Isaiah 11

Mossi MPBU (WẼNNAAM SEBRE 2014)

← Chapter 10 Jump to: Chapter 12 →

1La wil-poll n na n tão n yi a Izayi viukẽ wã, yẽnda yẽgã na n tãoo tɩ-tobengo.

2Sẽn-Ka-Saab Sɩɩgã na n siga yẽnda zugu: yaa yam ne bãngr sɩɩga, la saglg ne raood sɩɩga, ne minim la Sẽn-Ka-Saab rabeem zoees sɩɩga.

3Yẽnda na n zoee Sẽn-Ka-Saab rabeem ne sũ-noogo, yẽnda ka na n kao bʋʋdã wa sẽn zems yẽnda ninã sẽn ne wã ye. Yẽnda ka na n welg yɛlã wa sẽn zems yẽnda tʋb sẽn wʋm ye.

4Yẽnda na n kaoo ka-pãens rãmbã bʋʋd ne zemsgo. A na n bʋʋ tẽngã nimbãan-nebã bʋʋd wa sẽn zemse. Yẽnda na n wẽe dũniyã ne a noorã dasaare, la a kʋ nin-wẽnsã ne a noorã pemsem.

5Tɩrlem na n yɩɩ yẽnda sɛɛg sẽbdga, la maan-sɩd na n yɩɩ yẽnda kur-wĩiri.

6Rigd-n-yĩidg ne peosg na n vɩɩmda ne taaba, ãbg na n naaga bull n gãande, nag-bil ne gɩgem-polle, la rũm-nobds na n zĩnda ne taaba, la bi-bilf n na n yɩ bãmb pe-kɩɩma.

7Rigd-n-yĩidg ne nag-yãang na n wãba yamd ne taaba, la b kambã na n naaga taab n gãande. Gɩgemd na n wãba yamd wa naafo.

8Biig sẽn ket n yẽsemdẽ na n deema ruruug bok noore, la bi-sigdg na n tʋma a nug põeer bokẽ.

9Mam tãn-sõngã fãa zugu, bãmb ka na n maan to bũmb ye, sãoong buud kõn tol n leb n zĩnd ye. Bala, dũniyã gill na n pida ne Sẽn-Ka-Saab bãngre, wa ko-kãsengã sẽn pidã.

10Badaare, a Izayi yẽgrã na n tilga wa tãb-kaoor nebã yĩnga. Bu-zẽmsã na n baoo yẽnda, la yẽnda vʋʋsg zĩigã na n talla ziiri.

11Badaare, Sẽn-Ka-Saab na n leb n tẽega b nug n fãag b buud ning sẽn kellã, yaa neb nins sẽn pa Asiiri ne Ezɩptã, la sẽn pa-b Patroos ne Kuusã, la Elam ne Sineyaar la Hamatã, ne tẽms nins koom sẽn gũbg tɩ b be ko-kãsengã sʋkã.

12B na n zẽka tãb-kaoor buud toay-toayã yĩnga, la b kɩt tɩ Israyɛll neb nins b sẽn dag n digã tigme, b na n leb n deega Zʋʋda neb nins sẽn sãeeg n be dũniyã ween-vɩɩs a naasã.

13Efrayiim nebã sũ-kiirã na n sɛɛme, la b na n menesa Zʋʋda bɛɛbã. Efrayiim nebã ka na n leb n maan sũ-kiir ne Zʋʋda nebã ye. La Zʋʋda nebã ka na n leb n zab ne Efrayiim nebã ye.

14Bãmb na n naaga taab n zab ne Filistẽ-dãmbã sẽn be nin-taoorã, la b naag taab n zɛ neb nins sẽn be yaangã. Bãmb na n sooga Edom ne Moaab nebã, la Amo-rãmbã na n saka bãmba.

15Sẽn-Ka-Saab na n kʋɩɩsa Ezɩpt ko-kãsengã. Bãmb na n tẽega b nug Efrat kʋɩlgã zugu, n fʋʋs-a ne pãng n kɩt t'a welg ko-soay a yopoe, tɩ b tõe n pid neooda n pɩʋʋg-a.

16B na n tuka sor bãmb neb nins sẽn ketã yĩnga, yaa bãmb neb nins sẽn pa Asiiri wã yĩnga. Wa b sẽn dag n tuk sor Israyɛll nebã yĩnga, daar ning bãmb sẽn yi Ezɩpt tẽngã.

← Chapter 10 Jump to: Chapter 12 →