bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Quechuan
/
Quechuan QXO (Biblia en Quechua del sur de Conchucos)
/
1 Kings 1
1 Kings 1
Quechuan QXO (Biblia en Quechua del sur de Conchucos)
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 2 →
1
Rey David pasaypa rukuna karmi imanö pituyaptinpis qoñurqannatsu.
2
Tsaymi yanapaqninkuna niyarqan: «Taytay, sirvir atiendishunaykipä y oqllar qoñütsishunaykipä juk soltëra jipashta ashipäyämushayki».
3
Tsaynö nirmi entëru Israel nacionpa aywar kuyayllapä jipashta ashiyämurqan. Tariskirnam Sunam markapita Abisag jipashta rey Davidman pushayarqan.
4
Tsay jipashqa pasaypa kuyayllapämi karqan. Paymi rey Davidta cuidarnin oqllar qoñütsirqan. Peru rey Davidqa manam yataparqantsu.
5
Davidpa tsurin y Haguitpa wamran Adoníasmi rey kayta munarqan. Tsaymi rey kayman yaykuyta munaqkunapa costumbrin kanqannö puntanta cörriyänanpä alistakurqan guërra carrëtakunata, caballun muntashqa aywaq soldädukunata y pitsqa chunka (50) chakillapa aywaq soldädukunata.
6
Adoníasqa Absalónpa qepan yuriq kuyayllapä jövinmi karqan. Llutanta ruraptinpis papäninqa manam imatapis niqtsu.
7
Rey kayta munaptinmi Sarviapa wamran Joab y sacerdöti Abiatar Adoníasta yanapayarqan.
8
Peru sacerdöti Sadoc, Joiadapa tsurin Benaía, profëta Natán, Simei, Rei y Davidpa allinnin kaq soldädunkunaqa manam Adoníasta yanapayarqantsu.
9
Rey kayman yaykuyta munarmi Adoníasqa Rogel pukyuman aywaykur Zohelet qaqa lädunchö banquëtita ruratsinanpä pishtatsirqan atska üshata, cabrata, wäkata y wera torïtukunata. Tsaymanmi wawqinkunata y rey Davidpa sirviqnin Judá runakunatapis qayatsirqan.
10
Peru manam qayatsirqantsu profëta Natánta, Benaíata, Davidpa allin soldädunkunata ni wawqin Salomóntapis.
11
Tsaymi Natánqa Salomónpa maman Betsabéta nirqan: «¿Manaku musyanki Haguitpa wamran Adonías rey kananpä yaykuykanqanta? Tsaytaqa rey Davidpis manam musyantsu.
12
Qampis y wamrayki Salomónpis wanuyta mana munarqa yätsinqäta shumaq wiyamay.
13
Kanan ras aywar rey Davidta niy: «Taytay, puntatam awnimarqayki wamrä Salomón qampa trokiki rey kananpä kanqanta. Tsaynö awniykämaptikiqa ¿imanirtä Adoníasqa rey kayman yaykuykan?»
14
«Reywan tsaynö parlaykaptikim noqapis yaykamushä rasunpa kaqta parlaykanqaykita ninäpä».
15
Tsaymi Betsabéqa reypa cuartunman aywarqan. Rey David pasaypa rukuna kaptinmi Sunam markapita Abisag jipash cuidaykarqan.
16
Cuartunman yaykuskirmi urkunpis patsaman töpanqanyaq reypa puntanman qonqurikuykurqan. Tsaymi rey nirqan: «¿Imatä päsashunki?»
17
Tsaymi Betsabé nirqan: «Taytay, Tayta Diospa jutinchömi awnimarqayki wamrä Salomón qampa trokiki rey kananpä.
18
Peru mana musyatsishurnikim Adonías rey kayman yaykuykan.
19
Banquëtita rurarmi pishtatsishqa atska üshata, cabrata, wäkata y wera torïtukunata. Tsaymanmi qayatsishqa llapan tsurikikunata, sacerdöti Abiatarta y soldädukunapa capitannin Joabta. Peru wamrä Salomóntam sïqa qayatsishqatsu.
20
Kananqa llapan Israel nación runakunam shuyaykäyan qampa trokiki mayqan tsurikipis rey kananpä ninaykita.
21
Manarä churar wanuptikiqa noqata y wamrä Salomóntam Adonías wanutsiyämanqa».
22
Tsaynö Betsabé rey Davidwan parlaykaptinmi profëta Natán charqan.
23
Pay chaykuptinmi rey Davidta niyarqan: «Profëta Natánmi chämushqa». Natánnam yaykuskir urkunpis patsaman töpanqanyaq reypa puntanman qonquriykur
24
nirqan: «Tayta rey, ¿qamku nirquyki Adonías trokiki rey kananpä?
25
Rey kayta munarmi kanan junaq pishtatsishqa atska üshata, cabrata, wäkata y wera torïtukunata. Tsaymanmi tsurikikunata, soldädukunapa capitanninkunata y Abiatar sacerdötitapis qayatsishqa. Llapan qayatsinqankunam mikur upur nikäyan: «¡Viva rey Adonías! ¡Kananpitaqa paynam rey kanqa!»
26
Peru noqata, sacerdöti Sadocta, Joiadapa tsurin Benaíata ni tsuriki Salomóntapis manam qayatsiyämashqatsu.
27
Tsaynö rurananpäqa ¿qamku nirquyki? ¿Noqakunata mana musyatsiyämarku trokiki rey kananpä Adoníasta churaykanki?»
28
Profëta Natán tsaynö niptinmi Betsabéta rey David qayatsirqan. Tsaymi Betsabé yaykuskir reypa puntanman ichiskirqan.
29
Tsaymi rey nirqan: «Wanuypita salvamaq Tayta Diospa jutinchö jurarmi nï:
30
Kanan junaqmi cumplishä wamrayki Salomón noqapa trokï rey kananpä Tayta Diospa jutinchö awninqäta».
31
Tsaynö niptinmi Betsabéqa urkunpis patsaman töpanqanyaq reypa puntanman qonquriykur nirqan: «¡Imayyaqpis kawanaykipä Tayta Dios yanapaykulläshuy!»
32
Tsaypitanam rey David qayatsirqan sacerdöti Sadocta, profëta Natánta y Joiadapa tsurin Benaíata. Paykuna yaykuskiyaptinmi
33
nirqan: «Yanapamaqnïkunata qoriskir tsurï Salomónta muläman muntarkatsir Gihón pukyuman llapayki pushayay.
34
Tsayman chaykurmi sacerdöti Sadoc y profëta Natán Salomónman aceitita wiñayanqa Israel runakunapa mandaqnin rey kananpä. Wiñaskiyaptinnam cornëtata tukar jinchipa niyanki: «¡Viva rey Salomón! ¡Viva!»
35
Tsaypitanam palaciüman apaykamur trönüman jamatsiyanki noqapa trokï rey kananpä. Paytam churarqü Judá runakunapa y Israel runakunapa mandaqnin rey kananpä».
36
Niptinmi Joiadapa tsurin Benaía nirqan: «Taytay, ninqaykinömi rurayäshä. Tayta Diospis tsaynö kananpä permitikullätsun.
37
Qamta yanapashunqaykinölla Salomóntapis yanapaykullätsun. Qam mandanqaykipitapis mas atska markakunata mandaykullätsun».
38
Tsaypitanam sacerdöti Sadoc, profëta Natán, Joiadapa tsurin Benaía, cereteo runakuna y peleteo runakuna Salomónta rey Davidpa mulanman muntarkatsir Gihón pukyuman pushayarqan.
39
Tsaychönam waqrachö wiñaraykaq aceitita sacerdöti Sadoc sagrädu toldupita jipiskir Salomónpa umanman rey kananpä wiñarqan. Tsaymi cornëtata tukaptin llapan runakuna jinchipa niyarqan: «¡Viva rey Salomón! ¡Viva!»
40
Palaciuman kutirnam pinkulluta tukaraykar qaqakunapis yachapanqanyaq kushikuypita vïvarnin Salomónpa qepanta aywayarqan.
41
Tsaynö vïvayanqantam Adonías y paywan kaykaq runakuna mikuyta ushaykäyanqanchö wiyaskiyarqan. Cornëtata tukayämunqanta wiyarmi Joab nirqan: «¿Imanirtä markachö pasaypa bülla kaykämun?»
42
Tsaynö parlaykäyaptinmi sacerdöti Abiatarpa tsurin Jonatán charqan. Chaykuptinmi Adonías nirqan: «Taytay, päsakallämuy. Qam respitädu runaqa alli noticiatachi apaykämunki».
43
Tsaymi Adoníasta Jonatán nirqan: «Mana alli noticiatam apamurqü. Rey Davidmi Salomónta rey kananpä churashqa.
44
Gihón pukyu kaqman pushaykur churayänanpämi rey David mandashqa sacerdöti Sadocta, profëta Natánta, Joiadapa tsurin Benaíata, cereteo runakunata y peleteo runakunatapis. Tsaymi rey Davidpa mulanman muntarkatsir tsayman pushayashqa.
45
Tsaychömi sacerdöti Sadoc y profëta Natán Salomónpa umanman aceitita wiñayashqa rey kananpä. Tsaypitam llapankuna markaman kushishqa kutiyashqa. Kushikuypita vïvayanqantam kanan wiyaykäyanki.
46
«Kananqa reypa trönunchönam Salomón jamaykan.
47
Tsaymi rey Davidpa yanapaqninkuna llapanpis Davidta felicitar niyashqa: «Tayta Dios qamta yanapashunqaykinölla Salomóntapis yanapaykullätsun. Qam mandanqaykipitapis mas atska markakunata mandaykullätsun». Tsaynö niyaptinmi rey Davidpis cämanchö Tayta Diosta adorar
48
nishqa: «Israel runakunapa Tayta Diosnin alabashqa kaykullätsun. Paymi kawaykaptillärä juk tsurï trönüman jamananpä permitishqa».
49
Tsaynö päsanqanta willaptinmi Adonías qayatsinqan runakunaqa pasaypa mantsakarnin wakpa kaypa qeshpiyarqan.
50
Adoníasnam Salomón wanutsinanta mantsar Sagrädu Tolduman qeshpiskir altarpa waqrankunapita tsarikushqa ichiraykarqan.
51
Tsaytanam Salomónta juk runa willarqan: «Adoníasqa mantsashurnikim altarpa waqranta tsarikushqa ichiraykan. Paymi rugakushunki Tayta Diospa jutinchö jurar mana wanutsinaykipä».
52
Tsaymi Salomón nirqan: «Imatapis llutanta mana ruraptinqa manam imapis payta päsanqatsu. Peru llutankunata ruraptinmi sïqa wanutsishä».
53
Tsaypitanam Salomón mandarqan altar kaqpita Adoníasta pushamunanpä. Puntanman chaykur qonquriykuptinmi Salomón nirqan: «Wayikipa kutikuy».
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 2 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22