bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Quechuan
/
Quechuan QXO (Biblia en Quechua del sur de Conchucos)
/
Deuteronomy 4
Deuteronomy 4
Quechuan QXO (Biblia en Quechua del sur de Conchucos)
← Chapter 3
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 32
Chapter 33
Chapter 34
Chapter 5 →
1
Tsaypita mastam Moisés nirqan: «Israel runakuna, yachatsinqä estatütukunata y leykunata shumaq wiyakuyay. Tsaykunata cumplirqa unay castantsikkuna criyiyanqan Tayta Dios entregayäshunaykipä kaq nacionman yaykurmi kushishqa kawayanki.
2
Yachatsinqäpitaqa juk leyllatapis ama jipiyankitsu ni imatapis yapayankitsu. Tsaypa rantinqa Tayta Diosnintsikpa mandamientunkunata llapanta cumpliyanki.
3
«Kikikikunam rikayarquyki Baal-peorchö Israel mayintsikkunata Tayta Dios castigar ushakätsinqanta. Tsaynö ushakätsirqan tsaychö täraq runakuna adorayanqan diosta adorayanqanpitam.
4
Peru qamkunam sïqa Tayta Diosnillantsikta adorayanqaykipita kananyaqpis kawaykäyankirä.
5
«Tayta Dios nimanqannöllam estatütunkunata y leyninkunata yachatsirqü täyänaykipä kaq nacionman char cäsurnin alli kawayänaykipä.
6
Tsaynö kaykaptinqa yachatsinqäkunata mana qonqaypa cumpliyay. Cumpliyaptikim wakin nacionchö täraq runakuna tantiyakuyanqa yachaq y tantiyakuq kayanqaykita. Yachatsinqä estatütukunata paykunapis musyarmi kushikur qamkunapä niyanqa: «¡Tsay nacionchö täraq runakuna shumaq tantiyakuqmi kaykäyan!»
7
Mastam Moisés nirqan: «Manam mayqan nacionpapis diosnin kantsu mañakuyaptin noqantsikpa Diosnintsiknö yanapananpä.
8
Wakin nación runakunapa leyninkunapis manam noqantsikpa leynintsikkunanötsu. Qamkunata kanan yachatsinqä leykunaqa paykunapa leyninkunapitapis mas allim.
9
Tsaynö kaykaptinqa cuidädutä qonqayankiman Tayta Dios imanö yanapamanqantsikta. Kawayanqaykiyaq qoyay qoyay mana qonqaypa tsurikikunatapis willkaykikunatapis willayanki».
10
«Horeb jirkachö Tayta Diospa puntanchö kaykashqam pay nimarqan: «Ninqäta wiyayänanpä llapan runakunata qorimuy. Wiyarmi yachakuyanqa kawayninchö qoyay qoyay mantsapakayämänanpä y tsurinkunatapis yachatsiyänanpä».
11
«Tsaymi jirka chakinman qorikaykur jirkapita ciëluyaq nina lunyaqta y yana pukutay pasaypa tsaparaykaqta rikayarqayki.
12
Nina lunyaykaq chawpinpita Tayta Dios parlapäyämushunqaykita wiyarpis kikintaqa manam rikayarqaykitsu.
13
Mana rikayaptikipis Tayta Dios qamkunawan pactuta rurarmi chunka mandamientukunata ishkay läja rumikunaman qellqarqan mana qonqaypa cumpliyänaykipä.
14
Tsaynöllam tsay junaq Tayta Dios nimarqan estatütunkunata y leyninkunata qamkunata shumaq yachatsinäpä. Paymi munan täyänaykipä kaq nacionchö tärar leyninkunata imaypis cumpliyänaykita.
15
«Horeb jirkachö nina lunyaykaqpita Tayta Dios parlapäyämushunqayki junaq kikin imanö kanqantapis manam rikayarqaykitsu. Tsaynö mana rikaykarqa cuidädutä
16
ima ïdulutapis rurayankiman. Ïduluta ama rurayankitsu ollqu niraqta, warmi niraqta,
17
ashma niraqta, pishqu niraqta,
18
qarachaypa puriq niraqta ni pescädu niraqtapis.
19
Tsaynölla rupayta, killata y qoyllurkunata rikar ama adorayankitsu. Tsaykunataqa manam adoranantsikpätsu Tayta Dios kamashqa, sinöqa maytsaychö täraq runakunata atsikyapänanpämi.
20
Egiptuchö pasaypa ñakayanqaykipitam Tayta Dios jipiyämushurquyki paypa herencian kayänaykipä. Tsaynöllam kanan herencian kayanki.
21
«Peru tsaynö kaykaptinpis Tayta Diosta rabyanätsiyanqaykipitam pay nimashqa Jordán mayuta manana päsar entregayäshunaykipä kaykaq nacionman manana yaykunäpä.
22
Tsaymi kayllachöna wanur Jordán mayuta manana päsashänatsu. Peru qamkunam sïqa tsay alli nacionchö täyänaykipä päsayanki.
23
«Tayta Dios ruranqan pactuta mana qonqaypa cumpliyanki. Ïduluta mana rurayänaykipä Tayta Dios nikaptinqa ima ïdulutapis ama rurayankitsu.
24
Tayta Diosqa payllata sirvinantsiktam munan. Mana cäsuqkunataqa nina rupar ushanqannömi ushakätsinqa.
25
«Chäyanqayki nacionchöna taykar tsurikikuna y willkaykikuna kaptin cuidädutä Tayta Dios ninqanta qonqaskir ïdulukunata ruraykur adorayankiman. Tsaynö rurarqa Tayta Diosnintsiktam pasaypa rabyatsiyanki.
26
«Kanan junaq qamkunata ninqätam ciëlupis y kay patsapis testïgu kaykan. Ninqäkunata mana cäsurqa Jordán mayu tsimpan nacionkunachö taykarmi ushakäyanki. Imaypis tsaychö täyänaykipa rantinqa manaräpis aykätam chipyaq ushakäyanki.
27
Tsaymi juklä nacionkunachö mashtakashqa kayänaykipä Tayta Dios qarquyäshuptiki wallkaqllana kawaykar quëdayanki.
28
Juklä nacionkunachö tarnam qerupita y rumipita rurayanqan ïdulukunata adorayanki. Tsay ïdulukunaqa manam rikayantsu ni wiyayantsu ni mikuyantsu ni jamayninpis manam kantsu.
29
«Peru llapan shonquykikunawan y voluntänikikunawan Tayta Diosta ashirmi sïqa tariyanki.
30
Tsay nacionkunachö pasaypa ñakar llakikurpis Tayta Diospa leyninkunata yarpar cäsuyaptikiqa
31
kuyapäkuq karmi dëjayäshunkitsu ni ushakätsiyäshunkitsu. Unay castantsikkunawan pactu ruranqantaqa mana qonqaypam llapanta cumplinqa.
32
«Runata kamanqanpita manam imaypis ni maychöpis qamkunata yanapayäshunqaykinöqa Tayta Dios pitapis yanapashqatsu.
33
Manam mayqan nación runakunapis nina lunyaykaqpita Tayta Dios parlamunqanta wiyar qamkunanö kawaykar quëdayashqatsu.
34
Musyanqantsiknöpis Egiptuchö pasaypa ñakaykashqam milagrukunata, guërrata y espantaypä kaqkunata rurar kikinpa kanantsikpä Tayta Diosnintsik jipimarquntsik. Pay yanapamanqantsiknöqa manam mayqan diospis may nación runakunatapis yanapashqatsu.
35
Tsaynö jipimanqantsikta rikarmi musyantsik Tayta Diosnillantsik rasunpa Dios kanqanta. Paypita masqa manam juk dios kantsu.
36
«Leyninkunata yachatsimarnintsikmi ciëlupita Tayta Dios parlapämarqantsik. Kay patsachöpis nina lunyaykaqpita parlapämanqantsiktam wiyarqantsik.
37
Unay castantsikkunata kuyarmi akramarnintsik poderninwan Egipto runakunapa poderninpita jipimarqantsik.
38
Qamkunapita mas kallpasapa runakunata paymi ushakätsishqa nacionninkuna qamkunapäna kananpä.
39
«Tsaynö kaykaptinqa imaypis ama qonqayaytsu Tayta Diosnillantsik ciëluchöpis y kay patsachöpis Dios kanqanta. Manam paypita mas juk diosqa kantsu.
40
Kanan yachatsinqä estatütukunata y mandamientukunata cumplirqa qamkunapis tsurikikunapis Tayta Dios entregashunaykipä kaq nacionchö imayyaqpis allim kawayanki».
41
Tsaypitam Jordán mayu tsimpan rupay yarqamunan kaq läduchö Moisés akrarqan kimsa markakunata runakuna amparakuyänanpä.
42
Tsay markakunam karqan pipis mana yarpaypa runa mayinta wanupakur amparakuyänanpä.
43
Tsay markakunam karqan Beser, Ramot y Golán. Beserqa Rubén trïbu runakuna täyanqan tsunyaq pampachömi karqan. Ramotqa Gad trïbu runakuna täyanqan Galaadchömi karqan. Golánnam Manasés trïbu runakuna täyanqan Basánchö karqan.
44
Kaychömi qellqashqa kaykan Israel mayinkunata Moisés yachatsinqankuna.
45
Paykunatam Tayta Diospa leyninkunata, estatütunkunata y mandamientunkunata yachatsirqan Egiptupita yarqur
46
Bet-peor lädunman chaykur. Bet-peor partiqa Jordán mayu tsimpan rupay yarqamunan läduchömi kaykan. Puntataqa tsay parti karqan amorreo runakunapa mandaqnin rey Sehónpa poderninchömi. Payqa Hesbón markachömi täkurqan. Payta y tsay partichö täraq runakunatam Egiptupita shamur Israel mayinkunawan Moisés vinciyarqan.
47
Tsaynöllam Basán nacionpa mandaqnin rey Ogtapis vinciyarqan. Amorreo runakunapa ishkay mandaqnin reykunata vinciskirmi nacionninkunaman Israel runakuna yaykuyarqan. Tsay nacionkunaqa Jordán mayu tsimpan rupay yarqamunan kaq läduchömi karqan.
48
Tsaymi Israel runakunapäna karqan Aroer marka lädunchö kaq Arnón mayupita hasta Sirión jirkayaq. Tsay jirkapa jukaq jutinmi Hermón.
49
Arabá pampapis Israel runakunapämi karqan hasta Arabá Lamaryaq. Tsay pampakunaqa Jordán mayu tsimpan rupay yarqamunan kaq läduchömi kaykan. Arabá Lamarpis Pisga niyanqan jirka chakinchömi kaykan.
← Chapter 3
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 32
Chapter 33
Chapter 34
Chapter 5 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25
26
27
28
29
30
31
32
33
34