Judges 8

Kamba (MBIVILIA ŨVOO MŨSEO)

← Chapter 7 Jump to: Chapter 9 →

1Andũ ma mbaĩ ya Evalaimu nĩmakũlilye Ngitioni atĩĩ, “Ũnaleile kũtwĩta yĩla ũnaendete kũkita na andũ ma Mitiani nĩkĩ? Ũnatwĩkie ũu nĩkĩ?” Nĩmatetisye Ngitioni me na woo mwingĩ.

2Kwoou Ngitioni nĩwaneenie namo amea atĩĩ, “Ũndũ ũla nĩnaĩ nĩka ndwĩananw'a na ũla mwĩkĩte. Kĩla andũ ma Evalaimu mombanasya ĩtina wa nzavivũ syakethwa nĩ kĩseo mbee wa ngetha ya nzavivũ ya andũ ma mũsyĩ wa Avieseli.

3Ũu wĩ o vo, kwĩsĩla ũtonyinĩ wa Ngai, nĩmũnooaie ala atongoi elĩ ma andũ ma Mitiani, Olevu na Nzeevu. Nĩkĩte ũndũ mwaũ ũsianĩw'a na ũsu wenyu?” Ngitioni amina kwasya ũũ, woo ũla maĩ naw'o nĩwauisye.

4Ĩvindanĩ yĩu, Ngitioni na ala andũ make maana atatũ maĩ manavika ũsĩnĩ wa Yolotani, na makaũinga. O na vala nĩmanoete, nĩmaendeeie kũatĩĩa amaitha.

5Mavika ndũanĩ ya Sukothi, Ngitioni nĩwaneenie na andũ ma ndũa ĩsu amea atĩĩ, “Nĩngũmwĩsũva mũnenge asikalĩ makwa mĩkate; nĩmanoie mavinya, nakwa no nĩendee kũatĩĩa Nzeva na Nzalimuna, asumbĩ ma Mitiani.”

6Ĩndĩ atongoi ma Sukothi mamũkũlya atĩĩ, “Twĩnenga asikalĩ maku ma kaũ mĩkate ya kĩ, na mũinamba kũkwata Nzeva na Nzalimuna?”

7Nake Ngitioni amasũngĩa amea atĩĩ, “Vai ũndũ, ĩndĩ yĩla Mwĩai Ngai ũkũndonyethya kũsinda Nzeva na Nzalimuna, nĩmũvũa na mathanzu ma mĩw'a ya weũnĩ na ma mĩtae ya kĩthekanĩ mwĩw'e!”

8Kuma vau Ngitioni nĩwaendeeie kwambata athi ndũanĩ ya Venueli na akũlya andũ ma vo o ũndũ wakũlilye ala ma Sukothi, namo mamũsũngĩa o ta asu ma Sukothi.

9Kwoou nĩweeie andũ ma Venueli atĩĩ, “Yĩla ngũsyoka nĩ na mũuo, nĩomboanga nyũmba ĩno ndũlu!”

10Nzeva na Nzalimuna vamwe na asikalĩ moo ma kaũ maĩ Kalikoli. No andũ ngili ĩkũmi na itano matialile katĩ wa asikalĩ onthe ma kaũ ala maumĩte andũnĩ ma mbaĩ ila syatwĩe weũnĩ. Asikalĩ ngili ĩana na mĩongo ĩlĩ nĩmooaiwe.

11Ngitioni esĩlile nzĩanĩ ĩla yaĩ ũtee wa weũ ngalĩko ya wumĩlonĩ wa syũa ya ndũa ya Nova na Yokivea na avithũkĩa asikalĩ asu mateyũmbanĩtye.

12Asumbĩ elĩ ma Mitiani Nzeva na Nzalimuna nĩmasembie makĩa, ĩndĩ Ngitioni nĩwamaatĩĩie na amakwata me elĩ. Ũndũ ũsu nĩwatumie asikalĩ moo onthe matelema.

13Yĩla Ngitioni mwana wa Yoasi wasyokie kuma kaũnĩ esĩlĩte kyambatonĩ kya Eelesi,

14nĩwakwatie mwanake ũmwe wa mũika wa andũ ma Sukothi na amũkũlya makũlyo. Mwanake ũsu nĩwaandĩkĩie Ngitioni masyĩtwa mĩongo mũonza na mũonza ma atumĩa na andũ ala matongoesye Sukothi.

15Nĩvo ĩndĩ Ngitioni waendie kũla kwĩ andũ ma Sukothi na amea atĩĩ, “Nĩmũũlilikana yĩla mwaleile kũndetheesya? Mwaisye mũinenga asikalĩ makwa ala maĩ na mĩnoo mũno mũkate o na ũmwe, nũndũ ndyaĩ nĩnamba kũkwata Mũsumbĩ Nzeva na Nzalimuna. Yu ĩndĩ asumbĩ asu nĩ aa!”

16Nĩwoosie atongoi ma ndũa ĩsu na oosa mathanzu ma mĩw'a ya weũnĩ na ma mĩtae ya kĩthekanĩ na amavũa namo nĩ kana ũndũ ũsu wĩthĩwe ĩsomo kwoo.

17O ta ũu nĩwaomboangie mwako mũtũlu wa Venueli na ooaa andũ ma ndũa ĩsu.

18Ngitioni nĩwakũlilye Nzeva na Nzalimuna atĩĩ, “Mwooaie andũ mailyĩ ata yĩla mwaĩ Tavoli?” Nĩmamũsũngĩie mamwĩa atĩĩ, “Andũ mailyĩ taku; kĩla ũmwe ailyĩ ta mwana wa mũsumbĩ.”

19Nake Ngitioni asya atĩĩ, “Andũ asu maĩ ana-a-inyia makwa. Maĩ ana-a-ia makwa. O tondũ Mwĩai Ngai wĩ thayũ, nĩngwĩvĩta kana kethĩwa mũyaamoaa, o nakwa ndyĩthĩwa namũaa.”

20Nĩvo ĩndĩ Ngitioni weeie Yetheli mwana wake ũla mũkũũ atĩĩ, “Ũkĩla ũmoae.” Ĩndĩ Yetheli ndaaumya ũvyũ wake nũndũ aĩ o kamwana na nĩwakĩaa.

21Nĩvo ĩndĩ Nzeva na Nzalimuna meeie Ngitioni atĩĩ, “Ũka ũtũae we mwene, nũndũ o ũndũ mũndũ ũilyĩ now'o vinya wake wĩthĩawa ũilyĩ.” Kwoou Ngitioni nĩwamoaie, na oosa masoa ala meekĩĩtwe ngingonĩ sya ngamĩle syoo.

22Ĩtina wa ũu, andũ ma Ĩsilaeli nĩmaneenie na Ngitioni mamwĩa, “Tw'ĩka mũsumbĩ waitũ na o na nzyawa syaku ila ikoka iyĩendeea kũtũsumbĩka. We nĩwatũtangĩĩa kuma andũnĩ ma Mitiani.”

23Ngitioni nĩwamasũngĩie amea atĩĩ, “Nyie nditw'ĩka mũsumbĩ wenyu o na ana makwa maikethĩwa asumbĩ menyu. Mwĩai Ngai nĩwe ũkethĩawa mũsumbĩ wenyu.”

24Nĩwaendeeie kũneena amea atĩĩ, “Ekai nĩmũkũlye mũmbĩke ũndũ o ũmwe; kĩla ũmwe nĩanenge mĩnaĩ ya thaavu ĩla ũnoosie ta mũtavo.” (Andũ ma Mitiani nĩmeekĩaa mĩnaĩ ya thaavu, o ta andũ ala angĩ matwĩe weũnĩ.)

25Namo andũ ma Ĩsilaeli mamũsũngĩa mamwĩa atĩĩ, “Nĩtũũkũnenga mĩnaĩ ĩsu na ngoo ya kwenda.” Nĩmalanilye kĩtambaa nthĩ, na kĩla mũndũ alekya kĩtambaanĩ kĩu mĩnaĩ ĩla woosete.

26Ũito wa mĩnaĩ ya thaavu ĩla Ngitioni wanengiwe waĩ vakuvĩ kĩlo mĩongo ĩlĩ. Vamwe na thaavu ũsu nĩwanengiwe syĩndũ sya wanake, masoa ma ngingo, ngũa sya langi ũilyĩ ta wa mbuluu ila asumbĩ ma Mitiani meekĩaa, na masoa ala meekĩĩtwe ngingonĩ sya ngamĩle syoo.

27Ngitioni nĩwaseũvisye visa wa ngai ya mũvw'anano aitũmĩa thaavu ũsu, na amĩia ndũanĩ ya Ovala vala mũsyĩ wake waĩ. Andũ onthe nĩmaleile Ngai na mathi kũthaitha ngai ĩsu ya mũvw'anano. Ngai ĩsu nĩyatw'ĩkie mũteo kwa Ngitioni na kwa andũ ma mũsyĩ wake.

28Ũu nĩw'o andũ ma Ĩsilaeli masindie nthĩ ya Mitiani na kuma ĩvinda yĩu Mitiani yeethĩwa ĩtamatelemya. Nthĩ ya Ĩsilaeli nĩyeethĩiwe na mũuo vandũ va myaka mĩongo ĩna nginya Ngitioni esa kũkw'a.

29Yelumbaali, ũla kwa ĩsyĩtwa yĩngĩ weetawa Ngitioni, mwana wa Yoasi nĩwaendie kwĩkala mũsyĩ kwake.

30Ngitioni aĩ na ana mĩongo mũonza make mwene nĩkwĩthĩwa atwaĩte iveti mbingĩ.

31O ta ũu aĩ na mũndũ mũka watũĩtye wekalaa Sekemu. Ũsu nake amũsyaĩie mwana ũmwe ũla weetawa Avimeleki.

32Ngitioni akwie e na ũkũũ wa myaka mingĩ na athikwa mbũanĩ ya ĩthe wake Yoasi ĩla yaĩ Ovala, ndũanĩ ya andũ ma mũsyĩ wa Avieseli.

33Ngitioni amina kũkw'a oou, andũ ma Ĩsilaeli nĩmeethĩiwe ĩngĩ mate aĩkĩĩku kwa Ngai nũndũ wa kũthaitha ngai sya Mbaali. Nĩmatw'ĩkĩthisye ngai ĩla yĩtawa Mbaali-mbelithi ngai yoo.

34Kuma ĩvindanĩ yĩu nĩmaleile kũmũthũkũma Mwĩai Ngai, Ngai woo ũla wamovoetye kuma kwa amaitha moo ala mamathyũlũlũkĩte.

35Mayaaĩthĩwa na mũvea kwa andũ ma mũsyĩ wa Yelumbaali ũla kwa ĩsyĩtwa yĩngĩ weetawa Ngitioni kwondũ wa moseo ala wamekĩte.

← Chapter 7 Jump to: Chapter 9 →