Judges 18

Kamba (MBIVILIA ŨVOO MŨSEO)

← Chapter 17 Jump to: Chapter 19 →

1Ĩvindanĩ yĩu andũ ma Ĩsilaeli mayaĩ na mũsumbĩ. Ĩvinda yĩĩ noyo andũ ma mbaĩ ya Ndani mamanthaa kĩsio kyoo kya ũtiĩwa matũe vo, nũndũ mayaĩ manamba kũaĩwa kĩsio kya nthĩ katĩ wa andũ ma Ĩsilaeli.

2Kwoou andũ ma mbaĩ ya Ndani nĩmatũmie andũ atano me ũtonyi kuma andũnĩ ma mbaĩ yoo onthe ala matwĩe ndũanĩ ya Nzola na Esitaoli. Mamatũmie mathi makamanye kwa nzĩa ya kĩmbithĩ ũndũ nthĩ isu ĩilyĩ na maimĩkuũa. Nĩmameie atĩĩ, “Endai mũkekuũe nthĩ ĩsu.” Andũ asu nĩmavikie nthĩ yĩ iĩma ya Evalaimu mũsyĩ kwa Mika na makomela vo.

3Me vau, nĩmeewie na mamanya wasya wa ũla mwanake Mũlivai. Nĩmaendie vala ũĩ na mamũkũlya atĩĩ, “Wĩĩka ata vaa? Ũla ũnakũetie kũũ nũũ?”

4Nake amasũngĩa amea atĩĩ, “Nĩnzeũvĩtye mũvango na Mika, ũla ũnduvaa nĩ kana nĩthũkũme ta mũthembi wake.”

5Aũme asu nĩmamwĩie atĩĩ, “Mwa kũlya Ngai kana nĩtũkwona nesa kyalonĩ kitũ.”

6Mũthembi ũsu amasũngĩa amea atĩĩ, “Endai na mũuo, Mwĩai Ngai nũkũmũsũvĩa kyalonĩ kyenyu.”

7Kwoou andũ asu atano nĩmaumie vau mathi ndũanĩ ya Laisa. Nĩmoonie ũndũ andũ ma vau mekalaa me ũsũvĩonĩ, ta andũ ma Sitoni. Mekalaa na mũuo, matena w'ĩa wa kũvithũkĩwa nĩ amaitha, na maĩ na syĩndũ syonthe ila maĩ na vata nasyo. Matũaa vaasa na andũ ma Sitoni na mayaĩ na ngwatanĩo ya ũndũ o na ũmwe na andũ ala angĩ.

8Yĩla aũme asu atano masyokie Nzola na Esitaoli, ana-a-ĩthe moo nĩmamakũlilye ũndũ methĩie.

9Nĩvo ĩndĩ aũme asu mamasũngĩie mamea atĩĩ, “Ũkĩlai twambate tũkokite andũ ma ndũa ya Laisa, nĩtwonie nthĩ ĩsu yoo yĩ nou mũno. Kwoou mũikekale vaa mũte kwĩka ũndũ, na mũikalee kũthi na kwosa nthĩ ĩsu!

10Mwavika ndũanĩ ĩsu, nĩmũkwĩthĩa andũ ma ndũa ĩsu matesĩ ũndũ o na ũmwe. Nĩ nthĩ nene, na yĩna syĩndũ syonthe ila mũndũ ũtonya kwenda, na Ngai nũmĩnenganĩte kũla mũĩ.”

11Kwoou aũme maana thanthatũ ma mbaĩ ya Ndani nĩmaumie Ndũanĩ ya Nzola na ya Esitaoli meyũmbanĩtye kũkita.

12Nĩmaendie mamba maeema ngalĩko ya ũthũĩlonĩ wa syũa ya ndũa ya Kiliathi-yealimu ĩla yĩ Yuta. Kĩu nĩkyo kĩtumaa vandũ vau vetwa Maane-ndani kũvika o na ũmũnthĩ.

13Kuma vau nĩmaendie nginya nyũmba kwa Mika ĩla yĩ nthĩ yĩ iĩma ya Evalaimu.

14Nĩvo ĩndĩ ala aũme atano maendete kũmanya kwa kĩmbithĩ ũndũ nthĩ ya Laisa ĩilyĩ na kũmĩkuũa makũlilye ana-a-ĩthe moo atĩĩ, “Nĩmwĩsĩ kana ve ngai ya mũvw'anano yũmbĩĩwe silĩva nthĩnĩ wa nyũmba ĩmwe ya ii syĩ vaa?” O ta ũu ve o ngai ingĩ sya mĩvw'anano na ngũa ya ĩũlũ ya mũthembi. Mwĩsũanĩa twĩĩka ata?

15Kwoou nĩmaendie mũsyĩ kwa Mika na malika nyũmba vala ũla mwanake Mũlivai wekalaa na mamũkethya.

16Ĩvindanĩ yĩu ala asikalĩ maana thanthatũ kuma mbaĩnĩ ya Ndani maũngamĩte mũvĩanĩ meyũmbanĩtye kũkita.

17Aũme asu atano maendete kũmanya kwa kĩmbithĩ ũndũ nthĩ ya Laisa ĩilyĩ nĩmalikile nyũmba kwa Mika, na moosa ĩla ngai ya mũvw'anano, na ĩla ngũa ya ĩũlũ ya mũthembi. O ta ũu nĩmoosie ila ngai ingĩ sya mĩvw'anano syaĩ nyũmba. Ala asikalĩ maana thanthatũ kuma mbaĩnĩ ya Ndani na ũla mũthembi maĩ mũvĩanĩ wa ndũa.

18Yĩla aũme asu malikile nyũmba kwa Mika na moosa syĩndũ isu ntheu, mũthembi nĩwamakũlilye atĩĩ, “Mwĩĩkany'a ata inyw'ĩ?”

19Namo mamwĩa, “Vindya. Ndũkaneene ndeto o na ĩmwe. Ũka tũendany'e naku wĩthĩwe mũthembi na mũtai waitũ. No wĩthĩwa mũthembi wa mbaĩ yonthe ya Ĩsilaeli, vandũ va kwĩthĩwa mũthembi wa andũ ma nyũmba ya mũndũ ũmwe?”

20Ũndũ ũsu nĩwamwendeeisye mũthembi ũsu mũno, na kwoou oosa syĩndũ isu ntheu na aendany'a namo.

21Nĩmaendeeie na kyalo kyoo me vamwe na syana syoo. O ta ũu nĩmaingĩte indo syoo na mĩio yoo yakuĩtwe yĩ mbee woo.

22Mamina kũthi mũendo mũasa, Mika nĩweetie atũi make nĩ kana mokite aũme asu. Nĩmamaatĩĩie na mamakwata,

23na mamaneenea ndeto nthũku na wasya mũnene. Aũme asu ma Ndani nĩmavĩndũkie na makũlya Mika atĩĩ, “Thĩna waku nĩ mwaũ nĩ kana wũkany'e na andũ maingĩvĩte ũu?”

24Mika nĩwamasũngĩie amea atĩĩ, “Mũtonya ata kũngũlya, ‘Thĩna waku nĩ mwaũ?’ Nenyu nĩmwoosa mũthembi wakwa na ngai ila nzeũvĩtye na mwathi. Yu nĩ kyaũ natiwa nĩ nakyo?”

25Aũme asu ma Ndani nĩmamũsũngĩie atĩĩ, “Ndũkatate kũneena ndeto o na ĩmwe ethĩwa ndũkwenda aũme aa mathatw'e nue na maikũkita makũae vamwe na andũ ma mũsyĩ waku onthe.”

26Aũme asu nĩmaendeeie na kyalo kyoo, na yĩla Mika wamanyie kana maĩ na vinya mbee wake nĩwavĩndũkie na asyoka mũsyĩ kwake.

27Andũ asu ma mbaĩ ya Ndani mamina kwosa syĩndũ isu Mika waseũvĩtye vamwe na mũthembi wake, nĩmaendie Laisa makokite andũ ma nthĩ ĩsu. Andũ ma nthĩ ĩsu mekalaa na mũu, matena w'ĩa wa kũvithũkĩwa nĩ amaitha. Nĩmamokitie kwa kũmatemanga na ũvyũ, na mavĩvya ndũa yoo.

28Vayaĩ mũndũ wa kũmatangĩĩa nĩkwĩthĩwa matũaa vaasa na ndũa ya Sitoni na mayaĩ na ngwatanĩo na mũndũ o na ũmwe. Ndũa ĩsu yaĩ mwandanĩ ũla wĩ vakuvĩ na ndũa ya Mbethi-leovu. Andũ ma mbaĩ ya Ndani nĩmaakie ndũa ĩsu ĩngĩ na matũa vo.

29Nĩmamĩtie Ndani ta ũmae woo Ndani mwana wa Yakovo. Ndũa ĩsu vau mbeenĩ yeetawa Laisa.

30Andũ asu ma mbaĩ ya Ndani nĩmenzĩlile ngai ya mũvw'anano vau mamĩthaithae. Yonathani mwana wa Ngelisomu, nzũkũlũ ya Mwose vamwe na nzyawa syake nĩmathũkũmaa ta athembi ma mbaĩ ĩsu nginya yĩla andũ ma nthĩ ĩsu mataviwe matwawa nthĩ ya ũeninĩ ta ngombo.

31Ngai ya mũvw'anano ya Mika nĩyekalaa vau ĩvindanĩ yonthe yĩla Ĩeema yĩla Ngai wathaithĩawa yekalaa Silo.

← Chapter 17 Jump to: Chapter 19 →