bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Kamba
/
Kamba (MBIVILIA ŨVOO MŨSEO)
/
2 Kings 4
2 Kings 4
Kamba (MBIVILIA ŨVOO MŨSEO)
← Chapter 3
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 5 →
1
Kĩveti kya mũndũ ũmwe waĩ wa nguthu ya athani, nĩkyaendie vala ve Elisa na kyamwĩa atĩĩ, “Mũnene wakwa, mũũme wakwa nũnakwie! O tondũ we mwene wĩsĩ, mũũme wakwa anaĩ mũndũ ũnakĩĩte Ngai. Ĩndĩ yu mũndũ ũmwe ũnaĩ na thiĩ nake, nĩwũkie kwosa ana makwa elĩ amatw'ĩkĩthye ngombo.”
2
Elisa nĩwakũlilye kĩveti kĩu atĩĩ, “Wĩenda ngũtethye ata? Ndavye kĩla wĩ nakyo mũsyĩ kwaku.” Kĩveti kĩu nĩkyamũsũngĩie kyamwĩa, “Ndi na kĩndũ o na kĩmwe, ate o sũva wa mauta.”
3
Elisa nĩweeie kĩveti kĩu atĩĩ, “Enda kwa atũi maku onthe ũvoye sũva mbingĩ nthei.
4
Ĩtina wa ũu, lika nyũmba nthĩnĩ wĩ na ana maku na mũivinga mũomo. Onosya mauta masũvanĩ asu, na kĩla sũva wausũa, ũiwia ũtee.”
5
Kĩveti kĩu nĩkyaumie vala ve Elisa na kyathi kyeevingĩa nyũmba kĩ na ana makyo. Ana makyo nĩmaendeeie kũkĩnengeleelya sũva isu nakyo kyaendeea kũsyonoesya mauta.
6
Yĩla sũva isu syonthe syausũie, kĩveti kĩu nĩkyeeie mwanae, “Nenga sũva ũngĩ.” Mwanae nĩwasũngĩie asya, “Vai sũva ũngĩ ũtiele.” Nĩvo ĩndĩ mauta maekie kuma.
7
Kĩveti kĩu nĩkyaendie na kyatavya Elisa, nake akĩa atĩĩ, “Enda ũthoosye mauta asu na ũiĩva mathiĩ maku. We na ana maku nĩmũtonya kũtũmĩa kĩla kĩũtiala.”
8
Mũthenya ũmwe, Elisa nĩwaendie vandũ vetawa Sunemu. Ndũanĩ ĩsu vaĩ mũndũ mũka ũmwe mũthwii wekalaa vo. Mũndũ mũka ũsu nĩwathokisye Elisa akaye kwake. Kwoou kĩla ĩvinda, Elisa athi Sunemu, nĩwaĩsaa kwa mũndũ mũka ũsu.
9
Mũndũ mũka ũsu nĩwaneenie na mũũme amwĩa atĩĩ, “Nĩnĩmanyĩte kana mũndũ ũũ wĩsĩlaa vaa kwitũ kĩla ĩvinda, nĩ mũndũ mũtheu wa Ngai.
10
Eka twake kasũmba kanini nyũmbanĩ yaitũ ĩũlũ, na tũimwiĩa kĩtanda, mesa, kĩvĩla na taa vo. Mũndũ ũsu akeethĩawa atonya kwĩkala vo yĩla wooka kũũ kwitũ.”
11
Mũthenya ũmwe Elisa nĩwaendie Sunemu, na ambata ĩũlũ kasũmbanĩ kake na akoma athũmũe.
12
Nĩwatũmie Ngeasi mũthũkũmi wake athi akete mũndũ mũka ũsu. Yĩla mũndũ mũka ũsu wookie,
13
Elisa nĩweeie Ngeasi atĩĩ, “Neena na mũndũ mũka ũsu ũmwĩe nĩwĩthĩnĩtye mũno kwondũ witũ, kwoou eenda tũmwĩke ata? Ve ũndũ ũkwenda tũkamwĩtĩsye vala ve mũsumbĩ, kana vala ve mũnene wa asikalĩ ma kaũ?” Mũndũ mũka ũsu nĩwasũngĩie asya, “Nĩna syĩndũ syonthe ila nĩna vata nasyo vaa katĩ wa andũ makwa.”
14
Elisa nĩwakũlilye Ngeasi, “Yu ĩndĩ eenda nĩmwĩke ata?” Ngeasi nĩwasũngĩie asya atĩĩ, “Mũndũ mũka ũũ nde mwana na mũũme nĩ mũkũũ.”
15
Elisa nĩweeie Ngeasi, “Mwĩe nĩoke vaa.” Mũndũ mũka ũsu nĩwookie na aũngama mũomonĩ.
16
Elisa nĩwaneenie amwĩa, “Mwaka ũla wũkĩte ĩvindanĩ ta yĩĩ, ũkeethĩwa ũkwete kavĩsĩ.” Mũndũ mũka ũsu nĩwasũngĩie aseng'ete asya, “Aiee, we mũnene wakwa mũndũ wa Ngai, ndũkangenge nyie mũthũkũmi waku!”
17
Ĩndĩ o tondũ Elisa waĩtye, ĩvinda ta yĩu mwakanĩ ũla waatĩĩe, mũndũ mũka ũsu nĩwasyaie kavĩsĩ.
18
Kana kau nĩkeanie, na mũthenya ũmwe kathi vala ĩthe wako waĩ, e vamwe na akethi.
19
Kana kau nĩkambĩĩie kũĩa; kaĩaa kayĩa ĩthe wako, “Nĩngwalw'a nĩ mũtwe! Nĩngwalw'a nĩ mũtwe!” Ĩthe wa kavĩsĩ kau nĩweeie mũthũkũmi ũmwe, “Kua kavĩsĩ kaa ũkatwae vala ve inyia wako.”
20
Yĩla mũthũkũmi ũsu wakuie kavĩsĩ kau akatwaa vala ve inyia wako, inyia nĩwakakĩkie nginya saa sita na ĩndĩ kakw'a.
21
Nyinyia nĩwakakuie akambatya kasũmbanĩ ka Elisa, na akakomya kĩtandanĩ. Nĩwaumaalile na avinga mũomo.
22
Nĩweetie mũũme na amwĩa atĩĩ, “Tũma mũthũkũmi ũmwe oke e na ĩng'oi yĩmwe, nĩ kana nĩende mĩtũkĩ vala ve mũndũ wa Ngai na ngĩsyoka.”
23
Mũũme nĩwamũkũlilye, “Wĩthi kwake ũmũnthĩ nĩkĩ na ti mũthenya wa Savato, kana wa Mboka ya Kũtisa kwa Mwei?” Mũndũ mũka ũsu nĩwamũsũngĩie amwĩa atĩĩ, “Vai ũndũ.”
24
Mũndũ mũka ũsu nĩwailĩĩile matandĩko ĩng'oinĩ na eea mũthũkũmi, “Inga ĩng'oi yĩthi yĩkalaatĩte ũndũ vatonyeka, na ndũkaende mbola ndakwĩĩte ũndwae mbola.”
25
Kwoou mũndũ mũka ũsu nĩwambĩlĩĩlye kyalo aenda Kĩĩmanĩ kya Kalimeli vala Elisa waĩ. Elisa nĩwoonie mũndũ mũka ũsu e vaasa na eea Ngeasi mũthũkũmi wake atĩĩ, “Sisya, ũla mũndũ mũka Mũsunemu nũũya wũkĩte!
26
Semba ũmũthaũe na ũimũkũlya, ‘Wĩ mũseo? Mũemeu nĩ mũseo? Kana kaku nĩ kaseo?’ ” Mũndũ mũka ũsu nĩwasũngĩie asya, “Vai ũndũ ũthũku.”
27
Ĩndĩ yĩla mũndũ mũka ũsu wavikie kĩĩmanĩ vala Elisa waĩ, nĩwakumanie akwata nyaĩĩ sya Elisa. Ngeasi nĩwathengeeie ayenda kũmũluuta, ĩndĩ Elisa amwĩa, “Ekana nake. Mũndũ mũka ũũ e na woo mwingĩ, nake Mwĩai Ngai nũmbithĩte ũndũ ũũ na ndanandavya.”
28
Mũndũ mũka ũsu nĩwaneenie eea Elisa atĩĩ, “We mũnene wakwa, nyie naakwĩtya mwana? Nyie ndyakwĩie ndũkatume nĩthĩwa na wĩkwatyo?”
29
Nĩvo ĩndĩ Elisa weeie Ngeasi atĩĩ, “Ĩyũmbany'e! Osa ndata yakwa na ũisemba. Wakomana na mũndũ, ndũkamũkethye, na mũndũ o na wĩva akũkethya, ndũkaketheke. Enda ũkailĩĩle ndata yakwa ũthyũnĩ wa kavĩsĩ kau.”
30
Mũndũ mũka ũsu nĩweeie Elisa atĩĩ, “Nĩngwĩvĩta ĩsyĩtwanĩ ya Mwĩai Ngai ũla wĩ thayũ, na mbee waku kana ndikũtia.” Kwoou Elisa nĩwaendanisye nake.
31
Ngeasi nĩwaendie avika mbee, na ailĩĩla ndata ya Elisa ũthyũnĩ wa kala kavĩsĩ, ĩndĩ kayaaumya wasya kana kũnyaunyia. Kwoou Ngeasi nĩwasyokie akakomane na Elisa. Yĩla makomanie nĩweeie Elisa atĩĩ, “Kavĩsĩ kainaamũka.”
32
Yĩla Elisa wavikie, nĩwalikile kasũmbanĩ kake e weka, na eethĩa kala kavĩsĩ kaiĩtwe ũkomonĩ wake ke kakw'ũ.
33
Nĩweevingĩie e na kavĩsĩ kau vau nthĩnĩ na avoya Mwĩai Ngai.
34
Nĩvo ĩndĩ walĩsile ũkomonĩ na akomeea kavĩsĩ kau atinanĩtye kanyw'a wake, metho make, na moko make na kanyw'a, metho, na moko ma kavĩsĩ kau. Yĩla waendeeie kũkomea kavĩsĩ kau, mwĩĩ wako nĩwambĩĩie kũkwata muutĩa.
35
Elisa nĩwookĩlile, atembeanga vau kasũmbanĩ, na asyoka alĩsa ũkomonĩ na akomeea kavĩsĩ kau ĩngĩ. Kavĩsĩ nĩkaathimũie mavinda mũonza na kasalukya.
36
Elisa nĩweetie Ngeasi na amũtũma akete inyia wako. Ngeasi nĩweekie ũu. Yĩla inyia wako wookie, Elisa nĩwamwĩie, “Osa mwana waku.”
37
Mũndũ mũka ũsu nĩwatulilye ndu maũũnĩ ma Elisa, na akumana ũthyũ wake watina nthĩ amũnenge ndaĩa. Nĩvo ĩndĩ woosie mwana wake na aumaala.
38
Elisa nĩwasyokie Ngilikali, na ĩvindanĩ yĩu kwaĩ yũa kĩsionĩ kĩu kya nthĩ. Mũthenya ũmwe Elisa aendee kũmanyĩsya nguthu ya athani, nĩweeie mũthũkũmi wake atĩĩ, “Tinĩsya mbisũ nene iko ũuĩe aũme aa mboka.”
39
Ũmwe wa athani asu nĩwaendie kĩsesinĩ akove nyũnyi. E vau nĩwoonie wũngũ wa kĩthekanĩ, na atw'a mongũ amwe maw'o akua na ngũa yake. Yĩla wenũkie, nĩwamatilangile ilungu na amekĩa mbisũnĩ ĩla yauaa mboka, atesĩ nĩ kyaũ.
40
Aũme asu nĩmevũĩiwe mboka ĩsu maye. Yĩla mambĩĩie kũya, nĩmakayie maĩtye, “Mwa mũndũ wa Ngai, mboka ĩno yĩna sumu!” Kwoou mayaaya mboka ĩsu.
41
Elisa nĩwaneenie asya, “Etei mũtu.” Elisa nĩweekĩie mũtu ũsu mbisũnĩ na asya, “Ĩkĩa andũ mboka maye.” Nĩmaĩe, na mboka ĩsu ndyaameka naĩ.
42
Ĩvinda yĩmwe, mũndũ ũmwe nĩwookie kuma Mbaali-salisa, aetee Elisa mĩkate mĩongo ĩlĩ na mũtu wa ũsyao wa mbee wa nganũ ĩla yĩtawa mbaale. Mũndũ ũsu nĩwaetanĩisye mĩkate ĩsu na iia sya nganũ itilĩtwe mĩtũkĩ. Elisa nĩweeie mũthũkũmi wake, “Nenga andũ maye.”
43
Mũthũkũmi ũsu nĩwakũlilye atĩĩ, “Andũ ĩana nĩmekwĩanĩwa nĩ lĩu ũũ?” Elisa nĩwasũngĩie asya, “Manenge maye, nũndũ Mwĩai Ngai nĩwaĩtye kana makaya na kũtialya.”
44
Kwoou mũthũkũmi ũsu nĩwanengie andũ asu lĩu ũsu, maya na matialya o tondũ Mwĩai Ngai waĩtye.
← Chapter 3
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 5 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25