1 Kings 19

Quechuan QXO (Biblia en Quechua del sur de Conchucos)

← Chapter 18 Jump to: Chapter 20 →

1Acabmi wayinman kutiykur warmin Jezabelta willarqan Elías llapan ruranqankunata y Baalpa profëtankunatapis chipyaq wanutsinqanta.

2Tsaymi Jezabelqa Elíasman willakuqta mandarqan ninanpä: «Tsay profëtakunata wanutsinqaykipitam kanan kikikitapis wanutsishayki. Waray kaynö höra mana wanutsiptïqa llapan diosnïkunapis mana kuyapaypa castigamätsun».

3Tsaynö niptinmi pasaypa mantsarir Elíasqa qeshpir aywakurqan. Judá nacionchö Beersebaman chaykurmi sirviqninta dëjaskirqan.

4Tsaypita juk junaq qoyat desiertupa aywaykanqanchömi retäma jacha chakinman ajyashqa jamaskirqan. Tsaychömi wanuyta munar nirqan: «Tayta Dios, ras qorikallämay. Wanukuq castäkunapa ayan mana väliq kanqannömi noqapis mana väliq kaykä».

5Tsaynö mañakuskirmi tsay retäma chakinman kitiykur punukaskirqan. Tsaychö Elías punukashqa kaykaptinmi juk ángel rikchatsir nirqan: «Mikunaykipä shäriy».

6Rikchaskamurnam Elíasqa jawnan lädun shanshachö kuwashqa tantata y uylluchö yaku kaykaqta rikarqan. Tsayta mikuskir y upuskirmi yapay punukaskirqan.

7Tsaypita yapay kutiykurmi rikchatsir ángel nirqan: «Karurämi aywanaykipä kaykan. Tsaynö kaykaptinqa ras mikukurkuy».

8Tsaymi shäriskir yapay mikurqan y yakutapis upurqan. Tsay mikuyta mikunqallanwanmi chusku chunka (40) junaq y chusku chunka paqas aywar Tayta Dioswan tinkuna Horeb jirkaman charqan.

9Tsaychömi machayman yaykuykur tsay paqas punurqan. Tsaychö punuykaptinmi Tayta Dios nirqan: «Elías, ¿imatatä kaychö ruraykanki?»

10Elíasnam nirqan: «Poderyuq Tayta Dios kaptikim llapan shonqüwan qamta sirviykä. Israel runakunaqa pactu ruranqaykita manam cumpliyantsu. Tsaynöllam altarnikikunata juchutsiyashqa y profëtaykikunatapis wanutsiyashqa. Noqallanam qeshpirqü. Kananqa noqatapis wanutsiyämänanpämi ashiykäyäman».

11Tsaynö niptinmi Tayta Dios nirqan: «Kaypita yarquskir ñöpäman ichiy». Tsaynö niskir Tayta Dios tsaypa päsaptinmi jirkakunata kichakätsir y rumikunatapis amirrä shukukuy vientu päsarqan. Tsaynö kaptinpis Tayta Dios manam tsay vientuchö karqantsu. Shukukuy vientu päsaskiptinnam mantsariypä temblor karqan. Tsay temblorchöpis Tayta Dios manam karqantsu.

12Tsay temblor päsaskiptinnam lunyaypa lunyar nina rupaykaq päsarqan. Tsay ninachöpis manam Tayta Dios karqantsu. Nina päsaskiptinnam wallwallyayllapa vientu päsaykaqnö wiyakarqan.

13Tsayta wiyaykurmi Elíasqa cäpanwan cäranta tsapakurkur machay punkuman yarquskir ichiskirqan. Tsaychö ichiraykaptinmi Tayta Dios nirqan: «Elías, ¿imatatä kaychö ruraykanki?»

14Elíasnam yapay nirqan: «Poderyuq Tayta Dios kaptikim llapan shonqüwan qamta sirviykä. Israel runakunaqa pactu ruranqaykita manam cumpliyantsu. Tsaynöllam altarnikikunata juchutsiyashqa y profëtaykikunatapis wanutsiyashqa. Noqallanam qeshpirqü. Kananqa noqatapis wanutsiyämänanpämi ashiykäyäman».

15Tsaynö niptinmi Tayta Dios nirqan: «Shamunqallaykipa kutir Damasco desiertuyaq ayway. Tsayman chaykur Hazaelpa umanman aceitita wiñapanki Siria nacionpa mandaqnin rey kananpä.

16Tsaypita aywakur Israel nacionpa mandaqnin rey kananpä Nimsipa tsurin Jehúpa umanmanpis aceitita wiñapanki. Tsaynöllam qampa trokiki profëta kananpä Abel-mehola markapita Safatpa tsurin Eliseupa umanmanpis aceitita wiñapanki.

17«Hazaelpa poderninpita qeshpiq kaqtaqa Jehúmi wanutsinqa. Jehúpa poderninpita qeshpiq kaqtanam Eliseo wanutsinqa.

18Tsaynö kaptinpis kikïmi tsapäshä noqaman yärakamuq qanchis waranqa (7,000) runakunata. Paykunaqa manam Baalman qonqurikuyashqatsu ni mutsayashqatsu».

19Tsaypita Elías kutirmi Safatpa tsurin Eliseuta tarirqan chunka ishkay yuntankunawan melganakuypa jaruykaqta. Ushanan kaq melgachö Eliseo jaruykaptinmi Elíasqa puntanman aywarnin cäpanta aqshuskatsir päsakurqan.

20Tsaymi Eliseuqa yuntanta dëjaykur Elíasta taripaykur rugar nirqan: «Qamwan aywanantsikpä puntataqa mamäta y papänïtarä despidikur mutsaykamushä». Tsaynö niptinmi Elías nirqan: «Ayway ari. Peru ama qonqaytsu aywanantsikpä kanqanta».

21Elías tsaynö niptinmi Eliseuqa kutiykur ishkan törunta pishtatsirqan. Tsaypitam yügunwan y takllanwan aytsata kankaskir tsay markachö kaq runakunata qararqan. Tsaypitanam Elíasta yanapananpä aywakurqan.

← Chapter 18 Jump to: Chapter 20 →