bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Quechuan
/
Quechuan QXO (Biblia en Quechua del sur de Conchucos)
/
Judges 1
Judges 1
Quechuan QXO (Biblia en Quechua del sur de Conchucos)
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 2 →
1
Josué wanuskiptinnam Israel runakuna Tayta Diosta tapuyarqan: «Taytay, ¿mayqan trïbu runakunatä cananeo runakunawan puntata pelyaq aywayanqa?»
2
Tsaynö tapukuyaptinmi Tayta Dios nirqan: «Judá trïbu runakunam puntata aywayanqa. Cananeo runakunata vinciyänanpämi yanapashä».
3
Tsaymi Judá trïbu runakuna Simeón trïbu runakunata niyarqan: «Aypuyämanqan partichö kaykaq cananeo runakunata qarquyänäpä yanapaykayällämay. Tsaynöllam noqakunapis töcayäshunqayki partichö qarquyänaykipä yanapayäshayki». Tsaynö niyaptinmi Simeón trïbu runakuna paykunata yanapayänanpä aywayarqan.
4
Bezecman yaykur cananeo y ferezeo runakunawan pelyaptinmi vinciyänanpä Tayta Dios yanaparqan. Tsaymi chunka waranqa (10,000) runakunata wanutsiyarqan.
5
Tsaychö täraq cananeo y ferezeo runakunapa mandaqnin reymi Adonisedec karqan. Payta y paywan kaykaq runakunatapis llapantam vinciyarqan.
6
Adonisedec qeshpiykaqta taripaykurmi prësu tsariskir makinpa y chakinpa maman dëdunkunata roquskiyarqan.
7
Tsaymi rey Adonisedec nirqan: «Noqapis qanchis chunka (70) reykunapa chakinkunapa y makinkunapa maman dëdunkunatam roqurqä. Paykunam mësäpita shushunqan mikuyta mikullar kawayaq. Tsaynö ruranqäpitam noqatapis Tayta Dios kanan castigaykäman». Tsaypitanam rey Adonisedecta Jerusalénman apayarqan. Tsaychömi wanurqan.
8
Jerusalénman pelyaq aywarmi tsaychö täraq runakunata Judá trïbu runakuna llapanta espädawan wanuskatsir wayikunatapis rupatsir ushayarqan.
9
Tsaypitanam Neguevchö, jallqakunachö y Sefelachö täraq cananeo runakunawan pelyaq aywayarqan.
10
Tsaynöllam Hebrón markachö täraq cananeo runakunawan pelyaq aywayarqan. Tsay markapa unay jutinmi karqan Quiriat-arba. Tsaychömi Sesai runakunata, Ahimán runakunata y Talmai runakunata wanutsiyarqan.
11
Tsaypitanam Debirchö täraq runakunata atacayänanpä yaykuyarqan. Tsay markapa unay jutinmi Quiriat-sefer karqan.
12
Tsaymi Caleb nirqan: «Pipis tsay markaman pelyaq yaykur vinciq kaqtam warmin kananpä warmi tsurï Acsata entregashä».
13
Tsaynö niptinmi Cenazpa tsurin Otoniel tsay markaman yaykur tsaychö täraqkunata vincirqan. Tsaynö vinciskiptinmi Calebqa tsurin Acsata entregarqan warmin kananpa. Otonielqa Calebpa qepa wawqinpa tsurinmi karqan.
14
Papäninpa wayinpita yarquykarnam warmin Acsata Otoniel nirqan: «Papänikita rugakamuy chakrata rakipamänapä». Tsaymi ashnunpita Acsa yarpuskiptin papänin Caleb tapurqan: «Hïja, ¿imatatä munaykanki?»
15
Acsanam nirqan: «Papä, rugakulläshayki. Neguevchö chakrata rikatsimanqaykinölla pukyuyuq chakrakunatapis rikaykatsillämay». Tsaynö niptinmi jana läduchö pukyuyuq chakrata y ura läduchö pukyuyuq chakratapis papänin rikatsirqan.
16
Ceneo runakunam Moiséspa suegrun Hobabpita miraqkuna kayarqan. Paykunam Judá trïbuman juntakaskir Palmëra Markapita Judá trïbu runakuna chaskiyanqan desiertuman aywayarqan. Tsayqa Neguevchö Arad cercanchömi karqan. Tsaychömi Judá runakunawan juntuna täyarqan.
17
Tsaypitanam Judá trïbu runakuna Simeón trïbu runakunawan Sefatchö taykaq cananeo runakunata atacar chipyaq ushakätsiyarqan. Tsaymi tsay markapa jutin churayarqan Horma kananpä.
18
Tsaynöllam Gazachö, Ascalónchö y Ecrónchö täraq runakunata vinciskir chakrankunatapis qechuyarqan.
19
Tayta Dios yanapaptinmi Judá trïbu runakunaqa jallqakunachö täraq runakunata wanutsiyarqan. Peru costachö täraq runakunatam sïqa ushakätsiyta puëdiyarqantsu, fiërrupita rurashqa guërra carrëtankuna kaptin.
20
Moisés ninqannöllam Hebrón partita Calebta entregayarqan. Tsayman chaykurmi Anacpa kimsan tsurinkunapita miraqkunata qarqurqan.
21
Benjamín trïbu runakunaqa Jerusalénchö täraq jebuseo runakunata qarquyta manam puëdiyarqantsu. Tsaymi jebuseo runakunaqa kananyaqpis Benjamín trïbu runakunawan juntu Jerusalénchö taykäyan.
22
Tayta Dios yanapaptinmi Josépita miraq runakuna Bet-el markachö täraq runakunata atacar vinciyarqan.
23
Manarä atacarmi tsay markaman runakunata mandayarqan imanö kanqantapis rikapakayämunanpä. Puntataqa tsay markapa jutin karqan Luzmi.
24
Rikapakuqkuna chaykurmi tsay markapita yarqaykämuq juk runawan tinkuskir niyarqan: «Markaman maypa yaykuyänäpäpis rikatsiyämaptikiqa manam wanutsiyäshaykitsu».
25
Tsaynö niyaptinmi mayninpa yaykuyänanpäpis rikatsirqan. Tsaymi rikapakuqkuna kutiykur willayaptin Israel runakuna yaykuskir tsaychö täraqkunata espädankunawan llapanta wanutsiyarqan. Peru markaman imanö yaykuyänanpä rikatsiq runatawan castankunatam sïqa awniyanqannölla wanutsiyarqantsu.
26
Tsay runa heteo runakuna täyanqan kaqman aywakurmi juk mushuq markata shäriskatsir jutitsirqan Luz jutin kananpä. Kananyaqpis tsay markapa jutin tsayllam kaykan.
27
Manasés trïbu runakuna manam qarquyta puëdiyarqantsu Bet-seán, Taanac, Dor, Ibleam y Meguido markakunachö täraq runakunata y tsay markakunapa ñöpankunachö täraq runakunatapis. Tsaymi cananeo runakunaqa tsay kinray markakunachö taykäyan.
28
Tsaypita Israel runakuna atskaman mirarmi cananeo runakunata esclävutanö poderninchö tsararäyarqan. Peru qarquytam sïqa puëdiyarqantsu.
29
Efraín trïbu runakunapis manam qarquyta puëdiyarqantsu Gezerchö täraq cananeo runakunata. Tsaymi tsay cananeo runakuna Efraín trïbu runakunawan juntu taykäyan.
30
Zabulón trïbu runakunapis Quitrón y Naalal markakunachö täraq cananeo runakunata qarquyta mana puëdirmi esclävutanö poderninchö tsararäyarqan. Tsaymi cananeo runakuna y Zabulón trïbu runakunaqa juntu taykäyan.
31
Aser trïbu runakunapis Aco, Sidón, Ahlab, Aczib, Helba, Afec y Rehob markakunachö täraq runakunata manam qarquyta puëdiyarqantsu.
32
Tsaymi cananeo runakunawan juntu täyarqan.
33
Neftalí trïbu runakunapis Bet-semes y Bet-anat markakunachö täraq cananeo runakunata qarquyta mana puëdirmi esclävutanö poderninchö tsararäyarqan. Tsaymi cananeo runakuna y Neftalí trïbu runakuna juntu taykäyan.
34
Dan trïbu runakunataqa amorreo runakuna manam dëjayarqantsu costachö kaykaq herenciankunaman yaykuyänanta. Tsaymi jallqaman kutitsiyarqan tsaychö täkuyänanpä.
35
Tsaynöpam amorreo runakunaqa Heres, Ajalón y Saalbim markakunachö täyarqan. Qepatarämi Josépita miraq Efraín y Manasés trïbu runakuna poderyuq kar tsaychö taykaq amorreo runakunata esclävutanö tsararäyarqan.
36
Amorreo runakunapa lindërunqa witsarqan Acrabimpita qallaykur hasta Selapita mas janayaqmi.
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 2 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21