2 Samuel 5

Malagasy (Baiboly Protestanta Malagasy 2011)

← Chapter 4 Jump to: Chapter 6 →

1Tonga tao amin’i Davida tao Hebrona ny firenen’Israely rehetra ka niteny hoe: Indreto izahay, fa taolanao sy nofonao.

2Fa hatry ny fahiny koa aza, raha mbola nanjaka taminay i Saoly dia ianao no efa mpitarika ny Israely nandeha niady sy niverina avy any; ary NY TOMPO efa nilaza taminao hoe: Ianao no ho mpiandry ny Israely oloko, ianao no ho mpanapaka azy.

3Eny, tonga tao amin’ny mpanjaka tao Hebrona ny loholon’ny Israely rehetra ary nanao fanekena taminy tao Hebrona teo anatrehan’NY TOMPO i Davida mpanjaka. Dia nanosotra an’i Davida ho mpanjakan’ny Israely izy ireo.

4Telopolo taona i Davida fony izy nanomboka nanjaka, ary efapolo taona no nanjakany.

5Tao Hebrona no nanjakany tamin’ny Joda nandritra ny fito taona sy enim-bolana; ary tany Jerosalema no nanjakany tamin’ny Israely sy ny Joda rehetra nandritra ny telo amby telopolo taona.

6Nankany Jerosalema hiady amin’ny Jebosita tompon-tany ny mpanjaka sy ny olony, ary hoy ireo tompon-tany tamin’i Davida: Tsy ho tafiditra ato ianao; fa na dia ny jamba sy ny mandringa aza dia hahasakana anao; ny heviny tamin’izany dia toy ny hoe: Tsy ho tafiditra ato i Davida.

7Kanjo azon’i Davida ihany ny manda fiarovana, dia i Ziona, Tanànan’i Davida izany.

8Ary hoy i Davida tamin’io andro io: Izay mamely ny Jebosita dia aoka hananika ny lalan-drano ka hamely ny mandringa sy ny jamba izay halan’ny fon’i Davida. Izany no nahatonga ny fitenenana hoe: Izay jamba sy mandringa tsy hiditra ao amin’ny Trano.

9Dia nitoetra tao anatin’ny manda fiarovana i Davida ka ny anarany nataony hoe Tanànan’i Davida. Ary narafitr’i Davida ny manodidina, hatrany Milo, mbamin’ny ao anatiny.

10Dia nandroso nisandratra i Davida, satria NY TOMPO, Andriamanitra Tompon’izao rehetra izao, no nomba azy.

11Nandefa iraka tany amin’i Davida Hirama, mpanjakan’i Tiro, ka nampanatitra hazo sedera ary nandefa mpandrafitra sy tambato; dia nanorina trano ho an’i Davida ireo.

12Dia fantatr’i Davida fa NY TOMPO no nampitoetra azy ho mpanjakan’ny Israely ka nanandratra ny fanjakany noho ny amin’ny Israely olony.

13Mbola naka vady tsindrano sy vady hafa tany Jerosalema koa i Davida rehefa tonga avy tany Hebrona; ary nisy zanakalahy sy zanakavavy koa naterak’i Davida.

14Izao no anaran’ny naterany tany Jerosalema: Samoa, Sobaba, Natana, Solomona,

15Jibara, Elisoa, Nafega, Jafia,

16Elisama, Eliada ary Elifeleta.

17Nony ren’ny Filistina fa efa nohosoran’ny olona ho mpanjakan’ny Israely i Davida dia niakatra hitady azy ny Filistina rehetra. Rehefa ren’i Davida anefa izany dia nidina tao amin’ny manda fiarovana izy.

18Dia tonga ny Filistina ka nihahakahaka teny amin’ny Lohasahan’ny Refaìta.

19Nanontany NY TOMPO i Davida hoe: Hiakatra hamely ny Filistina va aho? Hatolotrao eo an-tanako va izy? Dia hoy NY TOMPO tamin’i Davida: Miakara, fa hatolotro eo an-tananao tokoa ny Filistina.

20Ary tonga tao Baala-Perazima i Davida ka namely ireo tao; dia hoy izy: NY TOMPO efa namaky ny fahavaloko teo anoloako hipariaka toy ny rano vaky, koa izany no nanaovany ny anaran’izany tany izany hoe Baala-Perazima.

21Nilaozan’izy ireo tao ny sampiny ka lasan’i Davida sy ny olony.

22Niakatra indray ny Filistina ka nihahakahaka teny amin’ny lohasahan’ny Refaìta.

23Ary nanontany NY TOMPO i Davida ka novaliny hoe: Aza mandeha; fa hodidino avy eo aoriana izy ka ho tonga eo aminy tandrifin’ny hazo balisama ianao.

24Ary raha mahare fingadongadon’ny olona eny amin’ny tendron’ny hazo balisama ianao dia haingàna; fa amin’izay no efa miainga mialoha anao NY TOMPO hamely ny miaramilan’ny Filistina.

25Dia nanatanteraka araka ny nandidian’NY TOMPO azy i Davida ka namely ny Filistina hatrany Geba ka hatrany akaikin’i Gezera.

← Chapter 4 Jump to: Chapter 6 →