Isaiah 61

Mossi MPBU (WẼNNAAM SEBRE 2014)

← Chapter 60 Jump to: Chapter 62 →

1Sẽn-Ka-Saab Sɩɩgã bee mam zugu, bala, Sẽn-Ka-Saab yãka maam. Bãmb tʋma maam tɩ m togs koe-noogã naong-rãmba, la m bels sũ-sãang-rãmbã, tɩ m togs b sẽn balg b rãmbã fãagr koɛɛga, la m togs sẽn be-b bi-bees roogã tɩ b na n paama yolsgo.

2Sẽn-Ka-Saab tʋma maam tɩ m moon nonglem yʋʋmde, tɩ m moon tõnd Wẽnnaamã sũ-dokr daarã, la m bels sũ-sãang rãmbã,

3tɩ m kɩt tɩ Sɩyõ nebã sẽn be sũ-sãang pʋgã leb n paam sũ-noogo, la m yãk tompeglmã sẽn be b zutẽ wã, la m teeg b zutã ne waoogr peende, n sõog sũ-noog kaam la ka sũ-sãang ye. La m yeelg-b ziir fuug la ka nimbãaneg ye. B na n boonda bãmb tɩ ‹tɩrlem terebẽnt tɩɩse›, n yaa tɩɩs ‹Sẽn-Ka-Saab sẽn sele›, sẽn wilgd tɩ Sẽn-Ka-Saab tara ziiri.

4Bãmb na n lebs n mee kʋdem-wẽndẽ raboodã, la b lebs n maneg hal pĩnd zĩis nins sẽn dag n sãamã. Bãmb na n kɩtame tɩ tẽms nins sẽn dag n yaa we-rasempʋɩɩsã leb n paam meebo, yaa tẽms nins sẽn dag n sãam n dɩg zamaan woo zamaanã.

5Sãamb n na n wa beenẽ, n wa gũ yãmb rũm-bãoonegã, tẽn-taas neb n na n yɩ yãmb koaadba, la b yɩ reezẽ tɩɩs gũudba.

6La yãmba, b na n boola yãmb tɩ ‹Sẽn-Ka-Saab maan-kʋʋdba›, tɩ ‹tõnd Wẽnnaamã tʋmtʋmdba.› Yãmb na n dɩɩ buud a taabã arzegse, la yãmb na n yeelga bãmb ziirã.

7Sẽn-Ka-Saab yetame: «B sẽn dag n ning bãmb yãndã yĩnga, bãmb na n deega pʋɩɩr a yiibu. Bãmb sẽn dag n paamd paoogrã, b na n kaasa ne sũ-noog b pʋɩɩrã yĩnga, b na n paama pʋɩɩrã naoor a yiibu, la bãmb sũ-noogã ka na n tol n sɛ ye.

8Bala, maam a Sẽn-Ka-Saab nonga zemsgo, la m kisa wẽgb ne wẽnem. Mam na n keoo bãmb wa sẽn segde, la m maan kaool sẽn ka sɛt ne bãmba.

9Buud a taabã na n bãnga bãmb yagensã, la b bãng bãmb pendã nebã, bu-zẽmsã sʋka. Neb nins fãa sẽn na n yãnd bãmbã na n bãngame tɩ b yaa buud Sẽn-Ka-Saab sẽn ning barka.»

10Mam paamda m sũ-noogã Sẽn-Ka-Saab nengẽ, mam na n kɩdma wʋsg mam Wẽnnaamã yĩnga. Bala, bãmb yeelga maam fãagr fuugu, la b yeelg maam tɩrlem kobre, wa pʋg-paal sɩd sẽn fõgend a maanfo, wa maan-kʋʋd sẽn fõgen a pugl-neere, la wa pʋg-paal sẽn ning a fan-teedo.

11Sɩd me, wa bõn-buud sẽn bund n yit tẽn-gãongã zugã, la wa zẽed zĩigẽ zẽ-buud sẽn bund n yitã, Sẽn-Ka-Saab na n kɩtame tɩ tɩrlem, ne pẽgr bul n yi a woto buud a taabã fãa nifẽ.

← Chapter 60 Jump to: Chapter 62 →