisye.

← Chapter 17 Jump to: Chapter 19 →