2 Samuel 8

Lao Bible 2012 (ພຣະຄຳພີສັກສິ)

← Chapter 7 Jump to: Chapter 9 →

1ຕໍ່ມາ ກະສັດດາວິດໄດ້ໂຈມຕີພວກຟີລິດສະຕິນອີກ. ເພິ່ນໄດ້ເອົາຊະນະພວກເຂົາແລະປົດປ່ອຍເອົາດິນແດນທັງໝົດໄດ້.

2ແລ້ວເພິ່ນກໍເອົາຊະນະຊາວໂມອາບ. ເພິ່ນໄດ້ບັງຄັບພວກຊະເລີຍເສິກໃຫ້ນອນລົງດິນ ແລະຂ້າສອງໃນສາມຄົນຖິ້ມ. ດັ່ງນັ້ນ ຊາວໂມອາບຈຶ່ງຕົກຢູ່ໃຕ້ອຳນາດຂອງກະສັດດາວິດ ແລະພວກເຂົາກໍຍອມເສຍສ່ວຍໃຫ້ເພິ່ນ.

3ຕໍ່ມາ ເພິ່ນໄດ້ເອົາຊະນະເຈົ້າຮາດາເດເຊລູກຊາຍຂອງເຣໂຮບ ກະສັດແຫ່ງຊີເຣຍທີ່ເມືອງໂຊບາ ໃນຂະນະທີ່ເພິ່ນໄປຕີເອົາເຂດແດນທາງພາກເໜືອຂອງແມ່ນໍ້າເອີຟຣັດຄືນ.

4ກະສັດດາວິດຈັບທະຫານມ້າຂອງເຈົ້າຮາດາເດເຊໄດ້ໜຶ່ງພັນເຈັດຮ້ອຍຄົນ ແລະທະຫານບົກອີກຊາວພັນຄົນ. ເພິ່ນເອົາມ້າຮ້ອຍໂຕໄວ້ສຳລັບລົດຮົບ ສ່ວນທີ່ເຫຼືອນັ້ນເພິ່ນສັ່ງໃຫ້ຕັດເອັນຄະນ່ອງທັງໝົດ.

5ເມື່ອຊາວຊີເຣຍແຫ່ງນະຄອນດາມັສກັດໄດ້ສົ່ງກອງທັບໄປຊ່ວຍເຈົ້າຮາດາເດເຊແຫ່ງໂຊບາ ກະສັດດາວິດກໍບຸກໂຈມຕີຄືນ ແລະໄດ້ຂ້າພວກເຂົາຊາວສອງພັນຄົນ.

6ແລ້ວເພິ່ນກໍໄດ້ຕັ້ງຄ້າຍທະຫານໄວ້ໃນ ດິນແດນຂອງພວກເຂົາ. ຊາວຊີເຣຍຈຶ່ງຕົກຢູ່ໃຕ້ອຳນາດຂອງກະສັດດາວິດ ແລະຍອມເສຍສ່ວຍໃຫ້ເພິ່ນ. ພຣະເຈົ້າຢາເວຊ່ວຍໃຫ້ກະສັດດາວິດໄດ້ຮັບໄຊຊະນະໃນທຸກບ່ອນທີ່ເພິ່ນໄປສູ້ຮົບ.

7ກະສັດດາວິດຍັງຢຶດເອົາໂລ້ປ້ອງກັນເປັນຄຳ ທີ່ພວກຂ້າຣາຊການຂອງເຈົ້າຮາດາເດເຊຖືນັ້ນ ນຳໄປທີ່ນະຄອນເຢຣູຊາເລັມ.

8ເພິ່ນຍັງຢຶດເອົາທອງສຳຣິດເປັນຈຳນວນຫລວງຫລາຍຈາກເມືອງເບຕາ ແລະເມືອງເບໂຣໄທອີກດ້ວຍ. ສອງເມືອງນີ້ປົກຄອງໂດຍເຈົ້າຮາດາເດເຊ.

9ເມື່ອກະສັດໂຕອີແຫ່ງຮາມັດໄດ້ຍິນວ່າ ກະສັດດາວິດໄດ້ເອົາຊະນະກອງທັບທັງໝົດຂອງເຈົ້າຮາດາເດເຊ

10ດັ່ງນັ້ນ ເພິ່ນຈຶ່ງສົ່ງໂຢຣາມລູກຊາຍຂອງຕົນ ໄປຄຳນັບແລະຊົມເຊີຍກະສັດດາວິດທີ່ເພິ່ນໄດ້ເອົາຊະນະເຈົ້າຮາດາເດເຊ ຜູ້ທີ່ເຈົ້າໂຕອີໄດ້ຕໍ່ສູ້ມາຫລາຍເທື່ອແລ້ວ. ໂຢຣາມໄດ້ນຳເອົາຂອງຂວັນມາໃຫ້ກະສັດດາວິດ; ຂອງຂວັນເຫຼົ່ານັ້ນເຮັດດ້ວຍຄຳ, ເງິນ ແລະທອງສຳຣິດ.

11ກະສັດດາວິດໄດ້ນຳສິ່ງເຫຼົ່ານີ້ໄປອຸທິດຖວາຍແກ່ພຣະເຈົ້າຢາເວ ດັ່ງທີ່ເພິ່ນໄດ້ອຸທິດຖວາຍເງິນ ແລະຄຳ ຊຶ່ງຢຶດມາໄດ້ຈາກຊົນຊາດຕ່າງໆທີ່ເພິ່ນໄດ້ເອົາຊະນະ ເຊັ່ນ:

12ເອໂດມ, ໂມອາບ, ອຳໂມນ, ຟີລິດສະຕິນ, ອາມາເຫຼັກ ແລະຕະຫລອດທັງຂອງທີ່ປຸ້ນສະດົມມາໄດ້ຈາກເຈົ້າຮາດາເດເຊລູກຊາຍຂອງເຣໂຮບແຫ່ງໂຊບານັ້ນດ້ວຍ.

13ກະສັດດາວິດມີຊື່ສຽງໂດ່ງດັງຫລາຍຂຶ້ນ ຫລັງຈາກທີ່ເພິ່ນໄດ້ກັບຄືນມາຈາກບ່ອນທີ່ເພິ່ນໄດ້ຂ້າຊາວເອໂດມສິບແປດພັນຄົນ ທີ່ຮ່ອມພູເກືອ.

14ເພິ່ນໄດ້ຕັ້ງຄ້າຍທະຫານຕ່າງໆ ໄວ້ຢູ່ທົ່ວເຂດແດນຂອງເອໂດມ ແລະປະຊາຊົນຕາມບ່ອນເຫຼົ່ານີ້ກໍຕົກຢູ່ໃຕ້ອຳນາດຂອງເພິ່ນ. ພຣະເຈົ້າຢາເວໄດ້ຊ່ວຍໃຫ້ກະສັດດາວິດໄດ້ຮັບໄຊຊະນະໃນທຸກບ່ອນທີ່ເພິ່ນໄປສູ້ຮົບ.

15ກະສັດດາວິດໄດ້ປົກຄອງທົ່ວທັງຊາດອິດສະຣາເອນ. ເພິ່ນປະຕິບັດຕໍ່ປະຊາຊົນຂອງຕົນຢ່າງຍຸດຕິທຳ ແລະຢ່າງສັດຊື່.

16ໂຢອາບລູກຊາຍຂອງນາງເຊຣູອີຢາ ເປັນຜູ້ບັນຊາການກອງທັບ; ສ່ວນເຢໂຮຊາຟັດລູກຊາຍຂອງອາຮີລຸດ ເປັນຜູ້ບັນທຶກ;

17ຊາດົກລູກຊາຍຂອງອາຮີຕຸບ ແລະອາຮີເມເຫຼັກລູກຊາຍຂອງອາບີອາທາ ທັງສອງເປັນປະໂຣຫິດ; ເສຣາອີຢາເປັນເລຂາທິການ;

18ເບນາອີຢາລູກຊາຍຂອງເຢໂຮຍອາດາ ເປັນຜູ້ບັນຊາການ ຊາວເກເຣັດແລະຊາວເປເລັດທະຫານປ້ອງກັນຕົວຂອງກະສັດດາວິດ ແລະບັນດາລູກຊາຍຂອງກະສັດດາວິດເປັນປະໂຣຫິດ.

← Chapter 7 Jump to: Chapter 9 →