1 Kings 16

Quechuan QXO (Biblia en Quechua del sur de Conchucos)

← Chapter 15 Jump to: Chapter 17 →

1Tsaymi Hananipa tsurin profëta Jehúta Tayta Dios nirqan Baasata willananpä:

2«Imapäpis mana cuentashqa kaykaptikim kuyanqä Israel runakunapa mandaqnin rey kanaykipä churarqä. Peru qamqa Jeroboamnöllam Israel runakunata animatsirquyki jutsata rurayänanpä. Tsaynö rurarmi pasaypa rabyanätsimarquyki.

3Tsaymi Nabatpa tsurin Jeroboamta ushakätsinqänölla qamta y qampita miraqkunata ushakätsiyäshayki.

4Markachö wanuqkunataqa allqukunam mikuyanqa. Markapita juklächö wanuqkunataqa wiskurkuna y condorkunam mikuyanqa».

5Baasa ruranqankuna y guërrakunachö vincinqankuna llapanmi Israel nacionpa mandaqnin reykunapa acta librunchö qellqashqa kaykan.

6Baasa wanuskiptinmi Tirsa markachö pampayarqan. Paypa trokinnam tsurin Elana rey karqan.

7Jeroboamnö y tsurinnö Tayta Diosta rabyanätsir jutsata ruranqanpita y Jeroboampa castankunata wanutsinqanpitam Hananipa tsurin profëta Jehú Tayta Dios tantiyatsinqannö Baasapa y castankunapa contran willakurqan.

8Judá nacionchö Asa ishkay chunka joqta (26) watana rey kaykaptinmi Baasapa tsurin Ela Tirsa markapita Israel runakunata mandar qallaykurqan. Payqa ishkay watallam mandarqan.

9Elapa soldädunkunapa juk capitanninmi karqan Zimri. Paymi guërra carrëtakunata pullanta poderninchö tsarararqan. Capitannin kaykarmi rey Elapa contran shärirqan. Juk kutim Tirsa markachö rey Ela palaciuta cuidaq Arsapa wayinchö upyaykarqan. Tsaychö pasaypa machashqa kaykaptinmi

10Zimri chaykur wanutsirqan. Tsaypitam kikinna rey kayta qallaykurqan. Tsaynö päsarqan Judá nacionchö ishkay chunka qanchis (27) wata Asa rey kaykaptinmi.

11Zimri rey kayman yaykuskirmi Baasapa tsurinkunata, castankunata y amïgunkunata chipyaq wanutsirqan. Manam ni jukllayllapis ollqu quëdarqantsu.

12Llapanta tsaynö wanutsirqan Tayta Diospa willakuqnin profëta Jehú willakunqannöllam.

13Rey Baasapa contran Jehú tsaynö willakurqan Baasa y tsurin Ela jutsata rurayanqanpita y jutsata rurayänanpä Israel mayinkunata animatsiyanqanpitam. Tsaynöpam ïdulukunata adorar Israel runakunata kuyaq Tayta Diosta pasaypa rabyanätsiyarqan.

14Ela imata ruranqankunapis Israel nacionpa mandaqnin reykunapa acta librunchömi llapan qellqashqa kaykan.

15Ishkay chunka qanchis (27) wata Judá nacionchö Asa rey kaykaptinmi Tirsa markachö Zimri rey kayta qallaykurqan. Peru qanchis junaqllam rey karqan. Tsay junaqkunam Israel soldädukuna Filistea nacionchö kaq Gibetón markata atacaykäyarqan.

16Tsaychömi Israel soldädukuna musyayarqan rey Elata wanuskatsir Zimrina paypa trokin rey yaykunqanta. Tsayta musyaskirmi jinan höra capitanninkuna Omrita rey kananpä churayarqan.

17Tsaynö churaskiyaptinnam Omriqa Gibetón markata manana atacar llapan Israel soldädukunawan Tirsa markata atacayänanpä aywayarqan.

18Zimriqa täranqan markata atacaykäyanqanta rikaykurmi palaciuchö kaykaq törri rurinman yaykuskirqan. Peru tsay törriman ninata tsariskatsiptinmi kikintapis nina lunyar usharqan.

19Tsaynö wanurqan Tayta Diosta rabyanätsir jutsata ruranqanpitam. Ïdulukunata adorayänanpä Israel runakunata Jeroboam animatsinqannömi Zimripis animatsirqan.

20Zimri ruranqankuna y Elapa contran shärir wanutsinqanpis Israel nacionpa mandaqnin reykunapa acta librunchömi qellqashqa kaykan.

21Tsaypitanam Israel nacionchö wakin runakuna munayarqan Ginatpa tsurin Tibni rey kananta y wakinnam munayarqan Omri rey kananta.

22Tsaymi Omripa favornin kaqkuna pelyar Ginatpa tsurin Tibnipa favornin kaqkunata vinciyarqan. Tibnita wanuskatsiyaptinmi Omrina paypa trokin rey karqan.

23Judá nacionchö kimsa chunka juk (31) wata Asa rey kaykaptinmi Israel nacionchö Omri rey kayta qallaykurqan. Payqa chunka ishkay watam Israel runakunapa mandaqnin rey karqan. Joqta watam Tirsa markapita mandarqan.

24Tsaypita juk markata shäritsinanpämi Samaria jirkanta Semer runapita Omri rantirqan. Tsay jirkanpa preciuntam pägarqan joqta chunka joqta (66) kïlu qellayta. Tsaychö markata shäriskatsirmi jiruruypa corralatsirqan. Jirkanpa punta kaq duëñunpa jutin Semer kaptinmi tsay markata jutitsirqan Samaria kananpä.

25Omriqa Tayta Diosta mana cäsurmi punta reykunapitapis mas peorrä jutsata rurarqan.

26Nabatpa tsurin Jeroboam jutsata ruranqannömi paypis jutsata rurarqan. Tsaymi ïdulukunata adorayänanpä Israel runakunata Jeroboam animatsinqannö animatsirqan. Tsaynöpam Tayta Diosta pasaypa rabyanätsirqan.

27Omri ruranqankuna y guërrakunachö vincinqankunam Israel nacionpa mandaqnin reykunapa acta librunchö qellqashqa kaykan.

28Wanuskiptinmi Samaria markaman pampayarqan.

29Judá nacionchö kimsa chunka puwaq (38) wata Asa rey kaykaptinmi Israel nacionchö Omripa tsurin Acab rey kayta qallaykurqan. Payqa ishkay chunka ishkay (22) watam Israel runakunata Samaria markapita mandarqan.

30Acabqa Tayta Diosta mana cäsurmi punta reykunapitapis mas peorrä jutsata rurarqan.

31Nabatpa tsurin Jeroboam jutsata ruranqannöllam paypis jutsata rurarqan. Manam tsaypis tsayllatsu, sinöqa Sidón runakunapa mandaqnin rey Et-baalpa tsurin Jezabelta warmin kananpä ashirmi Baal diostapis adorarqan.

32Tsaymi Baalpä templutapis altartapis Samariachö shäritsirqan.

33Asera diösapäpis qeruta jawitsirmi wakin kaq reykunapitapis mas peorrä Israel runakunata kuyaq Tayta Diosta rabyanätsirqan.

34Acab mandaq kanqan witsanmi Bet-elchö täraq Hiel jutiyuq runa Jericó markata yapay allitsatsirqan. Cimientukunata pirqayta qallaykuptinmi mayor tsurin Abiram wanurqan. Marka punkuta churatsiptinnam qepa kaq tsurin Segubna wanurqan. Llapan tsaykuna päsarqan Nunpa tsurin Josué ninqannöllam.

← Chapter 15 Jump to: Chapter 17 →