Acts 24

Lao 2023 (ພຣະຄຳພີລາວສະບັບສະໄໝໃໝ່)

← Chapter 23 Jump to: Chapter 25 →

1ຫ້າວັນຕໍ່ມາ ມະຫາປະໂລຫິດອານາເນຍກໍໄດ້ເດີນທາງລົງໄປກາຍຊາເຣຍພ້ອມກັບພວກຜູ້ອາວຸໂສບາງຄົນ ແລະ ທະນາຍຄວາມຊື່ວ່າເຕຕູໂລ ແລະ ພວກເຂົານຳເອົາຂໍ້ກ່າວຫາໄປຟ້ອງໂປໂລຢູ່ຕໍ່ໜ້າຜູ້ປົກຄອງ.

2ເມື່ອໂປໂລຖືກເອີ້ນຕົວເຂົ້າມາແລ້ວ, ເຕຕູໂລກໍສະເໜີຄະດີຂອງເພິ່ນຕໍ່ໜ້າຜູ້ປົກຄອງເຟລິກວ່າ: “ຮຽນພະນະທ່ານເຟລິກທີ່ນັບຖື ພວກຂ້າພະເຈົ້າທັງຫລາຍມີຄວາມສະຫງົບສຸກມາເປັນເວລາດົນນານພາຍໃຕ້ການປົກຄອງຂອງທ່ານ ແລະ ການທີ່ທ່ານເຫັນເຫດການລ່ວງໜ້າໄດ້ນັ້ນ ເຮັດໃຫ້ມີການປະຕິຮູບຕ່າງໆເກີດຂຶ້ນໃນປະເທດນີ້.

3ທ່ານເຟລິກທີ່ນັບຖື, ພວກຂ້າພະເຈົ້ານ້ອມຮັບສິ່ງນີ້ດ້ວຍຄວາມສຳນຶກໃນບຸນຄຸນຢ່າງຍິ່ງໃນທຸກຫົນທຸກແຫ່ງ ແລະ ໃນທຸກໆດ້ານ.

4ແຕ່ເພື່ອບໍ່ໃຫ້ເປັນການລົບກວນທ່ານຫລາຍເກີນໄປ, ຂ້າພະເຈົ້າຂໍຄວາມກະລຸນາຈາກທ່ານໃຫ້ຮັບຟັງພວກຂ້າພະເຈົ້າໂດຍສະຫລຸບສັ້ນໆ.

5“ພວກຂ້າພະເຈົ້າພົບວ່າຊາຍຜູ້ນີ້ເປັນຄົນສ້າງບັນຫາ, ປຸກລະດົມການຈາລາຈົນໃນທ່າມກາງຊາວຢິວທັງໝົດທົ່ວໂລກ. ລາວເປັນແກນນຳຄົນໜຶ່ງຂອງລັດທິນາຊາເຣັດ

6ແລະ ຍັງພະຍາຍາມຈະເຮັດໃຫ້ວິຫານເສື່ອມເສຍຄວາມສັກສິດ; ດັ່ງນັ້ນ ພວກຂ້າພະເຈົ້າຈຶ່ງຈັບກຸມລາວໄວ້.

7ແຕ່ນາຍພັນລີເຊຍມາ ແລະ ໃຊ້ກຳລັງເອົາໂຕລາວໄປຈາກມືຂອງພວກເຮົາ ແລະ ສັ່ງຄົນທີ່ກ່າວຫານັ້ນໃຫ້ມາຟ້ອງຕໍ່ໜ້າທ່ານ

8ຂໍໃຫ້ທ່ານສືບສວນລາວເອງ ແລ້ວທ່ານຈະຮູ້ຄວາມຈິງກ່ຽວກັບຂໍ້ກ່າວຫາທັງໝົດທີ່ພວກຂ້າພະເຈົ້າກຳລັງນຳມາກ່າວຫາລາວ”.

9ພວກຢິວຄົນອື່ນ ກໍໄດ້ເຂົ້າຮ່ວມກ່າວຫານຳ, ໄດ້ຢືນຢັນວ່າສິ່ງເຫລົ່ານີ້ເປັນຄວາມຈິງ.

10ເມື່ອຜູ້ປົກຄອງສັນຍານໃຫ້ໂປໂລເວົ້າ, ເພິ່ນຈຶ່ງຕອບວ່າ: “ຂ້າພະເຈົ້າຮູ້ວ່າທ່ານເປັນຜູ້ພິພາກສາໃຫ້ຊົນຊາດນີ້ມາຕະຫລອດຫລາຍປີ; ດັ່ງນັ້ນ ຂ້າພະເຈົ້າຈຶ່ງຍິນດີທີ່ຈະຂໍແກ້ຂໍ້ກ່າວຫາຂອງຕົນເອງ.

11ທ່ານສາມາດກວດສອບໄດ້ຢ່າງງ່າຍວ່າຂ້າພະເຈົ້າໄດ້ຂຶ້ນໄປນະມັດສະການທີ່ເຢຣູຊາເລັມນັ້ນຍັງບໍ່ເກີນສິບສອງວັນ.

12ຜູ້ທີ່ກ່າວຫາຂ້າພະເຈົ້າບໍ່ໄດ້ເຫັນວ່າຂ້າພະເຈົ້າໂຕ້ຖຽງກັບຜູ້ໃດທີ່ວິຫານ, ຫລື ປຸກລະດົມຄົນໃນທຳມະສາລາຕ່າງໆ ຫລື ບ່ອນອື່ນໃນເມືອງ.

13ແລະ ພວກເຂົາກໍພິສູດສິ່ງທີ່ພວກເຂົາກ່າວຫາຂ້າພະເຈົ້າໃຫ້ທ່ານບໍ່ໄດ້.

14ເຖິງຢ່າງໃດກໍຕາມ, ຂ້າພະເຈົ້າກໍຍອມຮັບວ່າຂ້າພະເຈົ້ານະມັດສະການພຣະເຈົ້າຂອງບັນພະບຸລຸດໃນຖານະຜູ້ຕິດຕາມ ‘ທາງນັ້ນ’, ເຊິ່ງພວກເຂົາເອີ້ນວ່ານິກາຍໜຶ່ງ. ຂ້າພະເຈົ້າເຊື່ອທຸກສິ່ງທີ່ສອດຄ່ອງກັບກົດບັນຍັດ ແລະ ທຸກສິ່ງທີ່ໄດ້ຂຽນໄວ້ໃນໜັງສືຜູ້ທຳນວາຍ,

15ແລະ ຂ້າພະເຈົ້າມີຄວາມຫວັງໃນພຣະເຈົ້າເໝືອນກັບຄົນເຫລົ່ານີ້ວ່າ ຈະມີການເປັນຄືນມາຈາກຕາຍທັງຂອງຄົນຊອບທຳ ແລະ ຄົນຊົ່ວ.

16ດັ່ງນັ້ນ ຂ້າພະເຈົ້າຈຶ່ງພະຍາຍາມຮັກສາຈິດສຳນຶກອັນດີງາມຕໍ່ໜ້າພຣະເຈົ້າ ແລະ ຕໍ່ໜ້າມະນຸດ.

17“ຫລັງຈາກຫາຍໄປຫລາຍປີ, ຂ້າພະເຈົ້າໄດ້ມາທີ່ເຢຣູຊາເລັມເພື່ອນຳເງິນມາໃຫ້ພີ່ນ້ອງທີ່ທຸກຍາກ ແລະ ຖວາຍເຄື່ອງບູຊາ.

18ເວລາທີ່ພວກເຂົາພົບຂ້າພະເຈົ້າເຮັດສິ່ງນີ້ຢູ່ທີ່ເດີ່ນວິຫານ ຂ້າພະເຈົ້າໄດ້ຊຳລະຕົວໃຫ້ສະອາດຕາມພິທີແລ້ວ. ບໍ່ມີປະຊາຊົນຢູ່ກັບຂ້າພະເຈົ້າເລີຍ, ອີກທັງຂ້າພະເຈົ້າບໍ່ໄດ້ກ່ຽວຂ້ອງກັບການວຸ້ນວາຍໃດເລີຍ.

19ແຕ່ມີຊາວຢິວບາງຄົນຈາກແຂວງເອເຊຍ, ເຊິ່ງຄວນຈະຢູ່ຕໍ່ໜ້າທ່ານທີ່ນີ້ ແລະ ນຳເອົາຂໍ້ກ່າວຫາມາຖ້າພວກເຂົາມີຫຍັງຈະຟ້ອງຂ້າພະເຈົ້າ.

20ຫລື ໃຫ້ຄົນເຫລົ່ານີ້ທີ່ຢູ່ບ່ອນນີ້ລະບຸຄວາມຜິດທີ່ພວກເຂົາເຫັນໃນຂ້າພະເຈົ້າເມື່ອເວລາທີ່ຂ້າພະເຈົ້າຢືນຢູ່ຕໍ່ໜ້າສະພາແຊນເຮດຣິນ.

21ນອກຈາກເລື່ອງນີ້ເລື່ອງດຽວທີ່ຂ້າພະເຈົ້າໄດ້ຮ້ອງຂຶ້ນຂະນະຢືນຢູ່ຕໍ່ໜ້າພວກເຂົາວ່າ: ‘ທີ່ຂ້າພະເຈົ້າຕ້ອງຖືກດຳເນີນຄະດີຕໍ່ໜ້າທ່ານໃນວັນນີ້ ກໍເພາະຂ້າພະເຈົ້າເຊື່ອໃນການເປັນຄືນມາຈາກຕາຍ’”.

22ຫລັງຈາກນັ້ນ ເຟລິກ ຜູ້ທີ່ຄຸ້ນເຄີຍດີກັບເລື່ອງ “ທາງນັ້ນ”, ຈຶ່ງສັ່ງເລື່ອນການພິຈາລະນາຄະດີ. ເພິ່ນກ່າວວ່າ, “ເຮົາຈະຕັດສິນຄະດີຂອງເຈົ້າເມື່ອນາຍພັນລີເຊຍມາເຖິງ”.

23ເຟລິກໄດ້ສັ່ງນາຍຮ້ອຍໃຫ້ເຝົ້າໂປໂລ ແຕ່ຜ່ອນຜັນໃຫ້ມີອິດສະຫລະ ແລະ ອະນຸຍາດໃຫ້ເພື່ອນຂອງໂປໂລເບິ່ງແຍງຊ່ວຍເຫລືອເພິ່ນໃນສິ່ງທີ່ຈຳເປັນ.

24ຫລາຍວັນຕໍ່ມາ ເຟລິກມາພ້ອມກັບດູຊີນລາເມຍຂອງເພິ່ນ ເຊິ່ງເປັນຊາວຢິວ. ເພິ່ນໄດ້ເອີ້ນໂປໂລມາພົບ ແລະ ຟັງໂປໂລເວົ້າເຖິງຄວາມເຊື່ອໃນພຣະຄຣິດເຈົ້າເຢຊູ.

25ຂະນະທີ່ໂປໂລເວົ້າເຖິງຄວາມຊອບທຳ, ການຄວບຄຸມຕົນເອງ ແລະ ການພິພາກສາທີ່ຈະມາເຖິງ, ເຟລິກກໍຢ້ານ ແລະ ບອກວ່າ, “ພໍເທົ່ານີ້ກ່ອນສຳລັບວັນນີ້! ເຈົ້າໄປໄດ້. ເອົາໄວ້ມີໂອກາດແລ້ວຂ້ອຍຈະເອີ້ນເຈົ້າມາອີກ”.

26ຂະນະດຽວກັນນັ້ນ ເຟລິກກໍມີຄວາມຫວັງວ່າໂປໂລຈະໃຫ້ສິນບົນແກ່ຕົນຈຶ່ງເອີ້ນໃຫ້ມາສົນທະນາເລື້ອຍໆ.

27ເມື່ອສອງປີຜ່ານໄປ, ໂປກີໂອເຟຊະໂຕມາຮັບຕຳແໜ່ງແທນເຟລິກ, ແຕ່ເຟລິກຢາກເອົາໃຈພວກຢິວຈຶ່ງປະໂປໂລໄວ້ໃນຄຸກ.

← Chapter 23 Jump to: Chapter 25 →