Judges 20 — Kamba (MBIVILIA ŨVOO MŨSEO)

1Nĩvo ĩndĩ andũ ma Ĩsilaeli onthe kuma Ndani ngalĩko ya ĩũlũ kũthi kũvika Mbeeli-sieva ngalĩko ya ĩtheo, na kuma nthĩ ya Ngileati maumaalile na moombana mbee wa Mwĩai Ngai me Misiva.

2Atongoi ma mbaĩ syonthe sya andũ ma Ĩsilaeli maĩ wũmbanonĩ ũsu wa andũ ma Ngai, na o ta ũu vaĩ asikalĩ ngili maana ana ma kũthi na maũũ makwete mĩio yoo ya kaũ.

3Ĩvindanĩ yĩu andũ ma mbaĩ ya Mbengyameni nĩmeewie kana andũ ala angĩ ma Ĩsilaeli mombanĩe Misiva. Andũ ma Ĩsilaeli nĩmakũlilye atĩĩ, “Tũtavyei ũndũ ũũ mũthũku wĩkiwe ata?”

4Ũla Mũlivai kĩveti kyake kya ndũsyo kyooaiwe nĩwasũngĩie asya atĩĩ, “Nyie na kĩveti kyakwa kya ndũsyo twaendie Ngivea kĩsionĩ kya nthĩ kya mbaĩ ya Mbengyameni tũkakomele kw'o.

5Ũtukũ ũsu aũme ma Ngivea nĩmookie kũmbũkita na mathyũlũlũka nyũmba mayenda kũmbũaa. Nĩmavukisye kĩveti kĩu kyakwa na kyakw'a.

6Nĩnoosie mwĩĩ wa kĩveti kĩu naũtilanga ilungu, na natũma kĩlungu kĩmwe kũla kwĩ kĩla mbaĩ ya andũ ma Ĩsilaeli, nũndũ andũ asu nĩmaneekie ũndũ mũthũku na mũvuku katĩ witũ.

7Inyw'onthe ala mwĩ vaa mwĩ andũ ma Ĩsilaeli. Mwĩona twĩĩka ata nũndũ wa ũndũ ũũ?”

8Andũ onthe nĩmeetĩkĩlanile masya atĩĩ, “Katĩ witũ vai ũmwe wĩĩnũka maeemanĩ kana nyũmba kwake.

9Ĩndĩ yu twĩĩkana na Ngivea atĩĩ: Nĩtũũkũna kula tũnyuve aũme amwe makokite andũ ma ndũa ĩsu.

10Mũndũ-ũme ũmwe kuma kĩla aũmenĩ ĩkũmi ma Ĩsilaeli nũkũnengane lĩu kwondũ wa asikalĩ. Namo ala angĩ maithi makakany'e andũ ma Ngivea nũndũ wa ũndũ ũsu mũthũku mbaĩ ya Mbengyameni yĩkĩte katĩ wa andũ ma Ĩsilaeli.”

11Kwoou aũme onthe ma Ĩsilaeli nĩmoombanie me na kĩeleelo o kĩmwe kya kũkita andũ ma ndũa ĩsu.

12Andũ ma mbaĩ sya Ĩsilaeli nĩmatũmie andũ kĩsionĩ kyonthe kya andũ ma mbaĩ ya Mbengyameni makamakũlye atĩĩ, “Ũndũ ũũ ũthũkĩte ũu mwĩkĩte nĩ mwaũ?

13Umĩlyai aũme asu avuku ma Ngivea nĩ kana tũmoae na tũiveta ĩvĩtyo yĩĩ kuma andũnĩ ma Ĩsilaeli.” Ĩndĩ andũ ma mbaĩ ya Mbengyameni mayaaĩthukĩĩsya ũndũ andũ ala angĩ ma Ĩsilaeli mameaa.

14Nĩmaumie ndũanĩ syoo makomanĩa Ngivea nĩ kana mokite andũ ma Ĩsilaeli.

15Andũ ma mbaĩ ya Mbengyameni nĩmoombanisye asikalĩ ngili mĩongo ĩlĩ na thanthatũ makwete mbyũ kuma ndũanĩ syoo. O ta ũu vaĩ aũme angĩ maana mũonza manyuvĩtwe kuma kwa ala matwĩe Ngivea.

16Katĩ wa asikalĩ asu onthe vaĩ aũme maana mũonza manyuvĩtwe na maĩ kĩmotho. Kĩla ũmwe woo aĩ atonya kwĩkya ĩvia na kĩkũtha akakima ũsw'ĩĩ, ate kũũvĩtya.

17Andũ ala angĩ ma mbaĩ sya Ĩsilaeli eka mbaĩ ya Mbengyameni nĩmoombanisye asikalĩ ngili maana ana maĩ amanyĩsye nesa.

18Andũ ma Ĩsilaeli nĩmaendie vandũ va kũthaithĩa Mbethi-eli, na makũlya Ngai atĩĩ, “Nĩ mbaĩ yĩva yaĩlĩte kwambĩĩa kũkita mbaĩ ya Mbengyameni?” Nake Mwĩai Ngai amasũngĩa amea, “Nĩ mbaĩ ya Yuta.”

19Ũnĩ ũsu kwakya andũ ma Ĩsilaeli nĩmaamũkie na mamba maeema vakuvĩ na ndũa ya Ngivea.

20Nĩmaendie kũkita andũ ma mbaĩ ya Mbengyameni. Nĩmavangie asikalĩ moo masyaĩtye ndũa ĩsu ya Ngivea.

21Asikalĩ ma mbaĩ ya Mbengyameni nĩmaumaalile ndũanĩ ĩsu, na kũtanamba kũtuka nĩmooaie asikalĩ ma andũ ma Ĩsilaeli ngili mĩongo ĩlĩ na ilĩ.

22Ĩndĩ andũ ma Ĩsilaeli nĩmeeyĩkĩie vinya ĩngĩ na meevanga ĩngĩ mokite me vala maĩ mũthenyanĩ wa mbee.

23Nĩvo ĩndĩ andũ ma Ĩsilaeli mambatie na mamwĩkaĩla Mwĩai Ngai nginya wĩoo. Nĩmamũkũlilye Mwĩai Ngai ũtao mayasya atĩĩ, “Nĩtũũthi kũkita ĩngĩ na ana-a-ĩthe maitũ andũ ma mbaĩ ya Mbengyameni?” Nake Mwĩai Ngai amasũngĩa amea, “Ĩĩ mavithũkĩei.” Kwoou asikalĩ ma andũ ma mbaĩ ya Ĩsilaeli nĩmakwatie vinya, na mavanga asikalĩ moo vala maũngamĩte mũthenyanĩ wa mbee.

24Nĩvo ĩndĩ maendie kũkita na asikalĩ ma mbaĩ ya Mbengyameni mũthenya wa kelĩ.

25Mũthenyanĩ ũsu wa kelĩ andũ ma mbaĩ ya Mbengyameni nĩmaumie Ngivea na mavithũkĩa andũ ma Ĩsilaeli. Nĩmooaie asikalĩ ma Ĩsilaeli maĩ amanyĩsye nesa ngili ĩkũmi na nyanya.

26Kwoou andũ ma Ĩsilaeli onthe nĩmambatie Mbethi-eli na mekala vo mbee wa Mwĩai Ngai maĩĩte. Nĩmatĩĩie kũya nginya ĩa mawĩoo na maumĩsya Mwĩai Ngai nthembo sya kũvĩvw'a na nthembo sya ngwatanĩo.

27Andũ ma Ĩsilaeli nĩmamũvoyie Mwĩai Ngai amanenge ũtao. Ĩvindanĩ yĩu Ĩsandũkũ ya Ũtianĩo ya Ngai yaĩ kũu,

28na Vineasi mwana wa Eleasali, mwĩsũkũũe wa Alũni nĩwe wathũkũmaa vala yaiĩtwe. Andũ ma Ĩsilaeli nĩmakũlilye Mwĩai Ngai atĩĩ, “Nĩtũkumaala ĩngĩ tũkokite ana-a-ĩthe maitũ andũ ma mbaĩ ya Mbengyameni, kana tũeke?” Nake Mwĩai Ngai amasũngĩa amea, “Ĩĩ, endai mũkokite namo ũnĩ na ngatuma mũmasinda.”

29Kwoou andũ ma Ĩsilaeli nĩmaiie asikalĩ kũndũ mevithĩte kwĩlingĩla ndũa ya Ngivea.

30Mũthenyanĩ wa katatũ nĩmaendie kũkita asikalĩ ma mbaĩ ya Mbengyameni na mavanga asikalĩ moo masyaĩtye ndũa ya Ngivea, o tondũ meekĩte mbeenĩ.

31Andũ ma mbaĩ ya Mbengyameni onthe nĩmaumie ndũanĩ na mooka makomane namo, na kwoou makusw'a maumw'a ndũanĩ yoo, o tondũ meekĩte vau mbeenĩ; nĩmambĩĩe kũaĩa andũ ma Ĩsilaeli nza wa ndũa, nzĩanĩ ĩla ĩendete Mbethi-eli, na ĩla ĩngĩ ĩendete Ngivea, na isesinĩ. Nĩmooaie andũ ma Ĩsilaeli ta mĩongo ĩtatũ.

32Andũ ma mbaĩ ya Mbengyameni nĩmasũanĩie masya atĩĩ, “Twĩmasinda o ũndũ tũneekie vau mbeenĩ.” Ĩndĩ andũ ma Ĩsilaeli masya, “Nĩtũsyoke na ĩtina nĩ kana tũmakusye maume ndũanĩ moke nzĩanĩ.”

33Aũme onthe ma Ĩsilaeli nĩmaumie kũndũnĩ kw'onthe kũla maĩ, na meevanga vandũ vetawa Mbaali-tamali. Andũ ma Ĩsilaeli ala meevithĩte nĩmaumie na mĩtũkĩ kũla meevithĩte kũndũ kwĩ mavia kwĩlingĩla ndũa ya Ngivea.

34Aũme ngili ĩkũmi manyuvĩtwe kwa nzĩa ya mwanya kuma andũnĩ ma Ĩsilaeli nĩmokitie andũ ma ndũa ya Ngivea na kweethĩwa na kaũ wĩ vinya. Andũ ma mbaĩ ya Mbengyameni mayaamanya kana makilĩlye kũminwa.

35Mwĩai Ngai nĩwatumie andũ ma Ĩsilaeli masinda asikalĩ ma mbaĩ ya Mbengyameni. Mũthenya ũsu nĩmooaie andũ ma mbaĩ ĩsu ngili mĩongo ĩlĩ na itano na ĩana yĩmwe.

36Andũ ma mbaĩ ya Mbengyameni nĩmamanyie kana nĩmasindwa. Andũ ma Ĩsilaeli nĩmakĩie kuma kũla kwĩ andũ ma mbaĩ ya Mbengyameni nĩkwĩthĩwa nĩmeekwatĩtye aũme ala mavangĩtwe kũndũ mevithĩte kwĩlingĩla ndũa ya Ngivea.

37Aũme asu nĩmasembie mĩtũkĩ melekele Ngivea. Nĩmanyaĩĩkĩie ndũanĩ ĩsu na mooaa andũ onthe ala maĩ vo.

38Andũ ma Ĩsilaeli nĩmavangĩte na aũme ala meevithĩte kana nĩmekũtuma mũumbĩ mũnene wa syũki wũkĩla kuma ndũanĩ,

39na ĩndĩ aũme ma Ĩsilaeli mayũka kaũnĩ. Ĩvindanĩ yĩĩ andũ ma mbaĩ ya Mbengyameni nĩmooaĩte andũ mĩongo ĩtatũ ma Ĩsilaeli. Nĩmaneenaa ene kwa ene mayasya, “Kwa w'o nĩtwamasinda o tondũ tũnamekie mbeenĩ.”

40Ĩndĩ yĩla syũki yĩu yambĩĩie kũkĩla kuma ndũanĩ, andũ ma mbaĩ ya Mbengyameni nĩmavĩndũkie na moona syũki yĩu yaumĩte ndũanĩ ĩsu yambatĩte matunĩ.

41Andũ ma Ĩsilaeli nĩmamavĩndũkĩie, na andũ ma mbaĩ ya Mbengyameni matelema, nũndũ nĩmamanyie kana makilĩlye kũminwa.

42Nĩmakĩie andũ ma Ĩsilaeli na masemba melekele weũnĩ, ĩndĩ mayaĩ matonya kũkĩa makathi vaasa. Nĩmavinganĩiw'e katĩ wa asikalĩ ma Ĩsilaeli ala mookĩte ndũanĩ, na katĩ wa ala maumĩte ndũanĩ ya Ngivea, na mooawa.

43Andũ ma Ĩsilaeli nĩmeelingĩlile andũ ma mbaĩ ya Mbengyameni, mamasembethya, na mamoaĩa ndũanĩ ĩsu ngalĩko ya wumĩlonĩ wa syũa.

44Asikalĩ ngili ĩkũmi na nyanya ala maĩ ngũmbaũ ma mbaĩ ya Mbengyameni nĩmooaiwe.

45Andũ ala angĩ ma mbaĩ ya Mbengyameni nĩmasembie melekele weũnĩ mavika ĩvianĩ ya Limoni. Andũ ngili itano ma mbaĩ ĩsu nĩmooaĩiwe nzĩanĩ. Andũ ma Ĩsilaeli nĩmaendeeie kũatĩĩa ala angĩ kũvika Ngitomu, na mooaa andũ angĩ ngili ilĩ.

46Andũ onthe ma mbaĩ ya Mbengyameni ala mooaiwe mũthenya ũsu maĩ ngili mĩongo ĩlĩ na itano. Onthe maĩ asikalĩ ngũmbaũ.

47Ĩndĩ andũ maana thanthatũ nĩmavĩndũkie na makĩa melekele weũnĩ mavika ĩvianĩ ya Limoni, vala mekalile vandũ va myei ĩna.

48Andũ ma Ĩsilaeli nĩmavĩndũkie masyoka na mokita andũ ala angĩ ma mbaĩ ya Mbengyameni na mamoaa onthe: Aũme, iveti na syana. O ta ũu nĩmooaie nyamũ na kyonthe kĩla kyatialĩte. Nĩmavĩvisye ndũa syonthe ila syaĩ kĩsionĩ kĩu.