bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Quechuan
/
Quechuan QXO (Biblia en Quechua del sur de Conchucos)
/
Deuteronomy 11
Deuteronomy 11
Quechuan QXO (Biblia en Quechua del sur de Conchucos)
← Chapter 10
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 32
Chapter 33
Chapter 34
Chapter 12 →
1
Tsaypita mastam Moisés nirqan: «Tayta Diosta kuyar yachatsikuyninkunata, estatütunkunata, leyninkunata y mandamientunkunata imaypis cumpliyay.
2
Kanan junaq yarpäyay Tayta Diosnintsik castigakuq y poderösu kanqanta. Manam tsurikikunatsu tsayta rikayarqan, sinöqa kikikikunam.
3
Manam tsurikikunatsu rikayarqan Faraónta y Egiptuchö täraq runakunata Tayta Dios poderninwan castiganqanta, sinöqa kikikikunam.
4
Tsaynöllam tsurikikunatsu rikayarqan Egipto soldädukunata, caballunkunata y carrëtankunatapis Tayta Dios Puka Lamarchö ushakätsinqanta, sinöqa kikikikunam.
5
Yarpäyay desiertupa päsayämuptiki kayman chäyämunqaykiyaq Tayta Dios imanö yanapashunqaykita.
6
Tsaynölla yarpäyay runakuna rikaykaptin Rubén trïbu Eliabpa tsurinkuna Datánta y Abiramta Tayta Dios castiganqanta. Paykunata castigarmi llapan castankunata, toldunkunata y imaykankunatapis patsata kichakaskatsir ultaskirqan.
7
Kikikikunam rikayarqayki poderninwan Tayta Dios tsaynö ruranqankunata.
8
«Tsaykunata rikashqa kaykarqa kanan willanqä llapan mandamientukunata cumpliyay. Llapanta cumplirqa Canaánman yaykuyaptiki kallpaykikunapis kanqam tsaychö täraq runakunata ushakätsiyänaykipä.
9
Tsaynöllam rukuyanqaykiyaq tsaychö kushishqa kawayanki. Tsaychö kawayänaykipämi Abrahamta, Isaacta y Jacobta Tayta Dios awnirqan. Tsaychöqa lichipis abëjapa mishkinpis yakunörämi atska kaykan.
10
«Täyänaykipä kaykaqchöqa chakra manam Egiptuchö täyanqayki chakranötsu. Egiptuchöqa muruykurpis huertata rëgaqnömi rëgayarqayki.
11
Peru yaykuyänaykipä kaykaq partichöqa imaypis tamyaptinmi jallqakuna y raqrakuna kuyayllapä kaykan.
12
Tsay chakrakunataqa tamya tiempuchöpis usya tiempuchöpis kikin Tayta Diosmi mana qonqaypa rikaykan.
13
«Kanan junaq willanqä mandamientukunata cumplir Tayta Diosnintsikta kuyayaptiki y llapan shonquykikunawan y voluntänikiwan payta sirviyaptikiqa
14
punta tamyata y qepa tamyatapis tiempullanchömi tamyatsimunqa. Tsaymi trïgupis, vïnupis ni aceitipis faltäyäshunkitsu.
15
Qewakunapis entëru jallqakunachö lloqlluypa lloqllurrämi ashmaykikunapä kanqa. Tsaynöllam mikuyänaykipäpis mikuy faltäyäshunkitsu.
16
«Peru cuidädutä pipis engañayäshuptiki Tayta Diosta qonqaykur juk dioskunata adorayankiman.
17
Juk dioskunata adorayaptikiqa Tayta Dios pasaypa rabyar mana tamyatsimuptinmi murukuyanqaykikunapis wayunqatsu. Tayta Dios entregayäshunqayki nacionchö tärarpis llapaykim wanuyanki.
18
«Tsaymi llapan willanqä mandamientukunata shonquykikunachö imaypis yarparäyanki. Mana qonqayänaykipä tsay mandamientukunata qellqaykur rikraykikunaman y urkuykikunamanpis watakuyay.
19
Tsurikikunata mana qonqaypa yachatsiyanki wayikikunachöpis, nänikunachöpis, punukurpis y shärikurpis.
20
Tsaynölla qellqayanki wayi punkupa marcunkunaman y marka yaykuna punkukunamanpis.
21
Tsaynöpam unay castantsikkunata Tayta Dios awninqan nacionchö qamkuna y tsurikikuna kay patsapis ciëlupis ushakänanyaq atska wata kushishqa kawayanki.
22
«Kanan junaq willanqä mandamientukunata cumpliyaptiki, Tayta Diosnintsikta kuyayaptiki y pay munanqannö kawayaptikiqa
23
Tayta Diosmi yanapayäshunki Canaánman yaykur tsaychö täraq runakunata ushakätsiyänaykipä. Tsaynö ushakätsiyanki qamkunapita mas atskaq y mas poderyuq kayaptinpis.
24
Tsaymi Canaánchö mayqan markaman yaykuyanqaykipis qamkunapäna kanqa. Lindëruykipis desiertupita Líbano nacionyaq y Éufrates mayupita Mediterráneo Lamaryaq kanqa.
25
Maypa chäyaptikipis Tayta Diosnintsik awninqannö yanapayäshuptikim runakuna mantsayäshurniki pärapuyäshunkitsu.
26
«Bendicionta o maldicionta karpis qamkuna kanan akrayay.
27
Tayta Diosnintsikpa mandamientunkunata kanan junaq willanqäta cäsurqa bendiciontam chaskiyanki.
28
Peru Tayta Diosnintsikta qonqaykur, mandamientunkunata mana cäsur y imaypis mana adorayanqayki dioskunata adorarmi sïqa maldicionashqa kayanki.
29
«Canaánman yaykuyänaykipä Tayta Dios yanapayäshuptikim Gerizim jirkaman witsarkur jinchipa niyämunki Tayta Diosta cäsuyaptiki bendisayäshunaykipä kanqanta. Tsaynölla Ebal jirkaman witsarkur jinchipa niyämunki Tayta Diosta mana cäsur maldicionashqa kayänaykipä kanqanta.
30
Tsay ishkay jirkakunaqa Jordán mayu tsimpan rupay ullunan kaq läduchömi kaykan. Tsaynöllam tsay jirkakuna kaykan Gilgal marka tsimpanchö y More encina jachakuna cercanchö. Tsayqa Arabá pampachö täraq cananeo runakuna täyanqanchömi kaykan.
31
«Qamkunaqa Jordán mayuta päsayänaykipänam kaykäyanki. Päsayaptikim tsay nacionman yaykur täyänaykipä Tayta Diosnintsik yanapayäshunki. Tsaychö tärar
32
kanan junaq llapan willanqä mandamientunkunata y leyninkunata mana qonqaypa cumpliyanki».
← Chapter 10
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 32
Chapter 33
Chapter 34
Chapter 12 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25
26
27
28
29
30
31
32
33
34