Judges 13

Kamba (MBIVILIA ŨVOO MŨSEO)

← Chapter 12 Jump to: Chapter 14 →

1Andũ ma Ĩsilaeli nĩmamũvĩtĩisye Mwĩai Ngai ĩngĩ, nake amanengane ũtonyinĩ wa Avilisiti mamasumbĩke vandũ va myaka mĩongo ĩna.

2Ĩvindanĩ yĩu vaĩ mũndũ weetawa Manoa kuma ndũanĩ ya Nzola. Aĩ wa mbaĩ ya Ndani, na mũka wake aĩ ngũngũ.

3Mũlaĩka wa Mwĩai Ngai nĩwamumĩlĩĩle mũka wake na amwĩa atĩĩ, “O na vala wĩ ngũngũ, ndwaasyaa, ũkaitava na ũisyaa kavĩsĩ.

4Kwoou ĩsũvĩe ndũkanyw'e ndivai kana kĩndũ o na kĩva kĩmilaa, kana kũya lĩu o na wĩva ũte mũtheu,

5nĩkwĩthĩwa ũkaitava na ũisyaa kavĩsĩ. Mwana ũsu asyawa ndakaaenzwe, nĩkwĩthĩwa kuma mũthenya ũla wĩsyawa akeethĩwa e mũvathe kwondũ wa Ngai, akeethĩwa e Mũnasili. Mwana ũsu akambĩĩa kũtangĩĩa andũ ma Ĩsilaeli kuma ũtonyinĩ wa Avilisiti.”

6Nĩvo ĩndĩ kĩveti kĩu kyaendie na kyeea mũũme atĩĩ, “Mũndũ wa Ngai nĩwũkie kũla nĩĩ. Eeilyĩ ta mũlaĩka wa Ngai, na eĩ wa kũtĩsya mũno. Ndinamũkũlya kũla wumĩte, nake ndanandavya ũndũ wĩtawa.

7Ĩndĩ mũndũ ũsu nũmbĩie kana ngaitava na ngĩsyaa kavĩsĩ. O ta ũu ambĩie ndikanyw'e ndivai kana kĩndũ o na kĩva kĩmilaa, kana kũya lĩu o na wĩva ũte mũtheu, nũndũ kana kau kakeethĩwa kavathĩtwe kwondũ wa Ngai kethĩwe Mũnasili ĩvinda ya thayũ wako w'onthe.”

8Manoa nĩwavoyie Mwĩai Ngai asya atĩĩ, “Ame Mwĩai Ngai, eka mũndũ wa Ngai ũla ũnatũmie asyoke kũla tũĩ na aitũtavya ũndũ twaĩlĩte kwĩkana na kavĩsĩ kau kasyawa.”

9Mwĩai Ngai nĩweewie mboya sya Manoa, na mũlaĩka wa Ngai nĩwookie ĩngĩ kũla kwĩ kĩveti kyake ĩvindanĩ yĩla kyekalĩte mũũndanĩ. Manoa mũũme wakyo ndaĩ vamwe nakyo,

10kwoou nĩkyasembie mĩtũkĩ vala ũĩ kyamwĩa atĩĩ, “Ũla mũndũ ũnookie kũla nĩĩ ũla mũthenya nĩwambumĩlĩĩla ĩngĩ.”

11Manoa nĩwookĩlile na aendany'a na mũka wake. Nĩwaendie vala ve mũndũ ũsu na amũkũlya atĩĩ, “Nue ũũneenaa na kĩveti kyakwa?” Mũndũ ũsu amũsũngĩa amwĩa, “Ĩĩ ninyie.”

12Nĩvo ĩndĩ Manoa wamũkũlilye atĩĩ, “Yĩla ndeto syaku syĩĩanĩa, kana kau kakeethĩwa kaĩlĩte kwĩkala thayũ ũilyĩ ata? Kana kau kakeekaa ata?”

13Mũlaĩka wa Mwĩai Ngai nĩwamũsũngĩie amwĩa atĩĩ, “Mũka waku no nginya eke maũndũ onthe ala nĩnamũtavisye.

14Ndaĩlĩte kũya kĩndũ o na kĩva kyumanĩte na ũsyao wa mũsavivũ, kana kũnyw'a ndivai kana kĩndũ o na kĩva kĩmilaa, kana kũya mũthemba o na wĩva wa lĩu ũte mũtheu. No nginya eke maũndũ onthe ala nĩmwĩaĩĩte.”

15Manoa nĩweeie mũlaĩka ũsu wa Mwĩai Ngai atĩĩ, “Twĩũkũlya wĩkalange nĩ kana tũkũaĩe katena ka mbũi.”

16Nake mũlaĩka wa Mwĩai Ngai amũsũngĩa amwĩa, “O na nekalanga, ndiya lĩu o na ũmwe waku. Ĩndĩ ethĩwa nũũthĩnza katena kau kethĩwe nthembo ya kũvĩvw'a, kathembee Mwĩai Ngai.” Manoa ndamanyaa kana ũsu aĩ mũlaĩka wa Mwĩai Ngai.

17Manoa nĩwakũlilye mũlaĩka atĩĩ, “Wĩtawa ata nĩ kana twĩkũnenga ndaĩa ndeto syaku syeanĩa?”

18Mũlaĩka amũsũngĩa, “Wĩngũlya ĩsyĩtwa yakwa nĩkĩ, nayo nĩ ĩsyĩtwa ya kũseng'ya?”

19Kwoou Manoa nĩwoosie katena ka mbũi na ngetha ya mbaa mbeke na aithembea ĩvianĩ kwondũ wa Mwĩai Ngai. Mwĩai Ngai nĩweekie maũndũ ma kũseng'ya Manoa na mũka masyaĩĩsye.

20Ĩvindanĩ yĩla ũlĩlĩnzĩ wa mwaki wakanĩte kĩthembeonĩ welekele ĩtunĩ, mũlaĩka wa Mwĩai Ngai nĩwambatie e ũlĩlĩnzĩnĩ ũsu. Yĩla Manoa na mũka moonie mũlaĩka ũsu ambatĩte e ũlĩlĩnzĩnĩ wa mwaki, nĩmakumanie matina nthĩ na mothyũ mamũnenge ndaĩa.

21Manoa na mũka mayaaona mũlaĩka ũsu ĩngĩ, ĩndĩ nĩmamanyie kana nĩ mũlaĩka wa Mwĩai Ngai.

22Nĩvo ĩndĩ Manoa weeie mũka atĩĩ, “Kwa w'o nĩtũũkw'a nũndũ nĩtwoona Ngai!”

23Ĩndĩ mũka wake nĩwamũsũngĩie amwĩa, “Kethĩwa Mwĩai Ngai eendaa kũtũaa, ndethĩwa eetĩkĩla nthembo yaitũ ya kũvĩvw'a, na nthembo ya ngetha ya mbaa mbeke ĩla twamumĩsya. O ta ũu ndethĩwa atwony'a maũndũ aa onthe, kana akatũtavya maũndũ ala yu watũtavya.”

24Mũka wa Manoa nĩwasyaie kavĩsĩ na aketa Samusoni. Kana kau nĩkeanie na Mwĩai Ngai akaathima.

25Samusoni e vandũ veetawa Maeemanĩ ma Ndani, vala vaĩ katĩ wa ndũa ya Nzola na ya Esitaoli, Veva wa Mwĩai Ngai nĩwambĩĩie kũmwĩkĩa vinya.

← Chapter 12 Jump to: Chapter 14 →