Isaiah 58

Mossi MPBU (WẼNNAAM SEBRE 2014)

← Chapter 57 Jump to: Chapter 59 →

1Wɩk f meng n kelem la f ra sĩnd ye! Zẽk f koɛɛg wa baorg n togs mam nebã b beegrã, togs a Zakoob yagensã b yel-wẽnã!

2Bãmb baooda maam beoog sẽn vẽeg fãa, bãmb dat n bãnga mam soayã, wa buud sẽn maand sẽn zemse, wa bãmb ka bas b Wẽnnaam tɩrlmã ye. Bãmb kota maam tɩrlem bʋ-kaoore, bãmb dat n kolga Wẽnnaam.

3Sã n mikame tɩ yãmb ka ne, bõe yĩng tɩ tõnd loet noore? Sã n mikame tɩ yãmb ka mi, bõe yĩng tɩ tõnd na n mong d meng rɩɩbo? Daar ning yãmb sẽn loet noorã, yãmb tʋmda y mens tʋʋma, la y namsd y tʋmtʋmdbã.

4Ade, yãmb sã n loe noore, yaa zab taab ne nokoɛɛma, la y maand pʋ-toog n pãbd taab nug-gila. Yãmb ka loet noorã wa a sẽn tog n yɩ to-to daar pʋgẽ wã ye, la Wẽnnaam ka tõe n zĩnd yĩngr n wʋm ye.

5Rẽ yĩnga, yaa no-loeer a woto buud la mam dat sɩda, yaa ned sẽn mongd a meng bũmb daar pʋgẽ? Yaa ned sẽn sulgd a zug wa tãnwĩiga, la a yeelg bot n gãe tompeglmẽ la? Rẽ yĩnga, yãmb boonda yõwã tɩ no-loeere? Yõwã yaa daar sẽn tat Sẽn-Ka-Saab yam sɩda?

6Ad no-loeer ning buud sẽn tat mam yam: Logs-y wẽng maaneg loetsã, yiis-y yembsã b yembdã pʋga, kõ-y neb nins b sẽn namsdã lohorem, la y kao b sẽn balg b rãmbã fãa balgrã.

7No-loeer sẽn noom maam yaa yãk f rɩɩb n kõ kom sẽn tar a soaba, la peeg nimbãan-nebã sẽn ka tar zĩigã n kuil f yiri. Bao fut n yeelg neb nins sẽn yaa bɛɛlã, la f ra solg f meng ne f ba-biig ye.

8Dẽ, yãmb vẽenemã na n puka wa zĩ-yẽegre, la y na n paama maagr tao-tao. Yãmb tɩrlmã na n lʋɩɩ yãmb taoore, la Sẽn-Ka-Saab ziirã na n pʋga yãmb poore.

9Dẽ, yãmb sã n boole, Sẽn-Ka-Saab na n leokame. Yãmb sã n bool n kos sõngre, b yetame: «Ad maam!» Yãmb sã n ka kɩt tɩ balgr ning sẽn be fo pʋgẽ wã zãag ne-fo, la y kɩt tɩ pãn-maanegã sɛ, la y bas nebã paoogre, la y bas y sẽn gomd gom-wẽnsã tɩ sɛ,

10yãmb sã n dɩk y meng rɩɩb n kõ kom sẽn tar-a soabã, la y kõ naong soab rɩɩb t'a rɩ n tɩge, yãmb vẽenem na n yãga lik bida pʋga, la yãmb lik bida na n lebga vẽenem wa wĩntoogo.

11Sẽn-Ka-Saab na n tɛɛ yãmb wakat fãa, bãmb na n kɩtame tɩ yãmb paam dɩɩb zĩ-peen-daagẽ n dɩ n tɩge, la b na n leb n kõo yãmb yĩnsã pãnga. Yãmb na n yɩɩ wa zẽed zĩig sẽn tɩg koom, la y yɩ wa kʋɩlg koom sẽn ka tol n sɛtẽ ye.

12Yãmb maasem yĩnga, b na n lebs n mee hal pĩnd rabo-kʋdã, yãmb na n lebs n mee hal pĩnd zamaanẽ dotã b zĩigẽ. B na n boola yãmb tɩ ‹neb sẽn maneg lal-wedse›, la ‹neb sẽn manegd soay tɩ neb tõe n wa zĩnd tẽngẽ wã.›

13Yãmb sã n yõk y naoor vʋʋsg daarã, la y sã n ka tʋm y tʋʋmã mam daarã sẽn welg toorã daare, yãmb sã n maan sũ-noog ne vʋʋsg daarã, yãmb sã n dɩk Sẽn-Ka-Saab daarã tɩ yɩ daar sẽn segd ne waoogre, yãmb sã n waoog vʋʋsg daarã n ka maan y sẽn date, n ka tʋm y meng tʋʋmã, la y ka yals n bao gom-wogdo,

14dẽ, yãmb na n maana y sũ-noogã ne Sẽn-Ka-Saabo, la mam na n kɩtame tɩ yãmb dʋ tẽngã zĩ-zãongls zutu, la m dɩlg yãmb ne y yaab a Zakoob rogem-pʋɩɩrã. Maam a Sẽn-Ka-Saab meng noor n yeele.

← Chapter 57 Jump to: Chapter 59 →