bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Quechuan
/
Quechuan QXO (Biblia en Quechua del sur de Conchucos)
/
1 Kings 18
1 Kings 18
Quechuan QXO (Biblia en Quechua del sur de Conchucos)
← Chapter 17
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 19 →
1
Usya qallanqanpita kimsa wata päsaskiptinnam Elíasta Tayta Dios nirqan: «Kay patsaman yapaymi tamyatsimushä. Tsayta willanaykipä Acab kaqman ayway».
2
Elíasnam Acabta willaq aywarqan. Samaria markachö pasaypa hambrüna kaptinmi mikuyänanpä ni imapis karqantsu.
3
Tsaynö kaptinmi Acab qayatsirqan palaciuchö yanapaqnin Abdíasta. Payqa Tayta Diosta mantsapakuq runam karqan.
4
Tsaymi Tayta Diospa profëtankunata Jezabel wanutsinqan witsan Abdíasqa pachak (100) profëtakunata qoriskir pitsqa chunka (50) pitsqa chunka (50) ishkay machaykunaman pakaskir mikuytapis yakutapis apapurqan.
5
Pasaypa usya kaptinmi Abdíasta rey Acab nirqan: «Maytsay raqrakunaman y oqukunaman qewa ashiq aywashun. Capazchi qewata tarimushwan caballuntsikkuna y mulantsikkuna mana wanuyänanpä».
6
Tsaynö willanakuskirmi Acab juk nänipa y Abdías juk nänipa yarquyarqan.
7
Nänipa Abdías aywaykarmi Elíaswan tinkurqan. Elías kanqanta tantiyaskirmi qonqurikuykur nirqan: «Taytay, ¿Elíasku kanki o rikapakuykäku?»
8
Tsaynö tapuptinmi Elías nirqan: «Awmi, noqam kä. Kanan ayway kaychö kaykanqäta patronnikita willanaykipä».
9
Tsaynö niptinmi Abdías nirqan: «Taytay, ¿imatä jutsä kashqa Acabman mandamänaykipä? Nimanqaykinö willaptïqa llullapaykanqäta yarparmi wanuskatsimanqa.
10
Tayta Dios musyanmi patronnï maytsay nacionpa ashitsishunqaykita. Mana tarishurnikim tsay nacionpa mandaqnin reykunatapis juratsishqa rasunpa mana rikashunqaykita.
11
¿Tsaynö mana tariykäshuptikiku kanan nikämanki kaychö kaykanqaykita patronnïta willanäpä?
12
Willaq aywaykaptillänachi Tayta Diospa Espïritun maypapis pushashunki. Wamra kanqäpitapis Tayta Diosta mantsapakur kawaykaptïpis Acab shamur mana tarishurniki noqatachi wanutsimanqa.
13
¿Manaku willayäshurquyki profëtakunata Jezabel wanutsinqan witsan imata ruranqätapis? Pachak (100) profëtakunata ishkay machayman pitsqa chunka (50) pitsqa chunka (50) pakaykurmi mikuytapis yakutapis apapurqä.
14
¿Tsaynö yanapaykaptïku kanan nikämanki Acabman aywaykur kaychö kaykanqaykita willanäpä? Willaptïqa mana tarishurnikim wanutsimanqa».
15
Elíasnam nirqan: «Kananmi Acabwan tinkushä. Llapanta mandaq Tayta Diospa sirviqnin karmi tsaynö nï».
16
Tsaymi Abdíasqa rey Acabta willananpä aywarqan. Willaykuptinmi Acabqa Elíaswan tinkunanpä ras aywarqan.
17
Elíasta rikaykurmi Acab nirqan: «¡Qammi jutsayuq kaykanki Israel runakuna pasaypa ñakayänanpä!»
18
Elíasnam nirqan: «Manam noqatsu jutsayuq kä ñakayänanpä, sinöqa qam y castaykikunam jutsayuq kaykäyanki. Qamkunaqa Tayta Diospa mandamientunkunata mana cäsurmi Baal dioskunata adoraykäyanki.
19
Carmelo jirkaman llapan Israel runakunata kanan qoritsimuy. Tsaynölla tsayman qayatsimuy Baalpa chusku pachak pitsqa chunka (450) profëtankunata y Asera diösapa chusku pachak (400) profëtankunatapis. Tsay profëtakunataqa warmiki Jezabelmi wätan».
20
Tsaynö niptinmi llapan Israel runakunata y profëtakunata Carmelo jirkaman Acab qoritsirqan.
21
Tsaychömi runakunata Elías nirqan: «Qamkuna ¿imayyaqtä ishkay yarpayyuq kayanki? Tayta Dios rasunpa Dios kaykaptinqa payllatana adorayay. Peru Baal Dios kanqanta criyirqa payta adorayay». Tsaynö niptin tsaychö kaykaq runakunaqa imatapis manam parlakuyarqantsu.
22
Tsaymi Elías nirqan: «Noqa japallänam Tayta Diospa profëtan kaykä. Peru Baalpa profëtankunam sïqa chusku pachak pitsqa chunka (450) kaykäyan.
23
Kanan ishkay torïtukunata apaykamur Baalpa profëtankuna juk torïtuta pishtaskir yanta jananman churayätsun. Peru tsay yantaman ninata ama tsaritsiyätsuntsu. Noqapis tsaynöllam jukaq torïtuta pishtaskir yanta jananman churaykur ninata tsaritsishätsu.
24
Tsaypitanam diosnikikunata mañakuyanki. Tsaynöllam noqapis Diosnïta mañakushä. Mayqanpis ninata yantaman tsaritsiq kaqmi rasunpa kaq Dios kanqa». Tsaynö niptinmi runakuna niyarqan: «Taytay, ninqaykinö katsun».
25
Tsaymi Baalpa profëtankunata Elías nirqan: «Atskaq kaykarqa qamkuna puntata mayqan torïtutapis pishtaskir altar jananman churayay. Tsaypita ninata mana tsaritsiyllapa diosnikikunata mañakuyay».
26
Tsaymi paykunaqa juk torïtuta pishtaskir aytsata yanta jananman churaskir wäraypita pullan junaqyaq Baalta mañakur niyarqan: «¡Tayta Baal, mañakuyanqäta wiyaykayällamay!» Tsaynö nir rurayanqan altar lädunkunapa qayararnin saltaykachar tumayaptinpis manam pipis contestamurqantsu.
27
Pullan junaqnam Elíasqa paykunata manakaqman churarnin asipar nirqan: «¡Wiyayäshunaykipä mas jinchipa qayaräyay! ¿Manaku paypis diosnikikuna kaykan? Capaz imallatapis ruraykan. ¿O ishpakurtsurä kaykan? Quizás mayllapapis aywashqa o punukashqapis kaykan. ¡Rikchananpä mas jinchipa qayaräyay!»
28
Tsaynö niptinmi mas jinchipa qayararnin costumbrinkuna kanqannö yawarllana kayanqanyaq cutsillukunawan y espädakunawan roqukuyarqan.
29
Tardi kaq sacrificiuta rupatsiyänan hörayaq löcunö qayaräyaptinpis manam pipis contestarqantsu ni imapis wiyakämurqantsu.
30
Tsaypitanam runakunata Elías nirqan: «Kanan kayman llapaykikuna witiyämuy». Tsaynö niptin puntanman llapan qorikaskiyaptinmi Elías Tayta Diospa altarnin juchushqa kaykaqta allitsar qallaykurqan.
31
Allitsananpämi Jacobpa tsurinkuna chunka ishkay kanqanpita chunka ishkay rumikunata qorirqan. Jacobpa jutin Israel kananpämi kikin Tayta Dios nirqan.
32
Tsay qorinqan rumikunawanmi Tayta Diospa altarninta Elías allitsarqan. Tsaypitam altar ñöpankunapa zanjata rurarqan ishkay chunka (20) litru yaku yaykunanpänö.
33
Altar jananman yantata churaskirnam pishtanqan torïtupa aytsanta cuartizaskir yanta jananman churaykur
34
nirqan: «Chusku uyllu yakuta aytsamanpis yantamanpis wiñayay». Ninqannö wiñayaptinmi «mas yakuta wiñayay» nirqan. Yapay wiñayaptinmi «mastapis tsaynölla wiñayay» nirqan. Tsaynö niptinmi yakuta yapay wiñayarqan.
35
Ninqannö yakuta wiñayaptinmi altarchö kaykaqkunata chipyaq ushmar zanjamanpis juntarqan.
36
Tsaypita sacrificiuta rupatsiyänan höram Tayta Diosta Elías mañakurqan: «Abraham, Isaac y Jacob yärakuyanqan Tayta Dios, kanan junaq runakuna musyayätsun Israel nacionchö poderösu Dios kanqaykita. Tsaynölla musyayätsun profëtayki kar nimanqaykinö llapanta ruraykanqäta.
37
Tayta Dios, poderösu kanqaykita musyayänanpä y qamllamanna yapay yärakayämunanpä mañakunqäta wiyaykallämay».
38
Tsaymi ciëlupita nina urämur ruparqan pishtanqan torïtupa aytsanta, yantata, pirqaraykaq rumikunata y allpatapis. Altar ñöpan zanjachö kaykaq yakutapis chipyaqmi tsakiskatsirqan.
39
Tsayta rikaykurmi runakunaqa lätaykur niyarqan: «¡Elías mañakunqan kaqmi rasunpa kaq Diosqa!»
40
Tsaypitanam Elías nirqan: «Baalpa profëtankuna mana qeshpiyänanpä prësu tsariyay». Tsaynö niptinmi runakuna tsay profëtakunata prësu tsariyarqan. Cisón raqraman apaykurmi llapan tsay profëtakunapa kunkanta Elías roqurqan.
41
Tsaypitanam Acabta Elías nirqan: «Wayikiman kutikuy mikur y upyar kanaykipä. Mangäda qallaykunanpänam kaykan».
42
Elías tsaynö niptinmi Acab aywakurqan mikuq y upuq. Peru Elíasmi sïqa Carmelo jirkaman witsarkur qonqurikuykurqan cäranpis qonqurninman töpanqanyaq.
43
Tsaypitanam sirviqninta Elías nirqan: «Aywar lamar lädupa rikachakamuy». Tsaynö niptinmi sirviqninqa lamar lädupa aywar rikachakurqan. Kutiykurnam nirqan: «Taytay, imapis manam kantsu». Elíasnam sirviqninta yapay nirqan qanchis kuti rikachakamunanpä.
44
Qanchis kutina rikachakamunqanchömi nirqan: «Maki paltanöllam lamarpita pukutay yarqaykämun». Tsaynö niptinmi Elías nirqan: «Aywar Acabta niy manarä tamya qallanqanyaq carrëtaman yarkurkur wayinman ras kutinanpä».
45
Aywar willaykuptinmi carrëtaman ras yarkurkur Jezreelman Acab aywakurqan. Ciëlu pasaypa yanayämuptinmi vientuntin mangäda tamya qallaskirqan.
46
Elíasnam Tayta Dios yanapaptin röpanta chachak wachakakurkur Jezreelman cörrilla aywar Acabpa puntanta charqan.
← Chapter 17
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 19 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22