Judges 12

Quechuan QXO (Biblia en Quechua del sur de Conchucos)

← Chapter 11 Jump to: Chapter 13 →

1Amonita runakunata Jefté vinciskiptinmi Efraín trïbu runakuna Jordán mayuta päsar Zafón markaman chaykur Jeftéta niyarqan: «Amonita runakunawan pelyaq aywaykarqa ¿imanirtä yanapayänäpä willayämarquykitsu? ¡Kananmi sïqa wayikinintinta rupatsiyäshayki!»

2Tsaynö niyaptinmi Jefté nirqan: «Amonita runakunawan pasaypa rimanakur willakatsimuptïpis manam yanapamaq shäyämurquykitsu.

3Tsaymi wanuytapis mana mantsaypa kikilläkunana amonita runakunawan pelyaq aywayarqü. Tsay guërrachö Tayta Dios yanapayämaptinmi paykunata vinciyarqü. Qayaykätsiptïpis mana shamuykarqa ¿imanirtä atacayämaq shämuykäyanki?»

4Tsaynö niptinmi Efraín trïbu runakuna niyarqan: «Efraín trïbupita y Manasés trïbupita mana väliq kaqkunallam kayanki». Tsaynö nir manakaqman churayaptinmi Jeftéqa Galaad runakunata qoriykur Efraín trïbu runakunawan pelyar vinciyarqan.

5Tsaypitanam Jordán vädukunaman aywaykur Efraín trïbu runakunata tsapäyarqan. Tsaymi vädupa päsayta munar pipis chaptinqa tapuyarqan: «¿Efraín trïbupitaku kanki?» «Manam» niptinqa:

6«Mä, «shibolet» niy» niyarqan. Tsaynö niyarqan Efraín trïbu runakuna parlayta mana puëdir «shibolet» niyänanpa rantin «sibolet» niyanqanta musyarmi. Tsaymi pipis «sibolet» niptinqa juklla wanutsiyaq. Tsay pelyachömi chusku chunka ishkay waranqa (42,000) Efraín trïbu runakunata wanutsiyarqan.

7Joqta watam Israel runakunapa jueznin Jefté karqan. Wanuskiptinnam Galaad markanman pampayarqan.

8Jefté wanuskiptinnam Belén markapita Ibzánna Israel runakunapa jueznin karqan.

9Paypa tsurinkunam kimsa chunka (30) ollqu y kimsa chunka (30) warmi kayarqan. Llapan tsurinkunatam casaratsirqan juk lädu runakunawan. Qanchis watam Ibzánqa Israel runakunapa jueznin karqan.

10Ibzán wanuskiptinmi Belénman pampayarqan.

11Tsaypitanam Israel runakunapa jueznin karqan Zabulón trïbupita Elón. Payqa chunka watam Israel runakunapa jueznin karqan.

12Elón wanuskiptinmi unay trïbunkuna täyanqan Ajalón markaman pampayarqan.

13Tsaypitanam Israel runakunapa jueznin Abdón karqan. Payqa Piratónchö täraq Hilelpa tsurinmi karqan.

14Puwaq watam Abdónqa Israel runakunapa jueznin karqan. Paypa ollqu tsurinkunam chusku chunka (40) kayarqan. Willkankunanam kimsa chunka (30) kayarqan. Tsurinkunapis willkankunapis ashnun muntashqallam puriyaq.

15Abdón wanuskiptinmi Piratónman pampayarqan. Tsayqa Efraín jallqakunachömi karqan. Tsaychömi puntataqa amalecita runakuna täyarqan.

← Chapter 11 Jump to: Chapter 13 →