bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Kamba
/
Kamba (MBIVILIA ŨVOO MŨSEO)
/
Judges 5
Judges 5
Kamba (MBIVILIA ŨVOO MŨSEO)
← Chapter 4
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 6 →
1
Mũthenyanĩ ũsu, Ndevola na Mbalaka mwana wa Avinoamu nĩmainie wathi ũũ:
2
Mwĩai Ngai nĩataĩwe! Andũ ma Ĩsilaeli nĩmeeyumĩtye kũkita; andũ nĩmeeyumisye na ũtanu!
3
Ĩw'ai inyw'ĩ asumbĩ! Teai matũ, inyw'ĩ anene! Nyie ngainĩa Mwĩai Ngai, ngaina ngĩkumya Mwĩai Ngai, Ngai wa Ĩsilaeli.
4
Mwĩai Ngai, yĩla waumie iĩmanĩ sya Seili, yĩla waumie kĩsionĩ kya ndũa ya Etomu, nthĩ nĩyathingithie, na mbua yaua kuma ĩtunĩ, ĩĩ, kĩw'ũ nĩkyetĩkie kuma matunĩ.
5
Iĩma nĩsyathingithie mbee wa Mwĩai Ngai wa Sinaĩ, mbee wa Mwĩai, Ngai wa andũ ma Ĩsilaeli.
6
Ĩvindanĩ ya Samukalĩ mwana wa Anathi, ĩvindanĩ ya Yaeli malelũ mayaĩ na andũ maendete maatĩanĩe, na aendi ma kyalo mesĩlaa tũsĩlanĩ tũnini.
7
Ndũa sya andũ ma Ĩsilaeli nĩsyatiiwe syĩ nthei, syekalile syĩ nthei nginya yĩla we Ndevola, wookie kwa andũ ma Ĩsilaeli ta inyia woo.
8
Yĩla andũ ma Ĩsilaeli manyuvie ngai ingĩ, ndũa nĩsyeethĩiwe na kaũ. Vai ũmwe waĩ na ngao kana ĩtumo, katĩ wa andũ ngili mĩongo ĩna ma Ĩsilaeli.
9
Nĩngũmakathĩĩa anene ma asikalĩ ma Ĩsilaeli, o vamwe na andũ ala meeyumisye. Mwĩai Ngai nĩataĩwe!
10
Inyw'ĩ ala mũlĩsĩte mang'oinĩ meũ, mwĩkalĩle matandĩko mamo, na inyw'onthe ala mũendete na maũũ, tavany'ai ũndũ ũsu.
11
Ĩthukĩĩsye! Mawasya ma aini ala me ithimanĩ, meina ĩũlũ wa ũsindi wa Mwĩai Ngai, ũsindi wa ngũmbaũ sya Ĩsilaeli. Nĩvo ĩndĩ andũ ma Mwĩai Ngai maumaalile mathi mĩvĩanĩ ya ndũa.
12
Tongosya, Ndevola, tongosya! Tongosya, ina wathi, tongosya! Mbalaka mwana wa Avinoamu enda mbee; tongoesya andũ ala ũtavĩte kaũnĩ.
13
Nĩvo ĩndĩ andũ ala aĩkĩĩku matheeie kũla kwĩ atongoi moo; andũ ma Mwĩai Ngai nĩmookie meyũmbanĩtye kũkita.
14
Nĩmookie kuma mbaĩnĩ ya Evalaimu nginya mwandanĩ, me ĩtina wa mbaĩ ya Mbengyameni na andũ mayo. Anene ma asikalĩ nĩmatheeie kuma Makili, na kuma mbaĩnĩ ya Nzevuluni, mooka ala makuaa ndata ya mũtongoi.
15
Atongoi ma mbaĩ ya Isakali mookanisye na Ndevola, ĩĩ, andũ ma mbaĩ ya Isakali ala aĩkĩĩku kwa Mbalaka, na mamũatĩĩa masembete nginya mwandanĩ. Ĩndĩ andũ ma mbaĩ ya Lũveni maĩ aanĩku; mayaĩ matonya kũtw'a kana nĩmekũka.
16
Mwatiiwe syengonĩ sya malondu mũyĩka ata? Mwatiiwe mwĩthukĩĩsye mĩtũlilũ ya aĩthi mayĩta malondu? Ĩĩ, andũ ma mbaĩ ya Lũveni maĩ aanĩku; mayaĩ matonya kũtw'a kana nĩmekũka.
17
Andũ ma mbaĩ ya Ngandi nĩmekalile mũingo wa Yolotani, namo andũ ma Ndani nĩmatiiwe melinĩ. Andũ ma mbaĩ ya Aseli matiiwe ũtee wa ũkanga, nĩmaendeeie kwĩkala ũtee waw'o.
18
Ĩndĩ andũ ma mbaĩ ya Nzevuluni, na ya Navutalĩ nĩmaendie kwĩlikya mũisyonĩ kaũnĩ.
19
Asumbĩ nĩmookie, nĩmokitie; asumbĩ ma Kanaani nĩmokitie, me Taanaki ũtee wa Ũsĩ wa Mekito, ĩndĩ mayaatava syĩndũ sya silĩva.
20
Ndata nĩsyokitie syĩ matunĩ, syĩ vala iĩ nĩsyokitie na Sisela.
21
Kĩw'ũ kingĩ kya Ũsĩ wa Kisoni nĩkyamakuie kyamatwaa kũasa, ĩĩ, kĩw'ũ kingĩ kya Ũsĩ wa Kisoni. Enda mbee na vinya we thayũ wakwa!
22
Nĩvo ĩndĩ matuu ma mbalasi meew'ĩkie, ituĩte matuu na mavũngũ masyo.
23
Mũlaĩka wa Mwĩai Ngai easya atĩĩ, “Umanĩa Melosi. Umanĩa andũ mayo na woo, nũndũ mayaaũka kũtetheesya Mwĩai Ngai, kũtetheesya Mwĩai Ngai ayũkita na ũla wĩ vinya.”
24
Katĩ wa aka ala aathime nĩ Yaeli, mũka wa Eveli ũla Mũkeni, nĩ mũathime vyũ katĩ wa aka ala matũaa maeemanĩ.
25
Sisela eetisye kĩw'ũ, nake amũnenga ĩia, nĩwamũeteie mauta ma ĩia, mekĩĩtwe mbakũlinĩ mbanake mũno.
26
Yaeli nĩwakwatie kyambo kya ĩeema na kw'oko kũmwe, na akwata kĩiva kya mavundi na kw'oko kwake kwa aũme. Nĩwakũnie Sisela na aatũa mũtwe wake, nĩwaathĩĩie kyambo kĩu mũtwe nginya kyakuthũkĩla ngalĩko ĩla ĩngĩ.
27
Sisela nĩwatheeie, nĩwavalũkile, nĩwavalũkile maũũnĩ ma Yaeli na eethĩwa ate kũnyaunyia, nĩwatheeie avalũka maũũnĩ make, vau watheeie nĩwavalũkile nthĩ e mũkw'ũ.
28
Inyia wa Sisela nĩwakunĩkĩle ndĩlĩsyanĩ, nĩwasyaĩlye myanyanĩ ya ndĩlĩsya na aĩa ayasya, “Makasya make ma kaũ mekalile ũu matokĩte nĩkĩ? Wasya wa makinya ma mbalasi syake wĩkalile ũu ũtew'ĩka nĩkĩ?”
29
Aka ala me na ũĩ ma inyia wa Sisela nĩmamũsũngĩie, kwa w'o, atindĩaa kũsũanĩa ayasya,
30
“Memantha syĩndũ sya kũtava na kũaana, kĩla mũsikalĩ anengwe mwĩĩtu ũmwe kana elĩ, ngũa nzeo sya Sisela, itambaa ndumĩĩe malaa sya kwĩkĩwa ngingonĩ ya mũka wa mũsumbĩ.”
31
Mwĩai Ngai, amaitha maku onthe nĩ makw'e! Ĩndĩ anyanyae maku matise ta syũa yĩkuma! Nthĩ ĩsu nĩyeethĩiwe na mũuo vandũ va myaka mĩongo ĩna.
← Chapter 4
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 6 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21