Isaiah 19

Mossi MPBU (WẼNNAAM SEBRE 2014)

← Chapter 18 Jump to: Chapter 20 →

1Sɩbgr koɛɛg Ezɩpt nebã yĩnga. Sẽn-Ka-Saab zomba sawaodg kẽnd sẽn tʋʋle, la b wata Ezɩpte. Ezɩpt tẽng wẽn-naandsã rigda ne rabeem bãmb taoore, la Ezɩpt nebã pɛleng yɩgdame.

2Mam na n kɩtame tɩ Ezɩpt nebã zab taaba, ned ne a ba-biig na n zaba taaba, la ned ne a zoa na n zaba taaba, tẽng na n yika zabr ne a to, la soolem na n zaba ne soolem a to.

3Ezɩpt tẽng nebã yam na n menemame, mam na n zũndga bãmb saagrã. Bãmb na n tɩ soka wẽn-naandse, la b sok kɩɩmse, b na n kẽnda kinkir-bagb ne bag-bʋgdb nengẽ.

4Mam na n kɩtame tɩ zu-soben-toos soog Ezɩpte, la rĩm sẽn yaa nen-keglem soab n na n soog bãmba. Maam a Zu-soabã sẽn yaa Saasẽ-Pãng-Soabã n yeele.

5Ko-kãsengã koom na n kʋɩɩme, kʋɩlgã koom na n sɛɛme n lebg koɛɛnga.

6Ko-soayã koom na n põogame, Ezɩpt tẽng Nill kʋɩlgã ko-soayã koom na n yõbgame n kʋɩ, la tãnwĩisã ne rudmã na n zelgame.

7Nill kʋɩlgã noorã ne a sɛtmẽ wã na n lebga vɩʋʋgo! B sẽn na n bʋd bũmb ning fãa Nill kʋɩlgã koom noor na n kʋɩɩme. Sebg n na n kãag-a n loog t'a meneme.

8Zĩm-yõagdbã na n yãbame n wiisi, neb nins fãa sẽn lobd zĩm-leoos Nill kʋɩlgẽ wã fãa na n yãbame. Sẽn lobd-b zĩm-gãmba koomã pʋgẽ wã sũy na n sãamame.

9Neb nins sẽn tʋmd ne lẽ gĩsã na n paama yãnde, sẽn gursd-b lamdã ne sʋn-wʋgdbã gĩin na n maagame.

10Tẽngã sʋn-wʋgdbã na n paama sũ-sãanga. Tʋmtʋmdb nins fãa sẽn tʋmd n deegd yaoodã sũy na n sãamame.

11Sowan tẽng nanambsã tolg n yaa yalemba, Yam dãmb nins sẽn sagend Faarõ wã yaa nin-yaals sulli. Maana a wãn tɩ yãmb saag n na n yeel Faarõ a woto: «Mam yaa sẽn tar-b yamã biiga, n yaa kʋdem-wẽndẽ rĩm-dãmbã yagenga!

12Ezɩpt rĩma, fo yam dãmbã bee yɛɛnẽ? Kɩt tɩ bãmb wilg-f bũmbã fãa, la b wilg saagr ning Saasẽ-Pãng-Soabã sẽn dat n maan Ezɩptã!

13Sowan tẽng nanambsã ka tar yam ye. Noof tẽng nanambsã belgda b mense. Yẽnda buudã taoor dãmbã kẽesda Ezɩpt nebã moogo.

14Sẽn-Ka-Saab kɩtame tɩ nen-yiling yõk Ezɩpt nebã, n na n kɩt tɩ Ezɩpt ka leb n mi a sẽn maand ye. A wẽnda wa rã-yũud sẽn lengd la a wʋbdẽ.

15La Ezɩpt ka na n tõog n maan bũmb ning zugã ne zʋʋrã sẽn maandã, ne koang tɩɩgã will ne tãnwĩigã sẽn maandã ye.»

16Badaare, Ezɩpt nebã sã n yãnd Saasẽ-Pãng-Soabã sẽn zẽk b nugã n na n zab ne bãmbã, bãmb na n diga ne rabeem wa pagba.

17Zʋʋda tẽngã na n kẽesa Ezɩpt tẽngã rabeem. Wakat ning fãa b sẽn na n tẽeg Zʋʋda tẽngã yell bãmb taoore, bãmb na n diga ne rabeem, saagr ning Saasẽ-Pãng-Soabã sẽn saagd n dat n sɩbg Ezɩpt tẽngã yĩnga.

18Badaare, tẽms a nu n na n zĩnd Ezɩpt soolmã pʋg n gomd Kana-rãmbã buud goamã, la b na n wẽena ne Saasẽ-Pãng-Soabã yʋʋre. Tẽn-bãmb tẽng a yembr yʋʋr na n boondame tɩ Ɩɩr-Herɛɛse, sẽn dat n togs tɩ ‹sãoong tẽnga.›

19Badaare, tẽn-kugr n na n zĩnd Ezɩpt soolmã tẽn-sʋka, Sẽn-Ka-Saab yĩnga, la kug-vigindg n na n zĩnd soolmã toadgẽ Sẽn-Ka-Saab yĩnga.

20Bõn-kãng na n yɩɩ Saasẽ-Pãng-Soabã bãnde, la b kaset Ezɩpt soolmã pʋga. Wakat ning bãmb namsdbã sẽn namsd bãmbã, b sã n kelem n bool Sẽn-Ka-Saabo, b na n tʋma fãagd t'a wa bãmb nengẽ n wa zab n fãag-ba.

21Sẽn-Ka-Saab na n kɩtame tɩ Ezɩpt nebã bãng bãmba. Ezɩpt nebã na n bãnga Sẽn-Ka-Saab badaare. Bãmb na n pʋʋsa Sẽn-Ka-Saab n maan maando, la b kõ bãmb kũuni, n maan pʋleng ne Sẽn-Ka-Saabo, la b na n pidsa b pʋlengã.

22Dẽ, Sẽn-Ka-Saab sã n sɩbg Ezɩpt nebã, bãmb n na n leb n maag-ba. Ezɩpt nebã na n lebg n waa Sẽn-Ka-Saab nengẽ, la Sẽn-Ka-Saab na n sak n deega b kosgã n maag-ba.

23Badaare, sor na n yi Ezɩpt n dabd Asiiri. Asiiri nebã na n kẽnda Ezɩpt tẽnga, la Ezɩpt nebã na n kẽnda Asiiri, la Ezɩpt nebã ne Asiiri nebã na n naaga taab n pʋʋsd Sẽn-Ka-Saabo.

24Badaare, Israyɛll na n yɩɩ tãabẽ soab n naag Ezɩpt ne Asiiri n paam bark dũniyã zugu.

25Saasẽ-Pãng-Soabã na n ninga bãmb bark n yeele: «Bark bee Ezɩpt sẽn yaa mam nebã zugu, bark bee Asiiri sẽn yaa mam nug tʋʋmdã zugu, la bark bee Israyɛll sẽn yaa mam meng rẽndã zugu.»

← Chapter 18 Jump to: Chapter 20 →