bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Quechuan
/
Quechuan QXO (Biblia en Quechua del sur de Conchucos)
/
1 Kings 20
1 Kings 20
Quechuan QXO (Biblia en Quechua del sur de Conchucos)
← Chapter 19
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 21 →
1
Tsay witsanmi Siria nacionpa mandaqnin rey Ben-adad kimsa chunka ishkay (32) mandaq mayinkunata qorirqan. Tsaypitam soldädunkunawan, caballunkunawan y carrëtankunawan aywar Samaria markata jiruruypa tsapaskir tsaychö täraq runakunata atacayarqan.
2
Manarä atacarmi tsay markaman willakuqkunata mandarqan Israel nacionpa mandaqnin rey Acabta niyänanpä:
3
«Ben-adadmi nin: «Llapan qoriki, qellayniki, warmikikunapis y shumaq kaq tsurikikunapis noqapämi kayanqa».
4
Tsaynö ninqanta willayaptinmi rey Acab nirqan: «Rey Ben-adadman kutiykur niyanki: «Taytay, ninqaykinöllam llapan imaykäkunapis, warmïkunapis y shumaq kaq tsurïkunapis qampä kayanqa». Tsaynö niptinmi willakuqkuna aywaykur Ben-adadta willayarqan.
5
Tsaypitanam tsay willakuq aywaq runakuna yapay kutiykur Acabta niyarqan: «Rey Ben-adadmi nin: «Llapan qorikita, qellaynikita, warmikikunata y tsurikikunata entregamänaykipämi willatsirqä.
6
Tsaynö kaptinpis kananqa manam tsayllatatsu apashä, sinöqa palaciuykichö kaykaqta y mandar yanapashuqniki runakunapa wayinkunachö allin kaqkunatapis apashämi. Tsaymi mandaq soldädukunata waray junaq mandamushä munayanqan kaqta apakayämunanpä».
7
Tsaynö niptinmi Israel mayor runakunata qayaykatsir rey Acab nirqan: «Tsay runaqa niq tumpallam ëllu atacamaynintsikta munaykan. Qorïta, qellaynïta, warmïkunata, tsurïkunata y imaykäkunatapis apananpä nikaptïpis mastarämi munaykan».
8
Tsaynö niptinmi Israel mayor runakuna niyarqan: «Taytay, pay nishunqaykita ama cäsuytsu. Tsaynölla llapan mañayäshunqaykita ama entregaytsu».
9
Tsaynö niptinmi Ben-adad mandanqan runakunata Acab nirqan: «Mandamaqnintsik rey Ben-adadta niyanki: «Puntata mañakunqaykitaqa awnishurquykish. Peru kanan mañakunqaykitash sïqa awnishunkitsu». Tsaynö ninqantam Ben-adadman kutiykur willakuq aywaq runakuna willayarqan.
10
Tsaynö willayaptinmi Ben-adad yapay mandarqan Acabta niyänanpä: «Kananqa llapan Samaria markatam polvuyanqanyaq ushatsishä. Tsaynö mana ushakätsiptïqa diosnïkuna pasaypa castigayämätsun».
11
Tsayta wiyarmi rey Acabpis mandarqan niyänanpä: «Manarä vincimarqa ama alabakuyrätsu».
12
Acab tsaynö ninqantam mandaq mayinkunawan toldunkunachö upyaykaptin Ben-adadta willayarqan. Ninqanta wiyaykurmi mandaq soldädunkunata nirqan: «¡Samaria runakunata ras atacashun!» Tsaynö niptinmi soldädunkuna alistakuyarqan atacayänanpä.
13
Ben-adadpa soldädunkuna manarä atacaptinmi Israel runakunapa mandaqnin rey Acabman juk profëta chaykur nirqan: «Tayta Diosmi nin: «Maytsika soldädukuna shamuptinpis llapanta vinciyänaykipämi makikiman churamushä. Tsaynö rurashä Tayta Dios kanqäta musyanaykipämi».
14
Tsaynö niptinmi profëtata Acab tapurqan: «¿Imanöpatä Tayta Dios makïman churamunqa?» Tsaynö tapuptinmi profëta nirqan: «Tayta Diosmi nin: «Provinciakunapita shamuq capitankunapa soldädunkuna vinciyänanpämi yanapashä». Tsaymi Acab nirqan: «¿Noqakunaku puntata atacayäman o shuyäyämanku Ben-adadpa soldädunkuna puntata atacayämanqanyaq?» Tsaynö niptinmi profëta nirqan: «Qamkunam puntata atacayanki».
15
Tsaypitam Acab yuparqan provinciakunapita shamuq capitankunapa soldädunkunata. Tsay soldädukunam ishkay pachak kimsa chunka ishkay (232) kayarqan. Tsaypitanam wakin Israel soldädukunata yuparqan. Paykunaqa qanchis waranqam (7,000) kayarqan.
16
Pullan junaq kaykaptinnam Israel soldädukuna pelyayänanpä yarquyarqan. Tsay höram kimsa chunka ishkay (32) mandaq mayinkunawan Ben-adad qorikaykur toldunkunachö upyar machashqa kaykäyarqan.
17
Israel soldädukunapa puntantam provinciakunapita shamuq capitankunapa soldädunkuna aywayarqan. Samariapita soldädukuna yarquykäyanqanta willayaptinmi
18
Ben-adad nirqan: «Atacamänantsikpä o mana atacamänantsikpä shayämuptinpis kawaykaqta tsariskir apayämuy».
19
Provinciakunapita shamuq capitankunapa soldädunkuna y wakin Israel soldädukunapis pelyayänanpä listunam aywayarqan.
20
Pelyayta qallaskirmi cada soldädu Siriapita shamuq juk soldäduta wanutsirqan. Mana wanutsiyanqan Siria soldädukuna qeshpir aywakuyaptinmi Israel soldädukuna qatipäyarqan. Peru Siriapa mandaqnin rey Ben-adad y wakin kaq soldädukunam sïqa caballunkunata muntakurkur qeshpir aywakuyarqan.
21
Tsaynöpam Israel nacionpa mandaqnin rey Acab vinciskir Siria soldädukunapa caballunkunata y guërraman aywayänanpä kaq carrëtankunata qechurqan.
22
Tsaypitanam rey Acabta profëta nirqan: «Watan kaynö witsanmi atacayäshunaykipä Siria soldädukuna yapay kutiyämunqa. Tsaynö kaptinqa shumaq yarpachakuskir soldäduykikunata alistakatsiy pelyayänanpä».
23
Tsaypitanam Siria nacionpa mandaqnin rey Ben-adadta capitanninkuna niyarqan: «Israel runakunapa diosninkunaqa jallqakunallachö yanapaptinmi guërrachö vincimarquntsik. Peru pampaman apanakuykur pelyarmi sïqa vincishun.
24
Pelyamanqa reykuna amana aywayätsunnatsu, sinöqa capitankunallana soldädunkunawan aywayätsun.
25
Puntata alistakunqantsiknölla kananpis shumaq alistakushun caballukunata, carrëtakunata y soldädukunatapis. Pampaman apanakuykur Israel runakunawan pelyarqa mana mayayllam vincirishun». Tsaynö nir yätsiyaptinmi Ben-adadqa paykuna niyanqannölla alistakurqan.
26
Tsaypita juk wata päsaskiptinnam Ben-adadqa llapan soldädunkunata qoritsir Afecman aywayarqan Israel soldädukunawan pelyayänanpä.
27
Tsaynöllam Acabpis Israel soldädukunata qoriskir Siria soldädukunawan pelyayänanpä aywarqan. Siria soldädukunaqa ishniyparämi atska kayarqan. Peru Israel soldädukunam sïqa ishkay kuncha cabranölla kayarqan.
28
Manarä pelyayaptinmi rey Acabman chaykur profëta nirqan: «Tayta Diosmi nin: «Siria soldädukunaqa yarpäyan jallqakunallachö qamkunata yanapanqätam. Tsaynö yarpaykäyaptinmi kananqa pampachöpis paykunata vinciyänaykipä yanapayäshayki. Tsaynöpam musyayanki Tayta Dios kanqäta».
29
Siria soldädukuna y Israel soldädukunaqa joqta junaqmi frenti frenti campamentunkunachö kayarqan. Qanchis kaq junaqchönam pelyar qallaykuyarqan. Tsay junaqmi chakillapa aywaq pachak waranqa (100,000) Siria soldädukunata Israel soldädukuna wanutsiyarqan.
30
Tsaymi wakin kaq soldädukuna Afec markaman qeshpir aywakuyarqan. Tsaychö kaykäyaptinmi markapa murällan juchur ishkay chunka qanchis waranqa (27,000) Siria soldädukunata wanutsirqan. Ben-adadpis tsay markaman qeshpiskirmi wayin wayin pakakur purirqan.
31
Tsaynö pakakur puriykaptinmi soldädunkunapa mandaqninkuna payta niyarqan: «Israel nacionpa mandaqnin reykunaqa kuyapäkuqshi kayan. Tsaynö kaykaptinqa lütu röpakunata jatikurkur y waskata kunkantsikman watakurkur Israel runakunapa mandaqnin reyman aywashun. Tsaynö kaykaqta rikamarnintsikqa quizás perdonaykämäshunpis».
32
Tsaynö willanakuskirmi lütu röpata jatikurkur y waskata kunkakunaman wallqakurkur Israel runakunapa mandaqnin reyman aywayarqan. Chaykurmi niyarqan: «Tayta Acab, rey Ben-adadmi rugashurniki mandayämashqa mana wanutsinaykipä». Tsaynö niyaptinmi rey Acab nirqan: «¡Allaw! ¿Kawaykanräku? ¡Payqa imayka wawqïnömi!»
33
Tsaynö niptinmi aywaqkuna Ben-adadta mana wanutsinanpä kanqanta musyayarqan. Tsaymi ras niyarqan: «¡Ben-adadqa rasunpa wawqikinömi!» Tsaynö niptinmi Acab nirqan: «Ben-adadta pushayämunaykipä ras aywayay». Chaykuptinmi Ben-adadta guërra carrëtaman Acab yarkatsirqan.
34
Tsaychömi Acabta Ben-adad nirqan: «Papänikita papänï qechunqan markakunata kutiykatsishayki. Qampis Damascuchö ima negociutapis churay Samariachö papänï negociunta churanqannö». Tsaynö niptinmi Acab nirqan: «Tsaynö kananpä kaptinqa libri kutikunaykipä dëjashayki». Pactuta Ben-adadwan tsaynö ruraskirmi kutikunanpä dëjarqan.
35
Tsaypitanam profëta mayinta juk profëta nirqan: «Tayta Diosmi munan maqamänaykita. Tsaynö kaptinqa mana kuyapaypa maqamay». Peru profëta mayinqa manam maqayta munarqantsu.
36
Maqayta mana munaptinmi tsay profëta nirqan: «Tayta Dios ninqanta mana cäsunqaykipitam kaypita aywaykaptiki juk león wanutsishunki». Profëta ninqannöllam juk león yuripaykur wanuskatsirqan.
37
Tsaypitanam tsay profëta juk runawan tinkurqan. Profëta mayinta mañakunqannöllam tsay runatapis maqananpä mañakurqan. Tsaynö mañakuptinmi yawartapis pükatsiypa maqaskirqan.
38
Tsaynö maqaskiptinmi tsay profëta ñawinta tsapakurqan pipis mana reqinanpä. Tsaypitam rey Acabta nänichö shuyararqan.
39
Tsaypa rey Acabta päsaykaptinmi profëta jinchipa nirqan: «Taytay, guërramanmi aywarqü. Tsaychömi juk soldädu prësuta cuidanäpä entregamarqan. Entregamarmi nimarqan: «Tsay prësu qeshpiptinqa kikikim wanunki. Wanuyta mana munarqa kimsa waranqa (3,000) qellaytam pägakunki».
40
Tsaynö kaptinpis ruraynïkunachö ocupädu kakunqäyaqmi tsay prësu qeshpir aywakushqa». Tsaynö niptinmi rey Acab nirqan: «Qamtaqa shimikim condenashurquyki».
41
Tsaynö niptinmi ñawin tsaparaykaqta jipiskiptin rey Acab reqirqan profëta kanqanta.
42
Tsaymi profëta nirqan: «Tayta Diosmi nin: «Wanutsinaykipä makikiman Ben-adadta churaykämuptï dëjanqaykipitam kananqa paypa rantin kikiki wanunki. Tsaynöllam paypa soldädunkunata wanutsiyänanpa rantin qampa soldäduykikunatana wanutsiyanqa».
43
Profëta tsaynö niptinmi rey Acabqa pasaypa llakikurnin y rabyashqa Samaria markachö kaykaq palaciunman kutikurqan.
← Chapter 19
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 21 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22