1 Kings 7 — Quechuan QXO (Biblia en Quechua del sur de Conchucos)

1Tsaynöllam wayikunatapis Salomón shäritsirqan. Tsay wayikunatam chunka kimsa watachö shäritsiyta usharqan.

2Juk wayinpa jutinmi Líbano Munti karqan. Tsay wayinpa largunmi karqan chusku chunka pitsqa (45) metru, anchunna karqan ishkay chunka ishkay metru pullan (22.5), altunnam karqan chunka kimsa metru pullan (13.5). Cedrupita rurashqa vïgakunata chusku fïla paradorkunam tukmararqan.

3Tsay terrädukunam chusku chunka pitsqa (45) karqan. Tsaykunatam paradorkunaman kimsa fïlata churatsirqan. Tsaymi cada fïlachö chunka pitsqa vïgakuna karqan. Tsaypitam cedru tablakunawan terrädu rurinpa entablatsirqan.

4Tsaynöllam kimsa hilëra ventänakunatapis frenti frenti kananpä ruratsirqan. Cada hilërachömi kimsa ventänakuna karqan.

5Llapan punkukunapis y ventänakunapis kimsa fïla frenti frenti cuadrädum karqan.

6Tsaynöllam juk corredortapis paradorkunallawan ruratsirqan. Tsay corredorpa largunmi karqan ishkay chunka ishkay metru pullan (22.5) y anchunna chunka kimsa metru pullan (13.5). Tsay punkupa punku yaykunanchöpis paradorkunallawanmi juk punkuta ruratsirqan.

7Tsaynöllam demanduta arreglananpä despächunta ruratsirqan. Tsay despächunpa paredninkunatapis cedruwanmi entablatsirqan.

8Täkunan palaciutapis despächun niraqllatam ruratsirqan. Tsay palaciuqa patiuyuqmi karqan. Tsaynöllam Faraónpa warmi tsurinwan churakanqan warmipäpis palaciuta patiuyuqta shäritsirqan.

9Llapan tsaykunataqa alli rumikunallawanmi Salomón shäritsirqan cimientupita hasta pared ushanqanyaq y jatun patiuyaq. Tsay rumikuna alli kamakänanpämi tinku tinkuykatsir llapan lädunpa shumaq llaqllayarqan.

10Wayikunapa, corredorpa y despächupa cimientunkunapis jatusaq alli rumikunallawan pirqashqam karqan. Tsay rumikuna wakinqa karqan chusku metru pullan y wakinnam kimsa metru y 60 centïmetru.

11Llapan paredtapis medïdawan midiykurmi llaqllashqa alli rumikunallawan pirqatsirqan. Tsay rumikuna jananmanmi cedru qerukunata churatsirqan.

12Entëru kuchunpa tumaypam jatun patiuta kimsa hilëra rumikunawan y juk hilëra cedru tablakunawan corralatsirqan. Tsay corralatsinqan paredkunaqa templupa ruri kaq patiunta corralatsinqan paredkunanömi karqan. Tsaynöllam templuman yaykuna punkupa paredninkunanö karqan.

13Rey Salomónmi Tiro markachö täraq Hiramta qayatsirqan arupänanpä.

14Hiramqa Neftalí trïbu viüdapa wamranmi karqan. Hirampa papäninmi Tiro markapita bronci fundiyta yachaq karqan. Tsaymi Hiramqa broncipita imatapis shumaq ruraq. Rey Salomón qayatsiptinmi pay kaqman aywaykur rurananpä ninqankunata ushaypa ushar rurarqan.

15Hiramqa ishkay jatusaq paradorkunatam broncipita fundirqan. Tsay paradorkunam karqan puwaq metru largun y tumaypa midiptinna pitsqa metru pullan.

16Tsaynöllam parador jananman churananpäpis broncipita adornukunata rurarqan. Tsay adornukunam ishkay metru juk cuarta altu karqan.

17Cada paradorpa adornunman churananpämi qanchis cadënakunata rurarqan. Tsay cadënakunaqa tukupa ñawinnömi karqan.

18Tsaynöllam paradorkunapa adornunchö warkaränanpä granadïlla frütakunatanö ishkay fïlata rurarqan.

19Paradorkuna jananchö adornukunaqa liriu waytanömi karqan. Tsay adornukunapa tamäñun ishkay metrunömi karqan.

20Tsaynöllam cada adornupa jana puntanchö entëru kuchunpa ishkay pachak (200) granadïllakunatanö ishkay fïlata rurarqan. Tsaykuna cadëna lädunchö kar adornu mas anchu kaq partichömi warkararqan.

21Tsay paradorkunatam templu punkuman ichiykatsir derëcha kaq läduchö kaqta Hiram jutitsirqan Jaquín jutin kananpä y itsuq kaq läduchö kaqtanam jutitsirqan Boaz jutin kananpä.

22Paradorkunapa adornunkunam liriu wayta pashtaykaqnö karqan. Tsaynömi paradorkunata rurar usharqan.

23Tsaynöllam yakuta qoriyänanpä Hiram rurarqan broncipita fundiypa lamar niyanqan jatun redondu lavatoriuta. Tsay lavatoriupa anchunmi chusku metru pullan karqan. Altunnam ishkay metru y ishkay chunka pitsqa 25 centïmetru karqan. Kuchunta tumaypa midiptinmi chunka kimsa metru pullan (13.5) karqan.

24Lavatoriupa shimin jawanpanam ishkay fïla tumaypa broncipita rurashqa calabäsukuna karqan. Cada pullan metruchömi chunka calabäsukuna karqan. Tsay calabäsukunaqa lavatoriuwan juk piëzallam karqan.

25Tsay lavatoriutam chunka ishkay broncipita rurashqa törukuna jananman jamatsirqan. Kimsa törukunam rikaräyarqan rupay yarqamunan kaq lädupa, kimsa rupay ullunan kaq lädupa, kimsa norti kaq lädupa y kimsa sur kaq lädupa. Tsay törukunaqa llapanpis sikipuram ichiräyarqan. Lavatoriunam törukunapa jananchö karqan.

26Tsay lavatoriuqa puwaq centïmetru raktam karqan. Shiminqa liriu wayta pashtaykaqnömi karqan. Tsay lavatoriumanqa chusku chunka chusku waranqa (44,000) litru yakum yaykuq.

27Tsaynöllam chunka carrëtakunata broncipita rurarqan. Carrëtakunapa largun y anchunmi karqan ishkay metru 80 centïmetru y altunnam karqan juk metru 35 centïmetru.

28Tsay carrëtakunata rurananpämi marcuta ruraskir lädunkunapa mantaykunata churarqan.

29Carrëtakunapa chuskun lädunpam leonkunata, törukunata y querubinkunata rurarqan. Tsay törukuna y leonkuna jananpa y jawanpam waytakunata rurarqan.

30Cada carrëtapam chusku ruëdankuna broncipita rurashqa karqan. Ruëdankunapa ëjinkunapis broncipitam karqan. Carrëtakunapa chuskun esquïnanchömi tïnapa chakinkuna karqan. Chakinkunapa lädunkunachömi waytakunata rurarqan.

31Carrëtapa shiminpis imayka coröna rurinchönömi kaykarqan. Tsay corönapitam chusku chunka pitsqa (45) centïmetru päsarqan. Tsaynöllam shiminpis redondu karqan. Carrëtapa altunmi karqan joqta chunka puwaq (68) centïmetru. Shiminchönam tumaypa dibüjukuna karqan. Peru carrëtapa lädunkuna manam redondutsu karqan, sinöqa cuadrädum.

32Chuskun ruëdankunaqa ëjiman sigurashqam karqan. Ëjinkunaqa carrëtawan tsay piëzallam karqan. Cada ruëdapa altunmi 68 centïmetru karqan.

33Ruëdankunapis carrëtapa ruëdannömi ëjiyuq, äruyuq, räyuyuq y cübuyuq karqan. Llapanpis broncipita fundishqam karqan.

34Chuskun esquïnanchö rinrinkunapis tsay piëzallam carrëtawan karqan.

35Carrëtapa jananchö kaq rebëtinqa ishkay chunka ishkay (22) centïmetru altum tumaypa redondu päsarqan. Rebëtinpis cajonninpis tsay piëzallam karqan.

36Tsay cajonpa tablërunkuna jäkuraqninman Hiramqa dibujarqan querubinkunata, leonkunata y palmakunata. Tsaynöllam waytakunatapis tumaypa rurarqan.

37Tsay chunka carrëtakunataqa tsay tamäñullata y tsay niraqllatam fundiypa rurarqan.

38Tsaynöllam broncipita chunka lavatoriukunatapis rurarqan. Cada tïnapa tamäñunmi juk metru mas puwaq chunka (80) centïmetru karqan. Cada tïnamanmi puwaq pachak puwaq chunka (880) litru yaku yaykuq. Tsay lavatoriukunatam carrëtakunata ruratsinqan jananman jamatsirqan.

39Tsaypitam pitsqa carrëtakunata churarqan templupa derëcha kaq lädunman y pitsqa carrëtakunatanam churarqan templupa itsuq kaq lädunman. Tsaynöllam lamar niyanqan jatun lavatoriuta templupa derëcha kaq lädunman churarqan. Llapanpis rupay yarqamunan kaq läduchömi karqan.

40Tsaynöllam Hiram rurarqan mankakunata, tenäzakunata y tazonkunata. Salomón minkakunqannöllam Hiramqa Tayta Diospa templunchö kananpä llapanta rurarqan.

41Tsay ruranqankunam karqan: ishkay paradorkuna, paradorkunapa puntanchö adornunkuna, paradorkunapa cada adornunchö tukupa ñawinnö rurashqa ishkay adornukuna,

42tsay adornupita warkuraq chusku pachak (400) granadïllakuna (tsay granadïllakunatam rurarqan ishkay fïla warkuräyänanpä),

43chunka carrëtakuna, carrëtakunapä chunka lavatoriukuna,

44chunka ishkay törukuna, törukuna jananman jamananpä lamar niyanqan jatun lavatoriu,

45mankakuna, pälakuna y tazonkunapis. Tsay llapantam Hiramqa Tayta Diospa wayinpä rey Salomón ninqannölla broncipita chipipiqtarä rurarqan.

46Räku mituwan moldita ruraykurmi tsaykunata fundirqan Sucot y Saretán markakuna tinkuqchö. Tsayqa Jordán mayu lädun pampachömi karqan.

47Broncipita tsaytsika manëjukunata ruratsirmi ayka broncita gastanqantapis Salomón pësatsirqannatsu.

48Tsaynöllam Tayta Diospa templunman churayänanpä wakin manëjukunatapis Salomón ruratsirqan. Tsay manëjukunam karqan: qoripita altar, tanta churakuna qoripita mësakuna,

49Lugar Santïsimu derëcha kaq läduman churananpä qoripita rurashqa pitsqa candelërukuna, Lugar Santïsimu itsuq kaq läduman churananpä qoripita rurashqa pitsqa candelërukuna, wayta niraq adornukuna, mechërukuna, tenäzakuna,

50cöpakuna, mëchapa lliptanta jipinanpä taksha alicätikuna, tazonkuna, wishllakuna, inciensiu qoshnitsikuna, Lugar Santïsimuman yaykuna punkupa bisagrankuna y templu punkupa bisagrankunapis. Llapan tsaykunaqa qoripita rurashqam karqan.

51Tayta Diospa templunta ruratsiyta ushaskirnam templupa manëjunkunata tsayman churayänanpä Salomón apatsirqan. Tsay manëjukunatam ruratsirqan papänin David Tayta Diospä alistanqan qoripita y qellaypita.