bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Quechuan
/
Quechuan QXO (Biblia en Quechua del sur de Conchucos)
/
1 Kings 22
1 Kings 22
Quechuan QXO (Biblia en Quechua del sur de Conchucos)
← Chapter 21
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
1
Siria nacionwan Israel nación kimsa watanam guërrata rurayarqantsu.
2
Kimsa wata päsaskiptinnam Judá nacionpa mandaqnin rey Josafat Israel nacionpa mandaqnin rey Acabta watukaqnin aywarqan.
3
Chaykuptinmi yanapaqninkunata rey Acab nirqan: «Musyayanqaykinöpis Siria nacionpa mandaqnin rey kananyaqmi Galaadchö kaykaq Ramot markantsikta poderninchö tsararaykan. Imanöpapis tsay markantsikta qorimushun».
4
Tsaynö willanakuskirmi rey Josafatta Acab nirqan: «¿Yanapamankimantsurä Galaadchö kaykaq Ramot markata qorinäpä aywaptï?» Tsaynö niptinmi Josafat nirqan: «Soldädükunawan caballükunawan yanapanäpä listum kaykä.
5
Peru Tayta Diostarä tapukushun».
6
Tsaymi chusku pachak (400) profëtankunata qayaykatsir rey Acab tapur nirqan: «Galaadchö kaykaq Ramot markata qoriq ¿aywayämanku o manaku?» Profëtakunanam niyarqan: «Aywayay. Tayta Dios yanapayäshunkim tsay markata qoriyämunaykipä».
7
Peru Josafatnam nirqan: «¿Manatsurä Tayta Diospa profëtan kaychö kan tapukunantsikpä?»
8
Rey Acabnam nirqan: «Awmi, kaychö kanmi Tayta Diospa juk profëtan. Payqa Imlapa tsurin Micaíasmi. Peru payta tapukuptï imaypis mana allikuna päsamänanpä kanqantam niman. Tsaymi paytaqa pasaypa chikï». Rey Josafatnam nirqan: «Ama tsaynöqa parlaytsu».
9
Tsaymi juk capitanninta qayaskatsir rey Acab nirqan: «Imlapa tsurin Micaíasta ras pushamuy».
10
Israel nacionpa mandaqnin rey Acab y Judá nacionpa mandaqnin rey Josafatmi Samaria marka yaykuna punkuchö mandaq kay röpankuna jatishqa trönunkunachö jamaraykäyarqan. Paykunapa puntanchömi profëtakunapis willakuykäyarqan.
11
Quenaanapa tsurin profëta Sedequíaspis fiërrupita waqrakunata ruraskirmi nirqan: «Tayta Diosmi nin: «Töru waqraqnömi Siria nación runakunata ushakätsinki».
12
Tsaynöllam llapan profëtakunapis reyta niyarqan: «Galaadchö kaykaq Ramot markata atacayay. Tayta Diosmi yanapayäshunki tsay markata qoriyämunaykipä».
13
Willakuq aywaqnam Micaías kaqman chaykur nirqan: «Llapan profëtakunam rey Acabta nikäyan tsay markaman aywar soldädunkunawan vinciyänanpä kanqanta. Qampis paykuna willakuyanqannölla niykullay».
14
Tsaynö niptinmi Micaías nirqan: «Noqaqa Tayta Dios nimanqallantam nishä. Nimanqallanta mana niptïqa pasaypa castigamätsun».
15
Tsayman Micaías chaykuptinmi rey Acab nirqan: «Galaadchö kaykaq Ramot markata qorinäpä ¿atacayämanku o manaku?» Micaíasnam nirqan: «Aywar atacayay. Vinciyänaykipämi Tayta Dios yanapayäshunki».
16
Llullapaykanqanta yarparmi rey Acab nirqan: «¡Ayka kutitä nishayki Tayta Diospa jutinchö rasun kaqllata willamänaykipä!»
17
Micaíasnam nirqan: «Tayta Dios revelamaptinmi Israel runakuna mitsiqniynaq üshakunanö maytsaypa mashtakashqa kaykaqta rikarqü. Tayta Diosmi nin: «Duëñuynaq üshanö kaykarqa Israel runakuna wayinkunapa tranquïlu kutikuyätsun».
18
Tsaynam Josafatta rey Acab nirqan: «¿Manaku nirqä desgracia päsamänanpä kaqllata kay runa imaypis nimanqanta?»
19
Micaíasnam yapay nirqan: «Kanan wiyay Tayta Dios imata ninqantapis. Revelacionchömi rikarqü trönunchö Tayta Dios jamaraykaqta. Tsaynöllam rikarqü llapan angelninkuna itsuq kaq lädunchö y derëcha kaq lädunchö ishniyparä ichiraykaqta.
20
Tayta Diosmi nirqan: «¿Pirä rey Acabta yarpayta qonman Galaadchö kaykaq Ramot markata atacaq aywar tsaychö wanunanpä?» «Tsaynam wakin angelkuna juknöpa niyarqan y wakin kaqkunapis juknöpa niyarqan.
21
Tsaynö nikäyaptinmi juk espíritu Tayta Diospa puntanman aywaykur nirqan: «Noqam yarpayta qoshä». «Tsaymi Tayta Dios tapurqan: «¿Imanötä yarpayta qonki?»
22
«Tsaymi nirqan: «Acabpa llapan profëtankunatam llullakuyänanpä yarpayta qoshä». «Tsaynö niptinmi Tayta Dios nirqan: «Yarpanqaykinö ruraptiki allim kanqa. Tsaynö ruranaykipä ras ayway».
23
Tsaynö niskirmi rey Acabta profëta Micaías nirqan: «Tayta Dios tsaynö mandamuptinmi tsay espíritu shamur llapan profëtaykikunata llullakaykätsin. Tsaynö llullapaykäyäshunki wanutsiyäshunaykipä hörayki chämuptinmi».
24
Tsaynö niptinmi Quenaanapa tsurin Sedequías Micaíasta laqyaskir nirqan: «¡Imanirtä yarpaykanki Tayta Diospa Espïritun noqata dëjaskamar qamllatana parlapäshunqaykita!»
25
Micaíasnam nirqan: «Wayin wayin pakakur purinqayki höram musyanki rasun kaqta willanqäta».
26
Rey Acabnam yanapaqninkunata nirqan: «Micaíasta prësu tsariskir markapa gobernadornin Amónpa y tsurï Joáspa despächunman apayay.
27
Paykunata willayanki carcelman wichqaskir kawananpä tinkulla yakutapis mikuytapis qarayänanpä. Tsaychö wichqarätsun llapantapis vinciskir kutimunqäyaq».
28
Micaíasnam nirqan: «Vinciskir kutimunaykipä kanqanta yarpaptikipis Tayta Diosmi nin wanunaykipä kanqanta. Tsay ninqätaqa llapaykikuna wiyayay».
29
Tsaypitanam Israel nacionpa mandaqnin rey Acab y Judá nacionpa mandaqnin rey Josafat Galaadchö kaykaq Ramot markata atacaq aywayarqan.
30
Manarä atacarmi rey Acab nirqan: «Contrantsik soldädukuna mana reqiyämänanpä noqaqa pelyakuna röpata jatikurkur pelyashä. Peru qamqa mandaq kay röpallaykiwan pelyay». Tsaynö nirmi Acabqa pelyakuna röpata jatikurkur pelyaq yaykurqan.
31
Siria nacionpa mandaqnin reynam carrëtakunawan aywaq kimsa chunka ishkay (32) capitanninkunata yätsir nirqan: «Soldädukunata atacayänaykipa rantin rey Acabllata imanöpapis atacayanki».
32
Tsaynam tsay capitankuna pelyaman yaykur Josafatta rikaykurnin yarpäyarqan Israel nacionpa mandaqnin rey Acab kanqanta. Atacayänanpä corralaskiyaptinmi Josafatqa ausiliuta mañakur qayararqan.
33
Tsaynö qayaraptinmi Acab mana kanqanta tantiyaskir wanutsiyarqantsu.
34
Tsaypita pelyaykanqanchömi juk soldädu llutalla flëchanqanchö rey Acabpa bronci chalëcun tinkuraqninpa flëcha yaykuskirqan. Tsaymi carrëtan manijaqta Acab nirqan: «Ras kaypita jipimay. Flëchaskayämashqam».
35
Pasaypa mantsariypä tsay junaq pelyayaptinmi rey Acabta antsa kaykaqta carrëtanman soldädunkuna ichïtsiyarqan pelyayanqanta rikananpä. Flëchayanqanpita yawar mana päraypa carrëtanman liwaypa aywaptinmi tsay tardilla wanuskirqan.
36
Rupay jeqaykaptinmi rey Acab wanunqanta musyaskir soldädunkunata willakur niyarqan: «Kananqa cada ünuntsik markantsikpana kutikushun.
37
Mandamaqnintsik rey wanushqanam». Tsaypitanam rey Acabpa ayanta Samariaman apaykur pampayarqan.
38
Acabpa carrëtanta mayllayänanpämi prostitüta warmikuna bäñakuyänan Samaria pözuman apayarqan. Tsaychö mayllayaptinmi Acabpa yawarninta allqukuna laqwayarqan. Llapanpis tsaynö päsarqan Tayta Dios ninqannöllam.
39
Acab ruranqankuna, marfilwan adornanqan palaciuta shäritsinqan y markakunata shäritsinqankunapis llapanmi Israel nacionpa mandaqnin reykunapa acta librunchö qellqashqa kaykan.
40
Acab wanuskiptinnam tsurin Ocozíasna Israel nacionpa mandaqnin rey karqan.
41
Israel nacionchö chusku watana Acab rey kaykaptinmi Asapa tsurin Josafat Judá nacionchö rey kayta qallaykurqan.
42
Mandayta qallanqan witsan kimsa chunka pitsqa (35) watayuqmi kaykarqan. Payqa ishkay chunka pitsqa (25) watam Jerusalénpita mandarqan. Mamanmi Silhipa tsurin Azuba karqan.
43
Payqa papänin Asanöllam Tayta Dios munanqannö kawarqan. Peru templupita juk läduchö kaykaq altarkunata manam juchutsirqantsu. Tsay altarkunachömi imaypis sacrificiukunata rupatsiyarqan y inciensiuta qoshnitsiyarqan.
44
Israel nacionpa mandaqnin reywan amistäta rurashqa karmi Josafatqa paywan mana chikinakuypa kawakuyarqan.
45
Josafat ruranqankuna y guërrakunachö vincinqankuna llapanmi Judá nacionpa mandaqnin reykunapa acta librunchö qellqashqa kaykan.
46
Tsay witsanmi wakin runakuna y warmikuna diosninkunata adorar altarkuna kanqanchö jukwan jukwan kakuyaq. Llapan tsay runakunata y warmikunatam Judá nacionpita rey Josafat qarqurqan. Paykunaqa Josafatpa papänin Asa kawanqan witsanpitam diosninkunata tsaychö adorayarqan.
47
Josafat mandanqan witsanqa Edom nacionchö manam rey karqantsu, sinöqa gobernadorllam karqan.
48
Josafatqa qorita Ofirpita apayämunanpämi büquikunata ruratsirqan. Tsay büquikunaqa Tarsisman aywaq büquikunanömi karqan. Tsay büquikuna Ezión-geberchö pakir jundiskiyaptinmi aywayarqannatsu.
49
Juk kutim Acabpa tsurin Ocozías Josafatta nirqan: «Büquikikunata manijar yanapayänanpä sirvimaqnïkunapis aywayätsun». Tsaynö niptinpis Josafatqa paykuna aywayänanta manam munarqantsu.
50
Josafat wanuskiptinmi Davidpa Markanchö unay castankuna pamparäyanqanman pampayarqan. Paypa trokinnam tsurin Joramna rey karqan.
51
Judá nacionchö chunka qanchis wata Josafat mandaq kaykaptinmi Acabpa tsurin Ocozías Israel nacionchö rey kayta qallaykurqan. Payqa ishkay watam Samariapita mandarqan.
52
Tayta Diosta mana cäsurmi papäninnö, mamannö y Nabatpa tsurin Jeroboamnö Israel runakunata jutsata ruratsirqan.
53
Ocozíaspis papänin Acabnömi Baal diosta adorarqan. Tsaynö adorarmi Israel runakunata kuyaq Tayta Diosta pasaypa rabyanätsirqan.
← Chapter 21
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22