Isaiah 2

Mossi MPBU (WẼNNAAM SEBRE 2014)

← Chapter 1 Jump to: Chapter 3 →

1Woto yaa a Amots biig a Ezayi koɛɛga, a sẽn yãnd vẽnegr pʋgẽ, sẽn kẽed Zʋʋda ne Zeruzalɛm wɛɛngẽ.

2Wakat n wate, tɩ tãng ning Sẽn-Ka-Saab roogã sẽn tilg a zugã na n lug n yɩɩg tãms a taabã, a na n zẽkame t'a zãntlmã yɩɩg kunkubã zãntlem. La buud toay-toay fãa na n zoe n waa beenẽ.

3Neb kʋʋng na n dabda beenẽ la b yetẽ: «Wa-y tɩ d rʋ Sẽn-Ka-Saab tãngã zugu, a Zakoob Wẽnnaamã roogẽ! Bãmb na n wilga tõnd b soayã, la tõnd na n tũu bãmb so-bugsã. Bala, tõogã na n yii Sɩyõ n wa, Sẽn-Ka-Saab gomdã na n yii Zeruzalɛm n wa.

4Bãmb na n yɩɩ buud toay-toayã bʋ-kaooda, bãmb na n yɩɩ neb kʋʋng zab-paasda. B na n dɩka b zabr sʋʋsã n kud wãgse, la b rɩk b kãnã n kud goeto. Buud kõn tol n leb n yik zabr ne a to ye. La b kõn leb n zãms zabr sẽn zabd to-to ye.»

5«A Zakoob yagense, wa-y tɩ d kẽn Sẽn-Ka-Saab vẽenemã pʋga.»

6Sẽn-Ka-Saabo, yãmb basa a Zakoob buudã sẽn yaa y nebã, a sẽn pid ne yaang nebã manesmã, la a pid ne neb sẽn bʋgd bagr wa Filistẽ-dãmbã, la a maan zems-n-taar ne sãambã yĩnga.

7A tẽngã pida ne wanzuri la sãnem, la yẽnda arzegs sẽn ka tõe n sõd n sɛ ye. A tẽngã pida ne wiidi, la ne saar-dãmb sẽn ka tõe n sõd n sɛ ye.

8Yẽnda tẽngã pida ne wẽn-naandse, nebã wõgemdedame n waoogd bãmb nus tʋʋmã, b wõgemdeda bãmb mengã nus sẽn maanã taoore.

9Ninsaalbã na n paama yãnde. Nebã na n paama paoogre. Da-y kõ-y bãmb sugr ye!

10Ninsaalba, zoe n tɩ kẽ-y pĩis bogdẽ, la f solg f meng tẽng tomẽ, n zãag f meng ne Sẽn-Ka-Saab yɛɛsgã, la ne bãmb naam-kãsengã pukri.

11Tɩtaam dãmbã na n paama paoogre, la zẽk-m-mens rãmbã na n paama yãnde. Badaare, yaa Sẽn-Ka-Saab yʋʋrã bal n na n paam zẽkre.

12Bala, yaa Saasẽ-Pãng-Soabã daare. Bãmb na n sika tɩtaam la zẽk-m-meng fãa, la b sik bũmb ning fãa sẽn wukd a menga.

13Bãmb na n sika Libã sɛɛdr tɩ-wogdã sẽn lugã, ne Basã tẽng sɛn tɩɩsã fãa.

14Bãmb na n sirga tãms nins fãa sẽn lugi, la b sirg kunkub nins fãa sẽn zẽkã.

15Bãmb na n siiga gãs-wogdã fãa, la b siig lals nins fãa sẽn tar pãngã.

16Bãmb na n kɩtame tɩ Tarsɩɩs koom kogendã lisi, koom kogl-bɛd sẽn yaa neebã lisi.

17Woto, b na n sika ninsaalbã tɩtaamã, la zẽk-m-mens rãmbã na n paama paoogre. Badaare, yaa Sẽn-Ka-Saab bal n na n paam waoogre.

18Bãmb na n menesa wẽn-naandsã fãa.

19Sẽn-Ka-Saab sã n wa n na n yik n kẽes dũniyã rabeem, bãmb na n zoe n tɩ kẽe pĩis bogdẽ, la b solg b meng tẽng tomẽ, n zãag b meng ne Sẽn-Ka-Saab yɛɛsgã, la ne bãmb naam-kãsengã pukri.

20Badaare, ninsaalbã na n dɩka b wanzuri ne b sãnem wẽn-naandsã bãmb sẽn wõgemded n waoogdẽ wã n lob laoos ne zankiti.

21Sẽn-Ka-Saab sã n wa n na n yik n kẽes dũniyã rabeem, bãmb na n zoe n tɩ kẽe pĩis bogdẽ, la b solg b meng pĩis pẽgsẽ, n zãag b meng ne Sẽn-Ka-Saab yɛɛsgã, la ne bãmb naam-kãsengã pukri.

22Dẽ wã, bɩ f ra leb n teeg ninsaal sẽn vʋʋsd ne yõ-bogdã ye. Ninsaal yõod zema bõe?

← Chapter 1 Jump to: Chapter 3 →