Judges 14

Kamba (MBIVILIA ŨVOO MŨSEO)

← Chapter 13 Jump to: Chapter 15 →

1Mũthenya ũmwe Samusoni nĩwatheeie ndũanĩ yĩtawa Timina, vala woonie mwĩĩtu ũmwe Mũvilisiti.

2Yĩla wasyokie mũsyĩ nĩweeie ĩthe na inyia wake atĩĩ, “Nĩnonie mwĩĩtu Mũvilisiti ndũanĩ ya Timina. Endai mũkandetee mwĩĩtu ũsu nĩ kana atw'ĩke kĩveti kyakwa.”

3Ĩndĩ ĩthe na inyia wake mamũkũlya atĩĩ, “Vai mũndũ mũka mwaĩlu katĩ wa andũ ma mũsyĩ witũ, kana katĩ wa andũ ma mbaĩ yaitũ? No nginya ũtwae kĩveti kuma kwa Avilisiti asu mate aĩke?” Ĩndĩ nake Samusoni eea ĩthe wake atĩĩ, “Endai mũkandetee mwĩĩtu ũsu atw'ĩke kĩveti kyakwa, nũndũ nĩwe ũkũmbendeesya mũno.”

4Asyai ma Samusoni mayaamanya kana Mwĩai Ngai nĩwe watongoesye Samusoni kwĩka ũu, nĩkwĩthĩwa Mwĩai Ngai amanthaa ũndũ ũtonya kũkita Avilisiti. Ĩvindanĩ yĩu Avilisiti masumbĩkĩte andũ ma Ĩsilaeli.

5Kwoou Samusoni nĩwatheeanisye na ĩthe na inyia wake mathi Timina. Yĩla mavikie vakuvĩ na mĩũnda ya mĩsavivũ ya Timina, mũnyambũ wa mũika nĩwookie mĩtũkĩ kũla kwĩ Samusoni ũlulumĩte.

6Veva wa Mwĩai Ngai nĩwookie ĩũlũ wake na amwĩkĩa vinya, na aatũany'a mũnyambũ ũsu na moko o tondũ waĩ atonya kwatũany'a katena ka mbũi. Ĩndĩ ndaatavya ĩthe na inyia wake ũndũ weeka.

7Nĩvo ĩndĩ Samusoni watheeie Timina. Nĩwaneenie na mwĩĩtu ũsu Mũvilisiti, na endeew'a nĩwe mũno.

8Ĩtina wa mĩthenya mĩvũthũ Samusoni nĩwasyokie Timina akatwae mwĩĩtu ũsu. E nzĩanĩ nĩwaathũkie ũtee asisye mwĩĩ wa ũla mũnyambũ wooaĩte. Nthĩnĩ wa mwĩĩ wa mũnyambũ ũsu vaĩ kĩthuĩ kya nzũkĩ na ũkĩ wa nzũkĩ.

9Nĩwatwee ũkĩ ũsu na moko na aũya aendete. Yĩla waendie vala ve asyai make, nĩwamanengie ũkĩ ũmwe, na maya. Ĩndĩ ndaamatavya kana awumĩtye mwĩĩnĩ wa mũnyambũ mũkw'ũ.

10Ĩthe wa Samusoni nĩwatheeie mũsyĩ kwa mwĩĩtu ũsu, nake Samusoni aseũvĩsya mboka vo kwĩanana na ũndũ anake meekaa mayĩvaany'a.

11Yĩla Avilisiti moonie Samusoni, nĩmatũmie anake mĩongo ĩtatũ makekalany'e nake.

12Nĩvo ĩndĩ Samusoni weeie anake asu atĩĩ, “Ekai nĩmũkwatye ndaĩ, na ethĩwa nĩmũũnenga ũsũngĩo wayo ĩvindanĩ ya mĩthenya mũonza ya mboka, ngamũnenga ngũa mĩongo ĩtatũ itumĩtwe na ndii nzeo ndũmu, na ngũa ingĩ mĩongo ĩtatũ sya ũkũany'a;

13ĩndĩ nenyu mwaemwa nĩ kũnzũngĩa mũkanenga ngũa mĩongo ĩtatũ itumĩtwe na ndii nzeo ndũmu, na ngũa ingĩ mĩongo ĩtatũ sya ũkũany'a.” Namo anake asu mamwĩa, “Tũkwatye ndaĩ ĩsu yaku, nĩ kana tũmĩw'e.”

14Nake amea, “Kuma kwa ũla ũĩsaa, kwaumie kĩndũ kya ũya; kuma kwa ũla wĩ vinya, kwaumie kĩndũ kĩ mũyo.” Vandũ va ĩvinda ya mĩthenya ĩtatũ anake asu mayaĩ matonya kũnengane ũsũngĩo wa ndaĩ ĩsu.

15Mũthenyanĩ wa kana wa mboka ĩsu nĩmeeie mũka wa Samusoni atĩĩ, “Sesenga mũemeu nĩ kana atũtavye ũalyũlo wa ĩla ndaĩ. Walea kwĩka ũu nĩtũũkũvĩvanĩsya na andũ ma mũsyĩ wa ĩthe waku mũkw'e. Ũtũthokisye vaa nĩ kana ũtũyĩe?”

16Kwoou mũka wa Samusoni nĩwaendie vala ũĩ aĩĩte na amwĩa atĩĩ, “We nũmenete! Kwa w'o, ndũmbendete. Ũnakwatisye andũ ma nthĩ yaitũ ndaĩ, na ndũnaandavya ũalyũlo wayo!” Samusoni amwĩa, “O na ndinatavya ĩthe na inyia wakwa ũalyũlo wa ndaĩ ĩsu. Kĩla kĩũtuma ngũtavya nĩ kyaũ?”

17Kĩveti kyake nĩkyaendeeie kũĩa vandũ va ĩvinda ya mĩthenya ĩsu mũonza ya mboka. Ĩndĩ mũthenyanĩ wa mũonza Samusoni nĩwakĩtavisye ũalyũlo wa ndaĩ ĩsu, nũndũ kyaendeeie kũmũthing'ĩĩsya mũno akĩtavye. Nĩvo ĩndĩ kĩveti kĩu kyake kyaendie na kyatavya Avilisiti.

18Kwoou mũthenyanĩ wa mũonza syũa yĩtanathũa, aũme ma ndũa ĩsu nĩmamwĩie atĩĩ, “Nĩ kyaũ kĩ mũyo mbee wa ũkĩ wa nzũkĩ? Nĩ kyaũ kĩ vinya kwĩ mũnyambũ?” Nĩvo Samusoni wameie, “Kethĩwa mũinaaĩma na moi yakwa, mũyĩthĩwa mũnamanya ũsũngĩo wa ndaĩ yakwa o na kũvika yu.”

19Veva wa Mwĩai Ngai nĩwookie ĩũlũ wa Samusoni na amwĩkĩa vinya. Nĩwatheeie ndũanĩ ya Asikeloni, ooaa aũme mĩongo ĩtatũ, amaumya ngũa, na anenga aũme asu masũngĩie ndaĩ ngũa isu nzeo sya aũme asu wooaie. Ĩtina wa ũu nĩwenũkie, athatĩtw'e nĩ maũndũ ala meekĩka,

20na kĩveti kyake kyanengwa mũndũ ũla wamũũngamĩĩte mũtwaanonĩ.

← Chapter 13 Jump to: Chapter 15 →