Judges 4

Kamba (MBIVILIA ŨVOO MŨSEO)

← Chapter 3 Jump to: Chapter 5 →

1Ĩtina wa kĩkw'ũ kya Euti, andũ ma Ĩsilaeli nĩmamũvĩtĩisye Mwĩai Ngai ĩngĩ.

2Kwa kĩtumi kĩu Mwĩai Ngai nĩwatumie masindwa nĩ Yavini mũsumbĩ wa Kanaani ũla wasumbĩkĩte e ndũanĩ ya Asoli. Mũnene wa asikalĩ ma Mũsumbĩ Yavini eetawa Sisela na atwĩe ndũanĩ ya Alosethi-angoyimu.

3Andũ ma Ĩsilaeli nĩmaĩie maimwĩkaĩla Mwĩai Ngai amatethye, nũndũ Sisela aĩ na makasya maana kenda ma kaũ maseũvĩtw'e na kyũma, na nĩwamathĩnĩtye mũno vandũ va myaka mĩongo ĩlĩ.

4Ĩvindanĩ yĩu, mwathani mũndũ mũka weetawa Ndevola mũka wa Lavitothu nĩwe watongoesye andũ ma Ĩsilaeli ta mũsili.

5Ndevola nĩwakothaa kwĩkala ungu wa mũtĩ ũmwe wa mũkĩndũ ũla waĩ katĩ wa ndũa ya Lama, na ya Mbethi-eli nthĩ yĩ iĩma ya Evalaimu. Andũ ma Ĩsilaeli nĩmambataa vala ũĩ nĩ kana akamanenge ũtw'ĩo wa makoani moo.

6Nĩwatũmanie aketĩwe Mbalaka mwana wa Avinoamu kuma ndũanĩ ya Ketesi ĩla yĩ Navutalĩ. Yĩla Mbalaka wookie, Ndevola nĩwamwĩie atĩĩ, “Mwĩai Ngai, Ngai wa Ĩsilaeli ekwĩaĩa ũũ: ‘Osa andũ ngili ĩkũmi ma mbaĩ ya Navutalĩ na ya Nzevuluni na mũithi ũmatongoesye nginya Kĩĩmanĩ kya Tavoli.

7Nĩngũtuma Sisela, mũtongoi wa asikalĩ ma Mũsumbĩ Yavini oka kũkitĩa nenyu vakuvĩ na Ũsĩ wa Kisoni. Eĩthĩwa e na makasya na asikalĩ make ma kaũ, ĩndĩ nyie nĩngũmũnenga ũsindi ĩũlũ wake.’ ”

8Mbalaka nĩwasũngĩie Ndevola amwĩa atĩĩ, “Ethĩwa nũkũendany'a nakwa, nĩngũthi; ĩndĩ ethĩwa ndwĩendany'a nakwa, nyie o nakwa ndithi.”

9Ndevola nĩwamwĩie atĩĩ, “Nĩngũendany'a naku, ĩndĩ naku ĩthĩwa wĩsĩ kana ndwĩĩthĩwa na nguma nũndũ Mwĩai Ngai akanengane Sisela ũtonyinĩ wa mũndũ mũka.” Kwoou Ndevola nĩwaendanisye na Mbalaka Ketesi.

10Mbalaka nĩweetie andũ ma mbaĩ ya Nzevuluni na ya Navutalĩ mombanĩe Ketesi, na athi e na andũ ngili ĩkũmi. O ta ũu nĩwaendanisye na Ndevola.

11Ĩvindanĩ yĩu, Eveli ũla waĩ Mũkeni nĩwambĩte ĩeema yake vakuvĩ na mũtĩ wa mwalonĩ ũla waĩ Nza-ananimu ũtee wa ndũa ya Ketesi. Eveli aĩ anauma akathi vaasa na andũ ala angĩ ma mbaĩ ya Akeni, ala maĩ nzyawa sya Ovavu mũthoni wa Mwose.

12Yĩla Sisela wataviw'e kana Mbalaka mwana wa Avinoamu nĩwambatie Kĩĩmanĩ kya Tavoli,

13nĩwoombanisye ala makasya make maana kenda maseũvĩtw'e na kyũma, vamwe na andũ make. Nĩwamatũmie maume ndũanĩ ya Alosethi-angoyimu na maithi ũsĩnĩ wa Kisoni.

14Nĩvo ĩndĩ Ndevola weeie Mbalaka atĩĩ, “Ũkĩla! Ũmũnthĩ nĩw'o Mwĩai Ngai ũkũũnenga ũtonyi wa kũsinda Sisela. Kwa w'o Mwĩai Ngai nĩwe ũkũũtongoesya.” Kwoou Mbalaka nĩwatheeie kuma Kĩĩmanĩ kya Tavoli e na ngũmbaũ ngili ĩkũmi.

15Yĩla Mbalaka wavithũkĩie Sisela, Mwĩai Ngai nĩwavũavũanisye Sisela vamwe na makasya make onthe na andũ make. Sisela nĩwaumie ĩkasyanĩ yake ya kaũ na asemba na maũũ.

16Mbalaka nĩwaatĩĩie makasya asu ma kaũ na asikalĩ ma kaũ nginya athi kũmatiĩla ndũanĩ ya Alosethi-angoyimu. Asikalĩ ma Sisela onthe nĩmooaĩiwe kaũnĩ. Vai o na ũmwe waatiala.

17Sisela nake nĩwasembie na maũũ athi kũlika ĩeemanĩ ya Yaeli, mũka wa Eveli ũla mũndũ wa mbaĩ ya Akeni. Eekie ũu nũndũ mũsumbĩ Yavini wa Asoli aĩ ndũũ na andũ ma mũsyĩ wa Eveli.

18Yaeli nĩwaumaalile athaũa Sisela na amwĩa atĩĩ, “Mũnene wakwa, ũka, lika nthĩnĩ. Ndũkakĩe.” Kwoou Sisela nĩwalikile ĩeemanĩ nthĩnĩ na Yaeli amũvitha kwa kũmũvw'ĩka ĩvula.

19Sisela nĩweeie Yaeli atĩĩ, “Mwa, mbĩkĩe kĩw'ũ nĩnyw'e nĩĩw'a waũni.” Yaeli nĩwakunũie kĩkuu kya ĩia, amũnenga anyw'e na amũvw'ĩka ĩngĩ.

20Ĩtina wa ũu Sisela nĩweeie Yaeli atĩĩ, “Ũngama mũomonĩ wa ĩeema na mũndũ ooka vaa na kũkũlya, ‘Vaa ve mũndũ?’ Mũsũngĩe ũmwĩe, ‘Aiee.’ ”

21Sisela anoete mũno na kwoou akoma alĩkwa. Nĩvo ĩndĩ Yaeli mũka wa Eveli woosie kĩiva na kyambo kya Ĩeema na athi vala ve Sisela atonete; na amũaa kwa kũmũathĩĩa kyambo kĩu ngalĩkonĩ ĩmwe ya mũtwe nginya kyathi kũtonya nthĩ.

22Yĩla Mbalaka wookie amanthĩte Sisela, Yaeli nĩwaendie amũthaũa na amwĩa, “Ũka vaa! Nĩngũkwony'a mũndũ ũla ũũmantha.” Nĩwalikile ĩeemanĩ e na Yaeli na eethĩa Sisela avalũkĩte e mũkw'ũ, kyambo kya ĩeema kĩmũtonyete mũtwe kĩkavũthũa.

23Mũthenyanĩ ũsu, Mwĩai Ngai nĩwatumie andũ ma Ĩsilaeli masinda Yavini mũsumbĩ wa Kanaani.

24Andũ ma Ĩsilaeli nĩmaendeeie kwongelwa ũtonyi wa kũsinda Mũsumbĩ Yavini nginya mamũmina vyũ.

← Chapter 3 Jump to: Chapter 5 →