bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Quechuan
/
Quechuan QXO (Biblia en Quechua del sur de Conchucos)
/
1 Kings 2
1 Kings 2
Quechuan QXO (Biblia en Quechua del sur de Conchucos)
← Chapter 1
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 3 →
1
Wanukunanpäna kanqanta tantiyarmi tsurin Salomónta rey David yätsir nirqan:
2
«Llapan runakunanöllam noqapis atsikyay patsata dëjanäpäna kaykä. Wanukuptïpis mana mantsariypa shumaq mandanki.
3
Tayta Dios mandanqankunata cumplir pay munanqannö imaypis kawanki. Moisés qellqanqan leykunachö ninqannölla estatütunkunata, mandamientunkunata, ninqankunata y mandanqankunata llapanta cumplinki. Tsaynö cumpliptikiqa imayka ruranqaykichöpis y maypa aywaptikipis
4
llapan awnimanqankunatam Tayta Dios yanapashurniki cumplinqa. Awnimarmi nimarqan: «Qampita miraqkuna ninqäkunata cäsumar llapan yarpayninkunawan y llapan shonqunkunawan munanqänö kawarqa imaypis Israel runakunapa mandaqnin reymi kayanqa».
5
Mastam Salomónta rey David nirqan: «Qamqa musyankim Nerpa tsurin capitán Abnerta y Jeterpa tsurin capitán Amasata Sarviapa wamran Joab wanutsiptin wachäkanman y llanqinman yawarnin pillchinqanta. Imayka guërrachönö yawarninta jichar wanutsinqanpitam noqata tumpayäman.
6
Kanan imata ruranaykipäpis shumaq yarpachakuy. Joabtaqa rukuyanqanyaq tranquïlu kawananta ama dëjankitsu.
7
«Peru Galaadpita Barzilaipa tsurinkunata sïqa kuyapar mikuyninkuna qaraykunki. Paykunam mikuyta qarayämarqan wawqiki Absalónpita qeshpiptï.
8
«Tsaynölla Bahurim markapita Benjamín trïbu runa Gerapa tsurin Simeita imanö ushakätsinaykipäpis yarpachakuy. Paymi Mahanaimman qeshpinqä junaq pasaypa manakaqman churamar imaykata qayapämarqan. Tsaynö kaptinpis kutimuptï Jordán mayuman chaskimaq shamuptinmi Tayta Diospa jutinchö jurar mana wanutsinäpä awnirqä.
9
Qamqa payta ama perdonaytsu. Tantiyakuq runa kaykarqa shumaq yarpachakunki imanöpapis wanutsinaykipä».
10
David wanuskiptinnam Davidpa Markan niyanqanman pampayarqan.
11
Puntataqa Hebrón markachömi qanchis wata rey karqan. Tsaypitanam Jerusalénchöpis kimsa chunka kimsa (33) wata rey karqan. Tsaymi Israel runakunapa mandaqnin rey karqan chusku chunka (40) wata.
12
Tsaypitaqa Salomónnam papäninpa trokin rey karqan. Salomón rey kanqan witsan llapan runakunapis allim kawayarqan.
13
Juk junaqmi Haguitpa wamran Adonías Salomónpa maman Betsabéta watukaq aywarqan. Chaykuptinmi Betsabé nirqan: «¿Alli yarpaywanku shamurquyki?» Tsaymi Adonías nirqan: «Awmi».
14
Mastam nirqan: «Mamïta, rugakuqnikim shamurqü». Tsaymi Betsabé nirqan: «¿Imallarä rugakamänaykipä kaykan?»
15
Tsaynö niptinmi Adonías nirqan: «Musyanqaykinöpis llapan Israel runakunam noqa rey kanäpä kanqanta yarpäyarqan. Peru tsaynö kaptinpis Tayta Dios munaptinmi wawqïta churashqa rey kananpä.
16
Kanan yapay rugakulläshayki. Ama ñëgaykamaytsu». Niptinmi Betsabé nirqan: «Allim kanman noqachö imallapis kaptinqa».
17
Adoníasnam nirqan: «Rey Salomónta rugapaykallämay Sunam markapita Abisag jipashwan tätsimänanpä. Qamtaqa awnishunkim».
18
Tsaynö niptinmi Betsabé nirqan: «Allim kanqa. Rey Salmóntam rugakamushä».
19
Tsaypitanam rey Salomónman Betsabé aywarqan Adoníaspa favornin parlananpä. Chaykuptinmi rey Salomónqa shärirkur mamanta respitar chaskirqan. Tsaypitanam trönunman yapay jamarqan. Maman jamananpä juk trönuta apatsimuptinmi derëcha kaq lädunman jamarqan.
20
Tsaymi maman nirqan: «Hïju, rugakuqnikim shamurqü. Ama yaqa kaykullaytsu». Tsaynö niptinmi rey nirqan: «Mamay, imatapis rugakamanqaykitaqa awnishaykim».
21
Mamannam nirqan: «Hïju, Sunam markapita Abisag jipashta wawqiki Adoníasta entregaykuy warmin kananpä».
22
Rey Salomónnam mamanta nirqan: «¿Imanirtä Abisagwan Adoníasta casaratsinäta munanki? Tsaynö mañakamarqa Adonías mayornï kaptin rey kananpä mañakamänallaykinam faltan. Tsaynöllam sacerdöti Abiatar y Sarviapa wamran Joabpis paypa favornin kaykäyan».
23
Tsaynö nirmi Tayta Diospa jutinchö jurarnin rey Salomón nirqan: «Adonías tsaynö mañakushunqaykipita mana wanutsiptïqa Tayta Dios mana kuyapaypa castigamätsun.
24
Tayta Dios awnimanqannöllam rey kanäpä papänï Davidpa trönunman jamatsimashqa. Tsaynö kaptinmi Tayta Diospa jutinchö noqa ordenä Adoníasta kanan wanutsiyänanpä».
25
Tsaynö nirmi jinan höra Joiadapa tsurin Benaíata mandarqan Adoníasta wanutsinanpä. Tsaymi Benaíaqa aywar Adoníasta wanuskatsirqan.
26
Tsaypitanam sacerdöti Abiatarta rey Salomón nirqan: «¡Sänu qarallaykiwan markayki Anatotman aywakuy! Qampis wanutsinäpämi kaykanki. Peru manam wanutsishaykitsu papänï Davidpa puntanta Tayta Diospa babulninta apamunqayki raykur. Tsaynöllam papänïwan juntu pasaypa ñakarpis puriyarquyki».
27
Tsaynöpam Tayta Diosta sirviq sacerdöti kanqanpita Abiatarta Salomón qarqurqan. Tsaynö rurarmi Siluchö Elípa castanpä Tayta Dios ninqanta cumplirqan.
28
Tsaynö ruranqantam Joabtapis willayarqan. Tsaymi paypis mantsarnin qeshpir Tayta Diospa toldunman amparakur tsaychö altarpa waqrankunata tsarikushqa ichiraykarqan. Tsaynö qeshpirqan Absalónpa favornin mana shärirpis Adoníaspa favornin shärishqa karmi.
29
Tsaychö kaykanqanta willayaptinmi rey Salomón Joiadapa tsurin Benaíata mandarqan Joabta tsaychö wanutsinanpä.
30
Tsaymi Tayta Diospa toldunman aywaykur Joabta Benaía nirqan: «Altarpita yarqamunaykipämi rey nishqa». Tsaynö niptinmi Joab nirqan: «¡Kaypitaqa manam imanöpapis yarqushätsu! ¡Kaychömi wanushäpis!» Tsaynö niptinmi reyman kutiykur Benaía willarqan.
31
Willaptinmi rey nirqan: «Tsaynö niptinqa jinallanchö wanuskatsir jukläman apaykur pampay. Tsaynöpam ishkan capitankunata Joab wanutsinqanpita papänïpis noqapis jutsaynaqna kayäshä.
32
Tsaynö wanutsiptikiqa Tayta Diosmi payta juzganqa jutsaynaq capitankunata wanutsinqanpita. Payqa papänïta mana musyatsirmi Nerpa tsurin Abnerta y Jeterpa tsurin Amasata tuksiskirqan. Abner Israel soldädukunapa capitanninmi karqan. Amasanam Judá soldädukunapa capitannin karqan. Ishkankunapis Joabpitaqa mas alli runam kayarqan.
33
Paykunata wanutsinqanpita Joab y paypita miraqkunapis imayyaqpis maldicionashqa kayätsun. Davidpita miraqkunataqa Tayta Dios yanapaykullätsun alli kawar imayyaqpis alli mandayänanpä».
34
Tsaynö niptinmi Benaíaqa aywaykur Joabta wanutsirqan. Tsaypitanam estancianchö kaykaq wayinman apaykur Joabta pampayarqan.
35
Tsaypitanam Joabpa rantin soldädukunapa capitannin kananpä Joiadapa tsurin Benaíata rey Salomón churarqan. Tsaynöllam Abiatarpa rantin sacerdöti kananpä Sadocta churarqan.
36
Tsaypitanam Simeita qayaykatsir nirqan: «Jerusalénchö wayikita ruraykur maypapis mana yarquypa tsayllachö täkunki.
37
Markapita yarqur Cedrón raqrata päsaptikiqa wanutsishqam kanki. Tsaynö wanunaykipä kikikim jutsayuq kanki».
38
Niptinmi Simeiqa reyta nirqan: «Awmi, taytay. Nimanqaykitaqa llapantam cumplishä». Ninqannöllam Simeiqa Jerusalénchö täkurqan.
39
Tsaychö kimsa watana taykaptinmi ishkay sirviqninkuna qeshpir Maacapa tsurin Aquis kaqman aywakuyarqan. Aquisqa Gat markapa mandaqnin reymi karqan. Qeshpiq sirviqninkuna Gatchö kaykäyanqanta musyaskirmi Simeiqa
40
ashnunta karunakurkur Gat markaman sirviqninkunata ashiq aywarqan. Tsaychö tariykurmi Jerusalénman kutitsimurqan.
41
Tsaypitam Salomónta willayarqan Gat markaman aywanqanpita Jerusalénman Simei kutimunqanta.
42
Tsaymi Simeita qayaykatsir Salomón nirqan: «¿Manaku qamta nirqä Jerusalénpita maypapis yarqurqa wanunaykipä kanqanta? Tsaynö niptï ¿manaku Tayta Diospa jutinchö awnimarqayki maypapis mana yarqunaykipä kanqanta?
43
Tsaynö nikämarqa ¿imanirtä cumplirquykitsu Tayta Diospa jutinchö awnimanqaykita? Tsaynölla noqa ninqäta ¿imanirtä cäsumarquykitsu?»
44
Tsaypitanam Simeita rey Salomón nirqan: «Qamqa papänï Davidpa contranmi shärirqayki. Tsaymi kananqa jutsaykipita wanunaykipä Tayta Dios permitishqa.
45
Peru noqapämi sïqa Tayta Dios permitishqa bendicionninta chaskinäpä. Tsaynöllam Davidpita miraqkunata Tayta Dios imaypis yanapanqa rey kar trönunchö jamayänanpä».
46
Tsaypitanam Simeita wanutsinanpä Joiadapa tsurin Benaíata rey Salomón nirqan. Tsaynö niptinmi waqtapa yarquskir jinan höra wanutsirqan. Tsaynöpam rey Salomónqa contrankunapita librina karqan.
← Chapter 1
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 3 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22