2 Kings 3

Kamba (MBIVILIA ŨVOO MŨSEO)

← Chapter 2 Jump to: Chapter 4 →

1Yolamu mwana wa Aavu atw'ĩkie mũsumbĩ wa Ĩsilaeli mwakanĩ wa nyanya, wa kũsumbĩka kwa Yeosavati mũsumbĩ wa Yuta. Asumbĩkie vandũ va myaka ĩkũmi na ĩlĩ e Samalia.

2Nĩwavĩtĩisye Mwĩai Ngai, ĩndĩ ndaavĩtya mũno ũndũ ĩthe na inyia wake Yeseveli meekĩte. Nĩwaanangie kĩtuĩ kya ngai ya mũvw'anano ĩla yĩtawa Mbaali, kĩla ĩthe wake waseũvĩtye.

3Ĩndĩ o vamwe na ũu, nĩwatumie andũ ma Ĩsilaeli meka naĩ, o tondũ Yelovoamu mwana wa Nevati weekĩte vau mbeenĩ. Yolamu ndaaeka kwĩka naĩ isu.

4Mũsumbĩ Mesa wa Moavi nĩwaĩthasya malondu. Kĩla mwaka aaĩlĩte kũnenga mũsumbĩ wa Ĩsilaeli tũtena twa malondu ngili ĩana yĩmwe, vamwe na w'ĩa ũtilĩtwe ndũũmenĩ ngili ĩana yĩmwe.

5Ĩndĩ yĩla Aavu mũsumbĩ wa Ĩsilaeli wakwie, Mesa nĩwang'endeie mũsumbĩ wa Ĩsilaeli.

6Kwoou Mũsumbĩ Yolamu nĩwaumie Samalia na athi oombany'a asikalĩ ma Ĩsilaeli onthe.

7Nĩwatũmie andũ mathi kũla kwĩ Yeosavati mũsumbĩ wa Yuta makamwĩe atĩĩ, “Mũsumbĩ wa Moavi nũng'endeete. Nĩũkũlya kana nũkũendany'a nakwa tũkokite nake.” Mũsumbĩ Yeosavati nĩwamũsũngĩie amwĩa atĩĩ, “Ngaendany'a naku. Nyie naku twĩ kĩndũ kĩmwe. Andũ makwa no ũndũ ũmwe na maku, na mbalasi syakwa no ũndũ ũmwe na syaku.

8Tũkesĩla ngalĩko yĩva tũendete kũmavithũkĩa?” Yolamu nĩwamũsũngĩie amwĩa, “Tũkesĩla nzĩa ĩla yĩ weũnĩ wa Etomu.”

9Nĩvo ĩndĩ Mũsumbĩ Yolamu e na mũsumbĩ wa Yuta na wa Etomu mambĩlĩĩlye kyalo. Ĩtina wa kũthi vandũ va mĩthenya mũonza, asikalĩ ma kaũ nĩmathelelwe nĩ kĩw'ũ kyoo kya kũnyw'a, vamwe na kya nyamũ ila maĩ nasyo.

10Yolamu mũsumbĩ wa Ĩsilaeli nĩwaneenie aseng'ete akũlya atĩĩ, “Ũndũ ũũ nĩ mwaũ? Ngai anatũmbanisye vamwe ithyĩ twĩ asumbĩ atatũ nĩ kana atũnengane vala ve mũsumbĩ wa Moavi?”

11Mũsumbĩ Yeosavati nĩwakũlilye atĩĩ, “Kw'o kũũ no kwĩ mwathani wa Mwĩai Ngai, ũla tũtonya kũkũlya ũtao wa Mwĩai Ngai kwĩsĩla vala ũĩ?” Ũmwe wa anene ma asikalĩ ma mũsumbĩ wa Ĩsilaeli nĩwasũngĩie asya, “Elisa mwana wa Savati e kũũ. Aĩ mũtetheesya wa Eliya.”

12Mũsumbĩ Yeosavati nĩwaneenie asya atĩĩ, “Elisa nĩ mwathani wa w'o.” Kwoou asumbĩ asu me atatũ nĩmaendie vala ve Elisa.

13Elisa nĩwakũlilye mũsumbĩ wa Ĩsilaeli atĩĩ, “Wĩenda ngũtethye nĩkĩ? Thi ũkakũlye ũtao kũla kwĩ athani ma ĩthe waku na ma inyia waku.” Yolamu mũsumbĩ wa Ĩsilaeli nĩwamũsũngĩie amwĩa atĩĩ, “Aiee, Mwĩai Ngai nĩwe ũtũmbanĩtye vamwe ithyĩ asumbĩ atatũ, nĩ kana atũnengane vala ve mũsumbĩ wa Moavi.”

14Elisa nĩwamũsũngĩie amwĩa atĩĩ, “Nĩngwĩvĩta ĩsyĩtwanĩ ya Mwĩai Ngai Mwene Ũtonyi W'onthe ũla wĩ thayũ, na ũla nĩthũkũmaa kana kethĩwa ndiũtaĩa Yeosavati mũsumbĩ wa Yuta, ndiũngana naku.

15Ndetee mũndũ wĩsĩ kũkũna ngitaa.” Mũndũ ũsu aendee kũkũna ngitaa, vinya wa Mwĩai Ngai nĩwookie ĩũlũ wa Elisa,

16na asya atĩĩ, “Mwĩai Ngai easya ũũ: ‘Ĩnzai mĩtaũ kĩla vandũ mwandanĩ ũũ.

17O na vala mũiona kĩseve kana mbua, mwanda ũũ w'onthe nũkusũa kĩw'ũ, nenyu mũinyw'a mwĩ na indo syenyu na nyamũ ila ingĩ mwĩ nasyo.’ ”

18Elisa nĩwaendeeie kũneena asya atĩĩ, “Ũũ nĩ ũndũ ũte vinya kwa Mwĩai Ngai. Vamwe na ũu Mwĩai Ngai akatuma mũsinda Amoavi.

19Mũkasinda ndũa syoo syonthe ila mbiĩĩe ikalũlũmĩĩlw'a na ila nene. Mũkatemangĩĩa nthĩ mĩtĩ yoo yonthe ĩla mĩseo, na kũlinda ithima syoo syonthe, vamwe na kwananga isesi syoo ila nzeo kwa kũsyĩkĩĩsya mavia.”

20Ũnĩ ũsu kwakya, ta ĩvinda yĩla nthembo ya kwakya ya kĩla mũthenya yathembawa, kĩw'ũ nĩkyookie kyumĩte ngalĩko ya Etomu, na kyausũa nthĩ ĩsu.

21Yĩla Amoavi meewie kana ala asumbĩ atatũ nĩmokĩte kũmavithũkĩa, aũme onthe ala maĩ matonya kũkua mĩio ya kaũ, kuma ũla mũnini kũvika ũla mũnene, nĩmeetiwe moke na maiwa mũvakanĩ.

22Yĩla maamũkie ũnĩ ũsu kwakya tene, syũa nĩyaathie kĩla kĩw'ũ. Amoavi ala maĩ mũingo ũla ũngĩ, moonie kĩw'ũ kĩu kĩ kĩtune ta nthakame.

23Nĩmaneenie maseng'ete masya, “Ĩĩya nĩ nthakame! Asumbĩ asu no nginya methĩwe mokitie mooaana ene kwa ene! Ekai tũthi tũkose mũtavo.”

24Ĩndĩ yĩla Amoavi mavikie vala andũ ma Ĩsilaeli mambĩte maeema, andũ ma Ĩsilaeli nĩmokitie namo nginya masemba. Andũ ma Ĩsilaeli nĩmaatĩĩie Amoavi mamoaĩte.

25Nĩmaanangie ndũa syoo, na meethĩa kĩsesi kĩseo kũla mesĩlaa kw'onthe, kĩla mũndũ nĩwoosaa ĩvia akekya vo. Meekie ũu nginya mĩũnda ya Amoavi yonthe yausũa mavia. O ta ũu nĩmalindile ithima na matemanga mĩtĩ yonthe ĩla mĩseo. No ndũa nene yĩtawa Kili-alesethi yatialile ĩte mbanange, ĩndĩ nayo yeelingĩlwa nĩ andũ ma kwĩkya mavia na ikũtha na mokita nayo.

26Mũsumbĩ wa Moavi nĩwamanyie kana nũendee kũsindwa kaũnĩ, kwoou nĩwoombanisye asikalĩ maana mũonza ala mokitaa na mbyũ, na e namo matata na vinya kwĩsĩla vala vaĩ mũsumbĩ wa Etomu, nĩ kana makĩe mathi, ĩndĩ mayaatonya.

27Nĩvo ĩndĩ mũsumbĩ ũsu wa Moavi woosie mwana wake ũla mũkũũ, ũla waaĩlĩte kũsumbĩka ĩtina wake, na amumya ethĩwe nthembo ya kũvĩvw'a. Amumĩisye ũkũtanĩ wa ndũa. Yĩla andũ ma Ĩsilaeli moonie ũu, nĩmeewie woo mũno na maekana na kaũ masyoka nthĩ yoo.

← Chapter 2 Jump to: Chapter 4 →