bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Quechuan
/
Quechuan QXO (Biblia en Quechua del sur de Conchucos)
/
1 Kings 11
1 Kings 11
Quechuan QXO (Biblia en Quechua del sur de Conchucos)
← Chapter 10
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 12 →
1
Salomónqa atska jäpa warmikunata kuyarmi warmin kananpä ashirqan. Manam Faraónpa tsurillantsu warmin karqan, sinöqa warminkuna karqan Moab nacionpita, Amón nacionpita, Edom nacionpita, Sidón markapita y heteo runakunapitapis.
2
Jäpa warmikunawan Israel runakuna churakäyänanta mana munarmi Tayta Dios nishqa karqan: «Juklä nación warmikunawanqa ama churakäyankitsu ni paykunapis qamkunawan ama churakäyätsuntsu. Tsay warmikunawan churakäyaptikiqa diosninkunatam adoratsiyäshunki». Tsaynö nikaptinpis Salomónqa mana cäsukurmi tsay warmikunawan churakarqan.
3
Salomónpa warminkuna qanchis pachakmi (700) kayarqan. Tsaynöllam concubïna warminkunapis kimsa pachak (300) kayarqan. Tsay warmikunam ïdulukunata adorar Salomónta jutsaman ishkitsiyarqan.
4
Tsaymi Salomónqa rukuyayninchörä warminkunata cäsur ïdulukunatana adorarqan. Manam papänin Davidnötsu Tayta Diosllaman yärakur kawarqan.
5
Tsaymi Salomónqa adorarqan Sidón runakuna adorayanqan Astoret diösata y amonita runakuna adorayanqan melanaypä Milcom diosta.
6
Tsaynö rurar Salomónqa manam papänin Davidnötsu llapan shonqunwan Tayta Diosta cäsur kawarqan, sinöqa Tayta Dios mana munanqantam rurarqan.
7
Tsaymi Jerusalén markapa tsimpan jirkanchö moabita runakuna adorayanqan melanaypä Quemos diospä altarta shäritsirqan. Tsaynöllam altarta shäritsirqan amonita runakuna adorayanqan melanaypä Moloc diospäpis.
8
Tsaynöllam jäpa warminkuna adorayanqan dioskunapä altarta Salomón ruratsirqan. Tsay altarkunachömi tsay warmikuna diosninkunapä inciensiutapis sacrificiukunatapis rupatsiyaq.
9
Mana cäsukur juk dioskunata Salomón adoranqanpitam Tayta Dios pasaypa rabyakurqan. Salomón tsaynö rurarqan Israel runakunata kuyaq Tayta Dios ishkay kuti yuripuykaptinmi.
10
Payta yuripuykurmi Tayta Dios nirqan juk dioskunata imaypis mana adorananpä. Tsaynö nikaptinpis Salomón mana cäsuptinmi
11
Tayta Dios nirqan: «Pactu ruranqäta manam cumplirquykitsu y leynïkunata manam cäsurquykitsu. Tsaynö kanqaykipitam qampita miraqkuna wakin Israel runakunapa mandaqnin rey kayanqanatsu. Tsaypa rantinqa juk sirvishuqnikinam rey kanqa.
12
Tsaynö kaptinpis papäniki Davidta kuyarmi kawanqaykiyaqqa tsay sirvishuqnikita churashärätsu, sinöqa tsuriki rey kaykaptinrämi pullan Israel nacionta poderninpita qechushä.
13
Imanö kaptinpis sirvimaqnï David raykur y akranqä Jerusalén raykur juk trïbutaqa jaqishärämi tsuriki mandananpä».
14
Tsaypitanam edomita runa Hadadpa yarpayninman Tayta Dios churarqan Salomónpa contran shärinanpä. Hadadqa Edom nacionpa mandaqnin rey castam karqan.
15
Salomón manarä rey kaptinmi rey David aywar Edom nación runakunawan pelyayarqan. Tsaypitam Israel soldädukunapa capitannin Joab aywarqan pelyachö wanuq Israel soldädukunata pampananpä. Tsaychö kaykarmi Edom nacionchö llapan ollqu kaqkunata wanutsirqan.
16
Tsaynö wanutsinqanyaqmi Israel soldädukunawan Joab joqta killa Edomchö täkurqan.
17
Tsay witsanqa wamrallarämi Hadad kaykarqan. Edomita runa mayinkunata Joab wanutsinqanta musyaskirmi papäninpa yanapaqninkunawan Egiptuman qeshpir aywakuyarqan.
18
Madián nacionchö kaykäyanqanpita Egiptuman aywakurmi Parán partiman chäyarqan. Tsaypitanam mas runakuna paykunawan aywayarqan. Tsaymi paykunawan aywar Egiptuman chaykur rey Faraón kaqman aywayarqan. Tsaynö chaykuyaptinmi Faraónqa wayikunata y chakrakunata rikatsirqan tsaychö täyänanpä. Tsaynöllam mikuytapis alistaparqan.
19
Hadadwan Faraónqa amïgü karmi alläpa yachanänakuyarqan. Tsaymi Faraónqa warmin reina Tahpenespa ñañanwan Hadadta casaratsirqan.
20
Tsaychömi Hadadpa tsurin Genubat yurirqan. Paytam Faraónpa palaciunchö Tahpenes wätakurqan kikinpa wamrankunatawan juntu.
21
Rey David y soldädunkunapa capitannin Joabpis wanunqanta musyaskirmi Faraónta Hadad nirqan: «Taytay, markäman kutikushäna».
22
Tsaynö niptinmi Faraón nirqan: «¿Imanirtä markaykiman kutikuyta munaykanki? ¿Imatä kaychö faltäshunki?» Tsaynö niptinmi Hadad nirqan: «Taytay, manam imapis faltämantsu. Imanö kaptinpis markäpam kutikuyta munaykä».
23
Tsaynöllam Eliadapa tsurin Rezónpa yarpayninman Tayta Dios churarqan Salomónpa contran shärinanpä. Puntataqa Soba markapa mandaqnin rey Hadad-ezerpa sirviqnillanmi Rezón karqan. Sirviq kaykanqanpita qeshpiskirmi
24
asaltantikunawan qorikar paykunapa cabecïllan karqan. Hadad-ezerta rey David vinciskiptinmi Rezón y paywan puriq runakuna Damascuman qeshpir aywakuyarqan. Damascuchönam runakuna payta churayarqan rey kananpä.
25
Tsaynöpam Siria nacionpa mandaqnin rey kayta qallaykurqan. Israel runakunapa contran Hadad kanqannömi Salomón wanunqanyaq Rezónpis Israel runakunata chikir contran karqan.
26
Tsaynöllam Salomónpa contran sirviqnin Jeroboampis shärirqan. Paypa papäninmi Nabat karqan y mamanmi Zerúa. Zerúaqa viüdam karqan. Paykunaqa Efraínchö Sereda markapitam kayarqan.
27
Kaychömi qellqashqa kaykan Salomónpa contran imanö Jeroboam shärinqanpis. Rey Salomónqa papänin Davidpa Markanchömi Milo patak niyanqan pirqata y marka murälla kichakashqatapis allitsatsirqan.
28
Jeroboam kallpasapa allish chölu y habilösu kanqanta Salomón tantiyarmi Josépita miraq runakunapa capataznin kananpä churarqan.
29
Juk kutim Jerusalénpita Jeroboam yarquskir Silupita profëta Ahías mushuq tünican jatishqa aywaykaqwan nänichö tinkurqan. Tsay höraqa manam pipis karqantsu.
30
Tsaychömi Ahíasqa jatiraykanqan mushuq tünicanta chunka ishkay pedäzuman rachiskir
31
chunka pedäzuta Jeroboamta entregar nirqan: «Yärakunqantsik Tayta Diosmi nin: «Salomónpa poderninpita qechuskirmi chunka trïbuta entregashayki mandaqnin rey kanaykipä.
32
Sirvimaqnï David raykur y Israel markakunapita akranqä Jerusalén marka raykurmi Salomónta dëjapaykushä juk trïbullatana mandananpä.
33
Tsaynömi rurashä Salomón manana cäsumar Sidón runakuna adorayanqan Astoret diösata, moabita runakuna adorayanqan Quemos diosta y amonita runakuna adorayanqan Moloc diosta adoranqanpita. Payqa manam papänin Davidnötsu mandamientükunata, leynïkunata y ninqäkunata cäsushqa.
34
«Tsaynö kaptinpis sirvimänanpä akranqä David mandamientükunata y leynïkunata cäsur kawanqanpitam Salomón kawanqanyaqqa llapan trïbu runakunapa mandaqnin kanqa.
35
Tsurin rey yaykuskiptinmi sïqa chunka trïbu Israel runakunata qechuskir qamta entregashayki rey kanaykipä.
36
Salomónpa tsurintaqa dëjapaykushä juk trïbullatanam mandananpä. Tsaynöpam sirvimaqnï Davidpita miraqkuna Jerusalénchö mandayta sïguiyanqa. Jerusalén markatam akrarqü imayyaqpis tsaychö adorayämänanpä.
37
«Qamtaqa churashayki Israel runakunapa mandaqnin rey kanaykipämi. Tsaymi shonquyki yarpanqannö mandar kushikunki.
38
Sirvimaqnï rey David cäsumanqannö qampis mandamientükunata y leynïkunata cumpliptikiqa Davidta yanapanqänöllam yanapashayki. Rey kanaykipä qamta churanqänöllam qampita miraqkunatapis churashä Israel runakunapa mandaqnin rey kayänanpä.
39
Davidpita miraqkunataqa mana cäsuyämanqanpita castigarpis manam cada vezllaqa castigashätsu».
40
Profëta Ahías tsaynö willanqanta musyarmi Jeroboamta Salomón wanutsiyta munarqan. Tsaymi Jeroboamqa Egiptupa mandaqnin Sisacman qeshpir Salomón wanunqanyaq tsaychö tarqan.
41
Rey Salomón ruranqankuna y yachaq kanqanmi Salomónpa vïdanta qellqayanqan libruchö qellqashqa kaykan.
42
Chusku chunka (40) watam Israel runakunata Jerusalénpita Salomón mandarqan.
43
Wanuskiptinmi papänin Davidpa Markanman pampayarqan. Salomónpa trokinnam tsurin Roboamna rey karqan.
← Chapter 10
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 12 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22