bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Quechuan
/
Quechuan QXO (Biblia en Quechua del sur de Conchucos)
/
1 Kings 10
1 Kings 10
Quechuan QXO (Biblia en Quechua del sur de Conchucos)
← Chapter 9
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 11 →
1
Tayta Dios yanapaptin Salomón pasaypa yachaq kanqanta musyarmi Sabá nacionpa mandaqnin warmi aywarqan aja tapukuykunata tapunanpä.
2
Atska sirviqninkunawanmi Jerusalénman charqan mushkuq jachakunata, atska qorita y kuyayllapä cuestaq rumikunata camëllukunaman chaqnashqa. Salomónman chaykurmi llapan yarpanqankunata tapurqan.
3
Tapuyllantam Salomónqa ushaypa ushar llapanta contestarqan. Imata tapunqanpis paypäqa manam ajatsu karqan.
4
Salomón yachaq kanqanta y palaciunta ruratsinqanta rikarmi Sabá nacionpa mandaqnin warmi
5
pasaypa espantashqa quëdarqan. Tsaynöllam espantashqa karqan alli mikuykunata rikar, mandar yanapaqninkunapa cuartunkunata rikar, sirviqninkunata y jatiranqan röpanta rikar, cöpa sirviqninkunata rikar y Tayta Diospä sacrificiukunata templuchö rupatsinqanta rikar.
6
Tsaymi rey Salomónta nirqan: «Llapan ruranqaykita y yachaq kanqaykita nacionnïchö willayämanqanqa rasunpam kanä.
7
Tsaynö willayämaptinpis kikï rikanqäyaq manam criyirqätsu. Peru kananmi sïqa tantiyakü willayämanqanpitapis mas yachaq y imaykayuqpis kanqaykita.
8
Alli yachaynikiwan parlanqaykita wiyar ¡ima kushishqarä mandakur yanapashuqnikikuna y sirvishuqnikikuna kayan!
9
¡ Tayta Diosniki alabashqa kaykullätsun kuyashurniki Israel nacionpa mandaqnin rey kanaykipä churashunqaykipita! Israel runakunata imaypis kuyarmi rïcutapis pobritapis alli rikanaykipä churashurquyki».
10
Tsaypitam Salomónta qararqan kimsa waranqa isqun pachak joqta chunka (3,960) kïlu qorita, atska perfümikunata y kuyayllapä cuestaq atska rumikunatapis. Salomónta atska perfümita qaranqantanöqa manam imaypis Israel nacionman apayämurqantsu.
11
(Tsaynöllam rey Hirampa negociunta apaq büquikunawan Ofir partipita apayämuq atska qorita, sándalo jutiyuq qerukunata y kuyayllapä cuestaq rumikunatapis.
12
Tsay sándalo qerupitam rey Salomón ruratsirqan Tayta Diospa templunpa balconninkunata y palaciupa balconninkunatapis. Tsaynöllam tukaqkuna tukayänanpä arpakunata y salteriukunata ruratsirqan. Manam imaypis Judáman chätsiyarqantsu sándalo qeruta tsaynö atskataqa.)
13
Sabá nacionpa mandaqnin warmitam rey Salomón atska qaraykunata qararqan. Tsay jananmanmi tsay warmi imata mañakunqantapis qararqan. Tsaypitanam mandaq warmiqa nacionninman sirviqninkunawan kutikuyarqan.
14
Salomónqa cada watam chaskiq ishkay chunka ishkay waranqa (22,000) kïlu qorita.
15
Tsay jananmanmi negociantikuna, Arabia nacionpa mandaqnin reykuna y Israel nacionpa gobernadorninkuna pägayanqan impuestutapis chaskiq.
16
Ishkay pachak (200) escüdukunatam rey Salomón qoripita ruratsirqan martilluwan takayllapa. Tsay escüdukunaqa cada ünunmi joqta kïlu pësarqan.
17
Tsaynöllam mas kimsa pachak (300) escüdukunatapis martilluwan takayllapa qoripita ruratsirqan. Tsay escüdukunaqa cada ünunmi juk kïlu pullan pësarqan. Tsaykunataqa Líbano Munti jutiyuq palaciunmanmi churatsirqan.
18
Tsaynöllam trönuntapis marfilpita ruraskatsir qori püruwan enchapatsirqan.
19
Tsay trönum karqan joqta grädayuq, waqtanqa redondu y ishkan lädupa rikrankuna churakunayuq. Trönupa cada lädunchömi ruratsinqan león ichirarqan.
20
Grädakunapa lädunkunachöpis chunka ishkay ruratsinqan leonkunam karqan. Grädakunapa jukaq lädunchömi joqta leonkuna karqan y jukaq lädunchöpis joqta leonkunam karqan. Tsay kuyayllapä trönutanöqa manam mayqan nacionpa mandaqnin reypis ruratsirqantsu.
21
Rey Salomónpa cöpankunapis y Líbano Munti jutiyuq palaciuchö llapan manëjukunapis qoripitam karqan. Tsay palaciuchöqa manam imapis yuraq qellaypitaqa karqantsu. Qellaypita kaqtaqa Salomón rey kanqan witsan manam pipis cäsuyaqtsu.
22
Rey Salomónpa büquinkuna cada kimsa watachö rey Hirampa büquinkunawan Tarsisman juntu kutimurmi qorita, yuraq qellayta, marfilta, mönukunata y pävu realkunatapis apayämuq.
23
Rey Salomónqa maytsay nación reykunapitapis mas imaykayuq y mas yachaqmi karqan.
24
Yachaq kananpä Tayta Dios yanapaptinmi llapan nacionpitapis payman aywayarqan yachatsinqanta wiyayänanpä.
25
Aywarmi yuraq qellaypita y qoripita ruratsiyanqanta Salomónpä apayaq. Tsaynöllam apayaq röpakunata, armakunata, mushkuq jachakunata, caballukunata y mulakunatapis. Cada watam atska qarayta Salomón chaskiq.
26
Salomónmi atska carrëtakunata y caballukunata rantirqan. Tsaynöpam paypa karqan waranqa chusku pachak (1,400) carrëtankuna y chunka ishkay waranqa (12,000) caballunkuna. Tsay caballukunatam wakinta churarqan guërra carrëtakuna kaykäyanqan cuartelkunachö kayänanpä y wakintana churarqan Jerusalén palaciun cercachö kayänanpä.
27
Rey Salomón qoritsinqan yuraq qellaypis ruminörämi Jerusalénchö atska karqan. Tsaynöllam cedrutapis Sefelachö plantatsirqan hïgus muntinörä tsaytsika kananpä.
28
Salomón mandanqan negociantikunam Egiptupita y Ciliciapita caballukunata rantiyämuq.
29
Egiptupita rantiyämunqan juk carrëtam joqta pachak (600) qellay cuestaq y juk caballunam pachak pitsqa chunka (150) qellay cuestaq. Tsay caballukunata y carrëtakunatam wakintaqa rantikuyaq heteo runakunapa mandaqnin reykunata y wakintana Siria runakunapa mandaqnin reykunata.
← Chapter 9
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 11 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22