Judges 15

Quechuan QXO (Biblia en Quechua del sur de Conchucos)

← Chapter 14 Jump to: Chapter 16 →

1Tsaypita trïgu cosëcha witsanmi malta cabrata apakurkur warmin watukaq Sansón kutirqan. Chaykurmi suegrunta nirqan: «Papä, warmï watukaqmi shamurqü. Mä cuartunman yaykurishä». Tsaynö niptinmi suegrunqa yaykunanta mana munar

2nirqan: «Noqaqa tsurïta mana kuyar dëjanqaykitam yarparqü. Tsaymi jukwanna warmikita churarqü. Tsaynö kaptinpis qepa ñañan paypita mas kuyayllapämi kaykan. Mayor kaqpa rantin paywan täkuy».

3Tsaynö niptinmi Sansón nirqan: «Kananqa kikikikunam achäquita ashipäyämarquyki qamkunata y filisteo mayikikunata däñuta ruranäpä».

4Tsaypita aywakurmi kimsa pachak (300) atuqkunata tsariskir ishkay ishkay chupanpita shinrirqan. Tsaypitam chupanman watarqan aceitiwan ushmashqa ratashta.

5Tsay watanqan ratashkunaman tsariskatsirmi filisteo runakunapa chakrankunaman atuqkunata qarquskirqan. Tsaynömi chakrachö seganni trïgu kaykaqta, segashqa qoturaykaqta, üva chakrakunata y olïvuskunatapis kayarqan.

6Tsaynö kayanqanta rikaykurmi filisteo runakuna niyarqan: «¿Pitä kayta rurashqa?» Tsaymi niyarqan: «Timna runapa mashan Sansónmi rupatsishqa juk runawan wamranta suegrun churanqanpita». Tsaymi filisteo runakunaqa Sansónpa warminta papänintinta rupaskatsiyarqan.

7Tsayta musyaskirmi filisteo runakunata Sansón nirqan: «Tsaynö rurayanqaykipita qamkunata mana ushakätsiptïqa manam jutïpis jutïtsu kanqa».

8Tsaynö pasaypa rabyarmi tsaytsika filisteo runakunata wanutsirqan. Tsaypitam Etam qaqachö kaykaq machayman aywakurqan tsaychö tänanpä.

9Tsaymi filisteo runakuna Judá trïbu runakuna täyanqan partiman aywaykur campamentunkunata rurayarqan. Lehi marka lädunkunamannam churanakuyarqan Israel runakunata atacayänanpä.

10Tsaymi Judá trïbu runakuna tapuyarqan: «¿Imanirtä atacayämaq shäyämurquyki?» Filisteo runakunanam niyarqan: «Sansónta prësu tsariyänäpämi shayämurqü. Marka mayïkunata wanutsinqannömi kikintapis wanutsiyäshä».

11Tsaynö niptinmi kimsa waranqa (3,000) Judá trïbu runakuna Etam qaqachö kaykaq machayman aywayarqan. Chaykurmi Sansónta niyarqan: «¿Manaku musyanki filisteo runakuna mandamaqnintsik kayanqanta? ¿Imanirtä paykunata tsaynö rabyanätsirquyki?» Tsaynö niyaptinmi Sansón nirqan: «Paykuna rurayämanqannöllam noqapis rurarqü».

12Tsaymi Judá trïbu runakuna niyarqan: «Noqakuna shäyämurqü qamta prësu apaykur filisteo runakunaman entregayänäpämi». Sansónnam nirqan: «Prësu tsarimarpis ama wanutsiyämankitsu».

13Tsaynö niptinmi niyarqan: «Manam wanutsiyäshaykitsu, sinöqa filisteo runakunaman entregayänäpämi apayäshayki». Tsaynö nirmi ishkay mushuq waskawan wataskir pakaranqan machaypita Sansónta jipiyarqan.

14Lehi markaman chätsiyaptinmi filisteo runakuna pasaypa kushikur taripäyarqan. Tsaymi jinan höra Tayta Diospa Espïritun yanapaptin Sansónqa wataraykanqan waskatapis rupashqa jïlutanölla rachiskirqan.

15Tsaymi ashnupa quijädan manarä shumaq tsakir jitaraykaqta aptarkur waranqa (1,000) filisteo runakunata wanutsirqan.

16Tsaypitam nirqan: «Ashnupa quijädallanwanmi muntun muntun runakunata wanutsirqü. Ashnupa quijädallanwanmi waranqa runakunata wanutsirqü».

17Tsaynö nirmi aptaranqan quijädata jitaskirqan. Tsaypitam tsay partipa jutin Ramat-lehi.

18Filisteo runakunata wanuskatsirmi Sansónqa pasaypa yakunar Tayta Diosta mañakur nirqan: «¿Tsaytsika runakunata wanutsinäpä yanapaykämarku yakunaypita wanunäta munanki? Wanuyta ñakaykaqtam mana criyikuq runakuna tsariyämanqa».

19Tsaynö mañakuptinmi uchkupita yakuta Tayta Dios pashtatsimurqan. Tsayta upuskiptinmi Sansónpa valornin yapay yuriskirqan. Tsaypitam Lehichö kaykaq yaku pashtaqta kananyaq reqiyan En-hacore jutiwan.

20Ishkay chunka (20) watam Israel runakunapa jueznin Sansón karqan. Tsayqa karqan filisteo runakuna munayyuq kayanqan witsanmi.

← Chapter 14 Jump to: Chapter 16 →