Judges 16

Kamba (MBIVILIA ŨVOO MŨSEO)

← Chapter 15 Jump to: Chapter 17 →

1Mũthenya ũmwe Samusoni nĩwaendie ndũanĩ ya Ngasa. Nĩwoonie ĩlwaya vo na amanyanyana kĩ-mwĩĩ nayo.

2Andũ ma Ngasa nĩmamanyie kana Samusoni e vau, na kwoou mathyũlũlũka vau waĩ na mamweteela ũtukũ ũsu w'onthe. Nĩmekalile mavindĩtye na kũsũanĩa mayasya, “Twĩmweteela nginya kũkye, na ĩndĩ tũkĩmũaa.”

3Ĩndĩ Samusoni akomie vau nginya ũtukũ katĩ na aamũka athi akwata mĩomo ya mũvĩa wa ndũa ĩsu vamwe na ituĩ ilĩ syayo, na aikũanĩsya na ivulĩ na syĩndũ syonthe syayo, na asilĩĩla kĩtuo. Nĩwaikuie nginya mũthyanĩ wa kĩĩma kĩla kĩ ngalĩkonĩ ĩla ĩngĩ ya Eviloni.

4Ĩtina wa maũndũ asu, Samusoni nĩwendie mũndũ mũka weetawa Ndelila watwĩe mwandanĩ wa Soleki.

5Asumbĩ atano ma Avilisiti nĩmaendie vala ve Ndelila na mamwĩa atĩĩ, “Sengasenga Samusoni nĩ kana akũtavye kĩla kĩtumĩte ethĩwa e na vinya, na tũtonya kũmũkĩlya vinya ata, nĩ kana tũmwove, na tũituma ethĩwa ate na vinya. Kĩla ũmwe waitũ akakũnenga mbesa sya silĩva ngili ĩmwe na ĩana.”

6Kwoou Ndelila nĩweeie Samusoni atĩĩ, “Mwa ndavye kĩla kĩtumaa wĩthĩwa na vinya wingĩvĩte ũu. Ethĩwa mũndũ nũkwenda ũkwova atume wĩthĩwa ũte na vinya, atonya kwĩka ũu kwa nzĩa myaũ?”

7Samusoni amũsũngĩa amwĩa, “Kethĩwa mũndũ nũmbova na ndii mũonza nziũ ila syakaa ũta, ite ngũũ, nĩthĩwa nde na vinya o ta andũ ala angĩ.”

8Nĩvo ĩndĩ asumbĩ ma Avilisiti maeteie Ndelila ndii ndũmu mũonza nziũ ila syakaa ũta, ite ngũũ, na oova Samusoni nasyo.

9Ndelila aĩ na aũme meeteelete nyũmbanĩ ĩngĩ, na kwoou aneena na wasya mũnene asya atĩĩ, “Samusoni! Avilisiti nĩmokĩte!” Ĩndĩ Samusoni nĩwatusangie ndii isu o ta ũndũ ũlii ũtw'ĩkaa wakiitwa nĩ mwaki. Kwoou kĩmbithĩ kya vinya wake kĩyaamanyĩka.

10Ndelila nĩweeie Samusoni atĩĩ, “Wĩthĩĩtwe ũimbũĩa ngũĩ, na ndũndavasya ũla wa w'o. Mwa ndavye ũndũ mũndũ ũtonya kũkwova.”

11Nake Samusoni amũsũngĩa amwĩa, “Kethĩwa mũndũ nũmbova na makanda meũ mataatũmĩwa, nĩthĩwa nde na vinya o ta andũ ala angĩ.”

12Kwoou Ndelila nĩwoosie makanda meũ na amwova. Nĩwaneenie na wasya mũnene eea Samusoni atĩĩ, “Samusoni! Avilisiti nĩmokĩte!” Ala aũme meeteelete me ĩla nyũmbanĩ ĩngĩ. Ĩndĩ Samusoni nĩwatusangie makanda asu o ta ũlii mauma mokonĩ make.

13Nĩvo ĩndĩ Ndelila weeie Samusoni atĩĩ, “Kũvika yu wĩthĩĩtwe ũimbũĩa ngũĩ na kũngenga. Ndavye ũndũ mũndũ ũtonya ũkwova.” Nake Samusoni amũsũngĩa amwĩa, “Ũkova ithũkũ ii mũonza sya nzw'ĩĩ syakwa na ndii itumĩtwe ikakwatanw'a vamwe, na ũisyoveea mũsumaanĩ mũathĩĩe vandũ ilũme, nĩthĩwa nde na vinya o ta andũ ala angĩ.”

14Kwoou Samusoni akomete, Ndelila nĩwoovie ithũkũ isu syaĩ mũtwenĩ wa Samusoni na ndii itumanĩtw'e vamwe. Nĩwasyoveeie mũsumaanĩ na eea Samusoni atĩĩ, “Samusoni! Avilisiti nĩmokĩte!” Ĩndĩ Samusoni nĩwaamũkie na akusya akũa ũla mũsumaa, na atusanga ndii isu syoovee ithũkũ syake mũsumaanĩ.

15Ndelila nĩwakũlilye Samusoni atĩĩ, “Ũtonya kwasya nũmbendete ata, na ũu ti w'o wĩ thayũnĩ waku? Nũmbũĩe ngũĩ mavinda atatũ, na ndwaaĩsa kũndavya kĩla kĩtumaa wĩthĩwa wĩ na vinya.”

16Ndelila nĩwakũlasya Samusoni na kĩthing'ĩĩsyo kĩla mũthenya. Samusoni nĩwanoiw'e mũno nĩ Ndelila nũndũ wa kũmũkũlya kĩla ĩvinda na kĩthing'ĩĩsyo,

17nginya esa kũmũtavya ũw'o. Nĩwamwĩie atĩĩ, “Nzw'ĩĩ yakwa ndyaaenzwa o na ĩmwe, nũndũ nĩthĩĩtwe nĩvathĩtwe kwondũ wa Ngai ta Mũnasili kuma kũsyawa. Kethĩwa nĩnenzwa nzw'ĩĩ ĩno yakwa, vinya wakwa no wae, na nĩthĩwa nde na vinya o ta andũ ala angĩ.”

18Yĩla Ndelila wamanyie kana Samusoni nĩwamũtavya ũla wa w'o, nĩwatũmanie kũla kwĩ asumbĩ ma Avilisiti ayasya, “Syokai ĩngĩ ĩvinda o yĩmwe. Samusoni nĩwandavya ũla wa w'o.” Kwoou Avilisiti nĩmookie makuĩte ila mbesa mathie Ndelila.

19Ndelila nĩwakomethisye Samusoni maũũnĩ make, na eeta mũndũ eenza ila ithũkũ mũonza sya nzw'ĩĩ yake. Nĩvo ĩndĩ Ndelila wambĩĩie kũmũthĩny'a, nĩkwĩthĩwa Samusoni aĩ anaasya vinya wake.

20Ndelila nĩwaneenie na wasya mũnene asya, “Samusoni! Avilisiti nĩmokĩte!” Samusoni nĩwaamũkie na asũanĩa ayasya, “Nĩngũkĩla na ngĩkĩa nĩthi o ta mavinda ala angĩ.” Ndamanyaa kana Mwĩai Ngai nũmũtiĩte.

21Avilisiti nĩmakwatie Samusoni na mamũvũthũanga metho. Nĩmamũtwaie Ngasa mamwova na nyololo sya mbulonzi, na mamũnenga wĩa wa kũthia e vau yela.

22Ĩndĩ nzw'ĩĩ yake nĩyambĩĩie kwĩana ĩngĩ ĩtina wa eenzwa.

23Asumbĩ ma Avilisiti nĩmakomanie vamwe matane, na maithembea ngai yoo ĩla yĩtawa Ndakoni nthembo nene. Nĩmainie wathi ũũ, “Ngai yaitũ nĩtũnengie ũsindi ĩũlũ wa mũmaitha waitũ Samusoni!”

24Yĩla andũ mamwonie nĩmataĩie ngai yoo mayasya atĩĩ, “Ngai yaitũ nĩnenganie mũmaitha witũ mokonĩ maitũ. Mũmaitha ũsu nĩwe ũnaanangĩte nthĩ yaitũ, na akoaa andũ maitũ aingĩ!”

25Maendee kwĩtanĩthya nĩmaneenaa na wasya mũnene makasya atĩĩ, “Umaalyai Samusoni atũtanĩthye.” Kwoou nĩmeetie Samusoni auma Yela ooka kũmatanĩthya. Nĩmamũũngamisye katĩ wa ituĩ sya nyũmba ĩsu moombanĩe.

26Samusoni nĩweeie mwanake ũla wamũtongoesye amũkwete kw'oko atĩĩ, “Ngwatĩthye ituĩnĩ ila iũngamĩtye nyũmba ĩno nĩ kana nĩsyaĩĩe.”

27Nyũmba ĩsu yausũĩte aũme na aka. Asumbĩ atano ma Avilisiti maĩ vo, na vaĩ aũme na aka ta ngili itatũ ala mekalĩte kĩalanĩ kya nyũmba ĩsu mayĩloela Samusoni aimatanĩthya.

28Nĩvo ĩndĩ Samusoni wavoyie ayasya atĩĩ, “Ame Mwĩai Ngai Mũsumbĩ, ndilikane. Ame Ngai, nenge vinya ĩvinda yĩngĩ yĩmwe, nĩ kana nĩyĩĩvanĩsye kũla kwĩ Avilisiti nũndũ wa kũmbũthũanga metho.”

29Kwoou Samusoni nĩweekwatĩlile ituĩ ilĩ ila syaĩ katĩ wa nyũmba ĩsu. Nĩweekwatĩlile ituĩ isu syelĩ, kĩla kĩmwe na kw'oko kũmwe na ailuuta.

30Nĩwaneenie na wasya mũnene ayasya, “Nĩkw'e vamwe na Avilisiti!” Nĩwaluutile ituĩ isu na vinya wake w'onthe, na nyũmba ĩsu yonthe yavalũkĩla ala asumbĩ atano, na andũ ala angĩ onthe ala maĩ vo. Samusoni nĩwooaie andũ aingĩ ĩvindanĩ ya kũkw'a kwake mbee wa ala wooaĩte e thayũ.

31Ana-a-inya make na andũ ala angĩ ma mũsyĩ wake nĩmookie kwosa mwĩĩ wake. Nĩmamũtwaie mamũthika katĩ wa Nzola na Esitaoli mbũanĩ ya ĩthe wake Manoa. Samusoni atongoeisye andũ ma Ĩsilaeli vandũ va myaka mĩongo ĩlĩ.

← Chapter 15 Jump to: Chapter 17 →