bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Quechuan
/
Quechuan QXO (Biblia en Quechua del sur de Conchucos)
/
1 Kings 8
1 Kings 8
Quechuan QXO (Biblia en Quechua del sur de Conchucos)
← Chapter 7
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 9 →
1
Tsaypitanam Salomónqa Jerusalénman qayatsirqan llapan Israel mayor runakunata, trïbukunapa mandaqnin runakunata y Israel castakunachö mas respitashqa runakunatapis. Paykunatam qayatsirqan Tayta Diospa Pactu Babulninta Davidpa Markanchö kaykanqanpita templuman apayänanpä. Davidpa Markanpa jukaq jutinmi Sión.
2
Etanim killachö jatun fiestata rurayanqan junaqmi tsay qayatsinqan runakunawan Salomón qorikarqan. Etanim killaqa qanchis kaq killam karqan.
3
Llapan mayor runakuna qorikaskiyaptinmi sacerdötikuna babulta umrurkur templuman apayarqan.
4
Paykunawanmi levitakunapis tsay babulta, Tinkuna Tolduta y manëjunkunatapis apayarqan.
5
Templuman chaykatsirmi babulpa ñöpanman llapan Israel runakunawan rey Salomón qorikarqan. Tsaychömi Tayta Diosta adorar yupaytapis mana atipaypä tsaytsika üshakunata, cabrakunata y törukunata pishtaskir altarchö rupatsiyarqan.
6
Tsaypitanam Tayta Diospa Pactu Babulninta sacerdötikuna churayarqan Lugar Santïsimuchö ishkay querubinkunapa älankuna rurinman.
7
Tsay querubinkunapa älankunam babul jananpa mashtararqan. Tsaynöpam babul y puritsiyänan qerukunapis querubinkunapa älankuna rurinchö karqan.
8
Puritsiyänan qerukuna largu karmi Lugar Santupita rikakarqan. Peru alarpitam sïqa rikakarqannatsu. Tsaynöllam kananyaqpis kaykan.
9
Tsay babulchöqa Horebchö Moisés churanqan ishkay läja rumikunallam karqan. Tsay läjakunachömi qellqashqa karqan Israel runakuna Egiptupita yarqayämunqan witsan paykunawan Tayta Dios pactuta ruranqan.
10
Lugar Santupita sacerdötikuna yarquskiyaptinmi Tayta Diospa templunta pukutay tsapaskirqan.
11
Pukutay tsaynö tsapaptin y kikin Tayta Dios tsay pukutaychö kaptinmi sacerdötikunaqa ima ruraytapis mana puëdir aywakuyarqan.
12
Tsaymi Tayta Diosta mañakur Salomón nirqan: «Tayta Dios, yana pukutay rurinchö täkunqaykitam nirquyki.
13
Tsaynö kaptinpis kananqa templuta ruratsirqü tsaychö imayyaqpis tänaykipämi».
14
Tsaypitanam tsaychö kaykaq Israel runakunaman tikraykur bendisarnin rey Salomón
15
nirqan: «Yärakunqantsik Tayta Dios alabashqa kaykullätsun. Paymi papänï Davidta awninqankunata llapanta cumplishqa. Davidta awnirmi nirqan:
16
«Kuyanqä Israel runakunata Egiptupita jipimunqä junaqpita hasta kananyaq manam mañakurqütsu mayqan Israel trïbukunapa markanchöpis täkunä templuta rurapäyämänanpä. Peru Davidtam sïqa akrarqü Israel runakunapa mandaqnin rey kananpä».
17
«Papänï Davidqa kuyamaqnintsik Tayta Diosta adoranantsikpä templuta ruratsiytam munarqan.
18
Tsaynö munaptinmi Tayta Dios nirqan: «Noqapä templuta shäritsiyta yarpanqaykiqa allim.
19
Peru manam qamtsu shäritsinki, sinöqa tsurikirämi noqapä templuta shäritsinqa».
20
«Awninqannöllam Tayta Dios cumplishqa. Tsaymi papänï Davidpa rantin Israel runakunapa mandaqnin rey kaykä. Tsaynöllam kuyamaqnintsik Tayta Diospä templuta ruratsirqü.
21
Tsaymanmi Tayta Diospa Pactu Babulninta churatsirqü. Tsay babul rurinchömi qellqashqa kaykan Egiptupita jipimur unay castantsikkunawan Tayta Dios pactu ruranqan».
22
Tsaynö niskirmi Salomónqa Tayta Diospa altarnin ñöpanman aywar llapan Israel runakuna rikaykaptin makinta junishpa joqarirqan.
23
Tsaypitanam Tayta Diosta mañakur nirqan: «Israel runakunata kuyaq Tayta Dios, ciëluchö ni kay patsachöpis qamnöqa manam ima diospis kantsu. Sirvishuqnikikunawan pactu ruranqaykitaqa imaypis cumplinkim. Tsaynöllam llapan shonqunkunawan munanqaykinö kawaqkunata imaypis kuyanki.
24
Sirvishuqniki papänï Davidta llapan awninqaykita cumplirmi templuykita ruratsinäpä yanapamarquyki.
25
«Israel runakunata kuyaq Tayta Dios, papänï Davidta awnirmi nirqayki: «Qampita miraqkunapis qam cumplinqaykinö mandamientükunata cumpliptinqa Israel runakunapa mandaqnin reykuna kayänanpämi imaypis churashä».
26
Taytay, tsay awninqaykita imaypis cumpliykullay.
27
«Peru ¿rasunpatsurä kay patsaman shamuykur runakuna täyanqanchö tankiman? Ciëlu tsayläya jatun kaykarpis manam aypantsu tänaykipä. Tsaynö kaykaptinqa ¡imanöparä kay ruratsinqä templu aypanqa!
28
Tayta Dios, imanö kaptinpis llapan shonqüwan mañakamunqäta wiyaykallämay. Tsaynölla kanan rugakamunqäta chaskiykallämay.
29
Kikikim kay templuchö imaypis tänaykipä nirqayki. Tsaynö kaykaptinqa paqaspa junaqpapis kay templuchö kaykullay mañakamunqäta imaypis wiyamänaykipä.
30
Noqa mañakamuptïpis y kuyanqayki Israel runakuna kay templuchö mañakayämuptinpis wiyaykayällämay. Jutsäkunapita perdonta mañakayämuptï ciëluchö tanqaykipita perdonaykayällämay.
31
«Pipis runa mayinpa contran ruraptin rasun kaqta musyayänanpä kay altarnikiman qayaykatsimur juratsiptin
32
ciëlupita wiyaykallämunki. Tsaynöpa jutsayuq kaqta castigarpis jutsaynaq kaqtaqa ama castigaykullankitsu.
33
«Kuyanqayki Israel runakuna jutsata rurayanqanpita contrankuna vincir nacionninman apayaptin kay templuman rikaykamur perdonta mañakur alabayäshuptikiqa
34
ciëlupita wiyaykallämunki. Paykunata perdonar unay castäkunata entreganqayki nacionman kutiykatsillämunki.
35
«Jutsata rurayanqanpita pasaypa usyawan castigaptiki kay templuman rikaykamur perdonta mañakur alabayäshuptikiqa
36
ciëlupita wiyamur kuyanqayki Israel casta sirvishuqnikikunata perdonaykullanki. Tsaynölla cäsuyäshurniki shumaq kawayänanpä tantiyaykatsillanki. Entreganqayki chakrakunaman tamyaykatsillämunki.
37
«Taytay, kay nacionchö hambrüna kaptin, pesti kaptin, usyawan llapan tsakiptin, mikuyta rancha ushaptin, chukllushkuna o shiwrikuna ushaptin, mayqan markatapis contrankuna jiruruypa tsapar atacaptin, o ima desgraciapis o qeshyapis tsariptin kuyapaykullanki.
38
Kuyanqayki Israel runakuna mayqanpis jutsayuq kayanqanta tantiyar kay templuman makinkunata joqarkur mañakayämushuptiki
39
ciëluchö täranqaykipita wiyar perdonaykullanki. Taytay, qamqa musyankim runa imata yarpanqantapis. Imanöpis kawayanqanman yanapaykullanki.
40
Tsaynö yanapanqaykita tantiyarmi unay castäkunata entreganqayki nacionchö imaypis mantsapakuyäshunki.
41
«Tsaynöllam kuyapäkuq Tayta Dios kanqaykita musyar juklä nacionchö täraq mana Israel runakunapis kay nacionman shayämunqa.
42
Paykunapis musyayanqam llapanpä poderyuq Dios kanqaykita y imapis qampä aja mana kanqanta. Kay templuman rikaykamur mañakushuptiki
43
ciëlupita wiyamur yanapaykullanki. Tsaynö yanapaykunki kay patsachö llapan nación runakunapis kuyanqayki Israel runakunanö mantsapakuyäshunaykipä. Tsaynöllam paykunapis tantiyayanqa kay shäritsinqä templuchö qamta adorayäshunqaykita.
44
«Kuyanqayki Israel runakuna contrankunawan pelyayänanpä maypapis mandaptiki kay akranqayki markaman y qampä shäritsinqä templuman rikaykamur mañakayämuptinqa
45
ciëlupita wiyamur yanapaykullanki.
46
«Taytay, llapan runakunapis jutsa ruraqllam kayan. Tsaymi kuyanqayki Israel runakuna jutsata rurayaptinqa pasaypa rabyar capaz manana yanapankinatsu. Tsaynö manana yanapaptiki contrankuna shamur capazchi nacionninman apayanqa cercaman o karuman karpis.
47
Tsaychö kaykar capazchi cuentata qokur «jutsata rurarmi qamta cäsuyarqütsu» nir perdonta mañakayämushunki.
48
Tsaynölla capazchi contran runakunapa markanchö kaykar llapan shonqunkunawan yärakamur mañakayämushunki. Unay castäkunata entreganqayki nacionman rikaykamur, kay akranqayki markaman rikaykamur y qampä ruratsinqä templuman rikaykamur mañakayämuptin
49
taykanqayki ciëlupita wiyamur yanapaykullanki.
50
Kuyanqayki Israel runakuna jutsata rurayanqanpita perdonaykullanki. Tsaynölla poderninchö tsararaq runakunata tantiyaykatsinki Israel runakunata kuyapäyänanpä.
51
Kuyanqayki runakuna kaykaptinqa tsaynö yanapaykullanki. Egiptuchö pasaypa ñakayaptinmi kuyapar jipimurqayki.
52
«Taytay, noqa mañakamunqäta y Israel runakuna mañakayämunqantapis llapanta wiyaykayämay. Tsaynö wiyaykallämanki imay höra mañakamuptïpis.
53
Unay castäkunata Egiptupita jipimunqayki witsanmi sirvishuqniki Moiséswan musyatsirquyki Israel runakunata kuyar akranqaykita. Tsaynöllam paywan musyatsirqayki juk nacionta akranaykipa rantin Israel nación runakunata akranqaykita. Tsaymi Israel runakunaqa qampa herenciayki kayan».
54
Tayta Diospa altarnin puntanchö makinta joqarkur Salomón mañakuyta ushaskirmi qonquriraykanqanpita shärirqan.
55
Tsaypitam Israel runakunata bendisar jinchipa nirqan:
56
«Tayta Dios alabashqa kaykullätsun awninqannölla Israel runakunata alli kawananpä yanapanqanpita. Moisés willakunqannöllam llapan awnimanqantsikkunata cumplishqa.
57
Unay castantsikkunata mana dëjaypa yanapanqannölla noqantsiktapis Tayta Diosnintsik mana dëjaypa imaypis yanapaykallämäshun.
58
Tsaynölla alli yarpayta y alli tantiyayta qaraykallämäshun unay castantsikkuna chaskinqan mandamientunkunata, estatütunkunata y leyninkunata cumplir pay munanqannö kawanantsikpä.
59
«Kanan mañakunqäta paqaspa junaqpapis Tayta Diosnintsik imaypis yarparaykullätsun. Tsaynöpam noqata y qamkunatapis mana dëjaypa yanapamäshun.
60
Tsaynö yanapamashqam maytsay nacionchö täraq runakuna musyayanqa Tayta Dios japallan poderösu kanqanta y paypita mas juk dios mana kanqanta.
61
Kanan junaqmi llapantsik awniykantsik llapan shonquntsikwan Tayta Diosnintsik ninqankunata cäsur leyninkunata, mandamientunkunata cumplir kawanantsikpä. Kanan junaq awninqantsiknölla imaypis cumplishun».
62
Tsaypitanam rey Salomón y llapan Israel runakuna Tayta Diospä sacrificiukunata rupatsiyarqan.
63
Tsaymi alli päsakuy sacrificiupä rupatsiyarqan ishkay chunka ishkay waranqa (22,000) törukunata y pachak ishkay chunka waranqa (120,000) üshakunata y cabrakunata. Tsaynömi Tayta Diospä shäritsinqan templuta llapan Israel runakunawan Salomón bendisayarqan.
64
Rupatsina kaq sacrificiukuna, tsaki mikuy ofrendakuna y alli päsakuy sacrificiukuna tsaytsika kaptinmi Tayta Diospa puntanchö bronci altar ayparqantsu rupatsiyänanpä. Tsaymi templupa patiun chawpintapis Salomón tsay junaqlla bendisarqan tsay pampachö rupatsiyänanpä.
65
Altarta bendisayänanpämi llapan Israel runakunawan Tayta Diosnintsikpa puntanchö Salomón qanchis junaq fiestata rurarqan. Tsay fiestamanmi llapan Israel nación markakunapita shayämurqan. Bendisayänan fiestata ushaskirnam qanchis junaq mastapis Ramäda fiestata rurayarqan. Tsaywanqa chunka chusku junaqmi fiestata rurayarqan.
66
Fiesta ushaynam runakuna kutikuyänanpä rey Salomón despachaptin agradëcikurnin kushishqa wayinkunapa kutikuyarqan. Tsaynöllam Tayta Diosta agradëcikuyarqan sirviqnin Davidta y kuyanqan Israel runakunata yanapanqanpita.
← Chapter 7
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 9 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22