Judges 7

Kamba (MBIVILIA ŨVOO MŨSEO)

← Chapter 6 Jump to: Chapter 8 →

1Mũthenya ũmwe Yelumbaali, ũla nĩ Ngitioni, na andũ onthe ala waĩ namo nĩmaamũkie kwakya tene na mathi kwambĩla maeema moo vakuvĩ na kĩthima kya Aloti. Andũ ma Mitiani mambĩte maeema moo mwandanĩ ũla waĩ vakuvĩ na Kĩĩma kya Mole, ngalĩko ya ĩũlũ ya vala Ngitioni na andũ ala waĩ namo maĩ.

2Mwĩai Ngai nĩwaneenie na Ngitioni amwĩa atĩĩ, “Andũ asu wĩ namo nĩ aingĩ ũkethĩa nditonya kũnengane Amitiani ũtonyinĩ woo. Ndikwenda andũ ma Ĩsilaeli mambĩĩe kwĩkathĩĩa kũla nĩĩ mayona ta masindie kwa vinya woo,

3yu tavya andũ ũmee atĩĩ, ‘Mũndũ o na wĩva ũla wĩ na w'ĩa na ũkũtetema nĩwaĩlĩte kwĩnũka, naitũ nĩtũũtiwa vaa Kĩĩmanĩ kya Ngileati.’ ” Kwoou andũ ngili mĩongo ĩlĩ na ilĩ nĩmasyokie, ĩndĩ angĩ ngili ĩkũmi matiwa.

4Nĩvo ĩndĩ Mwĩai Ngai waneenie na Ngitioni amwĩa atĩĩ, “Andũ ala matialĩte no aingĩ mũno. Matheesye ũsĩnĩ, nakwa nĩngũũtetheesya kũmanyuvĩa vau. Ethĩwa nĩnakwĩa, ‘Mũndũ ũũ nĩmũkũendany'a,’ ũsu mũkaendany'a, ĩndĩ nasya, ‘Mũndũ ũũ mũyĩendany'a,’ ũsu ndethi.”

5Ngitioni nĩwatheeanisye na andũ asu ũsĩnĩ. Me vau, Mwĩai nĩwamwĩie atĩĩ, “Vatha andũ onthe ala meũnyw'a kĩw'ũ maikĩlambalambya na ũĩmĩ ta ngitĩ kuma andũnĩ ala meũnyw'a kĩw'ũ matulĩtye ndu.”

6Andũ maana atatũ mautie kĩw'ũ na moko moo na makĩlambalambya; ala angĩ onthe nĩmatulilye ndu manyw'e kĩw'ũ.

7Mwĩai Ngai nĩweeie Ngitioni atĩĩ, “Kwĩsĩla andũnĩ asu maana atatũ, nĩngũmũtangĩĩa na kũmũnenga ũsindi ĩũlũ wa andũ ma Mitiani. Tavya andũ ala angĩ onthe ũmee nĩmenũke.”

8Kwoou Ngitioni nĩweeie andũ ala angĩ onthe ma Ĩsilaeli nĩmasyoke maeemanĩ moo na atianĩw'a na andũ maana atatũ. Nĩwoosie lĩu, na masoo ma ala menũkie na ainenga ala matiiwe.

9Ũtukũ ũsu, Mwĩai Ngai nĩweeaĩie Ngitioni amwĩa atĩĩ, “Ũkĩla ũthi ũkavithũkĩe andũ ma Mitiani maeemanĩ moo; nĩngũũnenga ũsindi ĩũlũ wamo.

10Ethĩwa nũũkĩa kũmavithũkĩa theea wĩ na mũthũkũmi waku Vula mũthi maeemanĩ moo.

11Nũkwĩw'a ũndũ mekwasya, naku ũyĩthĩwa na ũkũmbaũ wa kũmavithũkĩa.” Nĩvo ĩndĩ Ngitioni e na mũthũkũmi wake maendie ũtee wa maeema ma amaitha moo.

12Andũ ma Mitiani, Aamaleki na andũ ala matũĩte weũnĩ nĩmanyaĩĩkĩe mwandanĩ ta ithuĩ sya ngie. Maĩ na ngamĩle itatalĩka; singĩvĩte ta kĩthangathĩ kĩla kĩ ũtee wa ũkanga.

13Yĩla Ngitioni wavikie vau, nĩweewie mũndũ ũmwe aitavya mũnyanyae ĩũlũ wa ndoto waotete. Nĩwaneenaa nake ayasya atĩĩ, “Nĩotie ndyona mũkate ũuĩtwe na mũtu wa nganũ yĩtawa mbaale ũvingilitĩte na wooka vala twambĩte maeema na wakima ĩeema. Ĩeema yĩu nĩyĩombokie na yeenyasya nthĩ.”

14Mũnyanyae wa mũndũ ũsu nĩwamwĩie atĩĩ, “Kĩu kĩyĩthĩwa kĩndũ kĩngĩ eka kaũ wa Ngitioni mwana wa Yoasi ũla mũndũ wa mbaĩ ya Ĩsilaeli. Ngai nũnenganĩte andũ ma Mitiani kũla ũĩ nĩ kana amasinde o vamwe na asikalĩ moo ma kaũ!”

15Yĩla Ngitioni weewie ĩũlũ wa ndoto ĩsu, na ũalyũlo wayo nĩwatulilye ndu na athaitha Mwĩai Ngai. Nĩvo ĩndĩ waendie maeemanĩ ma andũ ma Ĩsilaeli na amea atĩĩ, “Ũkĩlai! Nĩkwĩthĩwa Mwĩai Ngai nũmũnengete ũtonyi wa kũsinda asikalĩ ma Mitiani!”

16Nĩwaanisye ala andũ maana atatũ ikundi itatũ na anenga kĩla mũndũ soo na mũĩ sya mwaki ithing'ĩĩw'e ikuunĩ.

17Ngitioni nĩwaneenie namo amea atĩĩ, “Mwoona navika ũtee wa vala vambĩtwe maeema, nzyaĩĩsyei na mũyĩka ũndũ ngwĩka.

18Mwoona twavuva masoo nĩ na nguthu yakwa, o nenyu vuvai masoo menyu kwĩlingĩla maeemanĩ na mũineena na wasya mũnene mũyasya atĩĩ, ‘Nĩ kwondũ wa Mwĩai Ngai, na kwondũ wa Ngitioni!’ ”

19Ngitioni na nguthu yake ya andũ ĩana nĩmaendie ũtee wa maeema kũkilĩlye kũvika ũtukũ katĩ, kavinda kanini ĩtina wa ũla wasungaa akũana na ũngĩ. Ngitioni na andũ ma nguthu yake nĩmavuvie masoo na mooaa ila ikuu makwete.

20Nguthu ila ingĩ ilĩ nĩsyeekie o ta ũu. Onthe nĩmakwatie mũĩ syoo na kw'oko kwa aka, na makwata masoo na kw'oko kwa aũme, na maneena na wasya mũnene mayasya atĩĩ, “Twĩũkita kwondũ wa Mwĩai Ngai, na kwondũ wa Ngitioni!”

21Nĩmathyũlũlũkile maeema kĩla mũndũ aũngamĩte vandũ vake na asikalĩ onthe ma amaitha masemba mauĩte mbu.

22Ngitioni na andũ make maendee kũvuva masoo moo, Mwĩai Ngai nĩwatumie asikalĩ ma amaitha moo mambĩĩa kũkita mo ene kwa ene na mbyũ syoo. Asikalĩ asu nĩmakĩie mathi kũvika Mbethi-sita melekele Nzelela, o na mathi kũvika mũvakanĩ wa ndũa ya Aveli-meola vakuvĩ na Tavathu.

23Nĩvo ĩndĩ andũ ma mbaĩ ya Navutalĩ, ya Aseli na andũ ma mbaĩ ya Manase kuma ngalĩko syelĩ meetiwe na maatĩĩa andũ ma Mitiani.

24Ngitioni nĩwatũmie andũ mathi nthĩ yonthe ĩla yĩ iĩma ya Evalaimu makasye atĩĩ, “Theeai mũke kũkita na andũ ma Mitiani kwa kũmasiĩĩa maikainge Ũsĩ wa Yolotani na tũlũsĩ tũla tũngĩ kũthi kũvika ndũanĩ ya Mbethi-mbala.” Andũ ma mbaĩ ya Evalaimu nĩmeetiwe moombana vamwe na makwata Ũsĩ wa Yolotani kũthi kũvika Mbethi-mbala.

25Nĩmokitie na makwata atongoi elĩ ma andũ ma Mitiani ala meetawa Olevi na Nzeevu. Nĩmooaĩie Olevi ĩvianĩ ya Olevi, nake Nzeevu mamũaĩa kĩvivĩonĩ kya nzavivũ kya Nzeevu. Nĩmaendeeie na kũlũngya andũ ma Mitiani na maetee Ngitioni mũtwe wa Olevi na wa Nzeevu. Ĩvindanĩ yĩu Ngitioni aĩ ngalĩko ya wumĩlonĩ wa syũa ya Ũsĩ wa Yolotani.

← Chapter 6 Jump to: Chapter 8 →