2 Samuel 10

Lao Bible 2012 (ພຣະຄຳພີສັກສິ)

← Chapter 9 Jump to: Chapter 11 →

1ຕໍ່ມາ ນາຮາດກະສັດຂອງຊາວອຳໂມນໄດ້ຕາຍໄປ. ຮານູນລູກຊາຍຂອງເພິ່ນໄດ້ຂຶ້ນເປັນກະສັດແທນ.

2ກະສັດດາວິດຈຶ່ງກ່າວວ່າ, “ເຮົາຕ້ອງສະແດງຄວາມເປັນມິດຢ່າງສັດຊື່ຕໍ່ຮານູນ ຕາມທີ່ເຈົ້ານາຮາດພໍ່ຂອງລາວເຄີຍໄດ້ປະຕິບັດຕໍ່ເຮົາ.” ສະນັ້ນ ກະສັດດາວິດຈຶ່ງສົ່ງຄະນະທູດໄປສະແດງຄວາມເສຍໃຈນຳເຈົ້າຮານູນ. ເມື່ອຄະນະທູດຂອງກະສັດດາວິດມາເຖິງເມືອງອຳໂມນແລ້ວ

3ບັນດາຜູ້ນຳຊາວອຳໂມນກໍໄປບອກກະສັດຂອງພວກຕົນວ່າ, “ທ່ານຄິດເຫັນຢ່າງໃດທີ່ກະສັດດາວິດສົ່ງຄະນະທູດ ມາສະແດງຄວາມເສຍໃຈນຳທ່ານໃນເວລາເຊັ່ນນີ້ ເພື່ອເປັນການໃຫ້ກຽດແກ່ພໍ່ຂອງທ່ານຊັ້ນບໍ? ຄົງບໍ່ເປັນດັ່ງນັ້ນດອກ ເພິ່ນສົ່ງພວກເຫຼົ່ານີ້ມາສອດແນມເບິ່ງບ້ານເມືອງເພື່ອເອົາຊະນະພວກເຮົາ.”

4ດັ່ງນັ້ນ ຮານູນຈຶ່ງຈັບຄະນະທູດຂອງກະສັດດາວິດ ແລະສັ່ງໃຫ້ແຖໜວດຂ້າງໜຶ່ງທັງຕັດເຄື່ອງນຸ່ງຊື່ກັບກະໂພກອອກ ແລ້ວສົ່ງພວກເຂົາກັບເມືອ.

5ພວກເຂົາອັບອາຍຫລາຍຈົນບໍ່ກ້າກັບຄືນເມືອ. ເມື່ອກະສັດດາວິດໄດ້ຍິນເຖິງເລື່ອງທີ່ເກີດຂຶ້ນ ເພິ່ນຈຶ່ງສັ່ງໃຫ້ພວກເຂົາລໍຖ້າຢູ່ໃນເມືອງເຢຣິໂກ ຈົນກວ່າໜວດຂອງພວກເຂົາປົ່ງໃໝ່ກ່ອນ ແລ້ວຈຶ່ງກັບຄືນມາ.

6ຊາວອຳໂມນຮູ້ຕົວວ່າພວກຕົນໄດ້ສ້າງສັດຕູກັບກະສັດດາວິດ. ດັ່ງນັ້ນ ພວກເຂົາຈຶ່ງໄປຈ້າງເອົາທະຫານຊີເຣຍ ຊາວພັນຄົນ ຈາກເມືອງເບັດເຣໂຮບ ແລະເມືອງໂຊບາ ສິບສອງພັນຄົນ ຈາກເມືອງໂຕບ ແລະກະສັດແຫ່ງມາອາກາພ້ອມກັບທະຫານໜຶ່ງພັນຄົນ.

7ເມື່ອກະສັດດາວິດໄດ້ຍິນເຊັ່ນນັ້ນ ເພິ່ນຈຶ່ງສົ່ງໂຢອາບພ້ອມທັງກອງທັບໄປສູ້ຮົບພວກເຂົາ.

8ຊາວອຳໂມນໄດ້ເຄື່ອນທັບໄປຕັ້ງທີ່ໝັ້ນຢູ່ທາງເຂົ້າຣັບບາ ເມືອງເອກຂອງພວກເຂົາ; ໃນຂະນະດຽວກັນນັ້ນ ພວກອື່ນຄືຊາວຊີເຣຍກັບທະຫານຈາກເມືອງໂຕບ ແລະມາອາກາ ກໍຕັ້ງທີ່ໝັ້ນຢູ່ນອກເມືອງ.

9ເມື່ອໂຢອາບເຫັນວ່າ ກອງທັບຂອງສັດຕູຈະໂຈມຕີຕົນທາງດ້ານໜ້າກັບທາງດ້ານຫລັງ; ສະນັ້ນ ລາວຈຶ່ງເລືອກເອົາທະຫານອິດສະຣາເອນຜູ້ທີ່ເກັ່ງກ້າ ໃຫ້ໄປຕັ້ງທ່າໄວ້ປະເຊີນໜ້າກັບພວກຊີເຣຍ.

10ແລ້ວລາວກໍໃຫ້ອາບີໄຊນ້ອງຊາຍຂອງລາວ ເປັນຜູ້ບັນຊາການພວກທີ່ເຫຼືອຢູ່ນັ້ນ ໂດຍໃຫ້ພວກນີ້ຕັ້ງທ່າໄວ້ປະເຊີນໜ້າກັບພວກອຳໂມນ.

11ໂຢອາບບອກອາບີໄຊວ່າ, “ຖ້າເຈົ້າເຫັນພວກຊີເຣຍເອົາຊະນະຂ້ອຍ ໃຫ້ເຈົ້າມາຊ່ວຍຂ້ອຍເດີ. ຖ້າພວກອຳໂມນເອົາຊະນະເຈົ້າ ຂ້ອຍຈະໄປຊ່ວຍເຈົ້າ.

12ຈົ່ງເຂັ້ມແຂງແລະກ້າຫານ ຂໍໃຫ້ພວກເຮົາສູ້ຮົບຢ່າງເດັດດ່ຽວເພື່ອປະຊາຊົນຂອງພວກເຮົາ ແລະເພື່ອບັນດາເມືອງຕ່າງໆຂອງພຣະເຈົ້າ ແລະຂໍໃຫ້ພຣະເຈົ້າຢາເວດຳເນີນການ ຕາມທີ່ພຣະອົງເຫັນຊອບເຖີດ.”

13ດັ່ງນັ້ນ ໂຢອາບແລະທະຫານຂອງຕົນກໍໄດ້ຍົກທັບເຂົ້າບຸກໂຈມຕີກ່ອນ ແລະພວກຊີເຣຍກໍໄດ້ແຕກພ່າຍໜີໄປ.

14ເມື່ອພວກອຳໂມນເຫັນວ່າພວກຊີເຣຍປົບໜີໄປແລ້ວ ພວກເຂົາຈຶ່ງແລ່ນປົບໜີຈາກອາບີໄຊ ແລະຖອຍເຂົ້າໄປໃນເມືອງ. ແລ້ວໂຢອາບກໍກັບຄືນສູ່ນະຄອນເຢຣູຊາເລັມ ຫລັງຈາກທີ່ລາວໄດ້ສູ້ຮົບຊາວອຳໂມນແລ້ວ.

15ເມື່ອຊາວຊີເຣຍຮູ້ຕົວວ່າ ພວກຕົນໄດ້ພ່າຍແພ້ແກ່ຊາວອິດສະຣາເອນ; ສະນັ້ນ ພວກເຂົາຈຶ່ງລະດົມເອົາທະຫານທັງໝົດມາໂຮມກັນ.

16ເຈົ້າຮາດາເດເຊໄດ້ສົ່ງຄົນໄປນຳເອົາທະຫານຊີເຣຍ ຢູ່ທາງທິດຕາເວັນອອກຂອງແມ່ນໍ້າເອີຟຣັດ. ພວກນີ້ໄດ້ມາທີ່ເມືອງເຮລາມ ໂດຍແມ່ນໂຊບັກຜູ້ບັນຊາການກອງທັບຂອງເຈົ້າຮາດາເດເຊແຫ່ງໂຊບາ ເປັນຜູ້ບັນຊາການສູງສຸດ.

17ເມື່ອກະສັດດາວິດໄດ້ຍິນເຊັ່ນນີ້ ເພິ່ນຈຶ່ງຮວບຮວມເອົາທະຫານອິດສະຣາເອນທັງໝົດ ນຳພາຂ້າມແມ່ນໍ້າຈໍແດນ ແລະຍົກທັບໄປສູ່ເມືອງເຮລາມບ່ອນທີ່ພວກຊີເຣຍຕັ້ງທ່າປະເຊີນໜ້າກັບເພິ່ນ. ການສູ້ຮົບກັນໄດ້ເລີ່ມຂຶ້ນ

18ພວກອິດສະຣາເອນໄດ້ໄລ່ພວກຊີເຣຍໃຫ້ຖອຍກັບຄືນໄປ. ກະສັດດາວິດກັບທະຫານຂອງເພິ່ນໄດ້ຂ້າທະຫານຂັບລົດຮົບຊາວຊີເຣຍເຈັດຮ້ອຍຄົນ ແລະຂ້າທະຫານມ້າສີ່ສິບພັນຄົນ. ສ່ວນໂຊບັກຜູ້ບັນຊາການກອງທັບຂອງສັດຕູໄດ້ຮັບບາດເຈັບ ແລະຕາຍຢູ່ໃນສະໜາມຮົບ.

19ເມື່ອບັນດາກະສັດທີ່ຂຶ້ນກັບເຈົ້າຮາດາເດເຊເຫັນວ່າ ພວກຕົນເສຍໄຊໃຫ້ແກ່ຊາວອິດສະຣາເອນແລ້ວ ຈຶ່ງເຮັດສັນຍາສະຫງົບເສິກກັບພວກອິດສະຣາເອນ ແລະຍອມຢູ່ໃຕ້ອຳນາດຂອງພວກເຂົາ. ແລ້ວຊາວຊີເຣຍກໍບໍ່ກ້າຊ່ວຍເຫລືອຊາວອຳໂມນອີກຕໍ່ໄປ.

← Chapter 9 Jump to: Chapter 11 →