Judges 1

Kamba (MBIVILIA ŨVOO MŨSEO)

Jump to: Chapter 2 →

1Ĩtina wa kĩkw'ũ kya Yosua, andũ ma Ĩsilaeli nĩmaneenie na Mwĩai Ngai mamũkũlya atĩĩ, “Katĩ wa mbaĩ sitũ, nĩ mbaĩ yĩva ĩla yaĩlĩte kũthi mbee na kũkita na andũ ma Kanaani?”

2Mwĩai Ngai nĩwasũngĩie amea atĩĩ, “Andũ ma mbaĩ ya Yuta nĩmo mekũthi mbee. Nĩngũmanenga ũtonyi wa kũsinda andũ ma nthĩ ĩsu.”

3Andũ ma mbaĩ ya Yuta nĩmeeie ana-a-inyia moo, andũ ma mbaĩ ya Simioni atĩĩ, “Ũkai tũendany'e tũkalike kĩsionĩ kya nthĩ kĩla tũnengetwe na tũyũkita andũ ma nthĩ ya Kanaani twĩ vamwe. Ĩtina wa ũu naitũ nĩtũkũendany'a nenyu kĩsionĩ kya nthĩ kĩla mũnengetwe.” Kwoou andũ ma mbaĩ ya Simioni

4na ya Yuta nĩmaendanisye. Mwĩai Ngai nĩwamanengie ũtonyi wa kũsinda Akanaani na Avelisi. Nĩmooaie andũ ngili ĩkũmi ndũanĩ ya Mbeseki.

5Ndũanĩ ĩsu nĩvo meethĩie mũsumbĩ Atoni-mbeseki na mokita nake na masinda Akanaani na Avelisi vyũ.

6Mũsumbĩ Atoni-mbeseki nĩwasembie akĩĩte, ĩndĩ nĩmamũsembanisye na mamũkwata. Nĩmamũtilile syaa ila nene sya moko na sya maũũ.

7Mũsumbĩ Atoni-mbeseki nĩwaisye atĩĩ, “Asumbĩ mĩongo mũonza ala maĩ atile syaa syoo ila nene sya moko na sya maũũ moosanasya tũlungu twa lĩu ungu wa mesa yakwa. Ngai yu nĩwambĩka ũndũ namekie.” Mũsumbĩ Atoni-mbeseki nĩwatwaiwe Yelũsalemu vala wakw'ĩĩie.

8Andũ ma mbaĩ ya Yuta nĩmavithũkĩie andũ ma ndũa ya Yelũsalemu na makwata ndũa ĩsu. Nĩmooaie andũ ma ndũa ĩsu na mamĩvĩvya.

9Kuma vau nĩmaendie kũkita na Akanaani ala matwĩe nthĩ yĩ iĩma, ala matwĩe ngalĩko ya ĩtheo yĩtawa Nengevu, na ma nthĩ ĩla ndindimalu.

10O ta ũu nĩmaendie kũkita na Akanaani ala matwĩe ndũanĩ ya Eviloni. Ndũa ya Eviloni vau mbeenĩ yeetawa Kiliathi-aliva. Me vau nĩmasindie andũ ma mĩsyĩ ya Sesai, Aimani na Talimai.

11Kuma vau andũ ma mbaĩ ya Yuta nĩmaendie kũkita andũ ma ndũa ya Ndevili. Ndũa ya Ndevili vau mbeenĩ yeetawa Kiliathi-seveli.

12Kalevu, ũmwe wa andũ ma mbaĩ ya Yuta nĩwaisye atĩĩ, “Mũndũ ũla wĩsinda andũ ma ndũa ya Kiliathi-seveli, ngamũnenga Akisa mwĩĩtu wakwa atw'ĩke mũka wake.”

13Othinieli mwana wa Kenasi, mũinae wa Kalevu nĩwasindie ndũa ĩsu. Kalevu nĩwanenganie mwĩĩtu wake Akisa atwawe nĩ Othinieli.

14Mũthenyanĩ wa mũtwaano, Othinieli nĩweesũvie Akisa akũlye ĩthe wake Kalevu amũnenge mũũnda. Akisa nĩwaumie ĩng'oinĩ yake na Kalevu amũkũlya atĩĩ, “Wĩenda kyaũ?”

15Akisa nĩwamũsũngĩie amwĩa atĩĩ, “Nenge mũthĩnzĩo! Nĩũkũlya ũnenge ithima sya kĩw'ũ, nũndũ kĩsio kĩla ũnengete nĩkĩnyiau mũno, kĩi kĩw'ũ.” Kwoou Kalevu nĩwamũnengie ithima ila syaĩ ngalĩko ya ĩũlũ na ya ĩtheo.

16Akeni, ala maĩ nzyawa sya mũthoni wa Mwose nĩmaumie Yeliko, ndũa yĩ mĩtĩ ya mĩkĩndũ, na maendany'a vamwe na andũ ma mbaĩ ya Yuta. Nĩmaendie kũtũa vamwe na andũ ala mekalaa weũnĩ wa Yuta ũla wĩ ngalĩko ya ĩtheo yĩtawa Nengevu vakuvĩ na Alati. Vau nĩmatũie vamwe na Aamaleki.

17Nĩvo ĩndĩ andũ ma mbaĩ ya Yuta na ya Simioni maendie na mokita Akanaani ala matwĩe ndũanĩ ya Nzevathi. Nĩmaanangie ndũa ĩsu vyũ na kwoou yanengwa ĩsyĩtwa yĩngĩ yeetwa Olima.

18O ta ũu, andũ ma mbaĩ ya Yuta nĩmakwatie ndũa ya Ngasa, ya Asikeloni na ya Ekeloni. Makwatanĩisye ndũa isu na isio ila syaithyũlũlũkĩte.

19Mwĩai Ngai nĩwatetheeisye andũ ma mbaĩ ya Yuta. Nĩmoosie nthĩ ĩla yĩ iĩma mamesya ĩndĩ mayaĩ matonya kũlũngya andũ ala matũĩte ũiĩnĩ, nũndũ andũ asu maĩ na makasya ma mbalasi maseũvĩtw'e na kyũma.

20O tondũ Mwose weeaĩte, ndũa ya Eviloni nĩyanengiwe Kalevu. Kalevu nĩwe walũngĩtye kuma ndũanĩ ĩsu nzyawa sya ala ana atatũ ma Anaki.

21Ĩndĩ andũ ma mbaĩ ya Mbengyameni mayaalũngya Ayevusi ala matwĩe Yelũsalemu na kuma ĩvinda yĩu kũvika ũmũnthĩ, Ayevusi nĩmaendeeie kwĩkalany'a na andũ ma mbaĩ ya Mbengyameni.

22Andũ ma mbaĩ ya Evalaimu na ya Manase nĩmokitie ndũa ya Mbethi-eli. Mwĩai Ngai nĩwamatetheeisye.

23Nĩmatũmie andũ kwa kĩmbithĩ makamanye ũndũ andũ ma ndũa ya Mbethi-eli matũaa. Ndũa ya Mbethi-eli ĩvindanĩ yĩu yeetawa Lusu.

24Andũ asu mathi nĩmoonie mũndũ aumĩte ndũanĩ ĩsu na mamwĩa atĩĩ, “Nĩtũũkwĩsũva ũtwony'e ũndũ tũtonya kũlika ndũanĩ ĩno naitũ tũikwĩka ũndũ.”

25Mũndũ ũsu nĩwamonisye na kwoou andũ ma mbaĩ ya Evalaimu na ya Manase mooaa andũ onthe ala matwĩe ndũanĩ ĩsu, ate o mũndũ ũsu na andũ ma mũsyĩ wake.

26Ĩtina mũndũ ũsu nĩwathamie athi nthĩ ya Aititi vala waakie ndũa na amĩta Lusu. Ndũa ĩsu yĩtawa ũu o na kũvika ũmũnthĩ.

27Andũ ma mbaĩ ya Manase mayaalũngya andũ ala matwĩe ndũanĩ sya Mbethi-sani, Taanaki, Ndoli, Ivileamu na Mekito. O ta ũu mayaalũngya andũ ala matũĩte mathyũlũlũkĩte ndũa isu syonthe; Akanaani nĩmaendeeie kwĩkala nthĩ ĩsu.

28Yĩla andũ ma Ĩsilaeli mongelekile vinya, nĩmathũkũmĩthisye andũ ma Kanaani na vinya, ĩndĩ ũu wĩ o vo, mayaalũngya andũ ma Kanaani onthe.

29Andũ ma mbaĩ ya Evalaimu mayaalũngya Akanaani ala matwĩe ndũanĩ ya Ngeseli. Kwoou Akanaani asu nĩmaendeeie kwĩkala na andũ ma ndũa ĩsu.

30Andũ ma mbaĩ ya Nzevuluni mayaalũngya andũ ala matwĩe ndũanĩ ya Kĩteloni na ya Naalali; Akanaani nĩmaendeeie kwĩkalany'a na andũ ma Ĩsilaeli ala mamathũkũmithasya na vinya.

31Andũ ma mbaĩ ya Aseli mayaalũngya andũ ala matwĩe ndũanĩ sya Ako, Sitoni, Alavi, Akisivu, Eliva, Aveki na Leovu.

32Ĩndĩ andũ ma mbaĩ ĩsu maendeeie kwĩkalany'a na Akanaani ala nĩmo maĩ ene nthĩ isu, nũndũ andũ ma mbaĩ ya Aseli mayaamalũngya.

33Andũ ma mbaĩ ya Navutalĩ mayaalũngya andũ ma ndũa sya Mbethi-semesi na Mbethi-anathi. Ĩndĩ andũ ma mbaĩ isu nĩmaendeeie kwĩkalany'a na Akanaani ala nĩmo maĩ ene nthĩ ĩsu. Ũu wĩ o vo, andũ ma ndũa isu nĩmathũkũmĩthiw'e na vinya nĩ andũ ma mbaĩ ĩsu.

34Aamoli nĩmalũngĩlĩĩlye andũ ma mbaĩ ya Ndani nthĩ yĩ iĩma na mayaametĩkĩlya mathee moke ũiĩnĩ.

35Aamoli nĩmaendeeie kwĩkala Aiyaloni, Saalivimu na Kĩĩmanĩ kya Eelesi. Ĩndĩ andũ ma mbaĩ ya Evalaimu na ya Manase nĩmaendeeie kũmasumbĩka na kũmathũkũmĩthya na vinya.

36Mũvaka wa nthĩ ya Aamoli waumĩte kyambatonĩ kya Akilavimu ũkesĩla Sela na ũkaendeea na ĩũlũ.

Jump to: Chapter 2 →