2 Samuel 23

Lao Bible 2012 (ພຣະຄຳພີສັກສິ)

← Chapter 22 Jump to: Chapter 24 →

1ກະສັດດາວິດເປັນລູກຊາຍຂອງເຢຊີ. ເພິ່ນເປັນຜູ້ທີ່ພຣະເຈົ້າໄດ້ສ້າງຂຶ້ນໃຫ້ເປັນຜູ້ຍິ່ງໃຫຍ່ ເປັນຜູ້ທີ່ພຣະເຈົ້າຂອງຢາໂຄບເຈີມຕັ້ງໃຫ້ເປັນກະສັດ ແລະໃຫ້ປະພັນເພງອັນອອນຊອນສຳລັບຊາດອິດສະຣາເອນ. ຕໍ່ໄປນີ້ແມ່ນຖ້ອຍຄຳຄັ້ງສຸດທ້າຍຂອງກະສັດດາວິດ:

2“ພຣະວິນຍານຂອງພຣະເຈົ້າຢາເວກ່າວຜ່ານຂ້ານ້ອຍ ຖ້ອຍຄຳພຣະອົງຢູ່ທີ່ລີ້ນຂອງຂ້ານ້ອຍ.

3ພຣະເຈົ້າຂອງຊາດອິດສະຣາເອນໄດ້ກ່າວຕໍ່ຂ້ານ້ອຍ ຜູ້ຄຸ້ມຄອງຊາດອິດສະຣາເອນໄດ້ກ່າວດັ່ງນີ້: ກະສັດຜູ້ທີ່ປົກຄອງດ້ວຍຄວາມຍຸດຕິທຳ ແລະປົກຄອງດ້ວຍຄວາມຢຳເກງພຣະເຈົ້າ.

4ເພິ່ນກໍເປັນດັ່ງຕາເວັນສ່ອງແສງ ໃນຕອນເຊົ້າທີ່ບໍ່ມີເມກມາບັງໄວ້ ເປັນດັ່ງຕາເວັນສ່ອງແສງແດດໃສ່ຫຍ້າຂຽວອ່ອນ ແລະສົດໃສຂຶ້ນຫລັງຈາກຝົນຕົກ.

5ພຣະເຈົ້າອວຍພອນໃຫ້ເຊື້ອສາຍຂອງຂ້ານ້ອຍດັ່ງນີ້ ເພາະຊົງຕັ້ງພັນທະສັນຍາກັບຂ້ານ້ອຍສືບໄປ, ເປັນຄຳຕົກລົງທີ່ຈະບໍ່ຖືກຍົກເລີກ ເປັນຄຳສັນຍາທີ່ຈະປ່ຽນແປງບໍ່ໄດ້. ທັງໝົດນີ້ ຄືສິ່ງທີ່ຂ້ານ້ອຍຕ້ອງການ ຄືຊົງມອບໄຊຊະນະໃຫ້ໃນທຸກໆສະພາບການ.

6ແຕ່ຄົນບໍ່ນັບຖືພຣະເຈົ້າກໍຄືໜາມທີ່ຖືກຕັດ ບໍ່ມີຜູ້ໃດແຕະຕ້ອງມັນໂດຍມືເປົ່າໄດ້.

7ຄົນຈະໃຊ້ຫອກຫລືໃຊ້ເຄື່ອງມືເປັນເຫຼັກ, ພວກເຂົາຈະຖືກໄຟເຜົາໄໝ້ຈົນໝົດສິ້ນ.”

8ບັນດາທະຫານທີ່ມີຊື່ສຽງຂອງກະສັດດາວິດມີລາຍຊື່ຕໍ່ໄປນີ້: ຜູ້ທຳອິດຊື່ວ່າ ໂຢເຊບບັດເຊເບັດ ຊາວຕາເກໂມນ. ລາວເປັນຫົວໜ້າຂອງຈອມສາມທະຫານເອກ. ລາວໄດ້ໃຊ້ຫອກ ເປັນອາວຸດເພື່ອຕໍ່ສູ້ທະຫານແປດຮ້ອຍຄົນ ແລະຂ້າທຸກຄົນໄດ້ໃນສະໜາມຮົບບັ້ນດຽວ.

9ຜູ້ທີສອງຂອງຈອມສາມທະຫານເອກແມ່ນເອເລອາຊາ ລູກຊາຍຂອງໂດໂດໃນຕະກຸນອາໂຮ. ມື້ໜຶ່ງ ເອເລອາຊາກັບກະສັດດາວິດໄດ້ທ້າທາຍຊາວຟີລິດສະຕິນ ທີ່ມາເຕົ້າໂຮມກັນເພື່ອຈະເຮັດເສິກ. ຊາວອິດສະຣາເອນໄດ້ຖອຍໄປ,

10ແຕ່ເອເລອາຊາໄດ້ຢືນຕໍ່ສູ້ພວກຟີລິດສະຕິນຈົນມືລາວຈັງ ແລະວາງດາບອອກຈາກມືບໍ່ໄດ້. ໃນມື້ນັ້ນ ພຣະເຈົ້າຢາເວໄດ້ຊົງປະທານໄຊຊະນະຢ່າງໃຫຍ່ຫລວງ. ຫລັງຈາກເສິກສິ້ນສຸດລົງແລ້ວ ຊາວອິດສະຣາເອນຈຶ່ງກັບມາຫາເອເລອາຊາ ເພື່ອປົດເອົາອາວຸດຈາກພວກທີ່ຖືກຂ້າເທົ່ານັ້ນ.

11ຜູ້ທີສາມຢູ່ໃນຈອມສາມທະຫານເອກແມ່ນຊາມມາ ລູກຊາຍຂອງອາກີ ຊາວເມືອງຮາຣາເຣ. ພວກຟີລິດສະຕິນໄດ້ເຕົ້າໂຮມກັນຢູ່ທີ່ເລຮີ ບ່ອນທີ່ມີສວນໝາກຖົ່ວ. ສ່ວນພວກອິດສະຣາເອນນັ້ນໄດ້ປົບໜີໄປຈາກພວກຟີລິດສະຕິນ

12ແຕ່ຊາມມາໄດ້ຢືນຢູ່ທີ່ກາງສວນນັ້ນສູ້ຮົບພວກຟີລິດສະຕິນໃຫ້ຖອຍໜີໄປ. ໃນມື້ນັ້ນ ພຣະເຈົ້າຢາເວໄດ້ຊົງປະທານໄຊຊະນະຢ່າງໃຫຍ່ຫລວງ.

13ພໍໃກ້ລະດູເກັບກ່ຽວ ໄດ້ມີທະຫານສາມຄົນໃນຈຳນວນທະຫານເອກສາມສິບຄົນ ລົງໄປໃນຖໍ້າອາດຸນລຳບ່ອນທີ່ກະສັດດາວິດອາໄສຢູ່ ໃນຂະນະທີ່ກອງທັບຂອງພວກຟີລິດສະຕິນພວມຕັ້ງທີ່ໝັ້ນຢູ່ທີ່ຮ່ອມພູເຣຟາອິມ.

14ໃນເວລານັ້ນ ກະສັດດາວິດຢູ່ທີ່ເທິງພູບ່ອນມີປ້ອມປ້ອງກັນອັນແໜ້ນໜາ ແລະພວກຟີລິດສະຕິນອີກໝວດໜຶ່ງກໍຢຶດເອົາເມືອງເບັດເລເຮັມໄວ້ໄດ້.

15ກະສັດດາວິດຄິດຮອດບ້ານຈຶ່ງໄດ້ເວົ້າຂຶ້ນວ່າ, “ເຮົາຢາກໃຫ້ຜູ້ໃດຜູ້ໜຶ່ງໄປເອົານໍ້າຈາກສ້າງທີ່ຢູ່ໃກ້ກັບປະຕູເມືອງເບັດເລເຮັມມາໃຫ້ເຮົາດື່ມເດ.”

16ຈອມສາມທະຫານເອກຈຶ່ງໄດ້ບຸກຜ່ານຄ້າຍຂອງພວກຟີລິດສະຕິນ ໄປຕັກນໍ້າຈາກສ້າງ ແລະເອົານໍ້າມາໃຫ້ກະສັດດາວິດດື່ມ, ແຕ່ແທນທີ່ເພິ່ນຈະດື່ມ ເພິ່ນຊໍ້າຖອກນໍ້ານັ້ນລົງດິນ ເປັນເຄື່ອງບູຊາຖວາຍແກ່ພຣະເຈົ້າຢາເວ

17ແລະກ່າວວ່າ, “ຂ້າແດ່ພຣະເຈົ້າຢາເວ ຂ້ານ້ອຍບໍ່ອາດດື່ມນໍ້ານີ້ໄດ້ດອກ ເພາະມັນສໍ່າກັບດື່ມເລືອດຂອງຊາຍທັງສາມທີ່ໄດ້ສ່ຽງຊີວິດຂອງພວກເຂົາໄປເອົານໍ້ານີ້.” ດັ່ງນັ້ນ ກະສັດດາວິດຈຶ່ງບໍ່ຍອມດື່ມນໍ້ານັ້ນ. ສິ່ງທີ່ກ່າວມານັ້ນ ແມ່ນການກະທຳອັນອົງອາດກ້າຫານຂອງຈອມສາມທະຫານເອກ.

18ອາບີໄຊ ນ້ອງຊາຍຂອງໂຢອາບ (ສອງຄົນນີ້ເປັນລູກຊາຍຂອງນາງເຊຣູອີຢາ) ເປັນຫົວໜ້າຂອງ ທະຫານເອກສາມສິບຄົນ. ລາວໃຊ້ຫອກເປັນອາວຸດສູ້ຮົບສັດຕູສາມຮ້ອຍຄົນ ແລະຂ້າໄດ້ທັງໝົດ. ສະນັ້ນ ລາວຈຶ່ງກາຍເປັນຜູ້ມີຊື່ສຽງໃນຈຳນວນ ທະຫານເອກສາມສິບຄົນ.

19ລາວເປັນຜູ້ມີຊື່ສຽງທີ່ສຸດໃນພວກທະຫານເອກສາມສິບຄົນນັ້ນ ແລະໄດ້ເປັນຫົວໜ້າຂອງພວກເຂົາ, ແຕ່ລາວບໍ່ໄດ້ມີຊື່ສຽງເທົ່າກັບ ຈອມສາມທະຫານເອກ.

20ເບນາອີຢາ ລູກຊາຍຂອງເຢໂຮຍອາດາຊາວກັບເຊເອນ ເປັນທະຫານທີ່ມີຊື່ສຽງອີກຄົນໜຶ່ງ; ລາວໄດ້ສ້າງວິລະກຳໄວ້ຫລາຍຢ່າງ ຄືໄດ້ຂ້າທະຫານໂມອາບຜູ້ສຳຄັນສອງຄົນ. ມີຄັ້ງໜຶ່ງ ໃນມື້ຫິມະຕົກ ລາວໄດ້ລົງໄປໃນຫລຸມແລະໄດ້ຂ້າສິງໂຕໜຶ່ງ.

21ລາວຍັງໄດ້ຂ້າຄົນເອຢິບຜູ້ໜຶ່ງຊຶ່ງເປັນຄົນຮ່າງໃຫຍ່ ແລະມີຫອກເປັນອາວຸດ. ເບນາອີຢາຕໍ່ສູ້ລາວໂດຍໃຊ້ໄມ້ຄ້ອນເພື່ອຍາດຫອກຈາກມືຂອງຄົນເອຢິບ ແລະໃຊ້ຫອກນັ້ນຂ້າຄູ່ຕໍ່ສູ້.

22ນີ້ແຫລະ ແມ່ນວິລະກຳຂອງເບນາອີຢາລູກຊາຍຂອງເຢໂຮຍອາດາ ຜູ້ໜຶ່ງໃນພວກທະຫານເອກສາມສິບຄົນ.

23ລາວເປັນຜູ້ເກັ່ງກ້າໃນທ່າມກາງພວກເຂົາ ແຕ່ຍັງບໍ່ມີຊື່ສຽງເທົ່າກັບຈອມສາມທະຫານເອກ. ກະສັດດາວິດໄດ້ເອົາລາວເປັນທະຫານປ້ອງກັນຕົວຂອງເພິ່ນ.

24ສະມາຊິກຄົນອື່ນໆໃນຈຳນວນທະຫານເອກສາມສິບຄົນນັ້ນມີດັ່ງນີ້: ອາສາເຮນ ນ້ອງຊາຍຂອງໂຢອາບ; ເອນຮານານ ລູກຊາຍຂອງໂດໂດ ຊາວເມືອງເບັດເລເຮັມ.

25ຊາມມາແລະເອລີກາ ຊາວຮາໂຣດ.

26ເຮເລັດ ຊາວເປເລັດ; ອີຣາ ລູກຊາຍຂອງອິກເກັດ ຊາວເຕກົວ.

27ອາບີເອເຊ ຊາວອານາທົດ; ເມບຸນນາຍ ຊາວຮູຊາ.

28ຊານໂມນ ຊາວອາໂຮ; ມະຫາໄຣ ຊາວເນໂຕຟາ;

29ເຮເລັບ ລູກຊາຍຂອງບາອານາ ຊາວເນໂຕຟາ; ອິດໄຕ ລູກຊາຍຣີໄບ ຊາວກີເບອາເຜົ່າເບັນຢາມິນ.

30ເບນາອີຢາ ຊາວປີຣາໂທນ; ຮິດໄດ ຊາວຮ່ອມພູໃກ້ເມືອງກາອາດ.

31ອາບີອານໂບນ ຊາວອາຣະບາ; ອາຊະມາເວດ ຊາວບາຮູຣິມ.

32ເອລີອາຢາ ຊາວຊາອານໂບນ; ພວກລູກຊາຍຂອງຢາເຊນ: ໂຢນາທານ.

33ລູກຊາຍຂອງຊາມມາ ຊາວຮາຣາເຣ; ອາຮີອາມ ລູກຊາຍຂອງຊາຣາກ ຊາວຮາຣາເຣ.

34ເອລີເຟເລດ ລູກຊາຍອາຮາສະໄບ ຊາວມາອາກາ; ເອລີອາມ ລູກຊາຍຂອງອາຮີໂຕເຟນ ຊາວກີໂລ.

35ເຮຊະໂຣ ຊາວກາເມນ; ປາອາໄຣ ຊາວອາຣັບ.

36ອີການ ລູກຊາຍຂອງນາທານ ຊາວໂຊບາ; ບານີ ຊາວກາດ.

37ເຊເລັກ ຊາວອຳໂມນ; ນາຮາໄຣ ຊາວເບເອໂຣດ ຜູ້ຖືອາວຸດໃຫ້ໂຢອາບລູກຊາຍຂອງນາງເຊຣູອີຢາ.

38ອີຣາຊາວອິດໄຣແລະຄາເຣັບຊາວອິດໄຣ.

39ອູຣິຢາ ຊາວຮິດຕີ. ທະຫານທັງໝົດທີ່ມີຊື່ສຽງນັ້ນມີສາມສິບເຈັດຄົນ.

← Chapter 22 Jump to: Chapter 24 →