bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Quechuan
/
Quechuan QXO (Biblia en Quechua del sur de Conchucos)
/
Deuteronomy 1
Deuteronomy 1
Quechuan QXO (Biblia en Quechua del sur de Conchucos)
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 32
Chapter 33
Chapter 34
Chapter 2 →
1
Kay libruchömi Israel runakunata Moisés ninqankuna qellqashqa kaykan. Tsay witsanmi Israel runakuna Jordán mayu tsimpan rupay yarqamunan kaq lädu desiertuchö kaykäyarqan. Tsayqa Zuf tsimpan Arabá pampachömi karqan. Tsay witsanmi Parán, Tofel, Labán, Hazerot y Dizahab markakuna karqan.
2
Seir jallqakunapa aywaq nänipa aywarmi Horeb jirkapita Cades-barneaman chunka juk junaqta chäyaq.
3
Egiptupita yarqayämunqanpita chusku chunka (40) wata päsaskiptinmi chunka killa qallaykunan junaqchö Tayta Dios ninqankunata Israel mayinkunata Moisés willarqan.
4
Tsay witsanmi amorreo runakunapa mandaqnin rey Sehónta Israel runakuna vincishqana kayarqan. Sehónqa Hesbón markachömi täkurqan. Tsaynöllam Israel runakuna Basán nacionchö täraq runakunapa mandaqnin rey Ogta vincishqana kayarqan. Payqa Astarotchö y Edrei markachömi täkurqan.
5
Jordán mayu tsimpan rupay yarqamunan lädu Moab pampachö kaykarmi Israel mayinkunata Moisés nirqan:
6
«Horebchö kaykashqam Tayta Diosnintsik nimarqantsik: «Qamkunaqa atska killanam kay jirkachö täyarquyki.
7
Kananqa imaykaykikunatapis apakurkur amorreo runakuna y cananeo runakuna taykäyanqan kaqman aywayay. Yaykuyay Arabá pampaman, jallqakunaman, Sefelaman, Neguevman y lamar kuchunchö pampakunamanpis. Tsaynöpam Líbanuyaq y Éufrates mayuyaq yaykuyanki.
8
Tsaychö täyänaykipämi llapan tsay partikunata qamkunata entregarqü. Kananqa tsayman yaykur herenciata chaskiyay. Tsay partikuna qamkunapa kananpämi noqa Tayta Diosniki awnirqä Abrahamta, Isaacta, Jacobta y paypita miraqkunatapis».
9
Tsaypita mastam Moisés nirqan: «Horebchö kaykashqam qamkunata nirqä: «Japalläqa manam llapaykipa problëmaykikunata arreglayta puëdïtsu.
10
Tayta Diosnintsikmi qamkunataqa bendisayäshurquyki atskaman mirayänaykipä. Tsaymi kananqa qoyllurkunanö tsaytsika kaykäyanki.
11
Abraham, Isaac y Jacob criyikuyanqan Tayta Dios awnimanqantsiknö bendisaykuyälläshuy kanan kayanqaykipita waranqa (1,000) kuti masman mirayänaykipä.
12
Tsaynö tsaytsika kar rimanakuskir demandanakuyaptiki japalläqa manam arreglayta puëdïtsu.
13
Tsaymi cada trïbupita akrayanki shumaq yachaq, tantiyakuq y yarpayyuq runakunata. Paykunatam quejakuyanqaykita arreglayäshunaykipä churashä».
14
«Tsaynö niptïmi niyämarqayki yarpanqäkuna alli kanqanta.
15
Tsaymi cada trïbupita churarqä yachaq, tantiyakuq y yarpayyuq runakunata jueznikikuna kayänanpä. Wakintam churarqä juk waranqa (1,000) runakunata juzgayänanpä, wakinta churarqä pachak (100) runakunata juzgayänanpä, wakintam churarqä pitsqa chunka (50) runakunata juzgayänanpä y wakintanam churarqä chunka runakunata juzgayänanpä. Wakintanam churarqä cada trïbupa jueznin kananpä.
16
«Paykunatam nirqä: «Quejakayämuptin Israel mayikikuna o jäpa runakuna kaptinpis pipapis jananpa mana shäriypa llapantapis iwal arreglayanki.
17
Mayqanpis jutsayuq kaptinqa rïcu o pobri kaptinpis janan ama shäriyankitsu. Alli arreglayänaykipä Tayta Dios yanapaykäyäshuptikiqa pitapis ama mantsayankitsu. Arreglayta mana puëdiyanqayki kaqtam sïqa noqa arreglanäpä päsatsiyämunki».
18
«Tsay witsanmi llapaykita shumaq tantiyatsirqä imanö juzgayänaykipäpis.
19
«Tayta Diosnintsik nimanqantsikta cäsurmi Horebpita amorreo runakuna täyanqan jallqakunaman shamurqantsik. Espantaypä desiertukunapa päsamurmi Cades-barneaman chämurqantsik.
20
Tsaychömi nirqä: «Kananqa chämurquntsiknam amorreo runakuna taykäyanqan jallqakunaman. Kay jirkakunatam Tayta Diosnintsik entregamäshun.
21
Unay castantsikkuna criyikuyanqan Tayta Diosmi nimarqantsik kay jirkakunaman yaykur herenciata tsarinantsikpä kanqanta. Tsaynö kaykaptinqa mana qelanaypa pitapis mana mantsaypa tsay jirkakunaman yaykuyay».
22
«Tsaynö niptïmi niyämarqayki: «Tsaychö imanö kanqantapis musyanantsikpä rikapakuqkunata mandashun. Paykuna kutimurmi willamäshun may nänipa aywanantsikpä y may markakunaman yaykunantsikpä kanqantapis».
23
«Tsaynö niyämaptikim chunka ishkay runakunata cada trïbupita jukta akrarqä.
24
Paykuna jallqakunapa aywarmi Escol pampaman chäyarqan. Tsaychömi entërupa rikapakur puriyämurqan.
25
Kutimurmi tsay markakunachö wayunqankunata chätsimur willamarqantsik Tayta Diosnintsik entregamänantsikpä kaq markakuna alli kanqanta.
26
«Peru tsaynö willamashqapis Tayta Diosnintsik ninqanta mana cäsurmi tsay markakunaman yaykuyta munayarqaykitsu.
27
Tsaypa rantinqa tolduykikunachö parlarmi niyarqayki: «Tayta Dios rikaytapis mana munamarnintsikmi Egiptupita jipimarquntsik amorreo runakunawan ushakätsimänantsikpä.
28
Kananqa ¿mayparä aywashun? Rikapakuqkuna kutimurmi willamarquntsik tsay markakunachö täraq runakuna noqantsikpita mas jatusaq y kallpasapa kayanqanta y markankunapis altuyaq murallashqa kanqanta. Tsaynöllam willamarquntsik Anacpita miraq jatusaq runakuna tsaychö kayanqanta. Tsaynö willamarnintsikmi pasaypa qelanätsimarquntsik».
29
«Tsaymi noqa nirqä: «Ama llakikuyaytsu ni mantsariyaytsu.
30
Tayta Diosnintsikmi puntantsikta aywar favornintsik pelyanqa. Tsaymi Egiptupita yarqamunantsikpä yanapamanqantsiknölla kananpis yanapamäshun.
31
Juk runa tsurinta marqakurkur apaqnömi desiertupapis Tayta Dios kayyaq chätsimarquntsik. Kikintsikmi rikarquntsik maypa shamunantsikpä Tayta Dios pushamanqantsiktapis».
32
«Tsaynö niptïpis qamkunaqa Tayta Diosnintsikman manam criyiyarqaykitsu.
33
Paymi puntantsikta aywar maypa chänantsikpä y maychö campamentuta ruranantsikpäpis tantiyatsimarqantsik. Paqaspa nina lunyaykaqwan y junaqpana pukutaywan maypa shamunantsikpäpis pushamarqantsik.
34
«Contran parlayanqaykita wiyarmi Tayta Dios pasaypa rabyar nimarqantsik:
35
«Abrahamta, Isaacta y Jacobta awninqä alli nacionmanqa manam ni jukllayllapis yaykuyankitsu.
36
Ninqäkunata cäsunqanpitam Jefonipa tsurin Caleblla rikapakamunqan chakrakunaman yaykunqa. Payta y paypita miraqkunatam tsay chakrakunata entregashä».
37
«Qamkuna rabyanätsiyanqaykipitam Tayta Dios rabyarnin noqatapis nimarqan: «Qampis manam tsay nacionman yaykunkitsu.
38
Peru Nunpa tsurin sirvishuqniki Josuémi sïqa yaykunqa. Tsaynö kaptinqa payta shumaq animatsiy tsay nacionman yaykur llapan trïbu Israel runakunata herenciankuna rakipunanpä.
39
Israel mayikikunam yarpaykäyan tsay nacionman yaykuyaptin warminkunatawan tsurinkunata tsaychö täraq runakuna apakuyänanpä kanqanta. Tsaynö yarpäyaptinpis tsurinkunatarämi tsay nacionpa duëñun kayänanpä entregashä.
40
Qamkunaqa Puka Lamarman aywaq nänipa tsunyaqman kutikuyay».
41
«Tayta Dios tsaynö niptinmi niyämarqayki: «Tayta Diosta rabyatsirmi jutsata rurayarqü. Pay ninqannömi kananqa pelyaq juklla aywayäshä». Tsaynö nirmi fácil vinciy kanqanta yarpar armaykikunata aptakurkur jallqakunapa pelyaq witsäyarqayki.
42
«Tsaymi Tayta Dios nimarqan willanäpä: «Pelyanaykipä manam qamkunata yanapayäshaykitsu. Aywayaptikiqa tsaychö täraqkunam ushakätsiyäshunki. Tsaynö kaptinqa pelyaq ama aywayaytsu».
43
«Tayta Dios tsaynö ninqanta willaptïpis mana cäsuyämarmi runa tukurnin jallqakunapa pelyaq aywayarqayki.
44
Jallqakunaman chäyaptikim tsaychö täraq amorreo runakuna vinciyäshurniki avispakunanö qatikachäyäshurqayki. Tsaymi Israel mayintsikkunata wanutsiyarqan Seirpita Horma markayaq.
45
Kutiykamur Tayta Diospa puntanchö waqar llakikuyaptikipis manam wiyashurqaykitsu ni cäsuyäshurqaykitsu.
46
Tsaynöpam Cades partillachö unayyaq täkurqantsik.
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 32
Chapter 33
Chapter 34
Chapter 2 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25
26
27
28
29
30
31
32
33
34